1. Lidan burí irumu le sügühalibei, ka asansiruni anügübei fulasu lidan fiu ageiraü?

LIDAN saragu milu irumu le ásügürübei, hiibe-agei gürigia galigilisitiña meha. Ani lidan burí irumu le sügühalibei anihein óunwenbu asansiruni. Éibutima dan gánwountimahaña gürigia ha ariñagubaña mani hamá relihión. Lidan fiu ageiraü, hiibe-agei gürigia mánitiña ni aban relihión * (Mat. 24:12).

2. Kátima lébunabei eibu lubéi dan gíbetima hamá gürigia masandiraguntiña houngua gani hamá relihión?

² Kati uagu añahein lubéi saragu gürigia masandiraguntiña houngua gani hamá relihión? *. Añahein hádangiñe lúnrügüñein hagunda hetenira luma lun hetenirun lun haturóbulin (Luk. 8:14). Ha híbiri, mafiñenhaña luagu Bungiu. Añahein giñe hádangiñe afiñetiña luagu Bungiu, saminatiña sügühali lan dan lun gani hamá gürigia relihión, masudinin lan ani múaran lan relihión tuma siensia. Másiñati aganba hamá hariñagun tidan burí radiu, bigibigitu o katei libe le luagu saliguarügü lan sun katei lungua, ani aganba hamutiña giñe hamaisturungu hama hamadagu ariñagei dimurei burí le. Gama lumoun, míbeti ariñahani le achoururagüdübalin houn anihein lan Bungiu. Ha híbiri mínsiñeti houn harihini hanarime lan hafuudun alidihatiña relihión luagu ubafu luma seinsu. Anihein burí ageiraü, rútiña gumadimatiña lébeha le lunbei ladügüni relihión.

3. Ka lébubei ladügǘn arütíkulu le?

³ Óunaha lumutiwa Hesusu “habügürü gürigia ha lílana sun fulasu”  (Mat. 28:19). Ida luba wíderaguniña ha mídinbaña tidan ni aban ligilisi lun línsiñedun Bungiu houn luma lun lani hamá Kristu disipulugu? Lunti gabaroun wamani, ámuñegueinarügü luba lan hóunabun gürigia lun uganu le wanügübei según ageiraü le ñein lubéi hagüriarua. Kei hénpulu, ha agüriarubaña Yuropa másiñati móunabunbaña lan kei lóunabun aban gürigia le Asiana. Gíbetiña gürigia Yuropa subuditi somu ariñahani houn tídangiñe Bíbülia ani aganbaaña luagu Bungiu lan adügübalin sun katei. Ánhañati ha awinwandubaña Asia hiibe-agei ibidiñeti ni kata houn tuagu Bíbülia o murusunrügüñein lan hasubudin tuagu ani háfuga maha hamá lun saminaü luagu Bungiu lan adügübalin sun katei. Le lébunabei ladügǘn arütíkulu le lun líderaguniwa lun wachülürün tidoun hanigi gürigia ha únbaña wapurichiha, meberesenga kátaña lan o ka lan hafiñenbei.

4. Ka uagu lunti lubéi buidu lan wasaminan hawagu gürigia?

⁴ Buidu lan wasaminan hawagu gürigia. Sagü irumu hadügagun gürigia ha meha mídinbaña tidan ni aban ligilisi houngua gefentiña luagu Heowá. Saragu hádangiñe harumagubeiñein habagari ani mínsiñeti houn harihini mabusigari le ladügübei relihión, ani ha híbiri marumanti meha habagari. Saragu hádangiñe mosu meha hígiruni bisiu. Lau lídehan Heowá, gayaraati hadarirún ha lúntiñabaña ibagari magumuchaditi (Adü. 13:48; 1 Tim. 2:3, 4).

