Lidan likesin Nicolas tuma Céline, sukursáli amuriahaboun hama lun houdin eseriwida lidan amu damuriguaü. Ariñaga hamuti feru maríeitiña ha ka lan lanügübei asansiruni le houn: “Lau sun weiri lan meha wagundan furumiñe, lau lásügürün dan, aba wasandirun hénrengu lan woun ladüga áluga wamá hawagu wamadagu. Manarimegili meha wamadagua hama íbirigu ha lídanbaña iseri damuriguaü”. a Ligíati, ka gayaraabei líderagunün agagibudagua luma turobuli le lanügübei háguyun lidoun amu damuriguaü luma lun échudeina humá luagu? Ka gayaraabei hadügüni amu íbirigu lun hídehan? Anhaün águya lidoun amu damuriguaü, ka buiti gayaraabei hibihin dandu huguya kei lílana iseri damuriguaü ligía?

GÁDÜRÜ ADUNDEHANI LE GAYARAABEI LÍDERAGUNÜN LUN ÉCHUDEINA HUMÁ

1. Afiñe humá luagu Heowá (Sal. 37:5). Barüharu meha aban íbiri haponna gíritu Kazumi 20 irumu eseriwida lidan ligiaméme damuriguaü. Keiti aba lan meha lounahóun tani weiriei nadagimein lidan amu fulasu, mosu meha háguyun. Ka tadügübei lun tíchuguni tibagari lúhaburugun Heowá? Ariñagatu: “Aba nadaarunu nanigi lun Heowá lun nariñaguni lun sandigua nan nungua nábugua, sandí nan idiheri ani hanufude nan. Sagü méhati nadügüni lira, aba nasandirun ru lani erei le nemegeirubei nun”.

Kaba íderaguaün lúntima hafiñerun luagu Heowá? Ítara kei megei tan aban nadü duna luma amu burí katei lun aweirideina tan, mégeiti giñe wafiñen lun wóunigiruni lun derebugumeme lan. Nicolas, le buga uágubei wayanuha, ráramaguati asaminara luagu hénpulu le meha líchugubei Abüraámü, Hesusu luma Pábulu—wügüriña ha meha adügübaña saragu sákürifisiu lun hadügüni lugundan Bungiu— ani adügati lira lun lachoururuni líderagubei lan giñe Bungiu. Anhein gabügürügua haturiahan hábuguarügü, lídehaba  lira lun hagagibudagun luma furumiñeguarügü asansiruni lidan hibagari ani hafurendeiruba saragu katei le gayaraabei lahuudun hun lun híchugun dǘgüdaguaü houn íbirigu ha lídanbaña iseri damuriguaü le ñein hubéi.

2. Magoubaguagüda huméi iseri damuriguaü luma binadu (Apur. 7:10). Ariñagati Jules dan le lan láguyugunbei Beningiñe lun Merigoun, aba lan larihin mítaran lan hagaburi gürigia ha ñéinbaña hama ha Beninbaña: “Laganóun meha nun kamá mosu nabahüdahani sun nuáguti houn sun ha nasubudirubaña”. Keiti mechun lan Jules luagu igaburi ligía, aba lagumeserun adiseda hawéi íbirigu. Ariñagati eibu lan lasubudiruniña íbirigu, aba lan asansireina lan ligaburi larihini katei: “Rúhadina fe sun lan wagía aban wabu. Ligaburi wayanuhan ligía asansirubei. Mosu wánharun houn gürigia kei habéi”. Ligíati, magoubaguagüda huméi iseri damuriguaü luma le binadu. Ariñagatu aban prekursora gíritu Anne-Lise: “Mama náguyuña lidoun aban damuriguaü lun narihini lememe narihibei lidan damuriguaü le ñéingiñe lubéi niabin, náguyunbei lun nafurendeirun iseri katei”.

