TIDAN Bíbülia anihein saragu dimurei le hariñagubei gürigia ha ítarabaña “kei wagía”, tídangiñe sun hanigi (Sant. 5:17). Kei hénpulu, ariñagati apostolu Pábulu furangu: “Dan lan le busén nan nadügüni le buídubei, wuribatirügüñein [...] nadüga. [...] Fugiabu au!” (Rom. 7:21-24). Chóuruti ménrengun lan woun lun wíchaagun woungua lidoun lilugaarun. Dan le wageindaguña lan luma wafigoun guánarügü, adügati dimurei le lariñagubei tídangiñe sun lanigi lun wibihin darangilaü.

Gama lumoun afuranguagüda lumuti giñe Pábulu le lasandirubei luagu lani Hesusu sákürifisiu. Lidan Galasiana 2:20 ariñagati: “Liráü Bungiu le hínsiñehabubei nun, aba lederegeragun lungua lun lounwen nuagu”. Chouru lumuti meha Pábulu katei le. Saminatiwa san ítara kei ligía? Háfuga anihein lan dan liábingua machouruni woun.

Anhein wáfaaguña lubéi luma luriban saminaü ladüga burí figóu le wadügübei luagu aban dan, háfuga gürewei lan woun liibe-agei dan, lun wánharun lun línsiñehabu luma luagu feruduna láadiwa lan Heowá. Ani háfuga giñe hénrengutima lan woun lun warihini lani Kristu sákürifisiu kei aban idewesei le ladügübei luagu kada aban wádangiñe. Le san lúgubu busén lan Hesusu lun warihini lani sákürifisiu kei aban idewesei? Anhein ítara liña lubéi, kaba íderaguawa arihei ítara? Ru wamá óunabagülei lun bián álügüdahani le.

Busenti Hesusu lun warihini lani sákürifisiu kei aban idewesei le ladügübei luagu kada aban wádangiñe. Ka uagu chouru wabalin katei le? Samina wamá luagu abahüdaguni le lídanbei Lúkasi 23:39-43. Ánhati aban hádangiñe wügüriña ha ádarawagubaña luagu wagabu lóubagiñe Hesusu lun lidurun. Chóuruti adügaali lan meha wügüri ligía aban katei le hanarimeti luriban, lugundun hounti meha gürigia ha adügaañabaña aban lanarime wuribani lanarime abeichúni le leresibirubei. Le lueirin lidiheri wügüri ligía luagu le gádanbalin, aba layumuragun lun Hesusu: “Haritaguabatia nuagun danme le lagumeserun barúeihan”.

Ida liña lóunabuni Hesusu? Samina wamá luagu áfaaguni le ladügübei Hesusu lau gáriti luagu lun larihin luagun wügüri wuribati ligía. Lau sun weiri lan gáriti le lasandirubei Hesusu, ibihati erei lun láhayachun lau ínsiñehabuni luagun wügüri ligía ariñageina lun: “Ninarün bau, ariñagatina bun uguñe: Númabadibu lidan paraísu”, TNM. Gayaraati hamuga ariñagarügü lan Hesusu lun liábiña lan Liráü Wügüri Garaüwarügüti lun ‘líchuguni libagari lebegime hasalbarun saragu’ (Mat. 20:28). Gama lumoun, íderagua lumuti Hesusu wügüri wuribati ligía asubudirei lederegeruñein lan libagari luagu. Ariñagati lun lau ínsiñehabuni, “númabadibu” ani ayanuhati giñe lun luagu buiti le lunbei libihini seremei lebegi esefuruni: lawinwandun Ubouagu lidan aban Paraísu.

Meseriwidungubeigili meha wügüri wuribati ligía lun Bungiu. Lau sun lira, chóuruti busén lan meha Hesusu lun gunfuranda lani wügüri ligía ladügüñein lan Hesusu sákürifisiu ligía luagu keisi aban idewesei lun. Ligíati, anhein meha busén lubéi Hesusu lun gunfuranda lani wügüri ligía katei le, ma chóuruti giñe agurabatima lan lun ítara lan gunfuranda lani aban kristiánu badiseihali le eseriwidubei lun Bungiu? Ligíati, kaba íderaguawa ánhara barǘ lan lani Kristu sákürifisiu buiti lun kada aban wádangiñe íbini afigouha wamá luagu aban dan?