5. Ka adügübei lun hóunabun fiu gürigia lun uganu le wanügübei?

⁵ Arufuda wamá ínsiñehabuni ani subudi lan woun ida luba lan wariñaguni dimurei. Libe-agei dan buiti hóunabun gürigia lun uganu le wanügübei mama ladüga le wariñagubei, ladüga ligaburi ida liña lan wariñaguni. Hínsiñeti houn lun warufudun ínsiñehabuni, lun wasubudiruni ida luba lan wayanuhan hama luma lun berese wamá hau. Mafosurun wamutiña lun haganbuniwa. Álugarügütiwa lun gunfuranda wamani hasaminan luagu relihión luma ka lan uagu hasaminara ítara. Añahein hádangiñe magundantiña lau hayanuhan luagu relihión hama gürigia ha ibidiñetiña houn. Añahein asaminarutiña larufuduña lan gürigia menebenehabuni dan le lálügüdaha ka lan lisaminanbei gürigia luagu Bungiu. Ani ha híbiri nibusigaritiña harihín aliiha Bíbülia dántima le luma lan aban gefenti luagu Heowá. Furumiñeguarügü le gádanti le ídanbei ladariragua gürigia lungua busentiwa lun inebe lan lisaminan woun (2 Tim. 2:24).

6. Ka ladügübei apostolu Pábulu lun haganbuni gürigia, ani kaba wadüga lun wáyeihani?

⁶ Ka lunbei wadügüni anhein genege lubéi woun magundan lan somu gürigia laganbuniwa ayanuha tuagu Bíbülia, luagu Bungiu, luagu le ladügübei Bungiu o luagu relihión? Adüga wamá kei ladüga apostolu Pábulu. Dan le lapurichihabei houn huríu, yusu lumutu Lererun Bungiu lun ladügün lun hasaminarun huríu. Dan le layanuhabei hama gürigia Areupagu ha aturiahabalin harufudahan güriegu, maliihati tídangiñe Lererun Bungiu houn ayanuharügüti luagu dimurei le tídanbei (Adü. 17:2, TNM, 3, 22-31). Ida luba wáyeihani le ladügübei? Ánhawa ayanuha luma aban gürigia le mafiñenti tuagu Bíbülia, másiñati lunti lan masaga wamanu. Ánhawa asaminara mabusenrun lan gürigia lun larihín aliiha Bíbülia wama, arufuda waméi bérusu lun lídangiñe gágamuru o tídangiñe tiraüraü wani konputadora.

7. Lau gabaroun wamani le lariñagubei 1 Korintuna 9:20-23, ka katei buídubei lun wadügüni ítara kei Pábulu?

⁷ Gunfuranda wamaña gürigia ani aganba wamaña. Lunti wáfaagun lun gunfuranda wamani ka burí lan katei adügübei lun hasaminarun gürigia somu katei (Ari. 20:5). Arihaya waméi le ladügübei Pábulu. Huríu meha ligía, ani chóuruti lunti lan meha lasansiruni ligaburi lapurichihan houn ha mámabaña huríu, ha meha ibidiñebei ni kata houn o murusunrügüñein lan hasubudin luagu Heowá luma tuagu Lererun. Lidan wakesin, anhein busén wabéi lun gufuranda wamaniña gürigia ha lídanbaña fulasu le ñein lubéi wapurichihan luma lun wíchaagun woungua lidoun halugaarun, háfuga mosu lan wáluahan ariñahani tidan  wani agumeiraguagüdüni o wamuriahan ídemuei luma somu íbiri le subudihali saragu (aliiha huméi 1 Korintuna 9:20-23).

8. Ka igaburi buídubei lun lagumeserúniwa aban yanu tídangiñe Bíbülia?

⁸ Le wabusenrubei lun wadarirun gürigia ha busentiña haganbuni uganu le wanügübei (Mat. 10:11). Lun hibihini, lunti wígiruniña gürigia lun hariñaguni le hasaminarunbei luma lun waganbuniña. Álügüda lumutiña aban íbiri Ingülatérana gürigia ka lan lunbei ladügǘn lun hawinwandun maríeitiña gúndaañu, larufudahóun houn isaanigu o hagagibudagun gürigia luma marichaü. Lárigiñe hóunabun gürigia, aba lálügüdüniña: “Ka hisaminanbei luagu adundehani le le abürüdǘbei kéiburi bián milu irumu guentó?”. Mayanuhanga tuagu Bíbülia, aba larufudun fiu bérusu houn gürigia lídangiñe ligagamurun le úarati luma álügüdahani.

