1. Kaba ladüga Hesusu yarafa madise?

 WAWINWANDUÑA lidan lagumuhóun dan. Yarafa madise laguseragüdübaña Hesusu sun gürigia ha awinwandubaña ubouagu. Ida liña wasubudiruni chülümémeeli lan dan ligía? Ladüga ruti meha Hesusu aban profesía houn lani disipulugu le lunbei leseriwidun kei “liseinin” larúeihaña lan keisi urúei marihúaditi lidan lagumuhóun dan, le lánina “lagumuchagüle ubóu” (Mat. 24:3). Gayaraati waliihani profesía le lidan kapítulu 24 luma 25 tidan liliburun Matéu, darí wamuti giñe lidan kapítulu 13 tidan liliburun Márükosu luma lidan kapítulu 21 tidan liliburun Lúkasi.

2. Kaba wariha lidan aturiahani le, ani ka uagu?

² Lun líderaguniwa Hesusu lun aranseñu wamá, abahüdaguati ǘrüwa sügǘ le eseriwidubei woun kei eweridihani: 1) abahüdaguni hawaguti mudún hama gábara, 2) abahüdaguni hawaguti diisi nibureintiña luma 3) abahüdaguni luáguti talentu (fiádürü). Kada aban lídangiñe abahüdaguni le, líderagubadiwa lun gunfuranda wamani gabaroun lubéi lan Hesusu ligaburi hóuserun gürigia danme le laguseragüdüniña. Wakutihaali ariñahani le ani wariha kaba lan wafurendeira lídangiñe. Gumese wamá lau abahüdaguni hawaguti mudún hama gábara.

MUDÚN HAMA GÁBARA

3. Ídaba laguseragüdaña Hesusu gürigia?

³ Arufudahati Hesusu danme lan le lachülürün dan lun laguseragüdüniña gürigia, gabaroun lubéi anhein anha habéi lun uganu buiti, luma, anhein ru habéi ídemuei houn kristiánugu anuadirúaaña (Mat. 25:​31-46). Ídaba lariha Hesusu anhein óusera habéi gürigia kei mudún o kei gábara? Ladügübei Hesusu lira, lidan lidaani “saragu asufuriruni”, lubaragiñeraü Arümahedón (Mat. 24:21). Ítara kei lafanreinraguniña hóuniri mudún mudún hawéi gábara, lafanreinragubaña Hesusu ha  íderagubaliña kristiánugu anuadirúaaña hádangiñe ha míchubaña ídemuei houn.

4. Kei le aubei lariñagei Isaíasi 11:​3, 4, ka uagu chouru wabalin laguseragüdübaña lan Hesusu gürigia lau irichaü? (Ariha humóun giñe iyawaü).

⁴ Írida laali Heowá Hesusu kei aguseragüdüti, ani ariñagatu Bíbülia laguseragüdüba lan Hesusu lau irichaü (aliiha huméi Isaíasi 11:​3, 4). Leteniruba Hesusu buidu lun le lasaminarubei gürigia, lun le lariñagubei luma lun le ladügübei, lúmati ida liña lan lóuseruniña líbirigu Kristu (Mat. 12:​36, 37; 25:40). Lasubudirubei Hesusu kátaña lan íderagubaliña kristiánugu anuadirúaaña lidan dasi le hadügübei. a Dántima le wáfuridun apurichiha warufuda luagu wíderaguñanu lan. Sun ha ídehabaña harihúba kei gürigia ha “richaguabaña” ani gachansinbaña lun hawinwandun lun súnwandan ya ubouagu (Mat. 25:46; Aruf. 7:​16, 17). Ma lubuidun afayeiruahaü le lunbei habihini gürigia ha úaraguabaña! Ánhaña úaraguameme lidan lidaani saragu asufuriruni luma lárigiñe, lerederuba hiri “tidan líburu to lánina ibagari” (Aruf. 20:15).

