1, 2. Ka uagu gunda wabéi wagía le lubúeingu Heowá? (Santiagu 1:​22-25).

 BUSENTI Heowá luma Lisaani le hínsiñebei lun lun gunda wamá. Ariñagati le abürühabalin Sálumu 119:2: “Fuleseiwatiña ha etenirubaña lun lugumadin [Heowá] áluaha haméi tau sun hanigi”. Ariñagati giñe Hesusu: “Fuleseiwatimatiña ha aganbubalin ani adüga haméi le lubeibei Bungiu!” (Luk. 11:28).

² Kei lubúeingu Heowá gúndaatiwa. Ka uagu? Gíbeti lébuna wagundan, aban lídangiñe le súdinitimabei aliiha wamanu Lererun Bungiu súnwandan, ani áfaaguatiwa lun wawinwanduni le wafurendeirubei tídangiñe (aliiha huméi Santiagu 1:​22-25).

3. Ka buiti wasagarubei dan le wagunfuliruni lilurudun Bungiu?

³ Ka buiti wasagarubei dan le wagunfuliruni lugumadin Bungiu? Luagu aban oubaü, gúndaagüda wamuti Heowá ani gúndaatiwa giñe lau wasubudiruni lira (Apur. 12:13). Luagu le aban oubaü, sigí wamuti adundehani le tídanbei Lererun Bungiu ani íderagua tumutiwa lun buídutima lan wanaagun woungua hama tílana waban luma lun buidu lan wamadagua hama wábirigu. Chóuruti ariha humaali lan hungua. Lanwoun lira, masufurirunbadiwa saragu kei hasufurirun ha maganbadibaña lun lugumadin Heowá. Úarati wasaminan luma le lariñagubei urúei Dawidi dan le layanuhanbei luagu lilurudun, lugumadin luma lasiadihan Heowá. Ligíati lariñagunbei: “Buiti nun lun nafalaruni” (Sal. 19:​7-11).

4. Ka uagu anihein lubéi dan hénrengu lan lun wawinwanduni le tariñagubei Lererun Bungiu?

 ⁴ Íbini ítara, lunti wasubudiruni mama lan súnwandan ménrengubei lan lafalarún le tariñagubei Lererun Bungiu. Íbini beresegu wamá saragu, lunti wasagarun dan lun waliihanu luma lun waturiahanu Bíbülia, lun gayaraabei lan gunfuranda wamani ka lan labusenrubei Heowá lun wadügüni. Ligíati, lidan aturiahani le, wakutihaba fiu adundehani le gayaraabei líderaguniwa lun waliihanu Bíbülia sagü weyu. Warihibei giñe kaba lan íderaguawa lun wasaminarun luagu le waliihabei luma lun wawinwanduni le wafurendeirubei.

DIREI HUMÁ DAN LUN HALIIHANU LERERUN BUNGIU

5. Ka idan dasi beresegu wamá?

⁵ Saragu wádangiñe ha lubúeingu Heowá beresegutiwa. Wéiriti weberesegun lidan ámuñegeinarügü dasi lidan weseriwidun lun Heowá. Kei hénpulu, hiibe-agei lubúeingu Heowá nadagimeintiña lun hanuriagun houngua luma lun hanuriahaniña tílana haban (1 Tim. 5:8). Saragu wábirigu hóunigiruñanu haduheñu ha sándibaña hama ha derebuguhaña. Ani sun wagía lunti giñe wóunigiruni wátuadi luma giñe wetenirun lun dasi le lídanbei damuriguaü. Ani anihein aban le súdinitimati: wapurichihan. Lau saragu beresegu, másiñati álügüdagua humá hungua: “Ka lunbei nadügüni lun nadireirun dan lun naliihanu Bíbülia luma lun nararamagun asaminara ani winwanéime le naliihabei?”.

6. Ka gayaraabei wadügüni lun mígirun wamani waliihanu Bíbülia? (Ariha humóun giñe iyawaü).

⁶ Waliihanu Bíbülia ligía aban “katei le buídubei” woun kei kristiánugu, ligíati lunti lubéi wachoururuni waliihañoun lan (Fili. 1:10). Gumesetu líburu to gíriboun Sálumu ariñageina gürigia lan ha gúndaabaña “lídanñein lilurudun [Heowá] hínsiñehabu, luagu lúrudu ligía hasaminara, áriebu wéyuagu” (Sal. 1:​1, 2). Furanguti lunti lan ladireirún dan lun taliihóun Lererun Bungiu. Kati dan buídutimabei lun taliihóun? Según lidaani kada gürigia. Lunti wadireiruni dan le lunbei gayara lan waliihanu Bíbülia sagü weyu. Ariñagati aban íbiri gíriti Viktor: “Hínsiñeti nun naliihanu  Bíbülia sagü binaafin. Mama hamuga hínsiñe lan nun saragiñe nan, nadügünbalin ladüga manimaniga lan oura ligía. Míbegili katei nichügüwagun ani gayaraati netenirun buidu lun le naliihabei”. Ligiaméme san asuseredubei hun? Álügüdagua humá hungua: “Lidan nikesin, ka dan buídutimabei nun lun naliihanu Bíbülia?”.