9. Ida luba wíderaguniña gürigia ha mabusenrunbaña hayanuhan luagu Bungiu?

⁹ Ida luba wachülürün tidoun hanigi gürigia ha mabusenrunbaña hayanuhan luagu Bungiu? Lau wadimurehan luagu tema le kamanibei lidan ibagari. Liibe-agei dan hínsiñeti houn saragu hayanuhan luagu katei le geyegubei wau, másiñati gayara lan wariñagun: “Háfuga subudi humuti saragu lan katei le ladügübei wügüri lídangiñeti katei le geyegubei wau. Kéiburi ha adügübalin mikürófonu aturiaha hamuti arigeirugu ani ha adügübarun kámara aturiaha hamuti agu. Ka ñǘbuinbei hichügüwagu dan le hasaminarun luagu sun katei le geyegubei wau? Hariñaguña hamuga san aban lan gürigia, aban lan erei buiti, o amu burí katei?”. Lárigiñe waganbuniña gayaraati wariñagun: “Dan le haturiahani ínhenierugu ligaburi ladügǘn agu luma arigeirugu, másiñati wálügüdagun woungua ka lan úmagiñe hafurendeira. Wéirigüda lumutu nanigi dan le naliihan álügüdaha lan aban poeta lánina binadu dan anhein siñá lubéi laganbun le adügübalin arigeirugu ani anhein siñá lubéi larihin le adügübalin agu. Lárigiñe aban lariñagun poeta le, le lan adügübalin katei le ligía lan íchugubei subudi houn gürigia. Añahein aturiahatiña siensia ariñaga hamuti giñe ligiaméme” (Sal. 94:9, 10). Gayaraabei warufudun aban bidéu houn gürigia lidan jw.org^® luagu “Opiniones sobre el origen de la vida”, lidan seksioun “Entrevistas y experiencias” (belú humá lidoun PUBLICACIONES > VIDEOS). Gayaraati giñe wederegerunu garüdia ¿Es la vida obra de un Creador? o El origen de la vida. Cinco cuestiones dignas de análisis.

10. Ida luba wagumeserun aban yanu luma aban gürigia le mabusenrunti layanuhan luagu Bungiu?

¹⁰ Hiibe-agei gürigia busentiña lun labuidurun ibagari ámuñegü. Gama lumoun, hanufudetiña saragu luéi lagünrinchawagun Ubóu o luéi siñá lan lawinwandún lidan. Ariñagati aban óunigiruti sirkuitu Noruegana, gürigia lan ha mabusenrunbaña hayanuhan luagu Bungiu aranseñu haña lun hadimurehan  luagu turobuli le ubouagubei. Lárigiñe labusurun lun aban gürigia, aba lálügüdüni: “Genegeti san hun labuiduruba lan katei ámuñegü? Kaba funa san abuiduragüdei? Polítikuba funa san adügei o aturiahatiña siensiasi, odi somu gürigia?”. Lárigiñe laganbuni, ariñagati o aliihati somu bérusu le ayanuhabei luagu aban lubuidun ámuñegü. Añahein hínsiñeti houn haganbuni füramasei luagu magünrinchawagunbei lan Ubóu luma hawinwanduba lan ha buítiña lidan lun súnwandan (Sal. 37:29; Apur. 1:4).

11. a) Ka uagu buidu lubéi wayusurun ámuñegueinarügü tema lun wagumeserun ayanuha hama gürigia? b) Ka lunbei wadügüni lau gabaroun wamani le lariñagubei Pábulu lidan Rómana 1:14-16?

