1, 2. Katei meha san Sadokubei? (1 Krónikasi 12:​22, 26-28).

 SAMINA humá luagun sügǘ le. Añaha hóugiñe 340,000 wügüriña óundaraguñu lun hadügüni Dawidi lurúeiteme sun Ísüraeli. Luagu ǘrüwa weyu, aganbúati lubuidun hayanuhan, heremuhan luma héherahan lau ugundani luagu wübü le yarafabei lun Ebürón (1 Kro. 12:39). Ñein, haganagua sun wügüriña ha, anihein aban nibureinti gíriti Sadoku le lóuguabei lasubudirúniwa. Lau sun lira, ariha lumuti Heowá, ani busenti lun wasubudiruni ñeinñein lan meha wügüri le haganagua wügüriña ha (aliiha huméi 1 Krónikasi 12:​22, 26-28). Katei méhati Sadokubei?

² Aban meha fádiri Sadoku, le meha nadagimeinbei louba louba Abiatárü, fádiri le íñutimabei. Aba meha giñe profeta Sadoku lugundun ruti Heowá saragu lichú aau lun luma iyaraani lun gunfuranda lani ka lan labusenrubei Heowá ladügün (2 Sam. 15:27). Áluaha hamuti meha gürigia lun habihin adundehani buiti lúmagiñe. Lanwoun lira, aban meha wügüri ganigiti. Lidan aturiahani le, luágutimaaba ganigi le meha larufudubei Sadoku wayanuha.

3. a) Ka uagu lunti lubéi ganigi wamá? b) Kaba wariha lidan aturiahani le?

³ Lidan lagumuhóun dan le, hanarimetimahali lábürühan Satanási hawagun lumutuniña Bungiu (1 Fe. 5:8). Sunme awanha lan agurabahei lagumuchun Heowá lau Satanási luma lau wuribani le lídanbei ubóu le, mosu ganigi wamá (Sal. 31:24). Ariha wamá ǘrüwa igaburi le ídanbei gayara lan wáyeihani ganigi le meha larufudubei Sadoku.

LUÉIGIÑE WAMÁ LÓUBADINA LARÚEIHAN BUNGIU

4. Ka uagu mégeiwa lubéi ganigi lun wídehan lidan lawanserun Larúeihan Bungiu? (Ariha humóun giñe iyawaü).

⁴ Sun wagía ha lubúeingu Heowá, ídehatiwa tídangiñe sun wanigi lun lawanserun Larúeihan Bungiu ani lun wadügüni katei le, mégeitiwa ganigi (Mat. 6:33). Lidan dan le, mégeitiwa giñe ganigi lun gaganbadi wamá lun lilurudun Heowá luma lun wapurichihani uganu buiti luáguti Larúeihan (1 Tesa. 2:2). Uguñe weyu,  hénrengutimarügaali lun aban gürigia lun mádaragun lan lungua lidoun katei lánina ubóu le ladüga wéiritimahali fánreinguaü hadan gürigia (Huan 18:36). Adügati katei le lun hagagibudagun saragu gefentiña luagu Heowá luma turobuli lánina maseinsuni, lagayuahóun hawagu o hadaürǘn ladüga hamahadun hídehan lidan katei lánina polítika o ladüga hamahadun lun hasudarahan.

5. Ka meha uagu mosu lubéi ganigi lan Sadoku lun gayara lan líchugun ídemuei lun Dawidi?

⁵ Mámarügüñein meha lun lefeduhani Sadoku urúeihali lan Dawidi lídinbei Ebürón. Aranseñu liña meha giñe lun lawuribuhan (1 Kro. 12:38). Aranseñu liña meha wügüri le lun líderaguni Dawidi ageindagua furumiñeguarügü wuribu luéigiñe hafulesein ísüraelina. Másiñati meha lougua lan lisubudin luagu awuribuhani, íbini ítara, ganigiti meha.

6. Ida liña lídehan Dawidi lun ganigi lan Sadoku? (Sálumu 138:3).

⁶ Ka meha ídehabei lun ganigi lan Sadoku? Másiñati meha íderagua lani geyegu liña lan hau wügüriña héretiña ani ganigitiña. Dawidi meha aban hádangiñe. Kei méhati weiri lan ganigi le larufudubei Dawidi dan meha le ligía lubéi “adundehabalin Ísüraeli dan le láfuridun ageindagua”, gúndaatiña meha sun ísüraelina lau ligía lan harúeite (1 Kro. 11:​1, 2). Wéiriti meha lafiñen Dawidi luagu Heowá, ligía láluahanbei ídemuei luma dan le héibaahanbalin láganiñu (Sal. 28:7; aliiha huméi Sálumu 138:3). Añahein meha giñe ámuya wügüriña lidaaniwagu Sadoku ha íderagubalin lun ganigi lan, kéiburi Hoyadá luma Benaíasi, le lisaani Hoyadá, le meha gawuribuhadibei, hámati 22 ábutigu ha meha luéigiñebaña lóubadina Dawidi (1 Kro. 11:​22-25; 12:​26-28). Aranseñu haña meha sun hagía lun hídehan lidan larúeihan Dawidi.

