1. Ka hasandirubei luagu inarüni?

 WAGÍA le lubúeingu Heowá, hínsiñeti inarüni le tídanbei Lererun woun. Tuguya lébunabei wafiñen (Rom. 10:17). Chouru wamuti Heowá lan íchugubalin damuriguaü kristiánu keisi le “ágüdahabalin linarün”, tóunigilei buidu (1 Tim. 3:15). Lau sun wagundan weredera lábugiñe haríaahan íbirigu ha adundehabaliwa, lugundun afuranguagüda hamuti inarüni le tídanbei Bíbülia woun luma ida luba lan wadügüni lugundan Bungiu (Ebü. 13:17).

2. Según Santiagu 5:​19, ka gayaraabei lasuseredun woun, wagía le lubúeingu Heowá?

² Íbini ánharaadiwa lan lun inarüni ani subudi waméi lunti lan wafalaruni tadundehan lóundarun Bungiu, gayaraati wadireirun luéi inarüni (aliiha huméi Santiagu 5:19). Hínsiñeti hamuga lun Mafia lun masigirun wamá afiñera luagu le tariñagubei Bíbülia ni afalarei adundehani le tíchugubei lóundarun Heowá woun (Efe. 4:14).

3. Ka uagu lunti lubéi wárügüdün luagu inarüni? (Éfesuna 6:​13, 14).

³ (Aliiha huméi Éfesuna 6:​13, 14). Málühali Mafia aburuchaguagüda lanarime burí iyeeni lun línchahaniña néchanigu lun hebedaagun lun Heowá (Aruf. 16:​13, 14). Subudi wamuti giñe wéiritimabei lan láfaagun Mafia lun leyeeduniña lubúeingu Heowá (Aruf. 12:9). Ligía lunti lubéi wafurendeirun asubudirei le inarünibei lumoun le iyeenibei luma lun gaganbadi wamá lun inarüni (Rom. 6:17; 1 Fe. 1:22). Ligía lunbei wadügüni lun wásügürün lau ibagari lídangiñe óunwenbu asufuriruni.

4. Kaba wariha lidan aturiahani le?

⁴ Lidan aturiahani le, wayanuhaba luagu bián igaburi le wemegeirubei lun wasubudiruni inarüni le ñǘbuinbei tídangiñe Bíbülia luma lun wánharun lun adundehani le tíchugubei lóundarun Heowá.  Warihuba giñe ǘrüwa katei le lunbei wadügüni lun wasigirun árügüda luagu inarüni.

IGABURI LE WEMEGEIRUBEI LUN GAYARA LAN WASUBUDIRUNI KA LAN INARÜNIBEI

5. Ida liña líderaguniwa inebe lan Heowá woun lun wasubudiruni inarüni?

⁵ Inebesei lun Heowá. Sanditiwa inebesei luagu Heowá dan le weiri lan ínsiñeni le wasandirubei luagu darí lun maweiyasun wamá adüga ni kata le mínsiñeti lun. Busentiwa wasubudiruni le buídubei lumoun le wuribabei, subudi wameime ka lan inarünibei lumoun le iyeenibei lun gayara lan wibihin lun lagundaarun Heowá wau (Ari. 2:​3-6; Ebü. 5:14). Moun lumuti wéiritima lan anufudei le wasandirubei hawéi gürigia sügǘ lau ínsiñeni le wasandirubei luagu Heowá, lugundun, liibe-agei dan, katei burí le aubei magundan lan Heowá hínsiñetimabei houn gürigia.