SAMINA HUMÁ LUAGU LE HALIIHABEI

7, 8. Afuranguagüda huméi lau aban hénpulu ka lan moun lubéi wadügüni dan le waliihanu Bíbülia.

⁷ Lárigiñe wasubudiruni kaba lan dan waliihoun Bíbülia, lunti waliihanu lau lámarun mama furesegueina. Aliihañahaadün san somu katei ani murusun dan lárigiñe maritagunhaadün ni murusun lídangiñe le haliihabei? Mabuidunti katei le dan le waliihanu Bíbülia. Másiñati saminaadiwa lan waliihan ítaga bérusu sagü weyu. Buídubei lun wadügün aransehani lun wibihini le wabusenrubei, áfaagua wagíame lun wagunfuliruni (1 Ko. 9:26). Gama lumoun, úati buídurügü lan lun wagumeserun aliihoun Bíbülia. Anhein busén wabéi wasagarun saragu buiti lídangiñe waliihanu, lunti wadügün amu katei.

⁸ Samina wamá luagu le. Huuti huya lun nadü. Íbini ítara, anhein áhuya saragu luagun, mabuidunbei lun. Lugundun anhein mararamun huya, lagadeirubei nadü. Ligíati, buídubei lun máhuyun lan saragu, ladüga ítara gayaraabei lachuuruni múa duna ladügüba le lun laweinamudun nadü. Ítarameme, moun lumuti waliihanu Bíbülia lau lóufudagun ladüga úabei gunfuranda wamani le waliihabei ani maritagun wamaalimeti lun wawinwanduni (Sant. 1:24).

9. Ka lunbei wadügüni anhein hechu wabéi aliihoun Bíbülia furesegueina?

⁹ Samina humá haliihañoun lan Bíbülia ani aba harihin luagu haliihañoun lan lau lóufudagun. Kaba hadüga? Áfaagua humá lun haliihanu hámarugueina ani ráramagua humá asaminara luagu le aliiha humaalibei o le sun liñabei haliihani. Anhein hénrengu lubéi hun, máhüchüra humá. Saminarügü humá hulili luagu le haliihabei. Gayaraati 1) haganwoundagüdüni dan le hadireirubei lun haturiahan  lun gadaani humá lun hararamagun asaminara o 2) mibe lan bérusu haliihan lun gayaraabei lan gadaani humá lun hararamagun asaminara luagu le haliihabei. Ariñagati Viktor, le buga uágubei wayanuhan lidan párafu 6: “Áfaaguatina lun maliihan nan saragu kapítulu, luéidügü aban kapítulu. Kei saragiñe nan lun naliihanu Lererun Bungiu, yusu numuti sun weyu lun nasaminarun luagu le naliihabei”. Mama átiriñein lan kapítulu waliihan súdinibei, le súdinibei wasagarun buiti lídangiñe le waliihabei (Sal. 119:97; ariha huméi rekuáduru  “Álügüdahani le lunbei líderaguniwa lun wararamagun asaminara”).

10. Afuranguagüda huméi lau aban hénpulu ida luba lan hawinwanduni le haliihabei tídangiñe Bíbülia (1 Tesalónikana 5:​17, 18).

¹⁰ Meberesenga ka lan dan haliiha, átiri lan dan lidura, áfaagua humá lun hawinwanduni le haliihabei. Sun aünha lan aliiha fiu fánreinti tídangiñe Lererun Bungiu, álügüdagua humá hungua: “Ida luba nawinwanduni ariñahani le uguñe weyu o yarafa madise?”. Kei hénpulu, samina humá haliihañein lan 1 Tesalónikana 5:​17, 18 (aliiha huméi). Lárigiñe, ráramagua humá murusun asaminara luagu ligaburi hafurieidun. Tídangiñe san sun hanigi hafurieida? Gabügürüguati san? Ka burí katei lunbei heteingiruni Bungiu luagu? Másiñati hasaminarun luagu ǘrüwa katei súdiniti le lunbei heteingiruni Heowá luagu. Anhaün araramagua asaminara luagu burí katei le, íbini murusunraü, mama aliiharügü hubóun Lererun Bungiu, hagumeseruba giñe awinwandei le hafurendeirubei. Anhein hadüga ligiaméme sagü weyu lau le haliihabei tídangiñe Bíbülia, lau lásügürün dan ábanbadün lubúein Heowá le buiti. Ánheinti anihein lubéi saragu katei lunti habuiduragüdüni lidan hibagari?

