Lidan irumu 1934 nágurahoua. Suisana meha nagübürigu, aba háguyun Timmins, lidan aban aüdü le ñein lubéi lasagahóua golu Ontario (Kanadá). Lidan irumu 1939 tagumesera núguchu aliihoun garüdia La Atalaya luma abasiiha lidoun hadamuridagun gefentiña luagu Heowá. Barǘ tumutina lidoun adamuridaguni úara hama bián níbugañanu hama gádürü namulenu. Murusun dan lárigiñe aba tabadiseirún núguchu.

Mínsiñeti meha le tadügübei núguchu lun núguchi, lau sun lira, bunagua taali meha núguchu tichügüwagu tasigiruba lan tubaruaguóun eseriwida lun Heowá. Seriwitu meha lun Heowá lau úaraguni íbini lidan latatiraha burí irumu bián-wein, dan meha le máhawa lubéi lun apurichihani Kanadá. Súnwandan meha tóuseruni núguchi lau ínsiñehabuni luma inebesei, lau sun wuriba lan lóuseruniwa. Lubuidun igaburi le tarufudubei, íderagua lumutina ani íderagua lumutiña giñe igaburi le níbugañanu hama namulenu lun gefén wamá luagu Heowá. Ma lubuidun aba lan lasansiruni núguchi lóuserun ábati latatirun óuserawa lau ínsiñeni.

Labadinagua irumu 1950, aba naweiyasuhan Newayóru lidoun aban adamurini le gíribei “Aumento de la Teocracia”. Aba nasubudirun saragu íbirigu lídangiñetiña sun ubóu ñein, aganba nuguya sügǘ buíduburiti hámagiñe íbirigu ha ñǘdünhaña tidan Leskuela Galaadü. Ínchaha lumutina le naganbubei lun naganwoundagüdüni neseriwidun lun Heowá. Saminaadina meha neseriwidun lun Heowá lidan dan dayarüti, ani lárigiñe le naganbubei busentimahadina meha nadügüni. Dan le nachülürünbei múnadoun aba nabuinchagüdünu gárada lun prekursoru nan. Aba tóunabunina sukursáli to Kanadáboun ani ínchahatana lun nabadiseirun furumiñe.  Ani ligía nadügübei, aba nabadiseirun weyu 1 lidan diisi-hati, irumu 1950. Aban hati lárigiñe aba prekursoru nan, ani aba hóunahanina eseriwida Kapuskasing, aban aüdü le dísebei saragu kilometuru tuéi waban.

Lidan irumu 1951, aba tínchahaniña sukursáli íbirigu ha ayanuhabaña faransu lun háguyun lóubawagu Kebekü, le meha ñein lubéi layanuhóua iñeñein le, ani murusunrügüñanu meha gefentiña gariñagaditina faransu luma inglesi, ligía nounahóunbei Rouyn. Ibidiñeti meha ni aban gürigia nun ñein, kei buga nariñaguni lidan lagumeseha abahüdaguni le, ábanrügüñoun meha gárada numa lau liri fulasu le ñeinba lubéi nachülüra. Lagumuhóun oura buiti láfuridun sun katei. Aba gamadagua nan luma Marcel, sügütina gádürü irumu eseriwida Kebekü lau saragu ugundani, ani lau lásügürün dan aba niridún kei prekursoru espechaliti.

Dan Kebekü nubéi agunbirahóuatina lun nidin lidan külase 26 tani Leskuela Galaadü, le adügǘbei South Lansing (Newayóru). Ma lanarime nugundan! Eresibihatina tídangiñe Leskuela Galaadü weyu 12 lidan bián-hati, irumu 1956, ábati nounahóun eseriwida lidoun ageiraü le subudiwabei guentó kei Gana, b le ñéingiñe lubéi lálüda weyu libiti Áfürika. Lubaragiñe meha nidin, mosu meha nagiribudun Kanadaoun lun nagurabahan lun taranserún nigaradan. Saminatina yebe fiúrügübei lan dimaasu nau agurabaha.

