1, 2. Ka tariñagubei Bíbülia hawagu fiu hádangiñe urúeigu ísüraelina?

 AYANUHATU Bíbülia hawagu hóugiñe 40 wügüriña ha meha arúeihabaña Ísüraeli ani ariñaga tumuti lau inarüni le asuseredubei lidan habagari fiu hádangiñe. a Kei hénpulu, ariñagatu íbini lan meha urúeigu buítiña adügatiña meha katei wuribati. Ayanuha wamá luagu Dawidi. Subudi wamuti aban lan meha urúei buiti, ladüga ariñagati Heowá luagu: Éibugati “numa tau sun lanigi, ani úaraguati ligaburi nigibugiñe” (1 Uru. 14:8). Lau sun lira, aba larounrun Dawidi tuma aban würi maríeitu ani aba ladügün aransehani lun láfarun tani weiriei hilagubei lidan aban wuribu (2 Sam. 11:​4, 14, 15).

² Luéigiñe aban oubaü, añahein meha giñe urúeigu wuribatiña ha adügübaña katei buiti. Ariha waméi likesin Roboamü. Ariha lumuti Heowá kei aban urúei múaranti, ariñagati luagu: “Mabuidunti bugaha lóuserun Roboamü” (2 Kro. 12:14). Lau sun lira, dan le lariñagubei Heowá lun lun mageindagun lan hama 10 türibu lani Ísüraeli luma lun lígiruniña lun hagíaba lan anúadirei kaba lan harúeite. Ka ladügübei urúei le? Adüga lumuti le lariñagubei Heowá lun. Lanwoun lira, derebugudati saragu uburugu lun lóunigiruni ageiraü hawéi áganigu (1 Uru. 12:​21-24; 2 Kro. 11:​5-12).

3. Ka gayaraabei wálügüdagun woungua, ani kaba wariha lidan aturiahani le?

³ Ánheinti adüga habéi sun meha urúeigu katei buiti luma katei wuribati, kati uagu lariñaga meha Heowá úaragua hama híbiri ani múaragun hama ha híbiri? Wasubudiruni óunabagülei lun álügüdahani le líderagubadiwa lun gunfuranda wamani ka lan lunbei wadügüni lun wagundaaragüdüni Heowá. Lidan aturiahani le, warihuba  samina lan Heowá luagu ǘrüwa katei lubá laguseragüdüniña urúeigu ísüraelina: 1) anhein hínsiñe lubéi houn tídangiñe sun hanigi, 2) anhein asaküriha habéi lídangiñe hafigoun lúmati 3) anhein hudugua habéi lun kei aubei lagundaara.

HÍNSIÑETI MEHA HEOWÁ HOUN TAU SUN HANIGI

4. Ka idan amu hama urúeigu ha úaraguabaña hama ha múaragunbaña?

⁴ Urúeigu ha lanügübaña Heowá kei úaraguatiña hínsiñeti meha houn tau sun hanigi. b Kéiburi urúei Hosafátü “le bugaha áluahabalin Wabungiute lau sun linarün” (2 Kro. 22:9). Ariñagatu giñe Bíbülia luagu urúei Hosíasi: “Úati bugaha ni aban urúei ni lubaragiñe ni lárigiñe ederegeraguti lungua lun Aburemei kei ligía tau sun lanigi” (2 Uru. 23:25). Luéigiñe aban oubaü, ariñagatu Bíbülia luagu urúei Salomón, le adügübalin le wuribabei lidan lagumuchagüle larúeihan, mederegeragun lan “lungua sunsuinagubei lun Aburemei le Lubungiute” (1 Uru. 11:4). Ani ariñaga tumuti ligiaméme luagu ábanya urúei múaragunti gíriti Abiamü: “Magunfulintu lanigi ligibugiñe Aburemei le Lubungiute” (1 Uru. 15:3).

5. Ka mini lubéi weseriwidun lun Heowá tau sun wanigi?

⁵ Ka mini lubéi weseriwidun lun Heowá tau sun wanigi? Mini lan, weseriwidun lun lau sun wanarün luma lau sun taruman wanigi, mama ladüga wafosurun o ladüga genege lan woun ligía lan lunbei wadügüni. Mini lan giñe, mosu lan wasigirun aganwoundagüdei wínsiñehabu luagu Heowá inebe ligía woun lidan sun wabagari.

