1, 2. a) Ka meha eweridihani líchugubei Hesusu houn lani disipulugu? b) Ka meha uagu héiguada lidoun óuchawaguni? (Ariha huméi giñe dibuhu).

 KEI meha le gabaroun lubalin Hesusu chará hamá gürigia ladüga gafigoun hamá, ligía leweridirunbadiwa luéi weiri lan wafiñerun wawougua. Ligía lariñagunbalin dimurei le: “Inarüni luagu anha tan hanigi lun katei le buídubei; ánheinti húgubu, débiliti” (Mat. 26:41b, TNM). Samina wamá luagun le: lau sun meha ariñagaaña lan lani disipulugu maweiyasunbaña lan ígirei lábugua, ligía meha furumiñe hadüga fiu oura lárigiñe líchuguni Hesusu eweridihani le houn (Mat. 26:35). Íbini yebe buidu lan haritagun, ariñagati Hesusu houn: “Agagudúañu humá, afurieida huguyame, mábürühan humaamuga lidoun óuchawaguni” (Mat. 26:41a).

² Ka hadügübei disipulugu dan meha le larügüdǘnwabei Hesusu? Kei meha merede hamá agagudúañu, aba hábürühan lidoun óuchawaguni. Aba hígiruni Hesusu lau sun meha ariñagaaña lan mígirun habéi lan (Mat. 26:56).

3. a) Ka lunbei madügün wamani anhein busén wabéi lun úaragua wamá lun Heowá? b) Kaba wafurendeira lidan aturiahani le?

³ Mabusenrunti ni aban wádangiñe lun ñein lan somu katei le adügüti lun wadisedun luéi Heowá. Ligíati, mabusenrúntiwa wafiñerun wawougua. Ladüga, kei gafigoun wabéi, gayaraati busenbadiwa lan wadügün somu katei le wuribati (Rom. 5:12; 7:​21-23). Gayaraati wadunragun luma aban óuchawaguni sódini, le hénrenguti woun lun wárügüdagun woungua luéi. Anhein busén wabéi úaragua wamá lun Heowá luma lun Hesusu, lunti gaganbadi wamá lun eweridihani luáguti lunti lan agagudúañu wamá súnwandan. Ligíaba wafurendeira lidan aturiahani le. Furumiñe, warihaali kaba lan idan duari wamá. Lárigiñe, wayanuhaba luagu ida luba lan wóunigiragun woungua luéi óuchawaguni. Ani lagumuhóun, wakutihabei kaba lan wadüga lun agagudúañumeme wamá.

 KA IDAN WEMEGEIRA LUN AGAGUDÚAÑU WAMÁ?

4, 5. Ka uagu lunti lubéi duari wamá luéi figóu le genegeti maweirin lan?

⁴ Anihein figóu manarimeti lueirin, lau sun lira, gayaraati lagadeiruni wamadagua luma Heowá, barǘ láwame adüga figóu le wéinamutimati.

⁵ Sun wagía, dúnguatiwa luma óuchawaguni. Lau sun lira, gayaraati le lan óuchawagunibei lun aban gürigia mama lan óuchawaguni lun amu lugundun ámuñegueinarügütiwa wawariuagua. Kei hamuga guentó, másiñati añahein lan gürigia hageindaguña luma hayumahan lun hadügün magíaguni. Ani añahein hagía, hageindaguña lun méiguadun hamá lidoun katei kéiburi amulidaaguni unguaü o taríawagun iyawaü o bidéu lánina agamariduni. Añaheinti amu, hageindaguña lun máyeihan hamani igaburi burí le kamanibei ubouagu, kéiburi habusenrun lun hagía lan agumadiragua houngua, o sandí hamá anufudei hawéi gürigia o gañi gañi hamá. Kei lariñaguni Santiagu, “dan le lachawahani luriban layumahan gürigia, ligía lábürühan lidoun ladügǘn le wuribabei” (Sant. 1:14).

6. Ka lunbei gabaroun wamani?

⁶ Subuditi san hun ka lan óuchawaguni ídounbei ménrengun lan hun lun héiguadun? Mabuidunti lun wawinwandun kamá hamuga úati óuchawaguni le ídounti gayara lan wábürühan ni lun wasaminarun maweiyasunbadiwa lan ábürüha lidoun somu óuchawaguni (1 Huan 1:8). Ariñagati apostolu Pábulu íbini lan gürigia ha derebugu tafiñen lunti lan hóunigiragun houngua luéi hábürühan lidoun figóu (Gal. 6:1). Moun lumuti weyeedagun woungua, lubaragiñe lira, lunti gabaroun wamani ka lan idan débili wamá (2 Ko. 13:5).