Rédeitina Toronto sedü hati agurabaha lun taranserún nigaradan lun gayara lan naweiyasuha. Lidan dan ligía, rédeitina hábiñe íbirigu Cripps. Anuhein meha aban hasaani gíritu Sheila, aba tínsiñedun nun saragu. Dan meha le namuriahaali lubéi yebe túhabu, ligía tachülürün nigaradan. Aba nafurieidun tuma Sheila lun Heowá luagu katei le, ábati wasaminarun lunti lan nidin eseriwida, ani nabürühaba lan tun lun warihini anhein wamarieidamémeba lubéi ámuñegü. Lau sun hénrengu lan, lau lásügürün dan arihatiwa luagu buidu lan le wanúadirubei.

Lárigiñe naweiyasuhan luagu aban hati tidan íngiini, tidan waporu to anahaboun ílagu luma tidan  awión, aba nachülürün Accra, lichügüdina ageiraü Gana. Iridúatina kei óunigiruti distritu, mosu meha naweiyasuha sun Gana, sun Kosu Marüfíli luma sun Togolandia (le gíribei Togo guentó). Aba tíchugun sukursáli aban karü nun lun gayaraabei lan naweiyasuhan. Liibe-agei dan nábugua naweiyasuha ani gúndaatinaha lau nabisidahaniñu níbirigu.

Sagü lagumuchagüle dimaasu, gadasintinaha lidan adamurini lánina sirkuitu. Úatu meha aban Muna luntu Adamurini wama, ábati hadügün íbirigu aban dibasein lautu banbú lau tubara yawara lun ladouragun wau luéi Weyu. Kei ua tan refüri ni adiligülei lun lareidahóun éigini, ábati háfaruniña íbirigu animaalugu dan le lachülüra lan oura lun hábougun lun lichugún éigini houn ha achülürübaña lidoun adamurini.

Anihein dan lasuseredun burí katei le adügübei lun wéherahan lidan burí adamurini le. Haritagua nágili le asuseredubei lun aban misionéru gíriti Herb Jennings. c Aban weyu, dan le líchuguña lan yanu, sódini aba liabin aban bulu bágasu éibaagueina, ábati lásügürün ligibugiñe luma habadinaguagiñe gürigia ha lídanbaña adamurini. Ibidiñeti lun animaalu ligía haliñounbei lan, ábati lerederun íbiri Herb maniñu, ibidiñega lun kaba lan ladüga. Lárigiñe, aba hárügüdüni gádürü íbirigu ha héretiña bágasu ligía, ábati hanügüni lárigoun sun añaha lan ha ñéinbaña apouhei háhabu.

Labadinagua dimaasu, aba burí níchuguni pikchá le gíribei La Sociedad del Nuevo Mundo en acción lidan burí aüdü le yarafabei. Aba nagüragun aban sidi harutu luagu bián wagabu o luagu bián tídibu wewe lun gayara lan níchuguni pikchá. Ma meha hagundan gürigia! Saragu hádangiñe furumiñe meha wéiyaasu harihin aban pikchá. Ábati hapouhani háhabu lau ugundani dan harihin gürigia lidan pikchá abadiseira. Íderagua lumutiña pikchá le lun harihini úarani le wádanbei wagía gefentiña lidan sun ubóu.

Lárigiñe násügürün bián irumu Áfürika, aba nibihin aban lubuidun chansi lun nidin lidan Adamurini le ñein lubéi hóundaragua íbirigu lídangiñetiña ámuñegueinarügü ageiraü le adügǘbei irumu 1958, uburugu Newayóru. Ma lueirin nugundan lau nadunragun tuma Sheila ñein! Teseriwiduña meha kei prekursora espechalitu Kebekü, ábati taweiyasuhan ñéingiñe lidoun adamurini ligía. Abürüharügütiwa meha gárada wámagua, keiti ábaya lan wadunragun aba namuriahani túhabu, ani ánhatu. Aba nabürühan lun íbiri Knorr d álügüdei anhein gayara lubéi  tidin Sheila tidan Leskuela Galaadü, lárigiñe lun lan hóunahanu eseriwida Áfürika, ani ánhati. Dan tachülürünbei Sheila Gana, aba wamarieidun Accra weyu 3 lidan diisi-hati, irumu 1959. Le linarün aban katei, sanditiwa labiniruñadiwa lan meha Heowá ladüga wíchuguni weseriwidun lun lidan furumiñeti lúgaaru lidan wabagari.

