Subudi lumuti meha apostolu Pábulu damichi le gayaraabei ladügüni liyeeni Satanási, ánheinti amu kristiánugu ha lánina lidaani marihin hamuti meha peliguru. Kéiburi Korintu, añahein meha fiú wéiriti hafiñerun hawougua ani saminatiña meha weiri lan lere hafiñen ani mábürühanbaña lan (1 Ko. 10:12). Ligía meha leweridirunbaliña Pábulu: “Ítara kei teyeedunu hewe Ewa, hanufudetina luéi giñe hígiraguagüdün hungua lun heyeedún lidan haritagun, luéi heseriwidun lau sun hugunfulin lúnrügü Kristu” (2 Ko. 11:3).

Arufudahati lererun Pábulu woun mosu lan agagudúañu wamá ani lun mafiñerun wamá saragu wawougua. Lun magadeirun lani liyeeni Satanási wasaminan, mosu wasubudiruni peliguru lan ani mosu giñe wóunigiragun woungua.

Yúsuati ariñahani iyeeniti lun heyeedún gürigia luma lun hahandilihani ligaburi hasaminarun luma hóuserun. Según tariñaguni aban líburu gíritu Propaganda and Persuasion “adügati ariñahani iyeeniti le saragu damichi luma marichaü”. Dan le hayanuhan gürigia luagu yúsutiña dimurei kéiburi ariñahani iyeeniti o ariñahani le agadeirubalin saminaü.

Ka san uagu peliguru lubéi ariñahani iyeeniti? Ladüga ítara liña lani efekütu kei aban gasi péisiniti le siñati larihín ni lirimichún. Gama lumoun, awaragua wamuti sin wíchugun fe ani agadeireina liñalin wasaminan murusun murusun. Ariñagati aban aturiahati siensia gíriti Vance Packard gani lan efekütu hawagu saragu wádangiñe ani “ahandiliha lániwa lóugiñe le wasaminarubei”. Ariñagati ábanya sásaamu luagu dandu lan wügüriña kei würiña adügaaña “lanarime burí lílülün aau” ladüga ariñahani iyeeniti, ani adügaali giñe lun háfarawagun lílana somu rasa ladüga iyereehabuni, adügati lun ñein lan wuribu, iyereehabuni houn  lílana amu rasa, houn lílana relihión luma saragu amu katei wuribati (Easily Led—A History of Propaganda).

Anhein gayara lubéi heyeeduniwa gürigia guánarügü lau ariñahani iyeeniti, ma ménrenguntimabei lun Satanási? Lúmagiñe furumiñeti dan lakutihañein ligaburi hóuserun gürigia. Ani kei le lábugiñeñein lubéi lubafu sun ubóu, gayaraati layusurun furumiñeguarügü katei lun laburuchaguagüdüni liyeeni (1 Huan 5:19; Huan 8:44). Daruguaali lau hasaminan saragu gürigia darí lun tariñagun Bíbülia eyeeda laali lan “sun ubóu” (Aruf. 12:9; 2 Ko. 4:4). Ida luba san wóunigiragun woungua tuéi lisadaran?

Arufudahati Hesusu aban katei sensiyuti lun wáfaagun kóntüra ariñahani iyeeniti. Ariñagati: “Ábame hasubudiruni inarüni, ábame lesefurunün inarüni” (Huan 8:31, 32). Gama lumoun, ariñawagúati inarüni lan eferidirubei furumiñe lidan aban wuribu, ladüga buruguagüdatiña lílana aban sétanu iyeeni lun heyeeduniña lílana le aban sétanu. Ligía megei lubéi súdara lasubudiruni halíagiñe lan liabin ariñahani inarüniti lun meyeedúniwa lan. Ligía giñe wemegeirubei lun wóunigiragun woungua luéi wágani. Tídanñein Bíbülia ariñahani le inarünibei, ani Heowá íchugubalin woun. Tidan wadarirei sun le wemegeirubei lun wáfaagun kóntüra ariñahani iyeeniti le ñǘbuinbei lúmagiñe Satanási (2 Tim. 3:16, 17).

