1, 2. a) Según gumadi le líchugubei Hesusu le adarirubei lidan Matéu 28:18-20, kátima dasi súdinibei houn lílana damuriguaü kristiánu? b) Kaba álügüdahani wóunaba lidan arütíkulu le?

MÁSIÑATI gunda hamá apostolugu dan le hadamuridagunbei luagu aban wübü. Amuriahaali meha Hesusu hama lárigiñe láguyugun lun hóundaragun luma ñein (Mat. 28:16). Gayaraati ligía lan dan ligía ‘larufudagun lungua houn hóugiñe seingü-san afiñetiña ha óundaraguñubaña lidan aban’ (1 Ko. 15:6). Ka uagu lóundaraguagüdaña? Lun líchuguni lubuidun wadagimanu le houn: “Heiba lubeiti habügürü gürigia ha lílana sun fulasu, adüga humaña nánime disipulugu” (aliiha huméi Matéu 28:18-20).

² Ha meha aganbubalin lererun Hesusu chülütiña lun hádangiñe hamá lílana damuriguaü kristiánu lidan furumiñeti sígulu. Le meha dasi súdinitimabei le lunbei meha hadügüni lun hadügün lun haganwoundun lani Hesusu disipulugu. * Lidan wadaani, anihein saragu milu damuriguaü kristiánu inarüniti lidan sun ubóu. Ani añahagua adügei wadagimanu súdiniti le. Lidan arütíkulu le, wóunabuba gádürü álügüdahani: Ka uagu súdini lubéi lun wadügün disipulugu? Ka mini lubéi wadügün disipulugu? Ídehatiña san sun kristiánugu lidan hadügǘn disipulugu? Ani ka uagu mosu lubéi gaguraasun wamá dan le wadügüni?

3. Según Huan 14:6 luma 17:3, ka uagu súdini lubéi dasi lánina hadügǘn disipulugu?

³ Ka uagu súdini lubéi dasi lun hadügǘn disipulugu? Ladüga,  hárügüñanu afalarubalin Kristu gayara gamadagua hamá luma Bungiu. Gabagaritiña aban ibagari buiti guentó ani gayaraabei habihini ibagari magumuchaditi ámuñegü (aliiha huméi Huan 14:6; 17:3). Inarüni ru haali lan Hesusu aban dasi hanarimeti woun, íbini ítara, mama wábuguarügüñadiwa. Ariñagati apostolu Pábulu ligía lan hama amu kristiánugu íbirigu lan hagía “lidan wadagimanu eseriwida lun Bungiu” (1 Ko. 3:9). Ligíati, ru haali Heowá luma Kristu aban lubuidun chansi houn gürigia gafigountiña.

4. Ka wafurendeirubei lídangiñe sügǘ le labahüdahabei Iván tuma Matilde?

⁴ Gayaraati líchugun hadügǘn disipulugu saragu ugundani woun. Ariha waméi le asuseredubei lun Iván tuma Matilde aban feru maríeitiña Kolonbiana. Aba hapurichiha lun aban nibureinti gíriti Davier, le ariñagubei houn: “Hínsiñeti hamuga nun lun nadügün hasansiruni lidan nibagari, gama lumoun siñá numuti”. Aban meha sásaamu lidan aboksihani ani yúsuti düroga, gátadi ligía. Ani laganóuña meha tuma Érika to ladari. Abahüdahati Iván: “Aba wagumeserun abisidahei lidan aban aüdü le ñein lubéi leredera. Mosu meha waweiyasuhan saragu oura tidan beiki lidan aban üma le buinbei lau baribarabu. Dan le tarihinbei Érika lasansirun lusan luma ligaburi Davier, aba giñe tagumeserun aturiahoun Bíbülia”. Lau lásügürün dan, aban lígiruni nibureinti le düroga, átaguni luma aboksihani. Aba giñe lamarieidun tuma ladari. Ariñagatu Matilde: “Dan le labadiseirunbei Davier tuma Érika lidan irumu 2016, aba waritaguni le lariñagubei: ‘Hínsiñeti hamuga nun lun nadügün hasansiruni lidan nibagari, gama lumoun siñá numuti’. Siñá wamuti awanda aba wayahun”. Inarüni sandí wamá aban lanarime ugundani dan le wíderaguniña gürigia afalarei Kristu.

