1. Ka wabusenrubei wariñagun dan le wayanuha luagu “inarüni”?

“IDA liña san basubudiruni inarüni?”. “Lidan san inarüni bagüriahóua?”. “Átiri hali san irumu bau lidan inarüni?”. Chóuruti adügǘwaali lan álügüdahani burí le woun o adüga wamaali lan houn amu. Gama lumoun, ka wabusenrubei wariñagun dan le wayanuha luagu “inarüni”? Liibe-agei dan, wayanuhaña luagu wafiñen luma luagu ligaburi wáhuduragun lun Bungiu luma ligaburi wawinwandun. Dan le wariñagun anihein lan aban gürigia “lidan inarüni”, mini lan subudi lumuti lan le tarufudahabei Bíbülia ani inebe ligía adundehani le tídanbei Bíbülia lun. Adügati lira lun séfuñu lan luéi le tarufudahabei relihión mama inarünitu ani lawinwanduña aban lubuidun ibagari le gayaraabei gabagari lani aban gürigia le charati (Huan 8:32).

2. Según Huan 13:34, 35, kátima achawahabaliña saragu gürigia lidoun inarüni?

² Kátima achawahabaliwa lidoun inarüni? Másiñati lubuidun lan hagaburi gefentiña luagu Heowá (1 Fe. 2:12). Odi ínsiñeni le harufudubei. Anihán le achawahabalin hasaminan saragu dan le houdin luagu furumiñeti wéiyaasu tidan Luban Adamuridaguni, ani haritagua hamagili le achawahabalin hasaminan sügǘ luéi sun le haganbubei lidan adamuridaguni. Maweiridagüdün lumutu katei le wanigi, lugundun ariñagati meha Hesusu hasubudirubei lan gürigia kátaña lan lánibaña disipulugu ladüga ínsiñeni le hádanbei (aliiha huméi Huan 13:34, 35). Anhein busén wabéi lun derebugu lan wafiñen mosu wadügün amu burí katei.

3. Ka gayaraabei lasuseredun anhein ínsiñenirügüñein lubéi le harufudubei íbirigu lébunabei wafiñen?

³ Mámarügüba ínsiñeni le harufudubei kristiánugu inarünitiña lébuna wafiñen. Ka uagu? Samina wamá aban lan ladügün aban  íbiri, aban wéiyaali lidan afiñeni o aban prekursoru aban figóu wéiriti, o ladügün wuribani woun o aba lan lagarabaagun luagu Bungiu ani aba lariñagun ua lan inarüni wama. Kaba hamuga wadüga lidan kesi burí le? Wachugeraguba hamuga san ani ígira wameime weseriwidun lun Heowá? Arufudati katei le woun, anhein busén wabéi lun derebugu lan wafiñen luagu Heowá, lunti derebugu lan wamadagua luma, meberesenga le hadügübei amu. Moun lumuti ítara lan wafiñen kei aban muna to abunuboun láurügü “katei le lóuguati liderebugu o le lóuguati lere” kei hamuga ligaburi lasandiragun gürigia lungua, lunti giñe wederebudagüdüni wafiñen lau le wadügübei luma le wasaminarubei lau lichú aau. Lunti wachoururuni woungua inarüni lan le tariñagunbei Bíbülia woun luagu Heowá (Rom. 12:2).

4. Según Matéu 13:3-6, 20, 21, ka asuseredubei houn amu dan le lóuchawagun hafiñen?

⁴ Ariñagati Hesusu hánharuba lan fiu gürigia lun inarüni “lau ugundani”, gama lumoun ledebiliduba lan hafiñen danme le hagagibudagun luma turobuli (aliiha huméi Matéu 13:3-6, 20, 21). Másiñati ua lan gunfuranda hamani hagagibudaguba lan luma lénrengunga luma óuchawaguni lau hafalaruni Hesusu (Mat. 16:24). Háfuga giñe saminatiña buídubei lan habagari keisi kristiánugu ani buin luba lan lau abiniruni. Gama lumoun, lidan lagübüri ubóu le hénrengubei lun maturobulinbadiwa lan. Gayaraati lasansiragun gádantiwa gidáleime wagundan luagu murusun dan (Sal. 6:6; Apur. 9:11).

5. Ida liña harufuduni hiibe-agei lubúeingu Heowá lídanñanu lan inarüni?

⁵ Hiibe-agei lubúeingu Heowá arufuda hamuti chouru hamani lídanñanu lan inarüni. Ida liña wasubudiruni? Ladüga marabaha lan hafiñen dan le lachararun o ladügün aban íbiri wuribani houn (Sal. 119:165). Derebugutimati hafiñen dan le hagagibudagun luma somu óuchawaguni (Sant. 1:2-4). Ka lunbei wadügüni lun ítara lan wafiñen?

