1-3. a) Ka burí asansiruni gayarabei hénrengu lan woun wadügüni lárigiñe wabadiseirun? b) Anhein weiri lubéi lénrengun woun wadügün asansiruni lidan wabagari, ka álügüdahani gayarabei wadügüni wóuniwagua? (Ariha huméi dibuhu le lídanbei lagumeseha arütíkulu).

LUBARAGIÑE gefén lan Kevin luagu Heowá, héchuti meha áhurera luagu seinsu ani barühali meha saragu irumu adügei, héchuti meha giñe agumulaha, átagua luma ayusura düroga ^[1] (ariha huméi abürüdǘni lidan lagumuha arütíkulu). Dan le lafurendeirunbei luagu Heowá, aba busén lan lumada lan. Gama lumoun, mosu meha ladügün saragu asansiruni lidan libagari lubaragiñe labadiseirun. Sánsiti seremei ídemuei le libihibei lúmagiñe Heowá luma giñe lau tubafu Bíbülia, to Lererun Heowá (Ebüréu 4:12).

² Lárigiñe labadiseirun Kevin, mosu meha lasigirun adüga asansiruni lun aban lan kristiánu le buiti (Éfesuna 4:31, 32).  Ménrengunti meha lagañidun. Ani aba taweiridun lanigi dan le líchugun fe hénrengu lan lun lárügüdagun lungua luéi igañi. Abahüdaguati hénrengutima lan lun lárügüdagun lungua luéi lagañidun sügǘ lau lígiruni sun katei wuribati le meha ladügübei lubaragiñe labadiseirun. Ligía aba lubéi layumuragun lun Heowá lun líderaguni ani aba desidírü lan laturiahanu Bíbülia buidu. Seremei ladügüni katei le, ligía gayara lubéi lasansirun.

³ Lubaragiñe wabadiseirun, adügatiwa giñe saragu wádangiñe bandi asansiruni. Ítara liña meha gayara lan wagunfuliruni sun le tariñagubei Bíbülia. Gama lumoun, háfuga wíchugun fe mosu lan wasigirun áfaagua kóntüra somu luriban igaburi lun lenegetima wamá Bungiu luma Kristu (Éfesuna 5:1, 2; 1 Féduru 2:21). Kei hénpulu, háfuga rúhadiwa lan fe weiri lan werederun ekehara o ayanuha hawagu amu. O háfuga anihein lan dan madügün wamani le buídubei ladüga wanufude luéi le lunbei hariñaguni o hasaminaruni amu. Háfuga lǘhadiwa lan áfaagua lun wasansirun, ani awanheingua acharara lidan ligiaméme. Ligíati, háfuga álügüdagua wamá woungua: “Ka uagu lanarimebei lénrengun nun nadügüni asansiruni burí le? Ka lunbei nadügüni lun nasigirun abuiduragüdei nigaburi lun úara lan luma le tariñagubei Bíbülia?”.

4. Ka uagu siñá lubéi wagundaaragüdüni Heowá lidan sun katei?

⁴ Sun wagía, ha eseriwidubaña lun Bungiu, hínsiñeti Bungiu woun ani busentiwa wagundaaragüdüni. Ani mama súnwandan wadügüni ladüga gafigoun wamá. Anihein dan wasandiragun woungua kei apostolu Pábulu, le ariñagubei busén lan ladügüni le buídubei, gama lumoun mama súnwandan libihini (Rómana 7:18; Santiagu 3:2).

5. a) Ka meha asansiruni mósubei wadügüni lun gayara lan wabadiseirun? b) Ida liña lasigirun figóu íchiga turóbuli woun?

⁵ Lun gayara lan wabadiseirun lun aban wamá gefenti luagu Heowá, mosu meha wígiruni wadügüni katei burí le mínsiñebei lun Heowá (1 Korintuna 6:9, 10). Gama lumoun, kei le gafigoungidiwa lubéi, charamémegidiwa íbini barühadiwa lan saragu irumu lúmagiñe wabadiseirun (Kolosana 3:9, 10). Háfuga anihein lan dan liabin somu luriban saminaü tidoun wanigi o somu igaburi wuribati, o háfuga hénrengu lan woun wárügüdagun woungua lun marufudun wamá somu igaburi le mabuidunti. Le linarün katei, háfuga barühadiwa lan saragu irumu áfaagua lun wagidaruni luriban igaburi ligía wawariua.