6. Ida luba línsiñedun Heowá woun tau sun wanigi? (Ariñawagúni 4:23; Matéu 5:​29, 30).

⁶ Ida luba ítara wamá kei urúeigu ha úaraguabaña hínsiñe ligíame Heowá woun tau sun wanigi? Lunti wadireirun luéi sun katei le gayaraabei ladügün lun lafanreinragunu wanigi o le adügübei lun ledebilidagüdüni ínsiñeni le wasandirubei luagu Heowá, kéiburi, isebáhari le mabuidunti, hagübüri umadagu luma línsiñehabu umegeguni. Ánhawa ariha lasusereduña lan katei le woun, lunti wadügün asansiruni le wemegeirubei lau lóufudagun (aliiha huméi Ariñawagúni 4:23; Matéu 5: 29, 30).

7. Ka uagu lunti lubéi góunigigua wamá woungua luéi katei le gayaraabei lagadeiruni wamadagua luma Heowá?

⁷ Mígira wamá lun tafanreinragun wanigi. Ánhawa móunigi, gayaraati weyeedagun woungua lau wasaminarun anhein lan waganwoundagüda weseriwidun lun Heowá, úabei lan ni kata agadeiruti wamadagua luma. Lun gunfuranda wamani buidu, samina wamá arumadaha wamaaru lan waban buidu, webelaagüdüña hamuga san ifei múnadoun? Uá! Ladüga, lun hamuga wadügüni ítara, ábaya hamuga tawiyedun muna. Arufudahati katei le woun, lun lan wayarafadun lun Heowá, úati buídurügü lan lau beresegu wamá lidan weseriwidun lun. Moun lumuti giñe wígirun lun lebelurun katei mabuidunti lidoun wasaminan le gayaraabei lagadeiruni wamadagua luma Heowá o le adügübei lun tafanreinragun wanigi (Efe. 2:2).

ABA HASAKÜRIHAN LÍDANGIÑE HAFIGOUN

8, 9. Ida liña lóunabun urúei Dawidi luma urúei Esekíasi dan le lererehóunbei houn? (Ariha huméi giñe dibuhu).

⁸ Kei warihini, adügati urúei Dawidi aban figóu wéiriti. Lau sun lira, dan le lídinbei profeta Natán ayanuha luma luagu le ladügübei, arufudati Dawidi ǘnabuguni ani aba lasakürihan (2 Sam. 12:13). Arufudati dimurei le labürühabei lidan Sálumu 51 luagu asakürihaali lan tídangiñe sun lanigi. Mafamurunti lun lasaminarun Natán asakürihaali lan o lun meresibirun lani abeichúni, le linarün katei asakürihati tídangiñe sun lanigi (Sal. 51:​3, 4, 17).

⁹ Afigouhati giñe meha urúei Esekíasi ligibugiñe Heowá. ariñagatu Bíbülia aba lan  labuinchun “lau pantaü, aba lubéi lagañidun Wabureme lun, lun Hudá luma lun Herusalén” (2 Kro. 32:25). Ka uagu lapantaha Esekíasi? Másiñati ladüga lan ladügün Heowá lun larisidun, íderagualei lun lagañeiruniña asiriana o ladüga lan lareidaguagüdüni lídangiñe aban óunwenbu sandi máraninati. Másiñati ínchaha lani anaaguni ungua lun lapantaha lau lirisin hagibugiñe babilóniana. Ligíati, mosu lubéi meha lerereha profeta Isaíasi lun (2 Uru. 20:​12-18). Ítara kei urúei Dawidi, aba larufudun urúei Esekíasi ǘnabuguni ani aba lasakürihan (2 Kro. 32:26). Ligíati, ida liña larihini Heowá urúei Esekíasi? Ariha lumuti kei aban urúei úaraguati. Ligía tariñagubalin Bíbülia dimurei le: Buiti bugaha “ligaburi Esekíasi ligibugiñe Bungiu” (2 Uru. 18:3).

10. Ka ladügübei urúei Amasíasi dan le lererehóunbei lun?

¹⁰ Ánheinti Amasíasi le lurúeite Hudá adüga lumuti le buídubei, “gama lumoun móuserunti lau úarani sunsuinagubei” (2 Kro. 25:2). Ka katei wuribati ladügübei? Lárigiñe líderaguni Heowá agañeiraña edomuna, aba lagumeserun Amasíasi áhuduragua houn habungiutegu edomuna. c Ani lau lásügürün dan, dan le lóunahan Heowá aban profeta erereha lun, aba lebedaagun urúei Amasíasi ani máhati laganbuni le lariñagubei profeta lun (2 Kro. 25:​14-16).