Moun lumuti giñe hagoubaguagüdüni wéiyaaña lidan afiñeni iseri damuriguaü le ñein habéi luma le binadu. Gayaraati anihein lan katei le madügǘnti kei ladügǘn lidan damuriguaü le ñéingiñe lubéi hayabin, lau sun lira, úati mini lan wuriba lan. Buiti lun lasubudirúniwa furumiñe ka lan anügübei fulasu lubaragiñe híchugun somu adundehani (Apur. 3:​1, 7b). Buítimati lichugúniwa aban buiti hénpulu sügǘ lau ladügüdarúniwa hawagu gürigia lun hadügüni le ariñawagúbei houn (2 Ko. 1:24).

3. Bereseguñu humá lidan iseri damuriguaü (Fili. 1:27). Lau sun inarüni lan barǘ lan láguyun gürigia saragu dan luma lubucha uagu, buídubei lun hadamuridagun hama lílana iseri damuriguaü, ani anhein gayara, buítimabei lun hidin le ñein lubéi ladügǘwa adamuridaguni. Lugundun, ida luba hamugagia híderagunün íbirigu anhein marihin hubéi lidan adamuridaguni? Ariñaga tumuti Lucinda le tadügübei tuguya hama bián tisaanigu dan le háguyunbei lidoun aban uburugu wéiriti Suru Áfürika: “Áfaaguatina lun nafalaruni adundehani le híchugubei numadagu nun lun beresegu nan lidan damuriguaü, napurichihan hama ámuñegueinarügü íbirigu luma níchugun óunabagülei lidan adamuridaguni. Ariñagatina giñe houn íbirigu gayara lan hayusurunu waban lun hadügüni adamuridaguni lubá apurichihani”.

Anhaün ídeha lidan sun le adügǘbei lidan iseri damuriguaü le ñein hubéi úara hama íbirigu ha ñéinbaña, hídehañame “súngubei lidan aban lun laburuchagun” uganu buiti. Ariñagatiña wéiyaaña lidan afiñeni tun Anne-Lise, lun lan táfaagun lun tapurichihan hama sun íbirigu. Ariñagatu: “Lau lóufudagun, aba níchugun fe anihántima lan igaburi le ídehabei lun échudeina nan”. Lanwoun lira, anhaün ídeha lidan tarumadahóun luma taransehóun Luban Adamuridaguni, harihibadün íbirigu keisi lílana damuriguaü ligía. Anhaün áfaagua lun échudeina humá luagu iseri damuriguaü, furesetimabei hasandiragun hungua buidu luma harihiniña lílana damuriguaü keisi hiduheñu.

4. Áluaha humá iseri umadagu (2 Ko. 6:​11-13). Háfaagun lun híderaguniña amu, ligía igaburi buídutimabei lun hadarirun umadagu. Ligíati, sagá humá dan dandu lubaragiñe kei lárigiñe adamuridaguni lun  hayanuhan hama íbirigu luma lun hasubudiruniña. Áfaagua humá lun hafurendeiruni hiri. Anhaün gamadóun hama íbirigu, wa huguyame houn lau hiri, chóurubei buídubei lan hasansiragun houngua huma ani busenbaña lun gamadagua hamá huma.

Mabouchagua huméi hichügü áluga ida luba lan héiguadun buidu houn amu. Lubaragiñe lira, óusera humá kei higaburi. Áyeiha humóun Lucinda, to ariñaguboun: “Agunbiraha wamutiña íbirigu wábiñoun ani seremei wadügüni lira darihadiwa umadagu buítiña”.

“RESIBIGUA HUMÁ LUBEITI HÚNIWAGUA”

Añahein íbirigu hénrengu houn houdin adamuridagua tidan aban Luban Adamuridaguni to ídanboun ua hamá hasubudiragun. Ligíati, anhein águya aban íbiri lidoun damuriguaü le ñein hubéi, ida luba híderaguni? Ariñagati apostolu Pábulu: “Resibigua humá lubeiti húniwagua kei giñe leresibiruniwa Kristu” (Rom. 15:7). Gayaraati háyeihani wéiyaaña lidan afiñeni Kristu lau híderaguniña iseri lílana damuriguaü lun buidu lan hasandiragun houngua (ariha huméi rekuáduru “ Le lunbei hadügüni dan le háguyun lidoun amu damuriguaü”). Sun íbirigu, íbini irahüñü, gayaraati hídehan lau burí hadügün lirahüñü katei lun buidu lan hasandiragun íbirigu houngua lidan iseri damuriguaü le ñein habéi.