6, 7. a) Íbini gafigoun wamá, ka uagu gayara lubéi lumadagu wamá Heowá? b) Ka uagu lunti lubéi wasigirun amuriaha luma Heowá lun feruduna lániwa?

⁶ Íbini gafigoun wamá, gayarati lumadagu wamá Heowá ani seriwi wagía lun. Mabulieida waméi ligía lan anúadirubaliwa lumadagume ladüga larihin somu katei buiti wawagu ani aba busén lan lun wasubudiruni (Huan 6:44). Subudi lumuti meha gafigoun wamá ani ligía lan anihein lubéi igaburi wuribati wawagu ani chará wagía. Íbini ítara, busenti meha Heowá lun lumadagu wamá.

⁷ Ladüga lueirin wínsiñe lun Heowá, aba líchugun aban lubuidun idewesei woun. Aba lóunahani Liráü ubouagun lun lederegeruni libagari lun lafayeihan luagu wafigoun  (Huan 3:16). Dan le wachararun, gayarati wamuriahan ferudun luma Heowá. Seremei lani Hesusu sákürifisiu, feruduna lumutiwa Heowá ani ruti chansi woun lun wakipuruni wamadagua luma (Rómana 7:24, 25; 1 Huan 2:1, 2). Haritagua waméi hilati lan Hesusu hawagu gafigountiña ha asakürihabaña. Ligíati, anhein samina wabéi weiri lan luriban katei le wadügübei, amuriaha wamá luma Heowá lun feruduna lániwa. Ánhawa mamuriahan ferudun luma, ítara liña hamuga kei werederun lau wáhabu wíñeñu ladüga mabusenrun wamá wachibuni. Ma teinki wamuti Heowá luagu lígirun lun lumadagu wamá lau sun gafigoun wamá? (Aliiha huméi 1 Timotéu 1:15).

8. Ka uagu lunti lubéi wáfaagun lun wasansiruni igaburi wuribati le wawagubei?

⁸ Inarüni siñati lan warihini wachara kei ni kata. Ariñaga laali Heowá ka lan hawuyeri gürigia leresibirubaña keisi lumadagu (Sálumu 15:1-5). Ligíati, anhein busén wabéi lumadagu wamá Bungiu, mosu wasigirun áfaagua lun wáyeihani ani áyeiha wameime Liráü. Mosu giñe wáfaagun lun mígiraguagüdün wamá woungua lun luriban wayumahan, ani le gayarati wagidaruni wawariua lunti wagidaruni. Meberesenga átiri lan irumu lúmagiñe wabadiseirun, mosu wasigirun abuiduragüdei wagaburi keisi kristiánugu (2 Korintuna 13:11).

9. Ida liña wasubudiruni mosu lan wasigirun adaüragua lau iseri igaburi?

⁹ Ru lumuti apostolu Pábulu adundehani le: “Ánheinti luagu binadu ligaburi habagaridun, lunti hígiruni, le mabuidunhalibei ladüga hayumahan le geyeeraguadibei”. Ábaya lariñagun: “Iserigua humá lidan hani sífiri luma lidan hisaminan, daügua humá lau iseri igaburi, igaburi le ladügübei Bungiu kei ligaburi guánarügü, lidan irichaü le tímatimaati luma arumani” (Éfesuna 4:22-24). Mini lan le mosu lan wasigirun áfaagua lun buídutima wamá keisi kristiánugu ani lun warufuduni “iseri igaburi”. Ligíati, meberesenga átirihali lan dan wau eseriwida lun Heowá, súnwandan gayara lan wasigirun afurendeira luagu ligaburi. Ani gayarati tíderaguniwa Bíbülia abuiduragüdei wagaburi lun lenege lan ligaburi Heowá.