11. Según le lariñagubei 2 Korintuna 7:​9, 11, ka lunbei wadügüni lun feruduna lániwa Heowá? (Ariha humóun giñe iyawaü).

¹¹ Ka wafurendeirubei lídangiñe le hadügübei urúeigu ha? Furendeitiwa mosu lan wasakürihan lídangiñe wafigoun ani adüga wameime sun wayaraati lunya madügün wamani. Ánhañati erereha wéiyaaña lidan afiñeni woun, íbini lidan katei le genegeti woun masudinin lan? Moun lumuti wasaminarun magundan lan Heowá wau o mínsiñetiwa lan houn wéiyaaña lidan afiñeni. Ladüga íbini lurúeitegu Ísüraeli ha buítiña anihein dan mégeitiña meha lererehóun houn (Ebü. 12:6). Ligíati, anhein ererehóua woun, ka lunbei wadügüni? 1) Warufudun ǘnabuguni, 2) wadügüni asansiruni le wemegeirubei luma 3) wasigirun eseriwida lun Heowá tau sun wanigi. Ánhawa asaküriha lídangiñe wafigoun, feruduna lubadiwa Heowá (aliiha huméi 2 Korintuna 7:​9, 11).

HUDUGUATIÑA LUN HEOWÁ KEI AUBEI LAGUNDAARA

12. Ka idan mítaran hama urúeigu ha úaraguabaña hawéi urúeigu ha múaragunbaña?

¹² Urúeigu ha meha úaraguabaña lun Heowá héchutiña meha lun háhuduragua lun kei le aubei lagundaara ani ínchaha hamutiña amu lun hadügüni ligiaméme. Inarüni, ítara kei warihini anihein meha dan hachararun. Lau sun lira, lúnrügüñein meha Heowá háhuduragua, áfaagua hagía saragu lun hagumuchun lau áhuduraguni mama inarüniti. d

13. Ka uagu larihei Heowá Aabü kei aban urúei múaranti?

¹³ Ka gayaraabei wariñagun hawagu urúeigu ha múaranbaña ligibugiñe Heowá? Inarüni mámarügüñein lan katei wuribati hadüga. Íbini meha salufuri lan urúei Aabü arufudati murusun ǘnabuguni, sandiguati lungua wuriba dan le líchugun fe lau afarúa lan Nawotu ladüga (1 Uru. 21:​27-29). Bunaguati giñe burí uburugu ani adügati lun lagañeirun Ísüraeli wuribu (1 Uru. 20:​21, 29; 22:39). Gama lumoun, adügati Aabü saragu katei wuribati le aubei masakürihan lan: ínchaha tumuti lani weiriou lun ladügün lun háhuduragun gürigia houn guáriua (1 Uru. 21:​25, 26).

14. a) Ka uagu larihei Heowá Roboamü kei aban urúei múaranti? b) Ka hadügübei hiibe-agei urúeigu ha múaranbaña?

 ¹⁴ Ayanuha wamá luagu ábaya urúei le múaragunti: Roboamü líribei. Kei buga warihini, adügati giñe saragu katei buiti. Lau sun lira, dan le lederebugudunbei larúeihan, aba lígiruni lagunfuliruni lilurudun Heowá ani gumese ligía áhuduragua houn búngiugu mama inarünitiña (2 Kro. 12:1). Lúmagiñe dan ligía, anihein meha dan huduguati lun Heowá ani anihein meha dan huduguati houn guáriua (1 Uru. 14:​21-24). Mámarügüñein meha urúei Roboamü luma urúei Aabü adiseda luéi áhuduraguni inarüniti. Le linarün katei, hiibe-agei meha urúeigu múarantiña, huduguatiña houn búngiugu mama inarünitiña, ínchaha hamaña amu lun hadügüni ligiaméme. Furanguti, ánheingubeirügü lan áhuduragua aban urúei lun Heowá kei le aubei lagundaara ítararügüñein larihiniwa anhein buidu lubéi urúei ligía.

15. Ka meha uagu súdini lubéi áhuduraguni inarüniti lun Heowá?

¹⁵ Ka meha uagu súdini lubéi áhuduraguni inarüniti lun Heowá? Luéigiñe aban oubaü houn meha urúeigu líchigei Heowá dasi lun híderaguniña gürigia lun háhuduragun lun kei lubeibei. Dan méhati le háhuduragun urúeigu ha houn búngiugu mama inarünitiña barǘ lumutiña óusera lau marichaü adüga hagía figóu le wéiriti luriban (Ose. 4:​1, 2). Lanwoun lira, dandu meha urúeigu kei ísüraelina lubúeingu meha Heowá ha deregeguaañabaña houngua lun. Ligía tariñagubei Bíbülia dan le lan háhuduragun houn búngiugu mama inarünitiña, ítara liña lan lira kamá hamuga hagabarahaña (Her. 3:​8, 9). Dan le lagabarahanu aban wügüri lani weiriou o würi tani weiriei hadügüña figóu luagu hágubu  guánarügü. Ligiaméme asuseredubei houn gürigia ha deregeguaañabaña houngua lun Heowá ani, lárigiñe, aba háhuduragun houn búngiugu mama inarünitiña, gárigüda hamutu lanigi Heowá (2 Lur. 4:​23, 24). e