Furanguti subudi lani Satanási katei le. Ligía layusurunbalin katei burí le ubouagubei lun ladügün lun maliihan hamanu ani maturiahan hamounme gürigia Bíbülia. Méiguada humá tidoun sádara tuguya! (Efe. 6:11). Mosu wáfaagun lun gunfuranda wamani inarüni buidu (Efe. 3:18). Samina humá luagun le lariñagubei máisturu Noam Chomsky: “Úati lunti lebelaagüdüni inarüni lidoun wachügü. Mosu wadariruni woungua”. Ligíati, darí huméi inarüni hungua lau hakutihanu “Lererun Bungiu” sagü weyu buidu buidu (Adü. 17:11).

Gabaroun huméi mabusenrun lan Satanási wasaminarun buidu ni lun wakutihani katei buidu. Ka uagu? Ladüga según tariñaguni aban líburu, ladüga buídutima lan lani ariñahani iyeeniti efekütu dan le mararamagun hamá gürigia asaminara (Media and Society in the Twentieth Century). Ligíati, mafiñera huméi sun le ariñawagubei hun sin hakutihani hungua (Ari. 14:15). Yusu huméi ubafu le líchugubei Bungiu hun lun hasaminarun lun  hachoururuni inarüni lan le hafiñerubei (Ari. 2:10-15; Rom. 12:1, 2).

Gürigia ha buídubaña lidan laransehóun luáguti wuribu yúsutiña ariñahani iyeeniti lun hadügün lun heferidiruni háganiñu haguraasun. Háfuga hadügün lun hageindagun háganiñu hámagua o lun hafanreinragun súdaragu. Ariñagati aban hábuti súdaragu yámanina ladüga lan “larumugagüdüniña ariñahani iyeeniti le hámagiñeti áganiñu súdaragu” ligía lan heferidirunbalin Furumiñeti Wuribu Wéiriti. “Arumugagüda hamutiña kei tarumugagüdün aban hewe aban másaraga”. Yúsuti Satanási katei libe burí lira lun lagünrinchaguni úarani le lídanbei damuriguaü ani lun lagañeiruniwa. Gayaraati ladügün lun ñein lan turóbuli hadan íbirigu o ladügün lun hadisedun ha asafaragubaña o ha asandirubaña adügǘwaali lan somu marichaü houn tuéi lóundarun Heowá.

Mígira humá lun heyeedún! Ígira humá lun tadundehanün Lererun Bungiu. Lun ñein lan úarani wadan súnwandan, ínchaha tumutiwa Bíbülia lun ferudunaguaméme wamá woungua ani aranseha waméi turóbuli lau lóufudagun (Mat. 5:23, 24; Kol. 3:13, 14). Wéridi tumutiwa giñe luagu peliguru lan wadisedun luéi damuriguaü (Ari. 18:1). Ka uagu móuchagun hubalin ida liña lan hafiñen lun harihini anhein ladügüña lubéi liyeeni Satanási somu efekütu hun? Kei hénpulu, samina humá luagun lagumuhóun wéiyaasu le hasandirunbei adügǘwaali lan somu katei wuribati hun. Guentó álügüdagua humá hungua: “Ida liña san nóunabun? Arufuda numuti san ligaburi hasaminan gürigia ubouaguna o ligaburi lisaminan Bungiu?” (Gál. 5:16-26; Efe. 2:2, 3).

Anhein leferidira aban súdara lafiñen luagu lábuti, mageindagunbei buidu. Ligía hálugunbei íchaahatiña ñunsu iyeeniti lun hedebilidagüdüni hafiñen súdaragu. Buruguagüdatiña uganu kéiburi le: “Madünatiña hábutigu lun hafiñerun hawagu!” o “hanügüñadün lidoun günringuaü!”. Ani yusu hamuti furumiñeguarügü charati le hadügübei ábutigu lun hadügün lun larihín kamá hamuga inarüni le hariñagubei. Ligiaméme ladügübei Satanási. Súnwandan lálugun ledebilidagüdüni wafiñen hawagu wügüriña ha layusurubaña Heowá lun ladundehaniña lumutuniña.

 Ida luba san hóunigiragun hungua? Desidírü humá úaragua humá tun lóundarun Heowá luma lun híderaguniña ha líridubaña lun hadundehanu lóundarun, íbini chará hamá (1 Tesa. 5:12, 13). Mígira humá lun hayuridaguagüdünün ha agarabaagubaña lun Bungiu o amu áganiñu ha busenbaña hadügün damichi tun lóundarun Heowá, íbini genege lan inarüni lan le hariñagubei (2 Tesa. 2:2; Titu 1:10). Falá huméi adundehani le ichugúbei lun nibureinti Timotéu: mígiragüda huméi inarüni le meha arufudahóubei hun ani mabulieida huméi halía lan hafurendeirei (2 Tim. 3:14, 15). Ma anihein saragu katei le arufudubalin gayara lan hafiñerun luagu musu úaraguati, le layusurubei Heowá lidan san irumu le sügühalibei lun larufudahani inarüni woun? (Mat. 24:45-47; Ebü. 13:7, 17).