¹¹ Buídubei wadüga lun wayusurun ámuñegueinarügü tema o ariñahani lun wagumeserun ayanuha hama gürigia. Ámuñegueinarügütiña gürigia hawariuagua. Le hínsiñebei houn amu, mínsiñeti houn ha híbiri. Añahein aranseñu haña lun hayanuhan luagu Bungiu luma tuagu Bíbülia, gama lumoun añahein hínsiñeti houn lun hayanuhan dan le lagumeserun yanu lau amu burí tema. Meberesenga ida liña lan línsiñedun houn gürigia lun wayanuhan hama, le lunbei wadügüni lun meferidirun wamani chansi lun wayanuhan houn sun hawuyeri gürigia (aliiha huméi Rómana 1:14-16). Maweiyasun wamá abulieidei Heowá lan adügübei lun laganwoundun ínsiñeni tidan hanigi gürigia ha hínsiñehabubaña lun irichaü (1 Ko. 3:6, 7).

12. Ka gayaraabei wadügüni lun wayanuhan hama gürigia ha Asiana ha masaminarungubeitiña anihein lan aban Bungiu le Adügübaliwa?

¹² Lidan sun ubóu daritiña íbirigu gürigia ha lídangiñetiña Asia. Haganagua añahein gürigia ha ñǘbuinbaña lídangiñe ageiraü le ñein lubéi hamahara urúeigu lun katei lánina relihión. Lidan saragu ageiraü Asia, hiibe-agei arufudahóuati houn lun mafiñe hamá luagu Bungiu. Ligíati masaminarungubeitiña anihein lan Bungiu le Adügübalin sun katei. Hádangiñe busenrügütiña hasubudirun ani aba hánharun lun haturiahanu Bíbülia. Añahein amu, másiñati mabusenrun hamá furumiñe lun hafurendeirun iseri ariñahani. Ka lunbei wadügüni lun wayanuhan hama luagu inarüni? Añahein íbirigu ha barühaña saragu irumu apurichiha ariha hamaali buidu lan lun hagumeserun ayanuha hama luagu amu katei, hebereserun hau gürigia, lárigiñe lidan amu dan, habahüdahani houn ida liña lan lahuudun houn adundehani le tídanbei Bíbülia.

13. Ka gayaraabei ladügün lun hebereserun gürigia tau Bíbülia? (Ariha humóun iyawaü to luáguboun tidáü).

¹³ Furumiñeti katei le achawahabalin haritagun saragu gürigia lubuidun adundehani le tídanbei Bíbülia (Apur. 7:12). Anuhein aban íbiri Newayóru to abisidahabaliña cheiní mandarín, ariñagatu: “Áfaaguatina lun nebereserun hau gürigia luma lun naganbuniña. Dan le níchugun fe sun liña lan hachülürün lidoun ageiraü, aba burí nálügüdüniña ida liña lan lidin houn, anhein darí haña lubéi wadagimanu luma ida liña lan houserún”. Anihein dan adügati libe álügüdahani le lun tagumeserun íbiri ayanuha hama luagu tema tídangiñeti Bíbülia. Dan le tarihin buidu lan léibugun yanu aba burí tariñagun: “Ka buídubei lun buidu lan wanaagun woungua? Gayaraati narufudun aban ariñawagúni hun tídangiñe Bíbülia? Ariñagati: ‘Ítara liña lagumeserun wuribu kei liñurun duna, buítimati ladisedúniwa luéi, sügǘ lau ládarawaguniwa unguaü lidoun’. Afiñetün san gayara lan líderaguniwa adundehani le lun wanaagun woungua buidu?” (Ari. 17:14). Gayaraati líderaguniwa libe burí yanu le lun wasubudiruni kaba lan eresibirawa.

14. Ka ladügübei aban íbiri le eseriwidubei lidan aban fulasu le ñéingiñe lubéi laboucha weyu libiti Asia lun líderaguniña gürigia ha ariñagubaña mafiñen hamá luagu Bungiu?

