Lidan irumu 1954 nagüriahóua Meriga, lidan uburugu Saint Paul (Minnesota), hadan iduheñu ha marisin haña magudeme hagía naweirida ani tílana meha ligilisi katolika rómana hagía. Hádangiñe seingü hasaanigu nagübürigu, au habiamabei. Lúmagiñe niñüraü tidan aban leskuela katolika naturiaha ani monagiyu meha au, gama lumoun murusunrügüñein meha nisubudin tuagu Bíbülia. Lau sun meha afiñe nan luagu anihein lan aban Bungiu le adügübalin sun katei, aba neferidiruni nafiñen tuagu ligilisi.

Lidan furumiñeti irumu nau aturiaha lun awogóu nan, aba hadaünha aban feru maríeitiña luagu nubenari, gefentiña luagu Heowá, William Mitchell. Kei nachibaguña lan weyu ligía aban hariñagun nun lau ínsiñehabuni hagiribudayaba lan. Dan le hagiribudunbei aba nadügün bián álügüdahani houn: “Ka uagu buídutima lubéi lidin houn ha wuribabaña sügǘ hawéi ha buídubaña?” ani “ka mégeiwabei lun gunda wamá?”. Resibi numutu líburu La verdad que lleva a vida eterna tuma Traducción del Nuevo Mundo de las Santas Escrituras, to meha bérüdebou  idáü. To íderagubalina éfegechei nagu. Wéirigüda lumutu nanigi nafurendeiruni Larúeiha lan Bungiu ligíatima lan arúeihani le hemegeirubei gürigia ani ligíaba lan arúeihei ubóu. Aba gunfuranda nani mabuidun lan harúeihan gumadimatiña ani buíngüda hamaali lan ubóu lau igarigu, asufuriruni, marichaü luma lamiselu.

Aba nederegeragun nungua lun Heowá lidan lagumeseha irumu 1982 ani lídanmeme irumu ligía nabadiseira, lidan aban Adamurini Distritu le gíribei “Verdad del Reino”, lidan aban fulasu le ñein lubéi láhurerua bali gíriti St. Paul Civic Center. Dimaasu lárigiñe, giributina ñeinhin lun nadügün egüsámini le lunbei ladügün lun nagumeserun awadigimarida kei awogóu. Lidan lagumeseha diisi-hati aba níchugun fe gañei nanu egüsámini.

Lidan adamurini ligía nasubudirei Mike Richardson, le meha eseriwidubei tidan Beteli to Brooklynboun (Newayoru), aba lafuranguagüdüni nun anuheinharu lan aban áfisi to arihiboun luagu burí katei le luáguti lúrudu tidan Beteli. Aba nasaminarun luagu le lariñagubei wügüri etiopíana lidan Adügaü 8:36 ani aba nálügüdagun nungua: “Ka eredehabadina lun meseriwidun nan tidan Áfisi to Arihiboun lau Katei Luáguti Lúrudu tidan Beteli?”. Ábati nabuinchagüdünün gárada lun nidin eseriwida tidan Beteli.

Mínsiñeti meha houn nagübürigu lun aban nan gefenti luagu Heowá. Aba lálügüdünina núguchi kaba lan buiti nasagara lídangiñe awogóu nan lau nawadigimaridun tidan Watchtower. Aba nóunabuni aba lan wadagimanu le ñein lubéi mafayeiruabadina lan ani ǘrüwa-wein-keinsirügübei lan dólarü nibiha sagü hati, ligía meha ichugúbei houn betelitagu dan meha ligía.

Lárigiñe nagumuchun lau fiu dasi lidan nuadigimari lidan aguseragülei, aba nagumeserun eseriwida tidan Beteli to Brooklynboun lidan irumu 1984. Aba nounahóun awadigimarida tidan Áfisi to Arihiboun lau Katei Luáguti Lúrudu tidan Beteli. Íderagua lumutina saragu, subudi le nibihibei kei aguseragüdüti.