7. Kátima lunbei wóunigiruni? Ru humá aban hénpulu.

⁷ Danti le subudi wamaali ka lan óuchawaguni ídounbei gayara lan wábürühan, ka lunbei wadügüni? Lunti wóunigiragun woungua! Lidan meha tidaani Bíbülia, lubenaritima meha aban uburugu le gabarieirunti ounigirúbei, ladüga ñéingiñe lan gayara lan hebelurun áganiñu. Ítarameme, lunti giñe gabaroun wamani ka lan wadebilinbei lun wóunigiragun woungua (1 Ko. 9:27).

IDA LUBA WÓUNIGIRAGUN WOUNGUA LUÉI ÓUCHAWAGUNI?

8, 9. Ka yebe lunbei ladügüni nibureinti le uágubei layanuha Ariñawagúni kapítulu 7 lun méiguadun lan lidoun figóu? (Ariñawagúni 7:​8, 9, 13, 14, 21).

⁸ Ida luba wóunigiragun woungua luéi óuchawaguni? Warihaali kaba lan wafurendeira lídangiñe Ariñawagúni kapítulu 7. Ayanuhóuati ñein  luagu aban nibureinti le ábürühabei lidoun magíaguni tuma aban würi. Ariñagati bérusu 22 “furese lan lasuseredun”. Lau sun lira, arufudati bérusu le lubaragiñebei le murusun murusun lan layarafada nibureinti le lun figóu.

⁹ Ida liña ladügüni? Furumiñe, dan le aburigadeina lubéi, aba layarafadun “luagu legeyedun üma” le yarafabei tun tuban würi tuguya. Lárigiñe, “aba lánhiñuragun túbiñoun” (aliiha huméi Ariñawagúni 7:​8, 9). Ani lubaragiñe hamuga ladisedun tuéi dan le larihinbarun, ábarüga lígirun lun tayarafadun lun, lun tachuuruni luma lun tayanuhan lun luagu adagaragüdüni lánina arandaruni le tadügübei, másiñati lun lan tadügün lun lasaminarun mama tan aban gürigia wuribatu (aliiha huméi Ariñawagúni 7:​13, 14, 21). Lun hamuga mayarafadun lan nibureinti le tun würi to, mábürühanti hamuga lidoun óuchawaguni ani mafigounhanti hamuga.

10. Ítara kei lasuseredun lun nibureinti le uágubei layanuhóua lidan Ariñawagúni, ka charati gayaraabei ladügüni aban lubúein Bungiu uguñe weyu?

¹⁰ Gayaraati lasuseredun aban katei ítarati lun furumiñeguarügü lubúein Heowá. Másiñati lárigiñe lan léiguadun lidoun aban figóu wéiriti, aba lan lasaminarun sódini lan lasusereda. Ábati lariñagun lúnguarügü: “Ida liña san lasuseredun le?”. Lau sun lira, anhein asaminara luagun sun le ladügübei lubaragiñe, másiñati líchugun fe ka lan anügübalin ábürüha lidoun óuchawaguni. Másiñati gumese lan ásügüra dan hama hagübüri umadagu, anúadaha isebáhari le mabuidunti, ñüdün ligía lidoun fulasu le mámabei houn kristiánugu o belú lan lidoun páhina lánina Internet le mabuidunti. Másiñati giñe ígira lani lafurieidun, laliihanu Bíbülia luma labasiihan lidoun adamuridaguni o apurichiha. Ítara kei lidan likesin nibureinti le uágubei layanuhóua lidan Ariñawagúni, chóuruti mama lan sódini lasusereda sun katei.

11. Ka lunbei wadügüni anhein mabuseerun wabéi wéiguadun lidoun figóu?

¹¹ Ka larufudahabei le woun? Ua lan buídurügü lan wadisedun luéi figóu, lunti giñe wadisedun luéi sun le gayaraabei lanügüniwa afigouha. Ligía meha labusenrubei Salomón lariñagun dan le labahüdahanbei luagu nibureinti tuma würi to wíyeboun usan. Ariñagati tuagu: “Beferidiruba anhoun bafalara” (Ari. 7:25). Ru lumuti giñe eweridihani le: “Disebá tuéi [ . . . ], mayarafadabá lun tubenari tuban” (Ari. 5:​3, 8). Lidan amu dimurei, anhein mabuseerun wabéi wéiguadun lidoun aban figóu, lunti wadisedun luéi le gayaraabei lanügüniwa afigouha. a Laganagua lira, anihein katei le gayaraabei hadügüni kristiánugu, lau sun lira, siñati wadügüni anhein subudi wabalin gayara lan lanügüniwa lun wéiguadun lidoun óuchawaguni (Mat. 5:​29, 30).