Lidan irumu 1961, aba wounahóun eseriwida Kamerún, le ñein lubéi lariñawagúa nun lun nídehan lun ñein tan aban iseri sukursáli. Gíbeti meha katei lun nadügüni ani kei aba lubéi giñe niridún lun narihin tau sukursáli, gíbeti meha katei lunti nafurendeiruni. Lidan irumu 1965, aba wíchugun fe dageinañoun lan Sheila, ani le linarün katei, hénrenguti woun wasaminarun luagu agübürigubadiwa lan. Dan le gidaali idiheri wawéi, aba wagundaarun lau gasaanibadiwa lan ani aba yebe waranseha lun wagiribudun Kanadaoun, sódini aba lasansirun katei.

Aba tagadeiragun Sheila. Aba lariñagun surusia woun aban lan yebe wügüri irahü. Íbini sügühali lan lóugiñe 50 irumu, mabulieidun wamagili le asuseredubei. Lau sun láuñadiwa lan saragu igarigu, aba werederun lidan dasi le wéiribei línsiñe woun.

Gabügürüguati meha heibaahóun íbirigu ha Kamerunbaña ladüga mádaragun hamá houngua lidoun katei lánina polítika. Ábatima lawosudun katei lidan lidaani abuduhani. Weyu 13 lidan seingü-hati, irumu 1970, aba lasuseredun aban katei le ueibei wanufudeda: aba lamahadun Urúei lun hapurichihan gefentiña luagu Heowá. Aba hagidarunu tubuidun wani sukursáli wawéi ani seingürügügili meha hati wau ayusuroun. Lídanrügü aban dimaasu aba habugún sun misionérugu lídangiñe ageiraü. Hénrenguti wígiruniña wábirigu ladüga wéiriti meha hínsiñe woun ani nidiheritiwa lau le gayaraabei lasuseredun houn.

Sísiñein hati wau tidan sukursáli to faransuboun, ani ñéingiñe nadügei sun niyaraati lun netenirun lun le hemegeirubei íbirigu ha Kamerunbaña. Lidan duusu-hati, lidan irumu ligía, aba wounahóun tidoun sukursáli to Niheriaboun, le ñéingiñe lubéi wagumesera ariha lau dasi le adügǘbei Kamerún. Buiti heresibiruniwa íbirigu niheriana ani buiti wásügürüni sun irumu le waubei eseriwida ñein.

Lidan irumu 1973, mosu meha wanúadirun aban katei hénrenguti. Barüharu meha Sheila saragu dan lau sandi. Dan meha Newayóru wabéi lidan aban adamurini, aba tariñagun nun ayahuaheina: “Siñá nun. Buchá nuagu ani sun oura nau asandira”. Barüharu meha lóugiñe 14 irumu eseriwida numa Áfürika. Wéiriti meha nupantan tau, lau sun lira, mosu meha wadügün fiu asansiruni. Lárigiñe wayanuhan luagu le gádanbaliwa dará wamoun wanigi lun Heowá lidan furíei, aba wanúadirun wagiribudun Kanadaoun, le ñeinba lubéi letenirúa lun tisandi Sheila. Gáriti woun saragu wígiruni weseriwidun lidan dan dayarüti.

Lárigiñe wachülürün Kanadá, aba nibihin wadagimanu luma aban binadu numada le meha gánibei aban bísinisi lánina talugurahóun karü nórute lóubawagun Toronto. Aba wáhayahan aban rumu, aba wagañeihan umegeguni yúsuaali, ítara liña gayara lan wáguyun madueihanga. Busentiwa meha mibe lan wámati hemenigiñu lunya weseriwidun lidan dan  dayarüti ámuñegü. Aba lasuseredun aban katei le magurabun wamuti.