Lidan unsu-hati lidan irumu 1983, aba hagañeihanu gefentiña luagu Heowá Tiáturu Stanley, lidan Jersey City (Nueva Jersey). Amuriahatiña íbirigu üma lun laransehóuniwa katei lánina elekütrisida luma duna tidan tiáturu tuguya. Dan le hóundaragubei íbirigu hama gumadimatiña aba hafuranguagüdüni houn, busén hamá gefentiña luagu Heowá hayusurunu tiáturu lun hadügün adamurini ñein. Gama lumoun, aba ñein lan aban turobuli. Según lilurudun uburugu lídanrügüba fulasu le ñein tubéi saragu muna ani to ñein lubéi úata bísinisi gayara lan ladügǘniwa adamurini. Kei meha lídanñoun lan fulasu le ñein tubéi saragu bísinisi tiáturu máhatiña meha híchugun üma woun. Ábaya hageindaguni íbirigu kesi, gama lumoun magañeirun hamuti.

 Lidan furumiñeti dimaasu le naubei Betelirugu, barǘ tumuti lóundarun Heowá kesi luáguti lamuriahóun üma tidoun aguseragülei to lani New Jersey. Kei nadagimeihadina lan tidan aban aguseragülei Saint Paul (Minnesota), subuditi meha nun ida liña lan lahandilihóun burí kesi le. Ariñagati meha aban hádangiñe wani awogóu yúsuwa tan meha tiáturu Stanley lun ladügǘn ámuñegueinarügü katei tidan, kei burí lun tariawagún pikchá o pelikula luma hóundaragun saragu gürigia lun harihini láfarun músika rock. Ligíati, ka uagu lariñawagúa siñá lan ladügǘn adamurini le tánina relihión ñein? Aba lakutihóun kesi le tidan aguseragülei, ani aba lasubudirún dürüwaguaali lan waricha lun wadügün adamurini ñein ani aba lichugún gumadi lun lichugún üma le wamuriahabei woun. Ítara liña nagumeserun arihei biní lani Heowá wadagimanu le adügǘbei tidan Áfisi to Arihiboun lau Katei Luáguti Lúrudu tidan Beteli lun gayara lan lasigirun dasi lánina apurichihani. Gúndaatina lau gafanran nan lidan dasi le.

Aba hagumeserun íbirigu lau aban lanarime wadagimanu lidan taransehóun tiáturu to, ani gumuti haransehanu lubaragiñe lagunfulirun irumu lúmagiñe hagumeserun. Widü lidan nefu-hati, irumu 1985, ligía heresibiha íbirigu ha meha lídanbaña külase 79 tídangiñe Leskuela Galaadü, tidan tiáturu to subudiwaboun guentó kei Luban Adamurini Jersey City. Aban lubuidun chansi nun nawadigimaridun lun lawanserun wadagimanu luáguti Larúeihan Bungiu úara hama íbirigu ha meha arihibaña luagu katei le luáguti lúrudu, gúndaagüda lumutina wadagimanu le saragu sügǘ luéi furumiñeguarügü wadagimanu le nadügübei kei awogóu lubaragiñe meha neseriwidun Betelirugu. Masaminaruntina yebe layusurubadina lan Heowá lun nageindagun saragu kesi kei le.

Lidan burí irumu 1980, saragu surusiagu tuma háspitali minebenti meha haricha Gefentiña ha wéinamugaaña houn lidan hanúadahan lun michugún lan hitaü hawagu. Gaturobulin timaatiña meha würiña ha dageinabaña ladüga ariñagatiña meha aguseragüdütiña maricha hamá lun hamahadun lun lichugún hitaü hawagu lugundun ánhaña lan ounwe lerederuba lan hasaani máguchunga.

Wein-nefu lidan duusu-hati, irumu 1988 aseñeihatu íbiri Denise Nicoleau saragu lárigiñe tagüriahan. Wuribati meha tani hemoglobina rariti darí 5.0, aba lamuriaha tisurusian tuma lun tíchugun üma lun lichugún hitaü tuagu. Máhatu. Larugan binaafin, aba tamuriahan háspitali üma luma aguseragüdüti lun híchugun hitaü tuagu. Sin hakutihani kesi hagibugiñe gürigia, ani mayanuhan hagía tuma íbiri Nicoleau ni luma tani weiriei, aba líchugun aguseragüdüti üma lun lichugún hitaü tuagu.