ÁFAAGUA HUMÁ LUN HIBIHINI LE HIYARAABEI ADÜGA

11. Ka uagu anihein lubéi burí dan lábürühan larüna gürigia dan le laliihanu Bíbülia? Ru humá aban hénpulu.

¹¹ Dan le haliihanu Bíbülia másiñati híchugun fe anihein lan saragu katei lunti hasansiruni lidan higaburi. Samina humá luagu sügǘ le. Aban weyu aba haliihan fiu bérusu luagu moun lumuti lan hímeiwa lan aban gürigia luéi aban (Sant. 2:​1-8). Kei harihin gayara lan habuiduragüdüni ligaburi hóuseruniña gürigia, aba hadügün fiu asansiruni. Buiti katei le! Laruganti, aba haliihan aban bérusu le ñein lubéi lariñaga lunti lan hóunigiruni le hariñagubei (Sant. 3:​1-12). Ábati híchugun fe anihein lan dan hariñagun dimurei le mabuidunti, ábati háfaagun lun hariñagun dimurei le buítimati ani le ruti dǘgüdaguaü. Lǘrüwan weyu, aba layanuhan bérusu le haliihabei luagu moun lumuti lan gamadagua humá luma  ubóu (Sant. 4:​4-12). Ábati hasaminarun lunti lan hanúadiruni pikchá le lunbei harihini luma luwuyeri músika le lunbei haganbahani. Ligadürün weyu, másiñati lebelurun maguraasuni hun ladüga harihini sun asansiruni le lunbei hadügüni.

12. Ka uagu moun lumuti lubéi lábürühan harüna dan le haliihañoun lan Bíbülia ani aba híchugun fe lunti lan hadügün asansiruni? (Ariha huméi giñe abürüdǘni).

¹² Mábürüha lan harüna anhaün ariha lunti lan hadügün fiu asansiruni. Arufudati lira haliihañoun lan Bíbülia lau aban lubuidun igaburi luma ǘnabuguni, harufuduña giñe háfaaguña lan lun labuidurun higaburi. a Haritagua huméi lunti lan gabügürügua lan láfaagun gürigia lun iserideina lan ligaburi (Kol. 3:10). Kaba íderaguaün lun gayaraabei lan hawinwanduni le tariñagubei Lererun Bungiu?

13. Ka adundehani gayaraabei lahuudun hun? (Ariha humóun giñe iyawaü).

¹³ Le lunbei líderagunün hadügüni asansiruni le hemegeirubei aban lárigiñe aban, mama lun hadügüni súngubei lidan aban (Ari. 11:2). Aningira aban adundehani: adüga humá aban lísüta lau burí katei le habusenrunbei habuiduragüdün lidan higaburi, anúadira humá aban o biama le lunbei hetenirun lun furumiñe ani ígira huméi le líbiri lubá amu dan. Halíagiñeba san hagumesera?

14. Kaba un hetenira furumiñe?

¹⁴ Furumiñe, teni humá lun le ménrenguntimabei o le mégeitima hubéi habuiduragüdün. Danme le subudi humaali halíagiñeba lan hagumesera, áluaha humá ariñahani tidan wani agumeiraguagüdüni. Gayaraati háluahan tidan Índice de las publicaciones Watch Tower o tidan Adundehani lun haturiahan gefentiña luagu Heowá. Furíei humá lun Heowá ani amuriaha  humá luma lun líchugun “lubuidun aritaguni hun” luma lun líderagunün lun hadügüni katei kei labusenruni (Fili. 2:13). Lárigiñe, winwan huméi le furendei humaalibei. Chóuruti danme lan harihini lubuidun lidin hun, línchahabadün katei le lun hubaruaguóun humá lidan amu asansiruni le lunbei hadügüni según lísüta to adüga humaaruboun.

ÍGIRA HUMÁ LUN TASANSIRUNI LERERUN BUNGIU HIBAGARI

15. Ida liña amu wamá wagía lubúeingu Heowá hawéi saragu gürigia ha aliihabarun Bíbülia? (1 Tesalónikana 2:13).

¹⁵ Añahein gürigia ariñagutiña aliiha hamaaru lan Bíbülia saragu wéiyaasu. Lau sun lira, afiñetiña san luagu le haliihabei tidan? Ígiraguagüdatiña san houngua lun tasansiruni habagari? Ma lirun, mítaran lan lidan liibe-agei kesi. Amu wagaburi wagía le lubúeingu Heowá, hawéi gürigia ha. Ítara kei kristiánugu ha lánina furumiñeti sígulu, ánhatiwa tun Lererun Bungiu “keisi luganute [ . . . ] ani inarüni luagu luganute lan Bungiu”. Ligíati wáfaagunbei lun wawinwanduni le wafurendeirubei tídangiñe (aliiha huméi 1 Tesalónikana 2:13).

16. Kaba íderaguawa lun wawinwanduni le tariñagubei Lererun Bungiu?

¹⁶ Mama súnwandan ménrengun lan waliihanu Bíbülia luma wawinwanduni le tariñagubei. Gayaraati madaani wamá lun waliirunu. Másiñati hechun wamá aliihoun lau lóufudagun darí lun mararamagun wamá asaminara luagu le waliihabei, o lábürühan lan warüna dan le warihini sun asansiruni le lunbei wadügüni. Meberesenga turobuli le úmabei wagagibudagua, líderagubadiwa Heowá lun wagagibudagun luma. Anha wamá lun lídehan, mámarügü lun waganbuni le tariñagubei Lererun ni lun wabulieiduni, lubaragiñe lira, winwan waméi. Chouru waméi eibu lan waliihanu Bíbülia ani adüga wameime le tariñagubei lidan wabagari, gúndaatimabadiwa (Sant. 1:25).