Aba natatirun eseriwida sagü samudi lidan tábunawagun aban Luban Adamurini Norval (Ontario). Lau lásügürün dan, aba lamuriahóun numa lun neseriwidun kei íbiri le arihubei tau Luban Adamurini. Kei óuchadagueina tiña lan Sheila, aba wánharun lun iseri dasi le. Ligía wáguyunbei tidoun aban rumu to tídanboun Luban Adamurini, lidan sisi-hati irumu 1974. Ma meha lueirin wagundan lauya weseriwidun lidan dan dayarüti.

Ma lubuidun ábatima lan óuchadagueina tan Sheila. Bián irumu lárigiñe, aba lamuriahóun numa lun neseriwidun kei óunigiruti sirkuitu, ani aba wánharun lun dasi le. Aba wabisidahani damuriguaü burí le Manitobabei Kanadá, le subudiwabei luagu lanarime lidiliga ñein. Lau sun lira, “bachagu waña” meha lau ínsiñeni le harufudubei íbirigu ha lídanbaña damuriguaü burí ligía. Furendeitiwa mama lan fulasu le ñein lubéi weseriwida lun Heowá súdinitimabei, le súdinitimabei lun wíchuguni le buítimabei wámagiñegua le ñein wamuti.

Barühadiwa meha saragu irumu eseriwida kei óunigiruti sirkuitu, ani lidan irumu 1978, aba wagunbirahóun lun weseriwidun tidan Beteli to Kanadáboun. Murusun dan lárigiñe, aba nafurendeirun aban katei súdiniti ani le gáribei nun. Aba nagunbirahóun lun níchugun aban yanu le ábanti oura dimí lidan hererun faransuna lidan aban adamuridaguni espechaliti Montreal. Magurabuntina yebe metenirunbaña lan gürigia lun yanu le níchugubei. Ligíati, mosu meha líchugun aban íbiri lídangiñeti Sétanu le lánina Eseriwiduni adundehani nun lárigiñe níchuguni yanu. Lidan dan ligía, úati gunfuranda nani ka lan uagu líchiga adundehani nun, saminatina yebe gíchigadi nan yanu. Kei le aubei narihei, mama nunti lichugúniwa yanu. Le linarün aban katei, magundantina lau adundehani le líchugubei nun. Sanditina lúnrügüñein lan nichara letenira. Charatina ladüga maha nan lun adundehani ligía, netenirarüga lun le íchugubalin luma ligaburi líchuguni.

Fiu weyu lárigiñe, aba layanuhan aban íbiri le lílana Sétanu le Arihibei tau Sukursáli numa. Gunfuranda numuti luagu mabuidun lan nóunabun, ani ariñagatina lun luagu sarí nani le nadügübei. Lárigiñe, aba nidin amuriaha ferudun luma íbiri le íchugubei adundehani nun, ani feruduna lumutina lau sun lugundan. Arufudahati sügǘ le aban katei nun le lunbei mabulieidun nani, mosu lan ǘnabugu nan (Ari. 16:18). Furíeihadina lun Heowá saragu wéiyaasu luagu charati le meha nadügübei, ani aranseñu niña lun narihini ererehóuni kei aban katei buiti.

Barühadina lóugiñe 40 irumu eseriwida tidan Beteli to Kanadáboun, lúmagiñe irumu 1985 seriwihadina lidan Sétanu le Arihibei tau Sukursáli. Aba tounwen würi to hínsiñeboun nun, Sheila, to nani weiriou lidan bián-hati irumu 2021, ani wéiriti nálugun tuagu. Lanwoun lira, mabuidunhali nátuadi. Gama lumoun, kei weiri lubéi nuberesegun lidan neseriwidun lun Heowá, sügüti burí weyu, míchugunga au fe (Apur. 5:20). Inarüni, sügühadina saragu lénrengunga lidan nibagari, lau sun lira, wéiritimati ugundani le nasandirubei eseriwida lun Heowá. Ligíati, 70 irumu le naubei eseriwida lun Heowá lidan dan dayarüti, barühali giñe saragu ugundani nun. Amuriahatina luma Heowá hawagu sun nibureintiña lun híchuguni heseriwidun lun lidan furumiñeti lúgaaru, ladüga chouru numuti ítararügübei lan gébuna lan habagari ani ladügüba le lun gunda hamá.