6. Kei meha hanufude habéi 10 aríaahatiña fulasu, ida liña hóuserun?

⁶ Ánhawa ígira lun wéiritima lan wanufude hawéi gürigia sügǘ lau lineben Bungiu woun, gayaraabei wagumeserun afiñera luagu katei le múaranti luma inarüni le ñǘbuinbei lúmagiñe Heowá. Samina wamá hawagun 12 aríaahatiña fulasu ha meha ounahóubaña arihei fulasu le füramase lubéi Heowá houn ísüraelina. Lidan hakesin 10 hádangiñe, wéiritimati hanufude hawéi kananna sügǘ lau ínsiñeni le hasandirubei luagu Heowá, ligía hariñagunbei: “Siñabei wageindagun hama gürigia hara! Héretiña wawéi” (1 Lur. 13:​27-31). Gayaraati wariñagun mama lan meha hayeeni wügüriña ha luagu héretima hamá kananna hawéi ísüraelina. Íbini ítara, lau hariñagun siñabei lan hagañeiruni wuribu hama háganiñu, habulieidaguña meha luéi lubafu Heowá. Mosu yebe meha híchuguni 10 aríaahatiña fulasu hagía hasaminan luagun le labusenrubei Heowá lun hadügüni ísüraelina. Mosu yebe meha giñe haritaguni le meha adüga láalibei Heowá hawagu murusun dan lubaragiñe. Ítara, harihiñein hamuga meha mabafu hamá kananna ligibugiñe Heowá, Bungiu le Suntigabafu. Ánheinti Hosué luma Kalebü, afiñetiña meha luagu Heowá ani busentiña meha hagundaaragüdüni. Ligía  hariñagunbei houn gürigia: “Anhein fuleseihabu Wabureme woun, líderagubadiwa lun webelurun lidoun fulasu ligía, ábame líchuguni woun” (1 Lur. 14:​6-9).

7. Ka gayaraabei líderaguniwa lun laganwoundun inebesei le wasandirubei luagu Heowá? (Ariha huméi giñe dibuhu).

⁷ Aban katei le gayaraabei líderaguniwa lun laganwoundun inebesei le wasandirubei luagu Heowá, gabaroun wamani le aubei lagundaara lubaragiñe wadügün furumiñeguarügü katei (Sal. 16:8). Danme le haliihan somu sügǘ tídangiñeti Bíbülia, álügüdagua humá hungua: “Lun hamuga san ñéinñadina lan, kaba hamuga san nadüga?”. Kei hénpulu, samina wamá haganbuñein lan ariñahani mabuidunti le hanügübei 10 aríaahatiña fulasu. Hafiñeruña hamuga san lun le hariñagubei? Hígiraguagüdüña hamuga san hungua lun anufudei hawéi gürigia? O wéiritimabei hamuga ínsiñeni le hasandirubei luagu Heowá luma habusenrun lun hagundaaragüdüni? Míchuguntiña meha ísüraelina ha lánina dan ligía fe lariñaguñein lan meha Hosué luma Kalebü inarüni. Ka lanügübei lira houn? Mebelutiña lidoun Fulasu Füramasewati (1 Lur. 14:​10, 22, 23).

8. Ka igaburi lunbei wáfaagun lun gagaburi wamani, ani ka uagu?

⁸ Ǘnabuguni. Arufudaha lumuti Heowá inarüni houn gürigia ha ǘnabugubaña (Mat. 11:25). Arufudatiwa meha ǘnabugu wamá dan le wígirunbei lun larufudahóun inarüni woun (Adü. 8:​30, 31). Íbini ítara, lunti wóunigiragun woungua luéi wagumeserun anaagua woungua. Gayaraati lanügüniwa anaaguni ungua asaminara ábanmeme lan lebegi le wasaminarubei luma adundehani le tídanbei Bíbülia o adundehani le tíchugubei lóundarun Heowá.

9. Kaba íderaguawa lun ǘnabugumeme wamá?

⁹ Kaba íderaguawa lun ǘnabugumeme wamá? Haritagua waméi ni kata lan wagía lóubuagu Heowá (Sal. 8:​3, 4). Gayaraati giñe wafurieidun amuriaha luma Bungiu lun líderaguniwa lun ǘnabugu wamá, ígiraguagüda wagíame woungua lun larufudahóuniwa woun. Líderagubadiwa Heowá lun wíchuguni lisaminan lidan furumiñeti lúgaaru —le ñǘbuinbei tídangiñe Lererun luma tídangiñe lóundarun— mama wasaminan. Danme le haliihanu Bíbülia, áluaha humá katei le achoururagüdübalin hun hínsiñe lan ǘnabuguni lun Heowá ani iyereegu lan pantaü lun, uéiriguni luma anaaguni unguaü. Anhein ichugúa aban dasi súdiniti hun tidan lóundarun Heowá, góunigigua humá hungua luéi heferidiruni ǘnabuguni le huágubei.

KA LUNBEI WADÜGÜNI LUN WÁRÜGÜDÜN LUAGU INARÜNI?