5. Ka larufudahabei abahüdaguni hawaguti mudún hama gábara woun, ani kátaña lúnbaña híchugun arigei?

⁵ Arufuda humá úaragua humá. Hóuntima gürigia ha hemenigibaña hawinwandun lun súnwandan ya ubouagu lahuuda abahüdaguni hawaguti mudún hama gábara. Arufuda hamuti úaragua hamá, mámarügü lau híchuguni hídehan houn líbirigu Kristu lidan apurichihani, arufuda hamuti giñe lau hafalaruni ladundehan musu úaraguati (Mat. 24:45). Íbini ha lúnbaña hawinwandun sielu lunti giñe híchugun arigei lun le labusenrunbei Hesusu lafuranguagüdün lidan abahüdaguni le. Ka uagu? Ladüga leteniruña giñe Hesusu lun le hadügübei, lun le hasaminarubei luma le hariñagubei. Ligíati, lunti lubéi harufuduni luagu úaragua hamá. Barǘ lumutiwa le lidoun libiaman abahüdaguni, le gayaraabei waliihani lidan kapítulu 25 tidan liliburun Matéu, dariwati eweridihani furanguti houn kristiánugu anuadirúaaña ñein. Wabaruaguóun wamá lidoun abahüdaguni hawaguti 10 nibureintiña.

DIISI NIBUREINTIÑA

6. Ida liña harufudun seingü nibureintiña ha aranseñuhaña lan? (Matéu 25:​6-10).

⁶ Lidan sügǘ le, ayanuhati Hesusu hawagu 10 nibureintiña ha ñǘdünbaña adunragua luma aban adari (Mat. 25:​1-4). Sun hagía busentiña meha hebelurun luma adari lidoun fedu lánina maríei. Ariñagati Hesusu añahein lan seingü hádangiñe aransetiña ani añahein lan seingü maranseruntiña. Ha aransebaña agaradahañu haña lubá adari sétiñu lun hagurabuni íbini lachülürün amidi áriebu. Ligía hanügünbei halanpun ani gálagüda haméi lun harugounga lan hau. Lanwoun lira, barütiña amu budéin lau agülei luéidügü ladarasaragun adari (aliiha huméi Matéu 25:​6-10). Dan le lachülürünbei adari, aba hebelurun nibureintiña ha aransebaña úara luma lidoun fedu lánina maríei. Genegeguati le luma le lunbei lasuseredun houn kristiánugu anuadirúaaña. Ha erederutiña agagudúañu darí lachülürün Hesusu le adari, gayaraabei hebelurun luma lidoun Larúeihan Bungiu sielu (Aruf. 7:​1-3). b Anti seingü nibureintiña ha maranserunbaña?

7. Ka asuseredubei houn nibureintiña ha maranserunbaña, ani ka uagu?

⁷ Mítarantiña seingü nibureintiña maranseruntiña ha kei ha aransebaña, lugundun maranseruntiña seingü nibureintiña ha lubá  lachülürün adari. Según abahüdaguni le, dan le haganbunbei chülümémeeli lan adari, ligía híchugun fe ñegumémeeli lan halanpun. Kei manügün habéi amu agülei hámagua, mosu houdin agañeiha lun gayara lan habuinchagüdüni lagei halanpun. Dan le lachülürünbei adari magiribudungiña. “Hati aransebaña, aba hebelurun luma [adari] lidoun maríei, aba ladourúniwa bena” (Mat. 25:10). Dan le hagiribudunbei nibureintiña ha maranserunbaña, aba hálugun hebelurun lidoun maríei, lariñaga adari houn: “Ninarün hau, ibidiñetün nun” (Mat. 25:​11, 12). Maranseruntiña buidu lun hagurabuni adari sun dan le mégeiwabei. Ka larufudahabei sügǘ le houn kristiánugu anuadirúaaña?