10. a) Ka lunbei wadügüni lun tasigirun Bíbülia íderaguawa awansera? b) Ka burí álügüdahani lunbei wóunabuni?

¹⁰ Sun wagía busentiwa gaganbadi wamá lun le tariñagubei Bíbülia. Gama lumoun, anhein busén wabéi wasigirun awansera, mosu wáfaagun saragu. Ka uagu mosu lubéi wáfaagun saragu? Siñati san ladügün Heowá lun ménrengun lan woun wadügüni le buídubei?

11-13. Ka uagu aguraba lubéi Heowá lun wáfaagun lun wagidaruni luriban igaburi wawariua?

¹¹ Dan le wasaminarun luagun sun le adüga láalibei Heowá, aba wachoururuni gabafu lan lun ladügün furumiñeguarügü katei.  Samina wamá luagun Weyu. Wéiriti lubafu Weyu. Kada segundu ígiragüdati saragu erei. Murusunrügüñein lídangiñe erei le lígiragüdübei achülüra ubouagun, gama lumoun, ligíarügüñein emegeirúa lun ñein lan ibagari ubouagu (Sálumu 74:16; Isaíasi 40:26). Ruti giñe Heowá ubafu houn lubúeingu ya ubouagu dan le megei hamani (Isaíasi 40:29). Ligía gayara lubéi álügüdagua hamá fiú houngua ka lan uagu madügün lubéi Heowá lun ménrengun lan woun wagidaruni luriban igaburi wawariua.

¹² Rúhali Heowá üma woun lun desidírü wamá woungua. Ígirati lun desidírü wamá anhein gaganbadibadiwa lubéi lun o maganbadibadiwa lan. Dan le desidírü wamá gaganbadi wamá lun ani aba wáfaagun lun wadügüni lugundan, arufuda wamuti lun hínsiñe lan woun ani busén wamá wadügüni lugundan. Ariñagati Mafia maricha lan Heowá lun lagumadiruniwa. Gama lumoun dan le gaganbadi wamá lun Heowá, aba warufuduni busén wamá lun ligía lan warúeite. Ani wéiriti lebegi áfaaguni le wadügübei lun Wáguchi le hínsiñehabubei (Hobu 2:3-5; Ariñawagúni 27:11). Kei le madügün lubéi Heowá lun ménrengun lan woun wagidaruni luriban ayumahani wawariua, dan le wasigirun áfaagua arufudatiwa úaragua wamá ani busén wamá lun ligía lan warúeite.

¹³ Ariñagati Heowá woun mosu lan wáfaagun lun wáyeihani ligaburi (Kolosana 3:12; aliiha huméi 2 Féduru 1:5-7). Agurabati Heowá lun wáfaagun lun wóunigiruni wasaminan luma le wasandirubei (Rómana 8:5; 12:9). Anhein wadüga sun wayaraati lun wasansirun, gúndaabadiwa danme le wibihini.

14, 15. Ka lunbei wadügüni lun warufuduni igaburi burí le hínsiñebei lun Heowá? (Ariha huméi rekuáduru “ Sansi tumuti Bíbülia luma furíei hagaburi”).

¹⁴ Ka lunbei wadügüni lun warufuduni igaburi burí le hínsiñebei lun Heowá? Moun lumuti desidírü wamani woungua ka burí lan katei lunbei wasansiruni. Mosu wígirun lun ladundehaniwa Heowá. Ariñagati Rómana 12:2: “Hebé habagaridun keisi lirahüñü ubóu le; lubaragiñe lira, sansi huméi ligaburi hisaminan, sansi láamuga giñe ligaburi habagaridun. Ítara luba hiabin lun hasubudiruni le lugundanbei Bungiu hun —le buídubei, le úaraguabei”. Anhein busén wabéi wasubudiruni le hínsiñebei lun Heowá, mosu wayusuruni sun ídemuei le líchugubei woun. Mosu waliihanu Bíbülia sagü weyu, mosu wasaminarun luagun le waliihabei ani amuriaha wagíame sífiri sandu luma Heowá (Lúkasi 11:13; Galasiana 5:22, 23). Anhein wadüga katei le, líderagubadiwa Heowá lun gunfuranda wamani ka lan hínsiñebei lun ani ábame wafurendeirun asaminara kei ligía. Kei resultóu, hínsiñebei le wasaminarubei, le wariñagubei luma le wadügübei lun Heowá. Íbini ítara, mósume wasigirun áfaagua kóntüra luriban wayumahan (Ariñawagúni 4:23).