Lun buidu lan weresibiruniña íbirigu ha, gayaraati giñe wagunbirahaniña wábiñoun o wíderaguniña lidan le hemegeirubei. Kei tadüga aban íbiri to asagaruboun dan lun tarufuduni uburugu tun aban íbiri to málügilibei lúmagiñe táguyun lidoun uburugu ligía ani afuranguagüda tumuti giñe tun ida luba lan tárügüdün ugunei. Adügati lira lun taweiridun tanigi íbiri to luma lun darangilu lan tasandiragun tungua lidan iseri fulasu ligía.

ABAN CHANSI LUN LAGANWOUNDUN HUMADAGUA LUMA HEOWÁ

Anhein háguyuña lubéi lidoun aban iseri damuriguaü, másiñati sandí humá anufudei luma idiheri. Samina humá luagun le: ítara kei añahein lan animaalugu ñǘbüritiña ha asansirubaña ura lun gayaraabei lan háhamahan, mégeiwati giñe lun hagidaruni anufudei luma idiheri huáriua lun gayaraabei lan hasigirun ederebudagüdei humadagua luma Heowá.  Ariñagati Nicolas tuma Céline: “Furendeiti gürigia saragu katei dan le láguyun lidoun amu fulasu. Lidan wakesin, íderagua lumutiwa wéchudun hawagu amu gürigia luma luagu iseri fulasu le ídounbei wáguya, lun gagaburi wamá igaburi le meha úabei wawagu”. Ayanuhati Jean-Charles luagu buiti le hasagarubei tílana luban: “Ídehati wáguyun lidoun aban iseri damuriguaü lun laganwoundun heseriwidun wasaanigu lun Heowá. Lídanrügü fiu hati, aba tagumeserun wasaani íchiga dasi lidan adamuridaguni le adügǘbei labadinagua dimaasu, iridúa ligía wasaani kei apurichihati le mabadiseirúngili”.

Ánheinti busén hubéi háguyun lidoun aban fulasu le ñein lubéi lemegeirúa ídemuei ani siñati? Íbini ítara, gayaraati hafalaruni adundehani le lídanbei ariñahani le, ítara luba hasandirun kamá hamuga hagumeseruña lidan damuriguaü le ñein hubéi. Afiñe humá luagu Heowá, áfaagua humá lun hídehan lidan burí dasi le adügǘbei lidan damuriguaü, lau háfuridun apurichiha úara hama íbirigu, háluahan iseri umadagu o habuiduragüdüni humadagua hama amu. Áluaha humá chansi lun híderaguniña ha mégeihabubaña o ha iseribaña lidan damuriguaü le ñein hubéi. Líderagubadün hadügüni lira lun labuidurun humadagua luma Heowá, ladüga ínsiñeni le tímatimaati asubudiragüdübaliña kristiánugu inarünitiña (Huan 13:35). Chouru huméi anihán lan “burí katei le aubei lagundaara Bungiu” (Ebü. 13:16).

Íbini dungua hamá saragu kristiánugu luma burí lénrengunga, héchuhaña luagu iseri damuriguaü le ñein habéi ani gúndaatiña. Gayaraati giñe hasandiruni ligiaméme! Ariñagatu Anne-Lise: “Íderagua láadina náguyun lidoun amu damuriguaü lun gíbetima hamá gürigia ha uágubaña nasandira ínsiñeni”. Ariñagatu Kazumi: “Chouru numuti dan le lan háguyun gürigia lidoun amu damuriguaü, gayaraati harihini lúhabu Heowá lidan aban igaburi le marihinñaha hamagili”. Ka gayaraabei wariñaguni luagu Jules? Ariñagati: “Darihadina saragu umadagu ani adügati lira lun masandiragun nan nungua nábuguarügü. Héchuhadina luagu iseri damuriguaü le ñein nubéi darí lun hénrengubei lan hamuga nun náguyun lidoun amu”.