Moun lumuti wasaminarun ígira hamaali lan 70 disipulugu Hesusu ladügarügü ua hamá lidan adineruni le lagumeserubei ni lun wasaminarun mámaaña lan lani disipulugu. Busenrügüti meha Hesusu ladügüni adineruni ligía hama 12 lani apostolugu weyu ligía.

Gúndaati meha Hesusu dandu hau 12 apostolugu ítara kei hau 70 disipulugu. Furumiñe anúadirati Hesusu 12 wügüriña hádangiñe sun lani disipulugu ani aba lagúarun houn wügüriña hagía apostolugu (Luk. 6:​12-16). Galileañein meha dan le lóundaragubaliña “duusu disipulugu” ani “aba lóunahaniña apurichihei uganu luáguti larúeihan Bungiu luma areidaguagüdaña sánditiña” (Luk. 9:​1-6). Ani lárigiñe, dan le meha Hudeañein lubéi Hesusu ‘aba lanúadaha […] ǘrüwa-wein-diisi hádangiñe lánigu; aba lóunahaniña lubá, bián bián’ (Luk. 9:51; 10:​1, Lerérun Búngiu to lánina Iséri Darádu). Ligíati, lidan furumiñeguarügü fulasu le ñein lubéi lapurichihóua luganute añahein meha disipulugu ñein.

Sigitiña meha huríu ha adügagubaña houngua lánime Hesusu disipulugu efeduhei Luéyuri Esefuruni sagü irumu, chóuruti úara lan hama haduheñu (Afu. 12:​6-11, 17-20). Murusun dan lubaragiñebei lounwen Hesusu, aweiyasuhati Herusaléun úara hama lani apostolugu. Gama lumoun, mariñagunti houn lani disipulugu ha Hudeabaña, ni houn ha Galiléabaña, ni giñe houn ha Pereabaña lun hefeduhani Luéyuri Esefuruni úara luma. Genegeti hama lan lani apostolugu labusenra lefeduhani Luéyuri Esefuruni weyu ligía. Ligía lariñagunbei houn: “Óunwenbu nabusenrun néigini éigini lánina Luéyuri Esefuruni le huma lubaragiñe nounwen” (Luk. 22:15).

Gébunati labusenrun Hesusu lerederun hámarügü lani apostolugu. Lugundun málühali meha ounwe kei “mudún le lóunahabei Bungiu lun lagidaruni hafigoun gürigia” (Huan 1:29). Herusalénba meha lounwen, le ñein lubéi ladagarawagüdüwa lun Bungiu lúmagiñe binadu dan. Wéiribei meha esefuruni le lunbei libihín lau lounwen Hesusu sügǘ luéi le hibihibei ísüraelina ha éigibaña lídangiñe mudún guñoun le háfuridunbei Ehiptugiñe (1 Ko. 5:​7, 8). Seremei lani Hesusu sákürifisiu aba lubéi hádangiñehaaña lan lébuna damuriguaü kristiánu 12 apostolugu (Efe. 2:​20-22). Súdiniti wasubudiruni Herusalén lan óunwenbu uburugu le sándubei ani “dúusuñein dübü lebu [ . . . ], lau hiri duusu lani Kristu apostolugu bürüwañu luagu” (Aruf. 21:​10-14). Inarüni wéiribei lan buga lisudinin habara apostolugu úaraguatiña lidan le labusenrunbei Bungiu ladügün. Ligía busén lubéi meha Hesusu lefeduhani lagumuhóun Luéyuri Esefuruni hama, luma lun ladügüni adineruni le gíribei Ladinerun Aburemei hama.

Úatiña meha 70 disipulugu ni ha híbiri luma Hesusu lidan adineruni ligía. Gama lumoun, lahuuduba meha Ladinerun Aburemei houn sun disipulugu ha úaraguabaña. Ka uagu? Lugundun lau lásügürün dan, sun kristiánugu anuadirúaaña añahein giñe lidan daradu le meha ladügübei Hesusu hama lani apostolugu luagu harúeihaba lan úara luma sielu, luagu aransehani le layanuha Hesusu hama lani apostolugu guñoun ligía (Luk. 22:​29, 30).