5. Ka furumiñetibei katei lun wadügün disipulugu?

⁵ Le furumiñeti le lunbei wadügüni wáluahaniña ha busenbaña hasubudiruni Heowá (Mat. 10:11). Warufudubei gefentiña lan luagu Heowá inarünitiña wagía ánhawa ayanuha hama sun gürigia ha wadarirun. Ani arufuda wamuti kristiánugu lan wagía ánhawa gaganbadi lun lugumadin Hesusu lun wapurichiha.

6. Kaba íderaguawa lun buidu lan lidin woun lidan apurichihani?

⁶ Añahein gürigia hayumahaña lun hafurendeiruni inarüni le tídanbei Bíbülia. Añahein amu, furumiñe genegeti mabusenrun hamá, másiñati mosu lan wadügün lun busén hamá. Lun buidu lan lidin woun lidan apurichihani lunti wasubudiruni kaba lan wariñaga. Anúadira wamá tema le gayaraabei ladügün lun busén hamá haganbuniwa ani samina wagíame ida luba lan wariñaguni.

7. a) Ida luba wagumeserun aban yanu? b) Ka uagu súdini lubéi lun waganbuniña gürigia ani arufuda wagíame inebesei houn?

⁷ Gayaraati wariñagun: “Hínsiñeti hamuga nun lun naganbuni ka lan hisaminanbei luagu tema le. Uguñe weyu lidan sun ubóu wagagibudaguña luma saragu turobuli. Afiñetün san mégeiwa lan aban urúei lidan sun ubóu lun laransehani?”. Lárigiñe gayaraabei waliihani ani ayanuha wagíame luagu le lariñagubei Danieli 2:44. O gayaraati wariñagun: “Busentina hamuga nadügün aban álügüdahani hun. Ka san buídubei lun larufudahóun houn isaanigu lun buidu lan hagaburi?”. Gayaraabei wakutihani le lariñagubei 2 Lúrudu 6:6, 7. Meberesenga ka lan tema wanúadirubei, samina wamá hawagun gürigia ha lúnbaña wayanuhan hama. Samina wamá luagu ida luba lan buidu lan lidin houn lau hafurendeiruni inarüni le tarufudahabei Bíbülia. Danme le wayanuhan  hama gürigia, súdiniti lun waganbuniña ani inebe ligíame woun le hariñagubei. Ítararügübei gunfuranda wamaniña buidu ani másiñati haganbubadiwa lan.

8. Ka uagu moun lumuti lubéi labuchadun wawagun abisidahaña gürigia?

⁸ Lubaragiñe lánharun aban gürigia lun laturiahanu Bíbülia, háfuga mosu lan wasagarun dan áfaagua wagíame lun wagiribudun abisidahei saragu wéiyaasu. Ka uagu? Lidan furumiñeti lúgaaru, gayaraati ua hamá hábiñe dan le wagiribudun abisidahaña o siñá lan hetenirun woun. Másiñati mégeibadiwa lan lun wabisidahaniña saragu wéiyaasu lun buidu lan hasandiragun houngua wama luma lun hánharun lun haturiahan. Haritagua waméi lun lan laweiridun aban nadü mosu wáturaguni saragu wéiyaasu. Ítarameme chóuruti laganwounduba lan ínsiñeni le lasandirubei aban gürigia luagu Heowá luma luagu Kristu ánhawa ayanuha luma gabügürügua tuagu Lererun Bungiu.

9, 10. Ka uagu wariñaga sun lan wagía ídehatiwa lun wadariruniña gürigia haruma tanigi?

⁹ Sun kristiánugu ha apurichihabaña ídehatiwa lun wadariruniña gürigia ha haruma tanigi. Gayaraati wagoubaguagüdüni wadagimanu le wadügübei lumoun láluahoun aban irahü le eferidiruti. Ida? Ariha wamá aban sügǘ inarünti. Lun láluahoun aban irahü ǘrüwa irumu lau, le meha eferidirubei, ídehatiña kéiburi 500 gürigia. Lárigiñe 20 oura lúmagiñe leferidirun irahü, aban ladariruni aban hádangiñe ha áluahabalin lidan awasi-agei. Gama lumoun, máhati lichugún uéiriguni lun lau ladariruni, ábarüga lariñagun: “Darí wamá seremei lun áfaaguni le hadügübei saragu san gürigia”.