¹⁵ Ligibuagun waliihanu Bíbülia sagü weyu, mosu waturiahanu lau tídehan agumeiraguagüdüni kéiburi Garüdia Awisahatu tuma ¡Despertad! Arufudahati saragu  arütíkulu tídangiñe garüdia burí to woun ida luba lan wáyeihani ligaburi Heowá luma ida luba lan wáfaagun kóntüra luriban wayumahan. Gayarati darihadiwa lan somu arütíkulu o somu bérusu tídangiñeti Bíbülia le wemegeirubei lidan oura ligía. Gayarati wareiduni lun waliihani sun dan.

16. Ka uagu moun lumuti lubéi weferidiruni waguraasun anhein hénrengu lubéi woun wadügün asansiruni lau lóufudagun kei wabusenrun?

¹⁶ Mégeitiwa saragu dan lun wafurendeirun áyeihei ligaburi Heowá. Ligíati, gaguraasun wamá ánhawa ariha masansirungili lan wagaburi saragu kei hamuga wabusenrun. Dan le wagumeserun, háfuga mosu lan wafosuragun woungua lun wadügüni le tariñagubei Bíbülia. Gama lumoun, eibu wáfaagun lun wasaminarun luma lun wóuserun kei labusenrun Heowá, ménrenguntimabei woun wasaminarun kei ligía ani ábame wadügüni le buídubei (Sálumu 37:31; Ariñawagúni 23:12; Galasiana 5:16, 17).

17. Ánhawa asigira eseriwida lun Heowá lau úaraguni, ida luba wabagari ámuñegü?

¹⁷ Busenhadiwa lachülürün weyu lun mafigoun wamá ani lun weseriwidun lun Heowá lun súnwandan. Lidan dan ligía, úaalime ni aban igaburi wuribati wawagu. Ménrenguntimahalime woun lenege wamá Heowá. Gama lumoun, seremei lebegi asalbaruni íbini guentó lau gafigoungidiwa lan gayarati wáhuduragun lun. Ánhawa asigira áfaagua lun buídutima wamá ani lun gaganbadi wamá lun le larufudahabei Heowá woun tidan Bíbülia, gayarabei wagundaaragüdüni.

18, 19. Ka arufudubalin gabafu tan Bíbülia lun tasigirun asansirei wagaburi?

¹⁸ Lidan furumiñeti burí párafu ayanuhatiwa luagu Kevin, aban íbiri le meha áfaagubei lun lárügüdagun lungua luéi agañiduni. Aba lasaminarun luagun le laliihabei tidan Bíbülia ani aba láfaagun lun lasansirun. Ani gaganbaditi giñe lun adundehani le híchugubei líbirigu kristiánugu lun. Íbini barǘ lan fiú irumu lun lasansirun, chülüti dan lun leseriwidun keisi ídehati lidan damuriguaü. Ani lidan lagumuhóun 20 irumu seriwihali keisi wéiyaali lidan afiñeni. Gama lumoun, sandigili mosu lan lasigirun áfaagua lun lagidarun fiú igaburi wuribati luáriua.

¹⁹ Ítara kei Kevin, gayarati giñe wasigirun abuiduragüdei wagaburi. Anhein wadüga, buídutimabei wamadagua luma Heowá eibu dan (Sálumu 25:14). Adüga waméi sun wayaraati lun wasansirun según lugundan, ani ábame líderaguniwa. Gayarati wachoururuni gabafu tan Bíbülia lun tasigirun asansirei wagaburi (Sálumu 34:8).