¹⁴ Ka gayaraabei wariñagun houn ha ariñagubaña mafiñen hamá luagu Bungiu? Afuranguagüda lumuti aban íbiri le barühalibei saragu irumu apurichiha houn gürigia ha mídintiña tidan ni aban ligilisi lidan fulasu le ñéingiñe lubéi laboucha weyu libiti Asia: “Liibe-agei, dan le lariñagun aban gürigia lidan ageiraü le mafiñen lan luagu Bungiu lariñaguña luagu moun lumuti lan lun lahudurawagún  houn búngiugu ha kamanibaña. Aba burí nariñagun úara nan luma ladüga hiibe-agei búngiugu mama inarünitiña ladügün wügüri lau lúhabu. Aba naliihani Heremíasi 16:20, le ariñagubei: ‘Gayaraati san ladügüniña wügüri guánarügü lubungiutegu? Mama lubéi tímatimaatiña búngiugu hagía!’. Lárigiñe aban nálügüdüni ida luba lan wasubudiruni ka lan búngiubei inarüniti haganagua búngiugu ha ladügübaña wügüri. Aba naganbuni lóunabagüle, lárigiñe aba naliihani Isaíasi 41:23 lun le ariñagubei: ‘Ariñaga huméi woun kaba lan asusereda lárigiñe, arufuda huméi woun luagu búngiugu humá le tímatimaati’. Lárigiñe aba narufuduni le lariñagubei Heowá lubá ámuñegü”.

15. Ka wafurendeirubei lídangiñe le ladügübei aban íbiri le awinwandubei lidan aban fulasu le ñéingiñe lubéi laboucha weyu libiti Asia?

¹⁵ Ariha waméi le ladügübei aban íbiri le awinwandubei lidan aban fulasu le ñéingiñe lubéi laboucha weyu libiti Asia dan le lagiribudun abisidahaña gürigia. Ariñagati: “Ayanuhatina luagu lichú au le tídanbei Bíbülia, profesía le gúnfulihalibei, ani ayanuhatina giñe luagu katei le geyegubei wau. Lárigiñe, aba níderaguniña lun harihini luagu anihein lan aban Bungiu le adügübalin sun katei. Dan le narihin hagumeseruña lan ánhara anihein lan Bungiu, ábati nagumeserun arufudahei le tariñagubei Bíbülia luagu Heowá”.

16. Según Ebüréu 11:6, ka uagu megei habéi aturiahatiña tídangiñe Bíbülia lun hafiñerun luagu Bungiu luma tuagu Bíbülia, ani ida luba wíderaguniña lun hafiñerun?

¹⁶ Dan le warufudahan tídangiñe Bíbülia houn gürigia ha mídintiña tidan ni aban ligilisi, gayaraati wagumeserun ederebudagüdei hafiñen luagu anihein lan Bungiu (aliiha huméi Ebüréu 11:6). Mosu giñe wíderaguniña lun hafiñerun tuagu Bíbülia. Lun lira, másiñati mosu lan wáguyuguagüdün ariñahani luagu somu arufudahani. Lidan kada aturiahani másiñati lunti lan lakutihóun le achoururagüdübalin Lererun lan Bungiu Bíbülia. Gayaraati wakutihan fiu profesía le gúnfulihalibei, ida liña lan chouru tan Bíbülia dan le tayanuhan luagu burí katei le tánina siensia o luagu dan le sügühalibei luma ida liña lan tíderaguniwa lidan wabagari.

17. Ka gayaraabei wibihini anhein hínsiñe habéi gürigia woun?

¹⁷ Dan le warufudun ínsiñeni houn gürigia meberesenga anhein midin habéi tidan ni aban ligilisi o ñüdün hamá, wíderaguñanu lun hafalaruni Kristu (1 Ko. 13:1). Le wabusenrubei dan le warufudahani inarüni tídangiñe Bíbülia, lun gunfuranda hamani hínsiñe wamá lun Bungiu ani busén lan lun hínsiñe lan woun. Sagü irumu badiseitiña saragu milu gürigia ha meha meberesenbaña lau relihión o murusunrügüñein lan hebereserun ani guentó hínsiñe haali Bungiu houn. Ligíati, buidu lan wasaminan hawagu sun gürigia ani arufuda wamá hínsiñe hamá woun ani berese wagíame hau. Aganba wamaaña ani áfaagua wamá lun gunfuranda wamaniña. Arufudaha wamá houn lau wani hénpulu lun hafalaruni Kristu.