16. Ligibugiñe Heowá ka gürigia buídubaña o ka gürigia wuribabaña?

¹⁶ Ka wafurendeirubei? Lunti lau wadisedun sunsuinagubei luéi áhuduraguni mama inarüniti. Ani mámarügü ligía; mosu wáhuduragun lun Heowá kei le aubei lagundaara, bereseguñu wagíame lidan weseriwidun lun. Furanguti lariñaguni profeta Malakíasi, ka lan gürigia buídubei o ka lan gürigia wuribabei ligibugiñe Heowá, dan le lariñagubei: “Ábameti hasubudiruni le buídubei lumoun le wuribabei, le áhuduragubei lun Bungiu lumoun le máhuduragunbei lun” (Mal. 3:18). Ligíati, mígira wamá lun ladügün somu katei —kéiburi wachara— lun labürühan warüna lun wígiruni weseriwidun lun Bungiu. Wadügüña aban figóu wéiriti anhein wígira Heowá.

17. Ka uagu mosu lubéi duari wamá dan le wanúadahan kaba lan uma wamarieida?

¹⁷ Anhein mamarieidungidibu lubéi ani basaminaruña bamarieidun, gayaraati líderagunibu dimurei le lariñagubei Malakíasi anúadaha buidu. Saminabá luagu le: gayaraati buidu lan tigaburi aban würi; lau sun lira, anhoun meseriwidun lun Heowá, larihiboun funa san Heowá würi to kei aban würi to richatu? (2 Ko. 6:14). Ánhabu amarieida tuma, tíderagubadibu san lidan beseriwidun lun Bungiu? Mabulieidabei le, íbini meha arufuda hama lánigu urúei Salomón weiriou ha terenchana lubuidun igaburi, meseriwiduntiña meha lun Heowá. Ani murusun murusun, aba hadügün lúmarigu urúei le lun tegeyedun lanigi lun láhuduragun houn amu búngiugu (1 Uru. 11:​1, 4).

18. Ka lunbei harufudahani agübürigu houn hasaanigu?

 ¹⁸ Agübürigu, gayaraati hayusuruni abahüdaguni le hawagu urúeigu lun híderaguniña hisaanigu lun busén hamá heseriwidun lun Heowá. Súdiniti lun gunfuranda hamani hisaanigu urúeigu lan meha ha áubaña lagundaara Heowá hagía meha urúeigu ha ínchahabaliña gürigia lun háhuduragun lun. Arufuda huméi houn hisaanigu dandu lau le hariñagubei kei lau le hadügübei haliihanu lan Bíbülia, hidin adamuridagua luma hapurichiha ligíatima lan katei súdinibei lidan hibagari (Mat. 6:33). Anhein madügün humá ítara, ladügüba lira lun hasaminarun hisaanigu mosu lan giñe heseriwidun lun Heowá ladügarügü gefén humá luagu Heowá. Lau lásügürün dan, gayaraabei ladügün katei le lun híchuguni hisaanigu heseriwidun lun Heowá lidan libiaman lúgaaru o hígiruni heseriwidun lun.

19. Úaali san emenigini lun aban gürigia le ígira láalibei leseriwidun lun Heowá? (Ariha huméi giñe rekuáduru “ Gayaraayagili hagiribudun lun Heowá”).

¹⁹ Úaali san emenigini lun aban gürigia le ígira láalibei leseriwidun lun Heowá? Aniheingua emenigini lun gürigia ligía! Ladüga gayaraayagili lasakürihan luma lunya gamadagua lan luma Bungiu. Lanwoun lira, mosu ǘnabugu lan ánhara ligíame lun híderaguni wéiyaaña lidan afiñeni (Sant. 5:14). Furumiñeguarügü sákürifisiu le gayaraabei ladügüni wéiribei lebegi lunya gamadagua lan luma Heowá.

20. Ánhawa áyeihaña urúeigu ha úaraguabaña, ida luba larihiniwa Heowá?

²⁰ Ligíati, ka furendei wamaalibei hámagiñe harúeitegu Ísüraelina? Gayaraabei ítara wamá kei urúeigu ha úaraguabaña, anhein hínsiñe Heowá woun tídangiñe sun wanigi. Furendei wamá lídangiñe wachara, asaküriha wamá ani adüga waméi asansiruni le mégeiwabei. Lanwoun lira, wéiriti giñe lisudinin lun lúnrügüba lan Bungiu le inarüniti wáhuduragua. Anhein úaragua hubéi lun Heowá, larihibadün kei gürigia ha richaguabaña.