¹⁰ Saragu haña gürigia féridiñu haña kei irahü le. Memenigintiña ani ayumahatiña heresibirun ídemuei (Efe. 2:12). Hóugiñe widü  míñunu gefentiña luagu Heowá wáluahañanu gürigia burí ha. Másiñati madarirun wamá wagía woungua ni aban ha busenbaña haturiahanu Bíbülia, ánhañati amu apurichihatiña ha apurichihabaña lidan fulasu le ñein lubéi wapurichihan daritiña. Dan le ladarirun aban íbiri aban gürigia le busenbei lun lani lan Kristu disipulu, sun wagía gébunati lun wagundaarun.

11. Íbini mama lan wíchuguña aturiahani tídangiñeti Bíbülia guentó, ida luba gayara lan wídehan lun hadügǘn disipulugu?

¹¹ Íbini mama lan wíchuguña aturiahani tídangiñeti Bíbülia guentó, gayaraati wídehan lidan amu igaburi lun wadügün disipulugu. Kéiburi dan le lachülürün aban gürigia iseri tidoun Luba Wadamuridagun, gayaraati wíchugun buiti achülürüni lun luma lun wadügün lun lasandiragun lungua buidu. Ítara luba wíderaguni lun lachoururuni ínsiñeni lan adügübei lun hasubudiruniwa kristiánugu inarünitiña (Huan 13:34, 35). Lidan amu oubaü, óunabagülei le wíchugubei lidan adamuridaguni, íbini mamigifen lan gayaraati larufudahan houn ha iserigiñabaña lun hafuranguagüdüni hafiñen dan le híchuguni hóunabagüle tídangiñe sun hanigi ani lau inebesei. Gayaraati giñe wáfuridun apurichiha luma aban apurichihati le iserigili luma lun wíderaguni ayusuroun Bíbülia buidu lun lachülürün tidoun hanigi gürigia. Lau wadügüni lira, warufudahaña lun lun láyeihani Kristu (Luk. 10:25-28).

12. Mégeitiwa san aban igaburi espechaliti lun wadügün disipulugu? Abahüdagua humá aban sügǘ.

¹² Moun lumuti wasaminarun megei wamá aban igaburi espechaliti lun warufudahan lun somu gürigia lun aban lan lani Hesusu disipulu. Líderagubadiwa le tadügübei Faustina, to awinwanduboun Boliwia, lun gunfuranda wamani ka lan uagu. Dan le tasubudirunbaliña gefentiña luagu Heowá, maliiraditu meha, guentó furendeiharu aliiha murusunraü. Ani badiseiharu giñe, hínsiñeti giñe tun tarufudahani inarüni houn gürigia. Liibe-agei dan, sagü dimaasu rutu 5 aturiahani tídangiñe Bíbülia. Lau sun galiiradi hamá hiibe-agei gürigia ha aturiahabaña tuma sügǘ tau, íderaguaaru 6 gürigia lun gayaraabei lan habadiseirun (Luk. 10:21).

13. Íbini beresegu waña lan, kaba burí abiniruni weresibira ánhawa ídeha lidan dasi lánina hadügǘn disipulugu?

¹³ Saragu kristiánugu mosu burí hetenirun lun buligasion súdiniti ani wéiriti beresegu hamá. Íbini ítara, sagatiña dan lun híchugun aturiahani tídangiñeti Bíbülia ani adügati katei le lun gunda hamá saragu. Ariha waméi le asuseredubei tun Melanie, aban úguchuru to agüriarunbarun tisaani to 8 irumu tau, tábuguarügü. Lanwoun lira, nadagimeintu meha sun weyu, ídehatu meha giñe óunigirei túguchi le sándibei lau kánserü. Lidan meha aban aüdü Alaska tawinwanda ani díseti, tuguyarügüñoun meha gefentu luagu Heowá ñein.  Súnwandan meha tamuriahan luma Heowá lun líchugun erei tun lun táfuridun apurichiha lau sun meha diliga lan, lugundun busentu meha tadarirun somu gürigia lun tarufudahan luagu le tariñagubei Bíbülia. Dan lárigiñe, aba tapurichihan tun Sara to agundaaruboun lau tasubudiruni giri lan Bungiu. Lau lásügürün dan, ánhatu Sara lun taturiahanu Bíbülia. Ariñagatu Melanie: “Wéiriti meha lubucha nuagu wándaradi rábounweyu, íbini ítara, dandu nisaani kei nuguya, ñǘdüntiwa íchiga aturiahani tídangiñeti Bíbülia tun Sara ani adügati meha le lun buidu lan wasandiragun woungua. Hínsiñeti meha woun lun wáluahan ariñahani lun wíchugun óunabagülei lun tálügüdaha Sara, wéiriti giñe wagundan lau warihinun adügagua tungua lumadame Heowá”. Lau ganigi mígiraguagüdüntu Sara tungua lun híchugun tiduheñu hama tílana tiligilisin lidere dan tun, ígira tumutu tiligilisin ani badisei tuguya.