12. Ka füramase lubéi Hobu lúniwagua ani ida liña líderaguni lira lun agagudúañu lan? (Hobu 31:1).

¹² Anhein mabuseerun wabéi wábürühan lidoun figóu, gayaraati wáyeihani Hobu, le meha ariñagubei: “Füramasehaadina núniwagua lun mawamadirun nániña nírügü würiña ha mámarigiña” (aliiha huméi Hobu 31:1). Íderagua lumuti lagunfulirun lau le füramase lubéi lúniwagua lun mámari lan tigibuagun lani weiriou. Anhein wadüga ligiaméme, líderagubadiwa giñe lun mábürühan wamá lidoun óuchawaguni.

13. Ka uagu lunti lubéi wóunigiruni le wasaminarubei? (Ariha humóun giñe iyawaü).

¹³ Mosu giñe wóunigiruni le wasaminarubei (Afu. 20:17). Añahein afiñeruti gayara lan hasaminarun luagun katei wíyeti, madügünrügü hamaali ligía. Lau sun lira, bulíeiguatiña. Lugundun, eibu wasaminarun luagun katei le mabuidunti, ábatima wayumahan lun wadügüni. Anhein wadüga lira, gayaraati wariñagun wagía guánarügü lan esetirubalin óuchawaguni wabarua.  Le linarün katei, aniheinbei dan liábingua luriban saminaü wachügüwagun. Ka lunbei wadügüni dan le lasuseredun lira? Direi waméi wasaminan luéi lau lóufudagun ani gumese wamá asaminara luagun katei buiti. Ítara luba wídehan lun maganwoundun lan luriban ayumahani tidan wanigi, le gayaraabei lanügüniwa ábürüha lidoun óuchawaguni lau lumenrengun luma lun wadügün figóu le wéiriti (Fili. 4:8; Kol. 3:2; Sant. 1:​13-15).

14. Ka amu katei gayaraabei líderaguniwa lun agagudúañu wamá lun méiguadun wamá lidoun óuchawaguni?

¹⁴ Ka amu katei gayaraabei líderaguniwa lun agagudúañu wamá lun méiguadun wamá lidoun óuchawaguni? Mosu wachoururuni sunsuinagubei súnwandan lan lanügün lilurudun Heowá buiti woun. Másiñati ñeinbei lan dan hénrengubei lan woun lun wibihin lun úaragua lan dandu le wasaminarubei kei le wayumahabei luma le lagurabubei Heowá wámagiñe, lau sun lira, ánhawa áfaagua lun wibihini, wasandiruba darangilaü ani buídubei lidin woun.

15. Kaba buiti wibiha ánhawa asandira iyereehabúni luagu le wuribabei?

¹⁵ Lunti hínsiñe lan katei buiti woun ani furendei wagíame asandira iyereehabúni luagu le wuribabei (Amos. 5:15). Anhein wadüga ítara, aranseñu waba lun wadügüni le buídubei ani wadiseduba luéi sun le gayaraabei lanügüniwa afigouha. Lanwoun lira, wibihatimaaba erei lun wagagibudagun luma óuchawaguni magurabúnti le úmati wadunragua ámuñegü.

16. Ka uagu gayara lubéi líderaguniwa beresegu wamá lidan weseriwidun lun Heowá lun agagudúañu wamá? (Ariha humóun giñe iyawaü).

¹⁶ Ka katei gayaraabei wadügüni lun buidu lan le wayumahabei? Lunti beresegu wamá lidan weseriwidun lun Heowá. Ídehati wadamuridagun luma wapurichihan lúntima wayumahan wagundaaragüdüni Heowá ani ídehati katei le lun mábürühan wamá lidoun óuchawaguni (Mat. 28:​19, 20; Ebü. 10:​24, 25). Líderagubadiwa giñe waliihanu Lererun Bungiu, waturiahanu luma wararamagun asaminara luagun le waliihabei tidan lun línsiñedun le buídubei woun luma lun iyereegu lan le wuribabei woun (Hos. 1:8; Sal. 1:​2, 3; 119:​97, 101). Haritagua waméi adundehani le líchugubei Hesusu: “Agagudúañu humá, afurieida huguyame, mábürühan humaamuga lidoun óuchawaguni” (Mat. 26:41).  Dan le wadireirun dan lun wafurieidun lun Wáguchi le siélubei, íderagua lumutiwa ani ábatima wayumahan lun wagundaaragüdüni (Sant. 4:8).

