1, 2. Ka uagu buidu lubéi ligaburi ladügüniwa Heowá lun gúndaatima wamá dan gíchigadi wamá?

 ADÜGA lumutiwa Heowá lun gunda wamá dan le wíderaguniña amu (Adü. 20:35). Lau sun buidu lan wasandiragun woungua dan le lichugún aban idewesei woun, gúndaatimatiwa dan le wagía lan íchigei idewesei ligía. Le linarün aban katei, sagatiwa buiti ladüga ladügüniwa Heowá ítara. Ka uagu?

² Ítara liña ladügüniwa Heowá lau líchuguni ubafu wáhaburugun lun wagía guánarügü lan adüga lun gúndaatima wamá. Ánhawa áluaha chansi lun wíderaguniña amu, wéiritimabei ugundani wasandirun. Ma wéirigüda lumutu katei le wanigi? (Sal. 139:14).

3. Ka uagu tariñaga Bíbülia aban lan “Bungiu gúndaati” Heowá?

³ Ariñagatu Bíbülia gunda hamá ha gíchigadibaña, ligía gayara lubéi gunfuranda wamani ka lan uagu tariñaga Bíbülia, aban lan “Bungiu gúndaati” Heowá (1 Tim. 1:​11, TNM). Úati amu gíchigaditi luéi Heowá. Ítara kei meha lariñaguni apostolu Pábulu: “Ladüga lídangiñeti Bungiu awanhein lubéi, gabagari wagía” (Adü. 17:28). Le linarün aban katei, “sun buiti le ichugúbei woun” lúmagiñe Bungiu liabin (Sant. 1:17).

4. Kaba íderaguawa lun gúndaatima wamá?

⁴ Ka gayaraabei wadügüni anhein busén wabéi gúndaatima wamá dan le gíchigadi wamá? Warihiba lidan aturiahani le ida luba lan wáyeihani líchigadi Heowá (Efe. 5:1). Warihuba giñe ka lan lunbei wadügüni anhein sandí wabéi mebegi lan le wadügübei houn amu. Líderagubadiwa wasaminarun luagu katei le lun meferidirun wamani wagundan dan le wíderaguniña amu.

 ÁYEIHA WAMÉI LÍCHIGADI HEOWÁ

5. Ka burí katei le wemegeirubei líchugubei Heowá woun?

⁵ Ariha wamá fiu igaburi le ídanbei larufuda Heowá gíchigadi lan. Kei hénpulu, ru lumuti le wemegeirubei woun. Másiñati michu lubéi lan sun katei le wabusenrubei woun, lau sun lira aranseñu liña lun líchuguni létima wemegeirubei woun, kei burí éigini, daüguaü tuma aban muna lun wawinwandun (Sal. 4:8; Mat. 6:​31-33; 1 Tim. 6:​6-8). Ani madügün lumuti ladüga mosu lan ladügüni. Kati uagu ladügei?

6. Ka larufudahabei Matéu 6:​25, 26 woun?

⁶ Ladüga wínsiñe lun Heowá líchugunbalin le wemegeirubei woun. Akutiha waméi le lariñagubei Hesusu lidan Matéu 6:​25, 26 (aliiha huméi). Lidan burí bérusu le, yusu lumutiña Hesusu dunuru kei hénpulu, ariñagati: “Mábunagun haña malubahan, mareidun haméi alubahani lidan lagei”. Lárigiñe aba lariñagun: “Ruti Húguchi le siélubei éigini houn”. Ábati lálügüdahan: “Ma funagia gebegitimatün sügǘ hau dunuru?” Le labusenrunbei Hesusu lariñagun woun gebegitima wamá lun Heowá sügǘ hau animaalugu. Anhein góunigi lubaliña Heowá animaalugu, chouru wamuti luagu lóunigirubadiwa lan giñe. Kei Wáguchi lubéi Heowá ani hínsiñetiwa lun, ru lumuti le wemegeirubei woun (Sal. 145:16; Mat. 6:32).

7. Ida luba wáyeihani líchigadi Heowá? (Ariha humóun giñe iyawaü).

⁷ Ítara kei Heowá, hínsiñetiña giñe gürigia woun, ligía wíchugunbalin le hemegeirubei houn dan le gayara lan. Kei hénpulu, subuditi san somu íbiri le mégeibei éigini tuma daüguaü hun? Gayaraati layusurunün Heowá lun híchuguni le lemegeirubei íbiri ligía lun. Wagía lubúeingu Heowá subudiwatiwa kei gürigia gíchigaditiña dántima le mégeiwa lan. Samina wamá luagu le asuseredubei laganagua COVID-19. Ñéinñanu íbirigu ha íchugubaña éigini, daüguaü luma burí umegeguni houn ha mégeibalin. Lanwoun lira, ñéinñanu saragu íbirigu gíchigaditiña, óunahatiña seinsu tun lóundarun Heowá lun ladügǘn aransehani lun hiderawagún íbirigu lidan sun ubóu. Sun hagía adüga hamuti le lariñagubei Ebüréu 13:16: “Mabulieida humá hadügüni le buídubei, luma lun hafanreinruni húmati hadan ha mibihinbaña; lugundun ligía burí katei le aubei lagundaara Bungiu”.