Haritagua huméi agayuaha lan giñe Satanási wawagu lidan amu igaburi. Anihein dan layusuruni anufudei “aban binadu ligaburi laburuchaguagüdüniwa ariñahani iyeeniti” (Easily Led—A History of Propaganda). Kei hénpulu, según aban máisturu alunduna gíriti Philip Taylor, gañei hamutiña asiriana háganiñu lau aban “polítika lánina anufudei luma lau ariñahani iyeeniti”. Ítarameme, layusurubei giñe Satanási anufudei hawéi gürigia, luéi éibaahouni, luéi óunweni luma luéi furumiñeguarügü katei lun lanufudedagüdünün ani lun hígiruni heseriwidun lun Heowá (Isa. 8:12; Her. 42:11; Ebü. 2:15).

Hígiruba san lun layusuruni Satanási anufudei lun ladügün lun heferidiruni huguraasun luma lun hafigouhan kóntüra Heowá? Ariñagati Hesusu: “Moun lumuti hanufudedun hawéi gürigia ha gabafubaña lun háfarunün hilagubei, lárigiñe lira siñá hadügün amu katei hau” (Luk. 12:4). Masaminara humá ni luagu murusun oura luagu magunfulirun lubéi lan Heowá lani füramasei lun lóunigirunün, lun líchugun “ubafu” hun luma lun líderagunün lun manufude humá luma lun úaragua huma lun (2 Ko. 4:7-9; 1 Fe. 3:14).

Inarüni aniheinbei lan dan hasandirun anufudei o heferidiruni huguraasun. Gama lumoun, haritagua huméi dimurei le lariñagubei Heowá lun Hosué: “Au ariñagubei bun lun báfaagun ani ganigi buguyame. Manufudedabá, meferidirunbeime buguraasun, ladüga au, le Bubungiute le Babureme, búmabadina ñein lumuti bidin” (Hos. 1:9). Danme le weiri lan hidiheri, furíei humá lun Heowá lau lóufudagun ani abahüdagua huméi sun hidiheri lun. Gayaraati hachoururuni líchugubei lan Bungiu “lidarangilan hun” le lunbei lóunigirunu hanigi luma hisaminan lun gayara lan hamahadun lun sun ariñahani iyeeniti le ñǘbuinbei lúmagiñe Satanási (Fili. 4:6, 7, 13).

Haritagua humagili san ariñahani iyeeniti le layusurubei Rabüsaké, le lóunagüle lurúeite Asiria, kóntüra lumutuniña Bungiu? Aba lariñagun aban katei ítarati: “Úati lunti lesefurunün luéi Asiria. Ni Bungiu, le Heowá, siñabei líderagunün”. Ani ábaya lariñagun lau mabusigari: “Ligía guánarügü óunahabalina agünrinchaguei fulasu le”. Aba líchugun Heowá gurasu lun lurúeite Hudá lau dimurei burí le: “Manufudedabá luagu hanabagunibu lumusuniña lurúeite Asiria” (2 Uru. 18:22-25; 19:6). Lárigiñe, aba lóunahan aban ánheli le agumuchubei hau 185,000 asiriana lidan ábanrügü áriebu (2 Uru. 19:35).

Arihadün san aban pelikula le ñein lubéi míchugun lan aban hádangiñe gürigia ha lídanbaña pelikula fe luagu tesetirúña lan aban sádara lubá? Ma busentün hamuga hagúaragun lun: “Maganbabaña, hesetiruña sádara bubá”? Guentó samina humá hawagun ánheligu aríaguawa ani ariñaga woun: “Meyeeda labu Satanási!”.

Meberesen humá lau ariñahani iyeeniti le lúmagiñeti Satanási (Ari. 26:24, 25). Aganba huméi Heowá ani afiñe humá luagu súnwandan (Ari. 3:5-7). Anha humá lun agunbirahani le ladügübei hun lau ínsiñeni: “Chula bau, niráü, ábame bagundaaragüdünina” (Ari. 27:11). Anhein hadüga, hóunigiruboun hanigi ani hagañeirubei wuribu.