7. a) Kátaña íchugubaña hénpulu lánina ganigi woun uguñe weyu? b) Ka hafurendeirubei lídangiñe bidéu luáguti íbiri Nsilu?

⁷ Ibihatiwa erei luma ganigi dan le wakutihani le meha hadügübei lubúeingu Heowá ha  ídehabaña lun lawanserun Larúeihan. Máhati meha Hesukrístu, le Warúeite, lun gadan lani ni kata le lánina polítika (Mat. 4:​8-11; Huan 6:​14, 15). Súnwandan meha lafiñerun luagu Heowá lun libihini erei le lemegeirubei. Uguñe weyu, rúhaña giñe nibureintiña aban lubuidun hénpulu lau mádaragun hamá houngua lidoun katei le lánina polítika, masudarahan hagía. Ka uagu máluahan hubéi fiu lídangiñe sügǘ le lidan jw.org? a

ÍDERAGUA HUMAÑA ÍBIRIGU

8. Lidan ka sügǘ lunti lan harufudun wéiyaaña lidan afiñeni ganigi lun híderaguniña hábirigu?

⁸ Hínsiñeti houn lubúeingu Heowá híderagun hámagua (2 Ko. 8:4). Ani lun lira, anihein dan mégeiwa lan ganigi. Kéiburi dan le laduurun somu wuribu, subudi hamuti wéiyaaña lidan afiñeni megei hamá íbirigu lun lichugún dǘgüdaguaü houn luma híderawagun dandu lidan le hemegeirubei lun hawinwandun kei lun hakipuruni hamadagua luma Heowá. Kei hínsiñe habéi lubúeingu Heowá houn wéiyaaña lidan afiñeni, aranseñu haña lun híchuguni le hemegeirubei houn, íbini dencha lan lun hadügüni (Huan 15:​12, 13). Ítara liña harufuduni ganigi hamá kei meha Sadoku.

9. Según 2 Samueli 15:​27-29, ka lamuriahabei Dawidi luma Sadoku lun ladügüni? (Ariha huméi giñe dibuhu).

⁹ Lídanñein meha denchaü libagari Dawidi. Busenti meha Abüsalón le lisaani lagidaruni arúeihani luéi (2 Sam. 15:​12, 13). Ligía mosu lubéi meha lanurahan Dawidi Herusaléngiñe lau lóufudagun. Ligía lariñagunbei houn lubúeingu: “Anuraha wamá furese, ánhawa adarasaha, siñabei wesefurun luéi Abüsalón!” (2 Sam. 15:14). Dan meha le háfuriduña lubéi Herusaléngiñe, aba lasaminarun Dawidi mosu lan herederun fiu hádangiñe lánigu Herusalén lun gayara lan híchugun ariñahani lun libügürü le lasaminarubei Abüsalón ladügün lun. Ligía lébubei lagiribudagüdüni Dawidi Sadoku hama amu fádirigu Herusaléun lun hariñahan lun luagu sun le anügüti  fulasu ñein (aliiha huméi 2 Samueli 15:​27-29). Mosu meha duari hamá ladüga denchati meha dasi le líchugubei Dawidi houn, lídanñein meha huraraü habagari. Luouguounrügüñein meha lasaminara Abüsalón, aban meha wügüri furundeti ani ménrengunti meha lagarabaagun hawagun amu. Saminaadün san luagun le meha gayaraabei lasuseredun lun hamuga meha lasubudiruni Abüsalón Dawidi lan óunahabaliña wügüriña hagía ñeinhin lun hasubudiragüdüni lun ka lan lasaminarubei Abüsalón ladügün?

10. Ida liña lídehan Sadoku hama ha lúmabaña lun lesefurun libagari Dawidi?

¹⁰ Amuriahati meha Dawidi luma aban lumada gíriti Usaí le meha úaraguabei lun luma lun Sadoku lun híderaguni lidan aban katei (2 Sam. 15:​32-37). Falá lumuti Usaí adundehani le líchugubei Dawidi lun ani ibihati lagañeiruni laritagun Abüsalón lun lahandilihani wuribu kei lariñaguni lun, ídehati méhati lira lun gachansin lan Dawidi lun laranserun lubá wuribu. Lárigiñe, aba labahüdahani Usaí saminaü le lun Sadoku luma lun Abiatárü (2 Sam. 17:​8-16). Ábati hóunahan biángubei hagía asubudiragüdei lun Dawidi ka lan meha lasaminarubei Abüsalón ladügün (2 Sam. 17:17). Lau lídehan Heowá, ibihati Sadoku hama amu fádirigu lun lesefurun libagari Dawidi (2 Sam. 17:​21, 22).