8. Ka wayaraabei adüga seremei erei le líchugubei Heowá woun? (Filipuna 2:13).

 ⁸ Ruti Heowá erei woun. Mébehati lubafu Heowá ani hínsiñeti lun líderaguniña lubúeingu ha úaraguabaña lun (aliiha huméi Filipuna 2:13). Amuriahañahaadün san erei luma Heowá lun mábürühan humá lidoun aban óuchawaguni, lun hawandun aban turobuli hénrenguti, o lun hetenirun lun somu dasi lánina sagü weyu? Dan le lóunabunbalin Heowá hafurieidun lau líchuguni erei le hemegeirubei hun, chóuruti sandigua humá hungua kei profeta Isaíasi, le abürüdübalin dimurei burí le: “Ruti erei lun le buchaalibei uagu, ru ligía lanwoun lere le uánimabei” (Isa. 40:29).

9. Ida luba wáyeihani líchigadi Heowá? (Ariha humóun giñe iyawaü).

⁹ Mítarantiwa kei Heowá, mabafutiwa lun wíchugun erei houn gürigia kei ladügüni. Íbini ítara, gayaraati wáyeihani líchigadi lau wayusuruni were lun wíderaguniña amu. Kei hénpulu, anhein derebuguhali lubéi aban íbiri o sándiñein lan, gayaraati widin agañeihei somu katei le lemegeirubei o wíderaguni lau wadügün somu fisiu lúbiñe. Anhein gayara lubéi wadügüni, gayaraati wíchaagun woungua lun wídehan lidan tarumadahóun o taransehóun Luban Adamuridaguni. Dan le wayusuruni were lun wídehan lidan dasi burí le, wíderaguñanu wábirigu lau lira.

10. Ida luba wayusuruni le wariñagubei lun wíchugun erei houn amu?

¹⁰ Mabulieida waméi gabafu lan dimurei ani gayaraati wayusuruni lun wíchugun erei houn amu. Subuditün san somu gürigia hun le mégeibei dǘgüdaguaü luma lun laganbun somu dimurei le arufuduti ínsiñeni? Anhein ítara liña lubéi, ma buídubei hamuga lun híderaguni? Gayaraati san hidin arihei, hagúarun lun, o hóunahan aban tiraüraü gárada lun? Mama mosu hariñagun dimurei burí le hanarimeti laranserun, le súdinibei lun tídangiñe lan hanigi láfuacha dimurei burí le. Láurügü wariñagun fiu dimurei lau ínsiñeni houn gürigia, gayaraati wíderaguniña lun úaraguameme hamá lun Heowá luma lun hárügüdüni erei le hemegeirubei lun hasigirun habaruaguóun (Ari. 12:25; Efe. 4:29).

11. Ka ladügübei Heowá lau lichú lau?

¹¹ Ruti Heowá lichú aau woun. Abürühati disipulu Santiagu: “Anhein megei lubéi aban hídangiñe lichú aau, amuriahalá luma Bungiu”. Ariñagati giñe: “Ladüga mánginti ani ruti lau areini houn súngubei” (Sant. 1:5). Kei le aubei lariñagei bérusu le, meredeti Heowá lau lichú lau, kei gíchigadi lubéi, ru lumuti giñe houn amu. Ani madeinhanti, masandiraguagüdün lawa woungua wuriba dan le wamuriahani ladundehan. Ínchaharügü lumutiwa lun wamuriahani lichú lau lau sun were (Ari. 2:​1-6).

12. Ka chansi wámabei lun warufudahani le subudi wamaalibei?

 ¹² Agia wagía? Gayaraati san wáyeihani Heowá lau warufudahani le furendei wamaalibei houn amu? (Sal. 32:8). Anha! Gachansintiwa saragu lun wadügüni. Kei hénpulu, arufudahatiwa houn ha iserigiñabaña ida luba lan hapurichihan. Luagu amu oubaü, arufudahatiña wéiyaaña lidan afiñeni lau gurasu houn ídehatiña lidan damuriguaü luma houn íbirigu ha badiseihaña lun hasubudiruni ida luba lan hadügüni hadasin lidan damuriguaü. Añahein saragu íbirigu ha subudihabútiña luáguti tábunawagun luma taransehóun muna, arufudahatiña íbirigu ha houn amu íbirigu lun hafurendeirun awadigimarida tidan Luban Wadamuridagun luma tidan amu burí muna to eseriwiduboun lun lawanserawagüdün dasi lánina Larúeihan Bungiu.