Wándaradi 30 lidan duusu-hati, aba lichugún hitaü tuagu íbiri íbini maha lan yebe tani weiriei hama amu tiduheñu. Lanwoun lira, rábounweyu  aba harügüdǘn fiu hádangiñe tiduheñu hama fiu hádangiñe wéiyaaña lidan afiñeni. Aba híchugun hadurun mabusenrun hamá lun hásügürün surusiagu ni anosuhatiña lun lichugún hitaü tuagu íbiri. Samudi binaafin 31 lidan duusu-hati, burugua meha ñunsu uburugu Newayoru luma lidan fulasu le geyegubei lau luagu hárügüdün íbirigu.

Barǘ wamuti kesi ligibugiñoun liñun-agei lúrudu, ani leindi binaafin ayanuhatina luma aguseragüdüti le gíribei Milton Mollen, le arihibei lau kesi le. Aba nabahüdahani sun le asuseredubei lun, ariñaganéi lun aba lan laseinirun le aban aguseragüdüti gárada lun lichugún hitaü tuagu íbiri sin lakutihani kesi hagibugiñe gürigia. Amuriahati aguseragüdüti Mollen numa lun nidin arihei tidan lani áfisi rábounweyu ligía, lun wayanuhan luagu le anügübei fulasu luma luagu le lariñagubei lúrudu. Ñǘdünti íbiri le arihibei lau nuadigimari numa le gíribei Philip Brumley. Agunbiraha lumuti giñe aguseragüdüti awogóu le tani háspitali. Hanarimeti wasigenehan luagu kesi le weyu ligía. Darí lun labürühan íbiri Brumley nun tidan lani kuadernu le ñein lubéi lariñaga: “Rarigüdabéi bumalali”. Aba meha adundehani buiti, ladüga lidan náfaagun lun narufuduni iyeeni lan le lariñagubei awogóu le tani háspitali aba meha nagañidun saragu.

Lárigiñe aban oura asigeneha, aba lariñagun aguseragüdüti Mollen lunba lan wakesin letenira furumiñe haruga binaafin. Dan le wáfuridunbei tídangiñe lani Mollen áfisi, aba lariñagun hénrengubei lan lun awogóu le tani háspitali lun lageindaguni likesin. Sanditina meha larufuduñein lan Heowá nun gayaraati lan wagañeiruni kesi le. Wéirigüda lumutu wanigi warihini layusuruñadiwa lan Bungiu lun lagunfulirun lugundan.

Rédeitiwa darí laletidun aransera lubá kesi le. Yarafatu meha Luban aguseragülei tun Beteli to Brooklynboun, ligíati eibu meha houdin hiibe-agei wapanaagu ha nadagimeinbaña tidan Áfisi to Arihiboun lau Katei Luáguti Lúrudu tidan Beteli. Lárigiñe haganbuni gádürü aguseragüdütiña ha arihibaña luagu kesi le, le wariñagubei, aba hariñagun moun lumuti lan yebe lichugún lúrudu lun lichugún hitaü tuagu íbiri Nicoleau. Gañeinwati tikesin íbiri Nicoleau ani ariñagati Liñun-agei Lúrudu moun lumuti lan taseinirun aban gárada sin laganbun le hasaminarubei sanditiña, lau ladügǘn lira, ladüraawaguña haricha gürigia.

Murusun dan lárigiñe ariñagati Liñun-agei Lúrudu Newayoru garicha tan íbiri Nicoleau lun lagaranihóun tun sin lichugún hitaü tuagu. Ligía aban lídangiñe gádürü kesi luáguti hitaü le agañeirunbei lidan Liñun-agei Lúrudu Meriga le ñein lubéi gachansin nan lun nídehan (ariha huméi rekuáduru  “ Kesi le agañeirúbei lidan liñun-agei lúrudu”). Nadagimeinhaadina giñe hama amu awogóu dan le hawadigimaridun lidan kesi luáguti kaba lan uma heredera isaanigu hádangiñe biángubei agübürigu, ígiraguni, talugurun burí muna, luma lúrudu luáguti ábunaguni.