8, 9. Ka larufudahabei abahüdaguni hawaguti 10 nibureintiña houn kristiánugu anuadirúaaña? (Ariha humóun giñe iyawaü luma dibuhu).

⁸ Arufuda humá agagudúañu hiña lan. Mama meha lariñaguña Hesusu ñéinbaña lan bián sétanu hau kristiánugu anuadirúaaña: aban hau ha aransetiña luma aban hau ha maranseruntiña lidan lagumuhóun dan le. Le meha labusenrunbei lariñagun houn kristiánugu anuadirúaaña ánhaña lan maranserun lun hawandun lau úaraguni darí lagumuhóun, meresibirun habéi lan hafayeiruaha (Huan 14:​3, 4). Wéiriti lisudinin katei le! Meberesenga halíaba lan wawinwanda, sielu lan yebe o ya lan ubouagu, sun wagía lunti wíchugun arigei lun sügǘ hawaguti 10 nibureintiña: mosu agagudúañu wamá ani aranseñu lun wawandun darí lagumuhóun (Mat. 24:13).

⁹ Kei le aubei warihei, lidan abahüdaguni le labahüdahabei Hesusu hawaguti 10 nibureintiña, arufuda lumuti súdini lan lun aranseñu wamá luma lun agagudúañu wamá súnwandan. Murusun dan lárigiñe, aba labahüdahani Hesusu abahüdaguni luáguti talentu, le ñein lubéi larufuda súdini lan lun benefa wamá.

TALENTU O FIÁDÜRÜ

10. Ida liña harufudun bián musu ha luagu úaragua hamá? (Matéu 25:​19-23).

¹⁰ Lidan sügǘ le, ayanuhati Hesusu hawagu bián musu ha úaraguabaña lun hayubudiri luma luagu le múaragunbei (Mat. 25:​14-18).  Lubaragiñe laweiyasuhan iyubudiri, ruti saragu seinsu houn lun hawadigimariduni. Bián hádangiñe arufuda hamuti úaragua hamá lau háfaagun luma lau hawadigimaridun lun hagañeirun lanwoun lun hayubudiri. Dan le lagiribudunbei iyubudiri, bián hádangiñe musu gánwoungüda hamaali seinsu le lígirubei hayubudiri houn. Ábati lariñagun iyubudiri houn buidu lan hadüga ani ariñaga ligía houn kada aban hádangiñe: “Keimoun, gundaabá úara numa” (aliiha huméi Matéu 25:​19-23). Kati ladügübei háürüwan musu lau seinsu le lígirubei liyubudiri lun?

11. Ka asuseredubei lun musu móuniti le, ani ka uagu?

¹¹ Ruti yebe iyubudiri seinsu lun háürüwan musu lun giñe laganwoundagüdüni. Gama lumoun, “móuniti” musu le, aba lachigin aban huyu aba lábununi seinsu. Dan le lagiribudunbei iyubudiri aba lagiribudagüdüni musu liseinsun lun, ítara kei leresibiruni. Lubaragiñe hamuga lamuriahan ferudun luma liyubudiri luagu le ladügübei, ábarüga larufudun aba luriban igaburi, lariñaga lun: “Niyubudiri, subudigubei numuti luagu wügüri ban héreguti”. Kati asuseredubei? Ábati ladeinhan liyubudiri lun, gidaléi seinsu luéi ani aba labuguni lúbiñegiñe (Mat. 25:​24, 26-30).

12. Kátaña san bián musu úaraguatiña ha uágubaña labahüdaha Hesusu?

¹² Dan le labahüdagunbei Hesusu hawagu bián musu úaraguatiña ha, layanuhaña hawagu kristiánugu anuadirúaaña ha úaraguabaña. Lariñaguña Hesusu le hayubudiri houn kada aban hádangiñe: “Keimoun, gundaabá úara numa”. Lidan amu dimurei, aba líchuguni hafayeiruaha houn sielu, ligía furumiñetibei águyuguni (Mat. 25:​21, 23; Aruf. 20:5b). Ánheinti luriban igaburi le larufudubei musu le magúalibei, seriwiti kei eweridihani houn kristiánugu anuadirúaaña. Ariha waméi ka lan uagu.

