ÁFAAGUATIÑA kristiánugu ha lánina furumiñeti sígulu saragu lun hapurichihani “uganu buiti le luáguti larúeihan Bungiu” houn sun gürigia ha hayaraatiña (Mat. 24:14). Añahein hagía aweiyasuhatiña lidoun amu burí ageiraü. Kéiburi apostolu Pábulu, aweiyasuhati meha lidoun fulasu le ñein lubéi Turükía guentó ani apurichihati meha ñein saragu dan le misioneru lubéi. * Kéiburi 2,000 irumu lárigiñe, lidan irumu 2014, adügǘwati aban wadagimanu espechaliti lun lapurichihóun Turükía. Ka adügübalin, ani ka uagu?

Añahein hóugiñe 2,800 apurichihatiña Turükía, gama lumoun, añahein kéiburi 79 míñunu gürigia ñein. Mini lan le añahein lan 28,000 gürigia luagu kada apurichihati. Furanguti hóunrügügili lan murusun gürigia hapurichiha ñein. Adügǘwati wadagimanu espechaliti ligía lun lapurichihóun houn sun ha gayaraabei hadarirún lidan murusun dan. Dan le ladügǘnbei wadagimanu ligía, aweiyasuhatiña 550 íbirigu ha ayanuhabaña túrüku lídangiñe amu burí ageiraü chülǘ Turükía lun híderaguniña íbirigu ha ñéinbaña apurichiha. Ka lánibei wadagimanu ligía resultóu?

Apurichihóuati houn saragu gürigia. Abürühati aban damuriguaü le Estambulbei: “Kei aba lubéi harihin gürigia gefentiña luagu Heowá lidan sun fulasu aba hálügüdüniwa anhein anihein lubéi aban adamurini espechaliti”. Abürühati giñe aban damuriguaü lidan uburugu Izmir: “Aba layarafadun aban wügüri le awadigimaridubei lidan aban fulasu le ñein lubéi tararamagua taxi lun aban wéiyaali lidan afiñeni ani aba lálügüdüni: ‘Ka asuseredubei? Aba san haganwoundagüdüni hapurichihan?’”. Furanguti, achawaha lani wadagimanu espechaliti le haritagun gürigia.

Gúndaatiña íbirigu ha lídangiñetiña amu burí ageiraü lau apurichihani ligía. Ariñagati aban íbiri gíriti Steffen, le awinwandubei Dinamarca: “Gayarati meha napurichihan sagü weyu houn gürigia ha maganbunñahagiña luagu Heowá. Sandítina meha nasubudiragüdüñein lan liri Heowá ñein”. Abürühati aban íbiri Faransu gíriti Jean-David: “Sügütiwa meha saragu oura apurichiha lidan ábanrügü üma. Buiti meha katei ligía! Hibe-agei gürigia ibidiñetiña meha gefentiña luagu Heowá houn. Tidan tibe-agei  muna ayanuhatiwa hama gürigia, arufudatiwa aban bidéu houn ani ígira wagía agumeiraguagüdüni”.

Ígiratiña 550 íbirigu hagía kéiburi 60,000 agumeiraguagüdüni lídanrügü bián dimaasu. Kei warihini, ídehati wadagimanu espechaliti ligía lun lapurichihóun houn saragu gürigia.

Aba laganwoundun ubebeni luagu apurichihani. Ínchaha lumutiña wadagimanu espechaliti ligía saragu íbirigu lun hagumeserun asaminara heseriwidun lidan dan dayarüti. Le linarün katei, aba haganwoundun prekursorugu ha adügübaña 70 oura luagu hati Turükía. Aban irumu lárigiñe apurichihani ligía, aba ñein hamá 82 iseri prekursorugu hanwoun ha meha ñéinbaña.

Afuranguagüda hamuti íbirigu ha aweiyasuhabaña lídangiñe amu ageiraü lubuidun lani wadagimanu espechaliti ligía efekütu lidan hapurichihan íbini lárigiñe hagiribudun hageiroun. Abürühatu aban íbiri yámanina gíritu Şirin: “Ménrengunti houn íbirigu turükíana híchuguni uganu buiti houn gürigia íbini dan le mama lan hóudiña apurichiha. Ánheinti nuguya hénrenguti nun ladüga haburitina. Gama lumoun, íderagua lumutina wadagimanu espechaliti ligía, hani íbirigu hénpulu luma saragu furíei. Darí lun apurichiha nan ani ígira nuguya tirahüñü garüdia houn gürigia tidan íngiini! Manarimeli haburi nan kei meha furumiñe”.

Ariñagati Johannes, aban íbiri yámanina: “Furendeitina fiú leksióun lun gayara lan nayusuruni lidan nani ministeriu. Hínsiñeti houn íbirigu ha awinwandubaña Turükía hapurichihan houn saragu gürigia ha hayaratiña ani meferidiruntiña dan lun hapurichihan. Desidírütina nadügüni ligiaméme dan le nagiribudunbei Yámani. Ani guentó gíbetimahaña gürigia ha únbaña napurichiha”.

Ariñagatu aban íbiri Faransuna gíritu Zeynep: “Wéiriti lani wadagimanu espechaliti le efekütu lidan nani ministeriu. Íderagua lumutina lun ganigi nan ani lúntima nafiñerun luagu Heowá”.