6. Ka lébunabei hafiñen disipulugu ha lánina furumiñeti sígulu?

⁶ Le meha hafurendeirubei disipulugu ha lánina furumiñeti sígulu tídangiñeti Bíbülia luma le larufudahabei Hesusu, mini lan le, “inarüni le lánina uganu luáguti asalbaruni”, ligía adügübei lun derebugu lan hafiñen (Gal. 2:5). Inarüni ligía, ligía aban lídangiñe arufudahani kristiánu, le ayanuhabei luagu lani Hesusu sákürifisiu luma luagu láguyugun. Chouru lumuti meha apostolu Pábulu inarüniti lan burí arufudahani le. Ida liña wasubudiruni? Ladüga yusu lumutu meha Bíbülia lun larufuduni “lunti lan meha lasufurirun Kristu, lárigiñeme lan lounwen, aba lanme lásaarun lídangiñe óunweni” (Adü. 17:2, 3). Ánhatiña meha furumiñetiña kristiánugu lun arufudahani le ani áluaha hamuti lídehan sífiri sandu lun gayara lan gunfuranda hamani le tariñagubei Lererun Bungiu. Akutihatiña lun hachoururuni Lererun lan Bungiu lébunabei le arufudahóubei houn (Adü. 17:11, 12; Ebü. 5:14). Mama meha ligaburi hasandiragun houngua ágüdahabalin hafiñen, ani mama meha ladüga buidu lan hásügürüni hama amu kristiánugu heseriwidunbei lun Heowá. Lubaragiñe lira “hasubudirunitima Bungiu” lébunabei hafiñen (Kol. 1:9, 10).

7. Ida luba lahuudun wafiñen luagu inarüni le tídanbei Lererun Bungiu woun?

⁷ Masansirúnbei inarüni le tídanbei Lererun Bungiu (Sal. 119:160). Kei hénpulu masansirunbei anhein acharara aban íbiri woun o anhein adüga aban figóu wéiriti. Ani masansirunbei giñe anhein gaturobulin wabéi. Ligíati mosu lubéi wasubudiruni le tarufudahabei Bíbülia buidu buidu luma wachoururuni inarüni lan. Ítara kei ladügün aban óunguru lun madiñurun tan aban waporu lidan liñawan dan, lágüdahabei giñe inarüni le tídanbei Lererun Bungiu wafiñen danme le wagagibudagun luma dan hénrenguti. Ida luba chóurutima wamani anihein lan inarüni wama?

8. Según 2 Timotéu 3:14, 15, ida liña lachoururuni Timotéu darí laali lan inarüni?

⁸ Chouru lumuti meha Timotéu darí laali lan inarüni. Ida liña ladariruni? (aliiha huméi 2 Timotéu 3:14, 15). Lúguchu tuma lagütü hagía meha furumiñetiña arufudahabarun “Lererun Bungiu” lun. Lau sun lira, chóuruti ligía guánarügü lan adireirúbei dan luma erei lun laturiahanu. Adügati lira lun lafiñerun luagu inarüni le tídanbei. Lárigiñe lira, aba lafurendeiruni, ligía, lagütü tuma lúguchu arufudahani kristiánu. Chóuruti aban lan taweiridun lanigi dan le larihin harufudun lani Hesusu disipulugu ínsiñeni hámagua, ani busenti meha lun lerederun harugabu líbirigu ha rúguaabaña houngua lun Bungiu ani lun lóunigiruniña (Fili. 2:19, 20). Gama lumoun mama le lasandirubei hawagu amu lébunabei lafiñen, le lébunabei lafiñen katei le ladügübei lun lederebudagüdüni lumadagua luma Bungiu. Lunti giñe waturiahani le tariñagunbei Lererun Bungiu luagu Heowá luma lun wasaminarun tuagun lun warihini inarüni woungua.

9. Ka ǘrüwa inarüni súdiniti lunbei wachoururuni wagía woungua?

⁹ Lun wagumeserun, mosu wachoururuni wagía woungua ǘrüwa inarüni súdiniti. Furumiñe, Heowá lan adügübalin sun katei (Afu. 3:14, 15; Ebü. 3:4; Aruf. 4:11). Libiaman, anihein lan uganu lúmagiñeti Bungiu tidan Bíbülia houn sun gürigia (2 Tim. 3:16, 17). Ani le lǘrüwan, anihein lan aban sétanu gürigia luma Heowá ha áhuduragubaña lun lábugiñe ladundehan Kristu: Gefentiña luagu Heowá híribei (Isa. 43:10-12; Huan 14:6; Adü. 15:14). Lun wachoururuni wagía woungua luagu inarüni súdiniti le, memegeiruntiwa lun wasubudiruni sun katei tuáguti Bíbülia. Le wabusenrubei, lun wasaminarun lau “lichú aau” (Rom. 12:1 TNM).