13. Ida luba wafalaruni hénpulu le líchugubei Heowá dan le warufudahan houn amu?

¹³ Lunti wafalaruni hénpulu le líchugubei Heowá dan le warufudahan houn amu. Kei le aubei warihei, mánginti lau lichú lau. Busentiwa giñe warufudahani le subudi wamaalibei houn ha aranseñabaña lun hafurendeirun. Manufudetiwa warufudahani le furendei wamaalibei, manufude wagía lagidarun ubaraü wawéi, ani masaminaruntiwa, mariñagun wagía: “Furendei lan lábugua, marufudahóunti meha giñe nun!” Magaburi hamuti lubúeingu Heowá igaburi burí le. Gúndaatiwa lau warufudahani le subudi wamaalibei, ani mámarügüñein ligía wadüga, deregeguatiwa woungua sunsuinagubei lun dasi lánina arufudahani (1 Tesa. 2:8). Lárigiñe arufudahadiwa lan houn buidu, ítara luba wachoururuni aranseeña lan lun harufudahani le furendei hamaalibei houn amu (2 Tim. 2:​1, 2). Ánhawa gíchigadi lídangiñe wasubudin, lachuuduba wau kéigubeirügü hau ha afurendeirubaña ani ladügüba le lun gunda wamá.

ANHEIN GENEGE LUBÉI WOUN MEBEGI LAN LE WADÜGÜBEI

14. Ka burí katei asuseredubei dan le wadügün somu katei hawagu amu?

¹⁴ Lidan saragu kesi, dan le wadügün somu katei hawagu amu, hawagutima wábirigu, arufuda hamuti gebegi lan houn lau heteingiruniwa. Másiñati harufuduni heteingiradi lau hóunahan aban tiraüraü gárada woun gayaraati giñe harufuduni woun lidan amu igaburi (Kol. 3:15). Adügati geteingiradi le harufudubei wábirigu lun gúndaatima wamá.

15. Ka lunbei waritaguni dan le meteingirún wamá luagu le wadügübei?

¹⁵ Gabaroun waméi mama lan sun gürigia lun heteingiruni le wadügübei hawagu. Másiñati wíchugun lídangiñe wadaani, were, waseinsun lun wíderagun aban gürigia, lárigiñe aba warihin mebegi lan le wadügübei lun. Lidan kesi ítarati, ka gayaraabei líderaguniwa lun meferidirun wamani wagundan? Haritagua waméi le lariñagubei Adügaü 20:​35, le ídangiñebei lasagarúa aturiahani le. Mama luagu le hadügübei amu dipeni lan wagundan; lau sun lira, gayaraagili wíchugun lau ugundani lau sun genege lan mebegi lan le wadügübei houn amu. Ariha wamá fiu adundehani le gayaraabei líderaguniwa.

16. Kaba un wetenira?

¹⁶ Ru huméi hisaminan luagun háyeihañein lan Heowá dan le híchugun. Ruti Heowá katei buiti houn sun gürigia, gebegi lan yebe houn o mebegi lan (Mat. 5:​43-48). Füramaseti Heowá houn lubúeingu ánhaña lan íchiga ‘magurabahanga ni kata leweñegua, ítara luba weiri lan hafayeiruáha’ (Luk. 6:35). Mábürüha lan lubeiti harüna anhaün ariha meteingirun hamanün gürigia luagu le hadügübei hawagu. Haritagua huméi súnwandan lan líchugun Heowá  hafayeiruaha ha adügübaña katei buiti hawagu amu, ladüga ruti hafayeiruaha ha íchugubaña “lau ugundani” (2 Ko. 9:7; Ari. 19:17).