10. Ka layusurubaña Heowá lun ladundehaniña lubúeingu luma lun líchugun ariñahani houn?

¹⁰ Afiñe humá súnwandan luagu adundehani le tíchugubei lóundarun Heowá. Lidan meha binadu Ísüraeli, yusu lumuti meha Heowá Moisesi lun líchaahan adundehani houn lumutuniña ani dan lárigiñe, aba giñe layusuruni Hosué (Hos. 1:​16, 17). Buiti meha lidin houn ísüraelina dan meha le ariha hamaniña bián wügüriña ha kei lóunagülegu Heowá. Saragu sígulu lárigiñe, aba layusuruniña Heowá duusu apostolugu lun líchugun adundehani houn lílana damuriguaü kristiánu (Adü. 8:​14, 15). Dan lárigiñe, aba hanuadirún amu wéiyaaña lidan afiñeni ha meha Herusalénbaña hanwoun. Kei méhati falá habalin íbirigu adundehani le híchugubei wügüriña úaraguatiña ha houn, aba “hederebugudun tílana ligilisi lidan hafiñen” ani “aba haganwoundun afiñetiña sagü weyu” (Adü. 16:​4, 5). Uguñe weyu, biní lumutiwa giñe Heowá dan le wafalaruni adundehani le líchugubei woun tídangiñe lóundarun. Ligíati, ida luba hamuga lasandiragun Heowá lungua lun hamuga maha wamá waganbuniña íbirigu ha lanúadirubaña lun harihin lau dasi le líchugubei? Lun wasubudiruni óunabagülei, akutiha waméi le asuseredubei  dan meha le añangüra lubéi ísüraelina lidoun Fulasu Füramasewati.

11. Ka asuseredubei houn ha ebedaagubaña houn gürigia ha lanúadirubaña Heowá lun hagía lan adundehaña lumutuniña? (Ariha huméi giñe dibuhu).

¹¹ Dan meha le añangüran lubéi ísüraelina lidoun Fulasu Füramasewati, gumesetiña meha fiu hádangiñe wügüriña súdinitiña ha haganaguabaña ayanuha wuriba luagu Moisesi luma luagu ubafu le líchugubei Heowá lun. Ayanuhatiña luagu mámarügüñein lan Moisesi lanúadira Heowá ani aba hariñagun: “Sun wagía anúadira láadiwa Wabungiute ani anihein Wabureme wama” (1 Lur. 16:​1-3). Lau sun meha inarüni lan luagu anúadira laaña lan Heowá sun ísüraelina, Moisesi meha líridubei lun ligía lan adundehaña (1 Lur. 16:28). Ligíati, dan le hayanuhanbei ebedaagutiña ha wuriba luagu Moisesi, le linarün katei, hebedaaguña meha lun Heowá. Masaminaruntiña meha luagun le labusenrubei Bungiu, lun meha le habusenrubei hetenira: habihin lanwoun ubafu le rúaalibei houn lúntima habihin uéiriguni, barüwa hagíame kei gürigia wéirigutiña. Aba lagumuchun Heowá hau ha anügübalin ubaraü lidan ebedaaguni ligía luma hau saragu milu ísüraelina ha hámagiñebaña (1 Lur. 16:​30-35, 41, 49). Gayaraati giñe wachoururuni luagu magundan lan Heowá hau ha marufudunbaña inebesei uguñe weyu lun adundehani le tíchugubei lóundarun.

12. Ka lébunabei wafiñerun tuagu lóundarun Heowá?

¹² Gayaraati wafiñerun súnwandan tuagu lóundarun Heowá. Dan le harihini ha anügübalin ubaraü tidan lóundarun Heowá luagu mégeiwa lan ladügǘn somu asansiruni lidan ligaburi gunfurandawa lan ítaga inarüni tídangiñeti Bíbülia o lidan ligaburi ladügǘn ítaga katei, masaminarun hamuti bián wéiyaasu lun hadügüni asansiruni burí ligía (Ari. 4:18). Adüga hamuti ítara, ladüga busén hamá hagundaaragüdüni Heowá. Lanwoun lira, adüga hamuti sun hayaraati lun hafalaruni le tariñagubei Lererun Bungiu lidan sun le hadügübei, ani sun wagía le lubúeingu Bungiu, lunti wáyeihaniña lidan mígirun hamani arufudahani le harumabei.

13. Ka uagu layanuhóua lau dimurei “arufudahani harumati” ani ka lunbei wadügüni lau?

 ¹³ “Mígirabei luwuyeri arufudahani harumati le” (2 Tim. 1:13). Kati uagu layanuhóua lau dimurei “arufudahani harumati”? Layanuhóuña luagu arufudahani inarüniti le tídanbei Lererun Bungiu (Huan 17:17). Arufudahani le lébunabei sun wafiñen. Ani arufudaha taali lóundarun Heowá woun ida luba lan wafalaruni luwuyeri arufudahani harumati le buidu. Anhein wadüga, buídubei lidin woun.