AGAGUDÚAÑU WAMÁ SÚNWANDAN

17. Ka meha igaburi wuribati úmabei lageindagua Féduru?

¹⁷ Lau sun anihein lan débili le ueibei ibihaadiwa lan wárügüdagun woungua, gayaraati anihein lan amu le hénrengutimati woun lun wígiruni. Ligía meha asuseredubei lun apostolu Féduru: hanufudeti meha hawéi gürigia. Ǘrüwañein meha wéiyaasu leyeedagun luagu ibidiñe lan Hesusu lun (Mat. 26:​69-75). Kei méhati ibiha lan Féduru, dan lárigiñe, lun layanuhan lau ganigi ligibugiñe liñun-agei lúrudu, genegeti yebe séfuhali lan luéi anufudei le (Adü. 5:​27-29). Lau sun lira, fiu irumu lárigiñe, aba meha méiginhali lan hama kristiánugu ha mámabaña huríu “ladüga lanufude luéi le gayaraabei hariñagun huríu” (Gal. 2:​11, 12). Héiguayaali meha Féduru lidoun anufudei hawéi gürigia. Másiñati magida lan meha anufudei ligía luéi sunsuinagubei.

18. Ka lunbei wadügüni anhein awanhagua lubéi ageindagua luma somu luriban échuni?

¹⁸ Ítarameme, gayaraati mósuya lan wageindagun luma igaburi wuribati le yebe uágubei wasaminara ígira wamaali lan. Ariñagati aban íbiri: “Kei meha sügühali lan 10 irumu lúmagiñe maríagun nan iyawaü lánina agamariduni, aba yebe nasaminarun luagu ígira naali lan luriban échuni le. Lau sun lira, anihagua meha luriban échuni le nuagu, aramudañu kei aban animaalu gáñiti agurabahei dan le buídutimabei lun lachubarun luagun líliru”. Ma lubuidun mábürühan lan larüna íbiri le! Aba gunfuranda lani, anhein lan mabuseerun lubéi léiguadunya lidoun luriban échuni le, mosu lan lasigirun áfaagua sagü weyu, háfuga lun sun libagari lidan lagübüri ubóu le. Dandu lani weiriou kei wéiyaaña lidan afiñeni, íderagua hamuti lun ladügüni le mégeiwabei lun ladisedun luéi taríawagun iyawaü lánina agamariduni.

19. Ka gayaraabei wadügüni anhein awanhagua lubéi ageindagua luma somu luriban échuni?

¹⁹ Anhein awanhagua lubéi ageindagua luma somu luriban échuni le hénrengubei woun lun wígiruni, ka lunbei wadügüni lun manügün lániwa ábürüha lidoun figóu? Lunti wafalaruni  ladundehan Hesusu dan lariñagunbei: “Agagudúañu humá”. Íbini anhein chóurugua lubéi hasandiragun hungua, mosu hasigirun adireira luéi katei le gayaraabei lanügünün ábürüha lidoun óuchawaguni (1 Ko. 10:12). Sigí wamá afalarei adundehani le íderagubaliwa adiseda luéi luriban igaburi. Ariñagati Ariñawagúni 28:14: “Fuleseiwatiña gürigia ha íchugubaña inebesei lun Bungiu súnwandan” (2 Fe. 3:14).

BUITI LE LANÜGÜBEI AGAGUDÚAÑU WAMÁ

20, 21. a) Ka buiti wibihubei dan le agagudúañu wamá? b) Anhein wadüga le yuubei woun, kaba ladüga Heowá? (2 Korintuna 4:7).

²⁰ Huuti san wáfaagun lun agagudúañu wamá lun méiguadun wamá lidoun óuchawaguni? Anha, ítara liña! Barütimati gaganbadi wamá lun lugumadin Heowá óunwenbu ugundani woun sügǘ lau lawinwandúniwa lidan figóu (Ebü. 11:25; Sal. 19:8). Ítara liña katei le ladüga lun lan wadügüni lugundan Heowá ladügawa (Agu. 1:27). Dánrügüñein gaganbadi wamá lun lugumadin wibiha lun darangilu lan wasaminan luma lun gayara lan wawinwandun lun súnwandan (1 Tim. 6:12; 2 Tim. 1:3; Hud. 20, 21).

²¹ Lau sun inarüni lan luagu débili lan úgubu, úati mini lan lira luagu siñá lan wígiruni luriban ayumahani. Anihein Heowá wama lun líderaguniwa (aliiha huméi 2 Korintuna 4:7). Lun lira, ru lumuti óunwenbu ubafu le wemegeirubei woun. Wóunhalime yu lan wadügüni le lídanbei wabafu lau wáfaagun sagü weyu lun wíchugun luéigiñe wóubadina lun mábürühan wamá lidoun óuchawaguni, gayara láamuga wachoururuni weresibirubei lan erei le wamuriahabei luma Heowá (1 Ko. 10:13). Lau lídehan, gayaraabei agagudúañu wamá lun mábürühan wamá lidoun óuchawaguni.