Dan le nasubudirunün Dawn, to nani weiriou, luagu furumiñeti wéiyaasu, aba meha würi ígiraguaaru ani ǘrüwañanu tisaanigu. Nadagimeintu meha ani prekursora. Íbini hénrengu lan meha tibagari, wéiritu nanigi lau teseriwidun lun Heowá lau ubebeni. Lidan irumu 1992, ñǘdüntiwa lidan aban Adamurini Distritu le gíribei “Portadores de Luz” lidan uburugu Newayoru, aba nariñagun tun busén nan nasubudirunun buidu. Aban irumu lárigiñe aba wamarieidun, ani sigitina ídeha Betelirugu. Sanditina aban lan abiniruni lúmagiñe Heowá buidu lan tumadagua luma. Kei lariñaguni Ariñawagúni 31:12, rutu Dawn, aba óunwenbu ugundani nun sagü weyu.

Dan meha le wamarieidunbei 11, 13 luma 16 irumu hau tisaanigu. Kei le busén nubéi lun aban nan úguchili buiti áfaaguatina lun naliihani luma lun nafalaruni sun adundehani le nadarirubei tidan wani agumeiraguagüdüni le ayanuhabei hawagu agübürigu ha agüriahabaliña hasaanigu amu. Lidan burí irumu le sügühalibei sügühadiwa lídangiñe lénrengunga, gama lumoun, gúndaatina lau ariha hamutina lan tisaanigu kei aban úguchili hínsiñehabuti ani kei aban umadaü le afiñerúati luagu. Súnwandan meha weresibiruniña hamadagu wasaanigu buidu ani gúndaatiwa meha lau weresibirun bandi nibureintiña gúndaatiña múnada.

Lidan irumu 2013, au tuma Dawn aba wáguyun Wisconsin lun wóunigiruniña wagübürigu. Wéiritu nanigi luagu sigí nan eseriwida tun Beteli. Aba nagunbirahóun lun níderagunün lóundarun Heowá keisi awogóu dan le mégeiwa lan.

Lidan nefu-hati irumu 2018, aba níchugun fe ahünha nan saragu sagü lubá nayanuhan. Ibidiñeti meha lun surusia le lídanbei fulasu le ñein lubéi neredera ka lan nuágubei. Lárigiñe aba lariñagun amu surusia nun lun nidin ariha aban surusia le lánina ichügü. Lidan eneru 2019, aba lariñagun lisurusian ichügü nun másiña lan anihein lan aban sandi nuagu le úati kamani lan lau lásügürün dan lañawarihaba lan lun sun núgubu.

Ǘrüwa weyu lárigiñe, aba néiguadun dan le meha narirahaña lubéi tuagu yelu aba láhalachun nufuñein le luágubei núhabu le nóuweren. Sun nibagari nau iriraha tigibuagu yelu aba katei ménrenguti nun. Ligíati aba níchugun fe neferidiruñein lan nahigichuni núgubu. Wéiritu meha nanigi lawanseruña lan sandi lau lóufudagun ani ladügüña meha lun hénrengu lan nun lun nayanuhan, nahingichu luma lun nagunchagun.

Aban lubuidun chansi nun nayusuruni nisubudin kei awogóu lun nídehan lidan lawanserun wadagimanu luáguti Larúeihan Bungiu. Aban giñe lubuidun chansi nun lun nabürühan saragu arütíkulu tidan garüdia to burí haliihaboun surusiagu, awogóu hama aguseragüdütiña. Rútina giñe yanu lidan sun ubóu lun nayanuhan luéigiñe hafulesein lumutuniña Heowá luáguti hanúadirun lagaranihóun houn sin lichugún hitaü hawagu. Íbini ítara, kei lariñaguni Lúkasi 17:10: musu móuniti au, madünatina neresibirun ni kata, lérügüñein lunbei nadügüni nadüga.