14. Ida liña meha hígiruni fiu kristiánugu “arufudahani harumati”?

¹⁴ Ka gayaraabei lasuseredun anhein wígira “arufudahani harumati le”? Ariha waméi le asuseredubei lidan furumiñeti sígulu. Añahein meha kristiánugu agumeserutiña aburuchaguagüda iyeeni luagu chülühali lan meha luéyuri Heowá. Másiñati tidan lan meha somu gárada to uáguboun lasaminarúa labürüdün lan apostolu Pábulu lariñawagúa katei le. Ani añahein meha kristiánugu Tesalónika, lubaragiñe hamuga meha hálügüdahan anhein inarüni lubéi katei le, ábarüga hafiñeruni ani aba haburuchaguagüdüni. Lun hamuga meha haritagua hamani le larufudahabei Pábulu houn dan meha le hama lubéi, mígiraguagüdüntiña hamuga meha houngua lun heyeedún (2 Tesa. 2:​1-5). Ligía laritaguagüdünbaliña apostolu Pábulu luagu moun lumuti lan hafiñeruni sun le haganbubei. Lun meha masuseredunya lan le houn, aba lagumuchunu tibiaman ligaradan houn lau dimurei burí le: “Au Pábulu, nabürühañein mábuigaü le hun lau núhabu guánarügü luma niletüran. Ítara luba hasubudiruni luagu au lan óunahabarun gárada to” (2 Tesa. 3:17).

15. Ida luba wóunigiragun woungua luéi iyeeni le genegebei inarüni lan? Ru humá aban hénpulu. (Ariha humóun giñe iyawaü).

¹⁵ Ka wafurendeirubei lídangiñe le labürüdübei Pábulu houn tesalónikana? Anhein lan achülüra somu ariñahani warigeirugun le adügüti lun taweiridun wanigi o aban le múaranti luma le furendei wamaalibei tídangiñe Bíbülia, lunti lan duari wamá. Lidan meha binadu Unión Sowiétika, aba meha hadügün wáganiñu lun tásügürün aban gárada —to nege ñǘbuinboun tídangiñe Beteli to Merigaboun— háhaburugugiñe ámuñegueinarügü íbirigu, to ínchahabaliña lun nege hagumeserun aban iseri óundaruni. Íbini meha  genege lan tídangiñetu lan Beteli gárada tuguya, méiguaduntiña wábirigu ha úaraguabaña tidoun sádara to. Aba híchugun fe múaran lan le ariñawagúbei tidan gárada tuguya luma le furendei hamaalibei tídangiñe Bíbülia. Uguñe weyu, anihein dan hayusuruni láganiñu inarüni teknolohía lun hayuridaguagüdüniwa luma lun hafanreinraguagüdüniwa. Gayaraati wóunigiragun woungua luéi wasansiruni ligaburi waritagun lau lumenrengun, lau wachoururuni luagu úara lan le waganbubei o le waliihabei luma inarüni le subudi wamaalibei (2 Tesa. 2:2; 1 Huan 4:1).

16. Según Rómana 16:​17, 18, ka lunbei wadügüni anhein adireira aban gürigia luéi inarüni?

¹⁶ Redei humá yarafa houn ha úaraguabaña lun Heowá. Busenti Bungiu lun háhuduragun sun íbirigu lun lidan úarani ani ánhawagubeirügü árügüda luagu inarüni, ligíarügübei wibihini lira. Ha adireirubaña luéi inarüni, adügatiña lun ñein lan fánreinguaü lidan damuriguaü. Ligía lariñagunbei Bungiu woun lun wadisedun hawéi hawuyeri gürigia ha, madügün hamaamuga lun wadisedun luéi inarüni (aliiha huméi Rómana 16:​17, 18).

17. Kaba asusereda ánhawa asubudirei inarüni ani ragǘ wagíame luagu?

¹⁷ Anhein wasubudira inarüni ani ragǘ wagíame luagu, yarafabadiwa lun Heowá ani derebugubei wafiñen (Efe. 4:​15, 16). Mígiraguagüdünbadiwa woungua lun leyeeduniwa Satanási lau arufudahani mama inarüniti ani lóunigirubadiwa Heowá lídanme óunwenbu asufuriruni. Ragǘ humá lau sun here luagu inarüni, ábameti huma lan “Lubungiute darangilaü” (Fili. 4:​8, 9).