10. Amu luéi wasubudiruni inarüni, ka katei lunbei gayara lan wadügüni?

¹⁰ Dan le chouru wamani inarüni súdiniti le luagu Heowá, tuagu Lererun luma hawagu lumutuniña, lunti gayaraagua wamá woungua lun wayusurunu Bíbülia lun warufuduni inarüni  burí le houn amu. Ka uagu? Ladüga wagía kristiánugu, wadasin lun warufudahani inarüni houn gürigia ha aganbubaliwa (1 Tim. 4:16). * Ani dan le wachoururagüdüni houn amu arufudaha tani Bíbülia inarüni, ábatima lederebudagüdüni wafiñen.

11. Ka larufudahabei Pábulu woun lau larufudahan houn amu?

¹¹ Dan meha le larufudahan apostolu Pábulu houn amu áfaaguati “lun lafiñeragüdüniña luagu Hesusu lan asalbaragüleibei lau layusuruni lilurudun Moisesi luma le habürühabei profetagu” (Adü. 28:23). Ida luba wáyeihani lau warufudahani inarüni tídangiñeti Bíbülia houn amu? Ua lan gufuruma wamá láurügü wariñaguni houn. Lunti wíderaguniña asaminara luagu le hafurendeirubei, ítara luba hayarafadun lun Heowá. Mabusenruntiwa lun hánharun lun inarüni ladügarügü wínsiñe houn, le wabusenrubei lun hachoururuni hagía houngua inarüni lan le hafurendeirubei luagu Wáguchi Bungiu le hínsiñehabubei.

12, 13. Ka lunbei hadügüni agübürigu lun híderaguniña hasaanigu lun herederun hasaanigu lidan inarüni?

¹² Agübürigu, chóuruti busén humá lun herederun hisaanigu lidan inarüni. Másiñati samina humá ánhaña lan gamadagua hisaanigu lidan damuriguaü, lederebuguduba lan hafiñen. Lun hachoururuni hisaanigu darí hamá lan inarüni mégeitiña amu katei, mámarügü umadagu buítiña. Súdiniti lun gamadagua hamá luma Bungiu luma lun hachoururuni anihein lan inarüni tidan Bíbülia.

¹³ Agübürigu, anhein busén hubéi lun harufudahani inarüni luáguti Bungiu houn hisaanigu, lau hani hénpulu, mosu harufuduni houn hisaanigu aturiahatiña lan Bíbülia buiti huguya. Direi humá dan lun hasaminarun luagu le haturiahabei. Gayaraabei giñe harufudahan houn hisaanigu lun hadügüni ligiaméme. Arufudaha huméi houn ida liña lan hayusurunu agumeiraguagüdüni to ayusurúboun lun aturiahani, kei hadügüni hama ha aturiahabarun Bíbülia huma. Ítara luba híderaguniña hisaanigu lun hínsiñe lan Heowá houn luma lun hafiñerun luagu le layusurubei lun larufudahan woun: “musu úaraguati” (Mat. 24:45-47). Ua lan gufuruma humá lúnrügü harufudahani inarüni súdiniti le tídanbei Bíbülia houn. Íderagua humaña lun hasubudiruni “lilulin-agei laritagun Bungiu”, gabaroun humeime harumudiri, le hayaraati, ani ítara luba derebugu lan hafiñen (1 Ko. 2:10).

14. Ka uagu mosu lubéi waturiahani profesía burí le tídanbei Bíbülia? (Ariha huméi rekuáduru “ Subuditi san woun ida luba lan wafuranguagüdüni profesía burí le?”).

¹⁴ Wéiriti lisudinin profesía burí le tídanbei Lererun Bungiu, ani íderagua lumutiwa lun  derebugu lan wafiñen luagu Heowá. Ka burí profesía íderagubaliwa lun derebugu lan wafiñen? Másiñati samina wamá luagu burí le ayanuhabei luagu “lagumuhóun dan” (2 Tim. 3:1-5; Mat. 24:3, 7). Gayaraati giñe líderaguniwa amu burí profesía le gúnfulihalibei lun derebugu lan wafiñen. Kei hénpulu, gayaraati san wafuranguagüdüni ida liña lan meha lagunfulirun profesía le lídanbei Danieli kapítulu 2 luma 11 luma le anihaguabei agunfulira uguñe weyu?  * Anhein lídangiñeti lubéi arufudahani le tídanbei Bíbülia lébuna wafiñen, wawanduba furumiñeguarügü óuchawaguni. Ariha waméi le hásügürübei íbirigu ha awandubalin lanarime éibaahouni lidan ageiraü Yámani lidan lidaani Libiaman Wuribu Wéiriti. Íbini ua lan gunfuranda hamani sunsuinagubei profesía luáguti lagumuhóun dan afiñetiña buidu buidu tuagu Lererun Bungiu.