13, 14. Ka larufudahabei abahüdaguni luáguti talentu houn kristiánugu anuadirúaaña? (Ariha humóun giñe iyawaü luma dibuhu).

¹³ Arufuda huméi luagu benefa humá. Lidan abahüdaguni luáguti talentu, mama lariñaguña Hesusu hamagualiguduba lan kristiánugu anuadirúaaña. Leweridirarügüñanu, ítara kei layusuruni abahüdaguni hawaguti 10  nibureintiña. Lafuranguagüdüña ka lan gayaraabei lasuseredun anhein heferidira ubebeni le hawagubei: machourunbei yebe anuadirúaaña lan, ani ítara siñabei hebelurun lidoun Larúeihan Bungiu sielu (2 Fe. 1:10).

¹⁴ Lidan abahüdaguni hawaguti 10 nibureintiña luma luagu talentu, arufudati Hesusu furangu mosu lan agagudúañu hamá sun kristiánugu anuadirúaaña, lunti aranseñu hamá benefa hagíame. Mámarügüñein eweridihani le líchiga Hesusu houn kristiánugu anuadirúaaña. Daritiwa amu lidan Matéu 24:​40, 41. Akutiha waméi bérusu burí le.

KABA HÁDANGIÑE ANÜGǗWA?

15, 16. Kei le aubei lariñagei Matéu 24:​40, 41, ka uagu súdini lubéi lun agagudúañu hamá kristiánugu anuadirúaaña?

¹⁵ Lubaragiñe labahüdahani Hesusu ǘrüwa abahüdaguni le, abahüdahati hawagu bián wügüriña ha nadagimeinbaña áraabu, lúmati hawagu bián würiña ha nadagimeinbaña lidan amuligülei. Lidan ámuñegueinarügü kesi le, hawadigimariduña gürigia ha. Lau sun lira, ariñagati Hesusu: “Lanügǘba aban, igirúame le aban” (aliiha huméi Matéu 24:​40, 41). Lidan bérusu le lárigiñebei le, ariñagati Hesusu houn lani disipulugu: “Agagudúañu humá, ladüga ibidiñeti hun kaba lan oura niabin, au le Habureme” (Mat. 24:42). Ligiaméme lariñagubei Hesusu lidan lagumuchagüle abahüdaguni hawaguti 10 nibureintiña (Mat. 25:13). Genegeti layanuhaña lan luagu ligiaméme kesi lidan bián abahüdaguni le. Kristiánugu anuadirúaaña ha úaraguabaña ani gaganbadi hagía, hagíarügübaña ebelura lidoun Larúeihan Bungiu sielun (Huan 14:3).

¹⁶ Arufuda huméi agagudúañu hiña lan. Anhein arumuga aban kristiánu anuadirúaali lidan lumadagua luma Heowá, móundarunbei hamoun ha lúnbaña hawinwandun sielun (Mat. 24:31). Ítarameme, sun ha hemenigibaña hawinwandun ya ubouagu, lunti giñe gaganbadi hamá lun leweridihan Hesusu ani kípugua hagíame houngua úaraguñu ani agagudúañu.

17. Anhein anúadira Heowá fiu hádangiñe lubúeingu úaraguatiña lidan lagumuhóun burí irumu le, ka uagu moun lubéi wadiheridun?