Wéiritimati úarani le hádanbei íbirigu. Ínsiñeni luma úarani le hádanbei íbirigu ha lídangiñetiña ámuñegueinarügü ageiraü gániti aban lanarime efekütu hawagu. Ariñagati Jean-David, le buga uágubei wayanuha: “Ariha wamuti areida hamá íbirigu. Óusera hamutiwa kei hamadagu ani kei tílana haban. Dará hamuti tubenari haban wabá. Subudi numuti meha luagu añahein lan wíbirigu lidan sun ubóu, ladüga  aliiha naali lan saragu wéiyaasu tidan wani agumeiraguagüdüni. Gama lumoun, ariha naali nungua guentó. Ábatima nagundaarun luagu lubúein nan Heowá. Rútina seremei lun luagu lubuidun chansi le”.

Ariñagatu giñe aban íbiri Faransuna gíritu Claire: “Óuseraguatiwa meha woungua kei iduheñu, meberesenga anhein Yámanina wabéi, Faransuna, Dinamarükana, o Turükíana. Ítara liña meha kamá hamuga gidá laali Bungiu láfadaragun ageiraü”.

Ariñagatu giñe aban Faransuna gíritu Stéphanie: “Arufudahati wadagimanu espechaliti le woun mama lan wechun ni wañeñe adügübei lun lidan wamá aban, ínsiñeni le wasandirubei luagu Heowá adügübalin lira”.

Saragu íbirigu ha apurichihabaña lidan wadagimanu espechaliti le gumesetiña asaminara háguyun Turükíoun lun hídehan lidan saragu wadagimanu le mégeigilibei lun ladügǘn ñein. Águyaaña fiú hádangiñe, ani seremei watiña luagu wadagimanu le hadügübei.

Kei hénpulu, lidan aban fulasu anihein meha aban sétanu ñein hau 25 apurichihatiña. Ábanrügüñein meha wéiyaali lidan afiñeni ñein luagu saragu irumu. Gama lumoun, lidan irumu 2015, aba háguyun sisi íbirigu Yámanigiñe luma lídangiñe Paises Bahos lun hídehan ñein. Ma lanarime ugundani le hasandirubei apurichihatiña!

Ida liña san hasandiragun íbirigu ha seriwihañabaña Turükía luagu fiú dan houngua? Kei lidan sun kesi, gagibuguatiña luma lénrengunga, gama lumoun, resibihaña saragu abiniruni. Ariha waméi le hariñagubei fiú hádangiñe.

Aba láguyun aban íbiri maríeiti gíriti Federico, Esüpáñagiñe, kéiburi 40 irumu lau. Ariñagati: “Íderagua lumutina lougua lan umegeguni numa lun netenirun lun katei le súdinitimabei”. Gayaraati san lariñagun houn íbirigu lun heseriwidun lidan igaburi le? Lariñaga: “Anha! Dan le bidin awinwanda lidan amu ageiraü lun bíderaguniña gürigia lun hasubudiruni Heowá, bederegeraguña bungua lúhaburugun. Ani sandí bumuti ida liña lan lóunigirunibu Heowá”.

Ariñagati giñe aban íbiri maríeiti gíriti Rudy, le lídangiñeti ageiraü Países Bahos, yarafa lun  60 irumu lau: “Gúndaatiwa weseriwidun lun Heowá hadan furumiñetiña apurichihatiña ani apurichihatiwa houn saragu gürigia ha maganbunñaha hamagili uganu buiti. Warihini ugundani le hasandirubei dan le hánharun lun inarüni ruti giñe ugundani woun”.

Sascha aban íbiri maríeiti kéiburi 40 irumu lau le águyubei Yámanigiñe. Ariñagati: “Sagü náfuridun apurichiha súnwandan nadarirun gürigia ha furumiñe haganbuni inarüni. Gúndaatina lau chansi le níchugubei houn lun hasubudiruni Heowá”.

Afuranguagüdatu aban íbiri maríeitu gíritu Atsuko, Hapónna kéiburi 35 irumu tau: “Súnwandan meha busén nan lun liabin Arümahedón lau lóufudagun. Gama lumoun, lárigiñe náguyun Turükíoun, aba níchugun seremei lun Heowá luagu gaguraasunmeme lan habá gürigia. Eibu narihini ida liña lan ligaburi lawadigimaridun Heowá, éibutima nabusenrun nayarafadun lun”.

Alisa, aban íbiri Rusiana kéiburi lóugiñe 30 irumu tau, ariñagatu: “Íderagua lumutina neseriwidun lun Heowá lidan igaburi le lun narihini buidu lan (Sal. 34:8). Ani ábaya tariñagun: “Mámarügüñei Núguchi Heowá, aban giñe Umadaü le yarafati nun le nasubudirubei buidu lidan ámuñegueinarügü kesi. Buin liña nibagari lau ugundani, sügǘ le buíduburiti luma abiniruni”.

Seremei wadagimanu espechaliti le adügǘbei Turükía, aganba hamaali saragu amu gürigia uganu buiti luáguti Larúeihan Bungiu. Gama lumoun, aniheingua saragu fulasu mapurichihóungili ñein. Sagü weyu hadarirun íbirigu ha águyubaña Turükíoun gürigia ha maganbunñahagiña layanuhóun luagu Heowá. Hínsiñeti hamuga san hun heseriwidun lidan aban fulasu libe le? Anhein ítara liña lubéi, haritagua huméi le lariñagubei Huan 4:35: “Ariha huméi nadü, lidaanihali lalubahóun”. Gayarati san hídehan lidan somu fulasu ubouagu le ñein lubéi “lidaanihali [lan] lalubahóun”? Anhein ítara liña lubéi, gumese humá adüga aransehani lúmagiñe guentó. Chouru huméi ánhadün lan apurichiha “chülǘ lumoun lidise-agei fulasu ubouagu” heresibiruba saragu abiniruni (Adü. 1:8).