17. Kaba íderaguawa lun wáyeihani Heowá? (Lúkasi 14:​12-14).

¹⁷ Amu katei le lunbei líderagunün áyeihei Heowá, adundehani le wadarirubei lidan Lúkasi 14:​12-14 (aliiha huméi). Inarüni mariban lan lun warufudun areini luma gíchigadi houn gürigia ha gayaraabei hagiribudagüdüni fulesei ligía woun. Ánhawati íchiga fe lǘhadiwa lan adüga fulesei ladüga aguraba wamá weresibirun somu katei leweñegua? Lidan kesi ítarati, áfaagua wamá lun wafalaruni adundehani le líchugubei Hesusu: lun lan wíchugun houn ha siñabei hagiribudagüdüni fulesei ligía woun. Anhein wadüga, gúndaabadiwa ladüga wáyeihañein lan Heowá. Lanwoun lira, ánhawa magurabahan afayeiruahaü, súnwandan wíchuguba lau ugundani íbini meteingirúniwa wamá.

18. Kaba íderaguawa lun masaminarun wamá wuriba hawagu amu?

¹⁸ Masaminara humá wuriba hawagu amu (1 Ko. 13:7). Ánhawa íderagua somu gürigia ani meteingirun hamutiwa, gayaraati wálügüdagun woungua: “Mebegiti funa san le wadügübei houn, o bulíei hamá funa heteingiruniwa?” O másiñati anihein lan amu katei le adügübei lun móunabun hamá kei le aubei wagurabei. Másiñati gunda hamá lau le wadügübei hawagu, lau sun lira, gayaraati hénrengu lan houn hariñaguni le hasandirubei. Gayaraati nibusigari hamá dan le hibihin ídemuei, dántima le gídehadi hamá meha ani guentó siñá hadügüni. Lidan furumiñeguarügü kesi, líderagubadiwa ínsiñeni lun masaminarun wamá wuriba hawagu wábirigu, lubaragiñe lira wasigiruba íchiga lau ugundani (Efe. 4:2).

19, 20. Ka uagu buidu lubéi lun gagurabaguadi wamá? (Ariha humóun giñe iyawaü).

¹⁹ Gaguraasun humá. Ayanuhati urúei Salomón luagu gíchigadi, ariñagati: “Chüboun beigan fein dúnarugun; tagiribudayaba bun dan luagun dan” (Apur. 11:1). Arufudahati dimurei burí le woun luagu gayara lan heteingiruniwa gürigia “dan luagun dan”. Ariha wamá aban kesi le arufudubalin katei le.

 ²⁰ Fiu irumu lubaragiñe le, abürühatu aban lani óunigiruti sirkuitu weiriou aban gárada tun aban íbiri to málügilibei lúmagiñe tabadiseirún, le ñein lubéi tinchahóun lun úaraguameme tan lun Heowá. Widü irumu lárigiñe, ligía tóunabunu íbiri to unboun tabürüdǘwa gárada, ariñagatu: “Nabürühanbei bun lun nabahüdaha bun ida liña lan bíderagunina sun dan le míchugunga buguya fe”. Ariñagatu giñe: “Lau ínsiñeni babürüdoun gárada tuguya nun, létima achülürübei tidoun nanigi bérusu le tídangiñeti Bíbülia, ani mabulieidun numuti”. a Lárigiñe tabahüdahani lídangiñe turobuli le úmabei tagagibudagua, aba tariñagun: “Anihein dan busén nan nígiruni inarüni luma neseriwidun lun Heowá. Lau sun lira, íderagua lumutina bérusu le babürüdübei tidan gárada lun nasigirun nubaruaguóun. Lidan widü irumu le sügühalibei, bigaradantima iñuragubalina”. Samina humá luagu lanarime ugundani le tasandirubei lani óunigiruti sirkuitu weiriou dan taliihanbarun gárada to. Anhein adüga wabéi buiti hawagu amu gayaraabei harufuduni heteingiradi “dan luagun dan”.

21. Ka uagu gebegi lubéi áfaaguni le wadügübei lun wasigirun áyeihei líchigadi Heowá?

²¹ Kei le aubei warihei, adüga lumutiwa Heowá lau aban lubuidun igaburi: gúndaatimatiwa dan le wíchugun sügǘ lau dan le weresibirun. Buiti wasandiragun woungua dan le gayara lan wíderaguniña wábirigu ani gúndaatiwa dan le geteingiradi hamá. Meberesenga anhein geteingiradi habéi o meteingiradi hamá, gayaraati gunda wamá ladüga wadügüñein le richabei. Meberesenga átirihali lan wíchugun, haritagua waméi le lariñagubei 2 Krónikasi 25:9 súnwandan, gayaraati “líchugun [Heowá] sügǘ lau lira bun”. Úati ni aban gíchigaditi kei Heowá! Ani úati ni kata le gayaraabei lagundaragüdüniwa kei afayeiruahaü le lunbei líchuguni Heowá woun. Ligíati, áfaagua wamá lun wáyeihani líchigadi Wáguchi Bungiu Heowá le siélubei.