Gunfuranda lumuti meha Pábulu hilá lan Hesusu luagu ladüga óunaha lani Hesusu apurichiha houn amu. Ariñagati: “Seremei numuti Wabureme Hesukrístu, le íchugubei ubafu nun lun wadagimanu le, luagu lanügünina keisi aban wügüri gúnfuliti, luma luagu líchugunina lun neseriwidun lun, lau sun meha adimureha nan wuriba luagu [...], anabanei ani éibaahanei” (1 Tim. 1:12-14). Adügati leresibiruni dasi luáguti apurichihani lun lachoururuni ibiha lani lugudemehabu luma línsiñehabu Hesusu ani afiñe lan giñe luagu. Rúhali giñe Hesusu aban dasi lun kada aban wádangiñe lun wapurichiha luagu Larúeihan Bungiu (Mat. 28:19, 20). Gayaraati san líderaguniwa wadagimanu lánina apurichihani le lun gunfuranda wamani hilá lan Hesusu wawagu?

Ariha waméi le asuseredubei lun Albert, le málügilibei lúmagiñe lagiribudun lun Heowá ani barǘ haali meha kéiburi 34 irumu bugawañu lídangiñe damuriguaü. Ariñagati: “Magidati nifigoun lídangiñe nisaminan. Gama lumoun, dan le náfuridun apurichiha sanditina rúhali lan Hesusu aban dasi nun ítara kei lun Pábulu. Adügati le lun nagundaarun ani íderagua lumutina lun buidu lan nasaminarun nuougua, luagu nibagari luma luagu nibagari ámuñegü” (Sal. 51:3).

Aban meha wügüri le fásiti Allan ani adügati meha saragu wuribani lubaragiñe lasubudiruni inarüni. Ariñagati: “Anahagua asaminara luagu sun wuribani le meha nadügübei. Anihein dan, aba nírudagun. Gama lumoun, teinki numuti Heowá lau líchugun chansi lun aban gafigounti kei au lun nanügüni uganu buiti houn amu gürigia. Haritaguagüda lumutina ligaburi hóunabun gürigia lun uganu weiri lan lubuidun luma línsiñehabu Heowá. Sanditina layusuruñadina lan lun níderagun gürigia ha ítarabaña kei meha au”.

Adügati wídehan lidan apurichihani lun wayusuruni were lun wadügüni le buídubei luma lun wasaminarun luagu katei buiti. Adügati lun wachoururuni gudemehabu lan Hesusu woun, hínsiñe wamá lun ani afiñe ligía wawagu.

Másiñati tasigiramémeba lan wanigi íchiga wadurun luagu figóu le meha wadügübei luagu aban dan darime lagünrinchawagun lagübüri ubóu le le lábugiñebei lubafu Satanási. Kaba íderaguawa lun mígiraguagüdün wamá woungua lun burí saminaü le?

Áfaaguati Jean súnwandan lun masandiragun lan lungua wuriba luagu meha luriban lóuserun dan le nibureingili. Ariñagati: “Hínsiñeti dimurei le nun le ariñagubei ‘wéiritimati Bungiu sügǘ tau wanigi’” (1 Huan 3:19, 20). Ibihatiwa giñe gurasu lau wasubudiruni gunfuranda lani Heowá luma Hesusu gafigoun wamá. Haritagua waméi ínsiñeni lan ínchahabaliña lun hesefuruniña gürigia gafigountiña ha asakürihabaña (1 Tim. 1:15).

Wachoururubei aban lan idewesei lebegi esefuruni lun kada aban wádangiñe, ánhawa adüga bián katei: lau wararamagun asaminara hulili ida liña lan lóuseruniña Hesusu gürigia gafigountiña luma lau wáfaagun sunsuinagubei lun wagunfulirun lau dasi lánina apurichihani le ru láalibei woun. Ítara, gayaraabei wariñagun kei lariñagun Pábulu: Hesusu “hínsiñehabubei nun, aba lederegeragun lungua lun lounwen nuagu”.