11. Ida luba ganigi wamá kei meha Sadoku anhein amuriahóua wama lun wíderaguniña wábirigu?

¹¹ Ida luba ganigi wamá kei meha Sadoku anhein amuriahóua wama lun wíderaguniña wábirigu dan le hásügürüña lan lídangiñe sügǘ hénrenguti? 1) Falá waméi adundehani le ichugúbei woun. Lidan sügǘ libe le, lunti gaganbadi wamá, ñein ligíame úarani waganagua. Ligíati, adüga waméi le tariñagubei sukursáli woun (Ebü. 13:17). Mosu gabügürügua lan háguyuguagüdüni wéiyaaña lidan afiñeni adundehani le ñǘbuinbei túmagiñe lóundarun Heowá luáguti ida luba lan aranseñu wamá lubá somu liñawan dan, hárabaganali o katei líbeina lira (1 Ko. 14:​33, 40). 2) Óusera wamá lau duari ani ganigi wamá (Ari. 22:3). Samina huméi katei lubaragiñe hadügüni.  Míchiga huméi hibagari lidan denchaü. 3) Afiñe wamá luagu Heowá. Bereseti Heowá wau súngubei wagía ani busenti lun séfuñu wamá. Gayaraati líderaguniwa lun wetenirun lun le hemegeirubei wábirigu lidan aban igaburi chóuruti.

12, 13. Ka larufudahabei likesin Víktor luma Vitali hun? (Ariha humóun giñe iyawaü).

¹² Ariha waméi likesin Víktor luma Vitali, bián wéiyaaña lidan afiñeni ha meha anügübaña éigini luma duna houn íbirigu Ukrania. Ariñagati Víktor: “Ñǘdüntiwa meha áluaha éigini lidan sun fulasu ani sun meha oura wau aganba aduuraguni yarafa woun. Haritagua nágili weyu le wachülürünbei lúbiñoun aban íbiri le edewehabei éigini woun lídangiñe le areidúañubei luma, ani seremei ledewehani éigini ligía woun gayara lubéi meha habihini íbirigu éigini le hemegeirubei lun fiu dan. Danti le awanhán lubéi meha ádinaguagüdei éigini ligía tidoun karü, ligía téiguadun aban bonba 20 méturu (66 ugudi) yarafa woun, maduuruntu bonba tuguya. Sun meha weyu ligía nau ayumuragua lun Heowá lun líchuguni ganigi le nemegeirubei nun lun nasigirun íderaguaña íbirigu”.

¹³ Ariñagati giñe Vitali: “Mégeiwati meha saragu ganigi. Lidan furumiñeti wéiyaasu le nadügübei, dúusuñein meha oura nau aweiyasuha, ani sun meha oura nau afurieida lun Heowá”. Ani lau sun arufuda lan Vitali ganigi, óuserati giñe lau duari, ariñagati: “Meredeti meha namuriahan luma Heowá lun líchugun lichú aau nun luma lun líderagunina lun ǘnabugu nan. Luéigiñerügüñein meha üma le uágubei hariñaga gumadimatiña gayara lan leibugúniwa naweiyasuha. Dan le narihinbaliña íbirigu nadagimein lidan úarani, aba lederebugudun nafiñen. Gidá hamuti meha sun le eberesehabei ǘmadarugugiñe, óundaraguatiña meha éigini ani dinaguagüda haméi tidoun karü, ani lanwoun lira, rútiña meha éigini dandu lun Víktor kei ye, darí hagía halíaba lan weredera”.

ÚARAGUA HUMÁ LUN HEOWÁ SÚNWANDAN

14. Ida liña wasandiragun woungua dan lígiruni somu gürigia le hínsiñebei woun leseriwidun lun Heowá?

¹⁴ Úati amu katei gáritimati luéi lígiruni aban waduhe o aban wamada leseriwidun lun Heowá (Sal. 78:40; Ari. 24:10). Ani gáritimati woun anhein buidu lubéi meha wanaagun woungua luma gürigia ligía. Anhein sügühadün lubéi lídangiñe aban katei ítarati, líderagubadün hafurendeirun luagu úaraguni le meha larufudubei Sadoku.