14. a) Ka ida genegegua lan wadügün disipulugu luma óuchahani? b) Ka un línchahawa le lariñagubei Pábulu lidan 2 Timotéu 4:1, 2?

¹⁴ Íbini genege lan woun marihin wamá awanseruni lidan wapurichihan, meferidira waméi wemenigin libügürü wadarirun gürigia ha busentiña lun lani hamá Hesusu disipulu. Haritagua waméi góubaguagüda lani Hesusu dasi le luma óuchahani. Gayaraati herederun óuchahatiña saragu oura óuchaha ani madigintiña ni aban úduraü. Liibe-agei dan, óuchahatiña guñoun o lubaroun larugan ani anihein dan mosu houdin dise (Luk. 5:5). Ítarameme, añahein saragu gefentiña sügütiña saragu oura áluahaña gürigia lau gurasu lidan ámuñegueinarügü fulasu. Adüga hamuti lun gayaraabei lan hadarirun saragu gürigia. Ha áfaagubaña lun hadügüni wadagimanu espechaliti le, liibe-agei  dan, ibihatiña hayanuhan hama gürigia ha busentiña hafurendeirun. Gayaraati san wapurichihan lidan aban oura, weyu o fulasu le ñein lubéi gachansintima wamá lun wayanuhan hama saragu gürigia? (Aliiha huméi 2 Timotéu 4:1, 2).

15. Ka uagu mégeiwa lubéi gurasu dan le lichugún aturiahani tídangiñeti Bíbülia?

¹⁵ Ka uagu mégeiwa lubéi gurasu lun lichugún aturiahani tídangiñeti Bíbülia? Aban lídangiñe, ladüga ua lan buídurügü lan lúnrügü líderawagun aturiahati asubudirei le tarufudahabei Bíbülia luma lun línsiñedun lun. Mosu giñe wíderaguni asubudirei Heowá, le úmagiñebei tiabin Bíbülia luma lun línsiñedun lun. Amu luéi warufudahan lun aturiahati asubudirei ka lan lamuriahabei Hesusu hámagiñe lani disipulugu, lunti giñe wíderaguni asubudirei ida luba lan lawinwandun kei aban kristiánu inarüniti. Mosu mígirun wamani lidan láfaagun lafalaruni adundehani méiniti le tídanbei Bíbülia. Añahein aturiahatiña sansi hamuti ligaburi hasaminan luma hechun lídanrügü fiu hati, añahein amu mégeitiña saragu dan.

16 Ka wafurendeirubei luagu Raúl?

¹⁶ Arufudati le asuseredubei lun aba misioneru Perú súdini lan lun gaguraasun lan gürigia. Ariñagati: “Aturiaha laaru meha aban aturiahati Bíbülia gírigi Raúl, bián líburu. Lau sun lira, anihagua meha lau saragu turobuli lidan libagari. Wuribati meha libagari keisi maríeiti, ayanuhagili meha bulagiadi ani hénrenguti meha houn lisaanigu lun inebebei lan houn. Gama lumoun kei meha abasiha lubéi lidoun adamuridaguni, sigitina abisidahei ligía hau liduheñu. Ǘrüwa irumu lárigiñe nasubudiruni, aba laransehani libagari ani aba labadiseirun”.

17. Kaba wakutiha lidan le aban arütíkulu?

¹⁷ Ariñagati Hesusu woun lun woudin “habügürü gürigia ha lílana sun fulasu” luma lun wadügün disipulugu. Lun gaganbadi wamá lun gumadi le, mosu wayanuha saragu wéiyaasu hama gürigia ha mítaranbei hasaminan kei wagía, íbini hama ha mídinbaña tidan ni aban ligilisi o hama ha mafiñenbaña anihein lan Bungiu. Lidan le aban arütíkulu, wakutihaba libügürü ida luba lan wanügüni uganu luáguti Larúeihan Bungiu houn gürigia ha.