15-17. Ida liña lederebudagüdüniña taturiahóun Bíbülia íbirigu ha asufurirubalin héibaahaniña nasi?

¹⁵ Lidan meha ageiraü Yámani lábugiñe hagumadiha nasi ounahouwatiña saragu milu íbirigu lidoun fulasu le ñein lubéi hafosurúa gürigia lun hawadigimaridun. Mínsiñetiña meha gefentiña luagu Heowá lun Hitler ni lun ábuti SS, le gíribei Heinrich Himmler. Abahüdaguatu aban íbiri ariñaga lan Himmler houn fiu íbirigu würiña ha meha lídanbaña aban lídangiñe fulasu ligía: “Anhein busén hubéi, gayaraati larúeihan Heowá ligía sielu, anhein ya ubouagu wagía agumadihabei! Warihibei kábatima lan eredera, anhein huguyaba lubéi odi wagía!”. Ka íderagubaliña lubúeingu Heowá lun úaragua hamá?

¹⁶ Subudi hamuti meha aturiahatiña Bíbülia hagüra lau gumeseeli lan Larúeihan Bungiu arúeiha lidan irumu 1914. Ani maweirigüdün lumutu hanigi lichugún lidere dan houn. Subudi hamuti lumutuniña Bungiu ua lan ni aban urúei gayara lun ladügün lun magunfulirun lani Bungiu le lubeibei. Mabafuti meha Hitler lun lagumuchun lau áhuduraguni inarüniti ni lun líchugun aban arúeihani le gabafuti lun lagidaruni Larúeihan Bungiu. Chouru hamuti meha íbirigu lachülürüba lan meha dan lun lagumuchagun larúeihan Hitler.

¹⁷ Ma meha hanarün lan! Lidan murusun dan aban lábürühan harúeihan nasi, úaali meha ni  kata lun ladügüni Heinrich Himmler luéidügü lanurahan, le meha ariñagubei ya lan ubouagu hagía lan arúeihabaña. Dan le lanurahanbei, aba ladunragun luma aban íbiri, le lúgububei liri íbiri ligía Lübke, le meha lasubudirubei Himmler ladüga aban lan binadu adaürǘti íbiri ligía. Féridiñu, aba lariñagun Himmler lun íbiri: “Aturiahatiña Bíbülia, guentoti, kaba asusereda?” Aba lariñagun íbiri Lübke lun, súnwandan lan subudi lan houn gefentiña luagu Heowá lábürühaba lan harúeihan nasi ani higirawagüdünba lan Gefentiña. Lidan dan ligía, Himmler, wügüri meha le ariñagubei saragu katei hawagu gefentiña luagu Heowá; aba lerederun maniñu. Murusun dan lárigiñe aba láfaragun lungua. Ka wafurendeirubei lídangiñe le? Gayara lan líderaguniwa aturiahani tídangiñeti Bíbülia, íbini profesía le tídanbei lun derebugutima lan wafiñen luagu Bungiu ani líchugubei lan ichouruni le wemegeirubei woun lidan lidaani óuchawaguni (2 Fe. 1:19-21).

18. Según Huan 6:67, 68, ka uagu megei wabalin “subudi luma gunfurandaü lidan sun katei”, kei lariñaguni Pábulu?

¹⁸ Sun wagía mosu warufuduni ínsiñeni le arufudubalin kristiánugu lan inarünitiña wagía. Lau sun lira, mégeitiwa giñe “subudi luma gunfurandaü lidan sun katei” (Fili. 1:9). Lun hamuga ua lan subudi luma gunfurandaü wama laduruuhan baadiwa hamuga “ligarabalin furumiñeguarügü iseri luwuyeri arufudahani lun wábürühan lidoun hayeeni gürigia sumaditiña ha abusenrubaña hanügüniwa lidoun üma le marichabei” (Efe. 4:14). Lidan furumiñeti sígulu, dan le hígirunbalin saragu disipulugu Hesusu, aba lariñagun apostolu Féduru lau ichouruni, anihein lan “dimurei [...] lánina ibagari magumuchaditi” luma Hesusu (aliiha huméi Huan 6:67, 68). Íbini lidan lan dan ligía úati gunfuranda lani Féduru sun katei luáguti dimurei le, úaraguamemeti meha ladüga gunfuranda lumuti inarüni luáguti Kristu. Ánhawa achoururagüdei wagía woungua buidu buidu arufudaha tumuti lan Bíbülia inarüni, ábatimame lederebudagüdüni wafiñen danme le wagagibudagun luma óuchawaguni ani wíderagubaña amu lun giñe derebugu lan hafiñen (2 Huan 1, 2).