15. Ka meha uagu mosu lubéi ganigi lan Sadoku lun úaraguameme lan lun Heowá? (1 Urúeigu 1:​5-8).

¹⁵ Lidan lagumuchagüle larúeihan Dawidi, dan meha le wéiyaali ani yarafaali dan lun lounwen, aba lálugun lisaani Dawidi le gíribei Adoníasi lagidaruni arúeihani luéi, íbini buga Salomón lan lanúadirubei Heowá lun ligíaba lan arúeiha leweñegua Dawidi (1 Kro. 22:​9, 10). Úaraguati meha Sadoku lun Heowá, ánheinti Abiatárü le lumada, aba lidin luéigiñe lóubadina Adoníasi (aliiha huméi 1 Urúeigu 1:​5-8). Lau ladügüni Abiatárü katei le, larufuduña meha múaragun lan lun Dawidi ni lun Heowá. Gayaraati san hasaminarun luagu lanarime íruni le lasandirubei Sadoku? Barühali meha Sadoku lóugiñe 40 irumu eseriwida úara luma Abiatárü kei fádirigu (2 Sam. 8:17). Anaaha hamaaru meha “lubagüsin Wabungiute” úara (2 Sam. 15:29). Íderagua hamaali meha Dawidi ani wínwanhaña meha saragu katei úara lidan heseriwidun lun Heowá (2 Sam. 19:​11-14).

16. Ka ínchahabalin Sadoku lun úaragua lan lun Heowá?

¹⁶ Úaraguati Sadoku lun Heowá meberesenga le ladügübei Abiatárü ani sigiti Dawidi afiñera luagu. Dan meha le lariñawagúnbei lun Dawidi ka lan labusenrubei Adoníasi ladügün, aba lagúaragüdün Dawidi luagu Sadoku, Natán luma Benaíasi lun hadügüni Salomón urúeime (1 Uru. 1:​32-34). Chóuruti ibiha lan meha Sadoku gurasu lídangiñe hénpulu le híchugubei amu lubúeingu Heowá ha meha úaraguabaña, kéiburi Natán, le meha ñǘdünbei luéigiñe lóubadina  urúei Dawidi (1 Uru. 1:​38, 39). Dan le liridúnbei Salomón kei urúei, iridúati Sadoku kei fádiri “leweñegua Abiatárü” (1 Uru. 2:35).

17. Ida luba háyeihani Sadoku anhein lígira somu gürigia le hínsiñebei hun leseriwidun lun Heowá?

¹⁷ Ida luba háyeihani Sadoku? Anhein hamuga lígira aban gürigia le hínsiñeti hun leseriwidun lun Heowá, arufuda huméi lun gürigia ligía furangu úaragua humá lun Heowá (Hos. 24:15). Líchugubei Heowá erei luma ganigi le hemegeirubei hun. Furíei humá lun ani yarafa humá houn lubúeingu ha úaraguabaña. Gúndaati Heowá dan le úaragua humá ani líchuguba afayeiruahaü hun (2 Sam. 22:26).

18. Ka hafurendeirubei lídangiñe likesin Marco tuma Sidse?

¹⁸ Ariha waméi le asuseredubei lun Marco luma tun Sidse to lani weiriou. Aba meha hígiruni biángubei hasaanigu würiña inarüni dan le aweirideina habéi. Ariñagati Marco: “Lúmagiñe hagüriahóun lisaanigu aban gürigia, aba tabuinchun lanigi lau ínsiñeni hawagu. Aranseñu liña gürigia lun ladügün furumiñeguarügü katei hawagu lisaanigu lun lóunigiruniña. Ligíati, dan le hadisedun luéi Heowá, aba tagaridun lanigi gürigia”. Ariñagati giñe: “Súnwandan anihein lan Heowá yarafa woun. Adügati Heowá lun here tan Sidse to nani weiriou dan le lábürühan narüna, ani dan le lábürühan tarüna, adügati giñe lun here nan”. Ariñagatu Sidse: “Seremei erei le líchugubei Heowá woun ligía gayara lubéi wawanduni sügǘ le. Wuribati meha nasandiragun nungua ladüga samina nan nadüga lan hígirunbalin nisaanigu inarüni. Ligíati aba lubéi nabahüdahani lun Heowá lidan furíei. Murusun dan lárigiñe, aba tayarafadun aban íbiri nun, to meha lüha marihin nanu, aba tíchuguni túhabu luagun nege, aba tarihin nigibuagun ani aba tariñagun nun: ‘Haritaguabatia Sidse, mama lan bidurun’. Lau lídehan Heowá, ibihaadina nasigirun eseriwida lun lau ugundani”.

19. Ka aranseñu hubéi lun hadügüni?

¹⁹ Busenti Heowá lun ganigi hamá sun lubúeingu, ítara kei meha Sadoku (2 Tim. 1:7). Lau sun lira, mabusenrunti lun wafiñerun luagu wabafu guánarügü, busenti lun wíchuguni sun wafiñen luagu. Ligíati, danme le hagagibudagun luma somu sügǘ le ñein lubéi mosu lan harufudun ganigi, amuriaha huméi ganigi ligía luma Heowá. Gayaraati hachoururuni líderagubadün lan lun ganigi humá ítara kei meha Sadoku (1 Fe. 5:10).