¹⁷ Subudi wamuti Heowá buidu buidu, ligía afiñe wabéi luagu le labusenrunbei ladügün. Ligíati, anhein anúadiraali lubéi Heowá fiu hádangiñe lubúeingu úaraguatiña lidan lagumuhóun dan le, moun lumuti wadiheridun. c Haritagua waméi le labahüdahabei Hesusu hawagu ha ñǘdünbaña nadagimein lidan aban ichari dan le gumumémeeli weyu (Mat. 20:​1-16). Aban labu hafayeirúniwa ha gumesegiñebaña nadagimein hama ha nadagimeinbaña dan le gumumémeeli weyu. Ítarameme, sun kristiánugu anuadirúaaña ha úaraguabaña heresibirubei hafayeiruaha lun houdin sielu meberesenga ka lan dan hanuadirúa.

GAGANBADI HUMÁ LUN EWERIDIHANI

18, 19. Ka furendei wamaalibei ani ka eweridihani warihibei lidan aturiahani le?

¹⁸ Ka ariha wamaalibei lidan aturiahani le? Furendeihadiwa lídangiñe abahüdaguni hawaguti mudún hama gábara, súdini lan lun úaragua hamá ha hemenigibaña lun hawinwandun lun súnwandan ya ubouagu dandu guentó kei lidan saragu asufuriruni. Danme lachülürün dan ligía, Hesusuba ariñagei kátaña lan úaraguabaña luma kaba lan eresibira “ibagari magumuchaditi” (Mat. 25:​46, TNM).

¹⁹ Arihaadiwa giñe bián sügǘ le ñein lubéi lichugúa eweridihani houn kristiánugu anuadirúaaña. Lidan abahüdaguni hawaguti 10 nibureintiña,  seingü hádangiñe aransetiña ani agagudúañu haña. Aranseñu haña lun hagurabuni adari sun dan le mégeiwabei. Kei maranserun habéi seingü hádangiñe, mígirun lumutiña adari lun hebelurun lidoun fedu lánina maríei. Ka wafurendeirubei? Furendeitiwa mosu lan aranseñu wamá lun wagurabuni sun dan le mégeiwabei darime lagünrinchaguni Hesusu lagübüri ubóu le. Lidan abahüdaguni luáguti talentu o fiádürü, arihatiwa benefa hamá bián hádangiñe musu hagía. Kei úaragua habéi, áfaaguatiña lun haganwoundagüdüni lirisin hayubudiri, ligía gunda lubéi hau. Ánheinti musu le magúalibei, aba labugún. Ka wafurendeirubei? Furendeitiwa mosu lan benefa wamá lidan weseriwidun lun Heowá darí lagumuhóun. Furendeihadiwa giñe arufudaha lan Hesusu lunti lan agagudúañu hamá kristiánugu anuadirúaaña lidan heseriwidun lun Heowá lun gayaraabei lan hanügǘniwa lidoun Larúeihan Bungiu sielu. Memeniha hanigi “lun hóundaragun luma” Hesusu sielu. Hesusu adaribei le “lánina lamarieidun Mudún”, lárigiñeme wuribu Arümahedón (2 Tesa. 2:1; Aruf. 19:9).

20. Kaba ladüga Heowá ánhawa gaganbadi lun leweridihan?

²⁰ Chülümémeeli dan lun laguseragüdüniña Hesusu gürigia, lau sun lira moun lumuti wanufudedun. Anhein úaragua wabéi lun Wáguchi Bungiu hínsiñehabuti le siélubei, larihúba “lúmagiñe lan […] liabin óunwenbu ubafu le wawagubei” ‘lun gayaraabei lan warufudagun woungua ligibugiñe’ Wügüri garaüwarügüti (2 Ko. 4:7; Luk. 21:36). Ligíati, meberesenga anhein hemenigi wabéi wawinwandun sielu o ya lan ubouagu, ru wamá arigei lun eweridihani le líchugubei Hesusu lidan abahüdaguni le sun liñabei warihin. Anhein wadüga, gúndaabei Wáguchi Bungiu, keiti weiri lubéi lugudemehabu, labürüdübei liri kada aban wádangiñe tidan “líburu to lánina ibagari” (Dan. 12:1; Aruf. 3:5).