1, 2. a) Ka wasandirubei tuagu Bíbülia, wagía gefentiña luagu Heowá? b) Ka fánreinti tídangiñeti Bíbülia hínsiñetimabei hun?

WAGÍA, gefentiña luagu Heowá, hínsiñetu Bíbülia woun. Rutu líburu to gurasu woun, emenigini luma aban adundehani le gayarati wafiñerun luagu (Rómana 15:4). Mama hasaminan gürigia tídanbei. “Luganute Bungiu” wadarirubei tidan (1 Tesalónikana 2:13).

² Ka fánreinti tídangiñe Bíbülia hínsiñetimabei hun? Chóuruti anihein lan somu fánreinti le hínsiñetimati lun kada aban wádangiñe. Añahein fiú hínsiñetu liliburun Matéu, Márükosu, Lúkasi luma Huan houn, ladüga íderagua lumutiña le hariñagubei luagu Hesusu lun hasubudiruni lubuidun burí ligaburi Heowá (Huan 14:9). Añahein amu hínsiñetu líburu kéiburi Arufudúni houn, ladüga anihein profesía burí tidan le ayanuhabei luagu “katei le burí lunbei lasuseredun madise” (Arufudúni 1:1). Híbiri daritiña gurasu dan le haliihani Sálumu, ani añahein amu gúndaatiña lau lubuidun burí adundehani le lídanbei Ariñawagúni. Furanguti aban lan líburu to hountu sun gürigia Bíbülia.

3, 4. a) Ka wasandirubei tuagu wani agumeiraguagüdüni? b) Ka agumeiraguagüdüni wámaboun houn ámuñegueinarügü hawuyeri gürigia?

 ³ Kei le hínsiñe tubéi Bíbülia woun, hínsiñetu giñe sun agumeiraguagüdüni to weresibiruboun woun ladüga tídangiñe Bíbülia tasagarúa. Dandu líburu, garüdia tuma sun agumeiraguagüdüni to wibihiboun lúmagiñe Heowá tiabin woun keisi éigini. Íderagua tumutiwa lun buidu lan wamadagua luma Bungiu luma lun héreñu lan wafiñen (Titu 2:2).

⁴ Saragu tídangiñe wani agumeiraguagüdüni hountu sun gefentiña luagu Heowá. Anuhein amu to hountu nibureintiña o houn agübürigu. Ani lidan wani páhina lidan Internet libe-agei arütíkulu luma bidéu burí le ñeinbei hounti gürigia ha mama gefentiña luagu Heowá. Sun ariñahani le arufudati gúnfuli laali lan Heowá lani füramasei luagu líchuguba lan saragu éigini houn sun gürigia (Isaíasi 25:6).

5. Ka katei gayarabei wachoururuni?

⁵ Besafu wádangiñe hínsiñeti hamuga woun gadaanitima wamá lun waliihanu Bíbülia tuma burí amu agumeiraguagüdüni. Háfuga siñati wígirun saragu dan lun waliihan kada agumeiraguagüdüni to weresibiruboun. Gama lumoun gayarati wachoururuni gúndaabei lan Heowá wama anhein wayusura wadaani buidu lun waliihan luma lun waturiahanu Bíbülia tuma amu burí agumeiraguagüdüni (Éfesuna 5:15, 16). Íbini ítara, anihein ábanya peliguru le lunbei wóunigiragun woungua luéi. Ariha waméi katei lan.

6. Ka gayarabei ladügün lun masagarun wamá saragu buiti lídangiñe sun ariñahani le líchugubei Heowá woun?

⁶ Ánhawa móunigi, gayarabei wasaminarun anihein lan somu fánreinti tidan Bíbülia o tidan burí wani agumeiraguagüdüni le marufudahanti ni kata woun. Kéiburi anhein genege lubéi woun mahuudun lan somu fánreinti tídangiñe Bíbülia woun lun ni kata lidan wabagari, kaba wadüga? O kaba wadüga anhein houn lubéi amu hawuyeri gürigia tadügǘwa somu agumeiraguagüdüni? Marihin wabéi san le tariñagubei kei ariñahani súdiniti? Odi maliihangubei wabóun? Anhein asusereda ítara, weferidiruba ariñahani súdiniti le gayarati líderaguniwa saragu. Ida luba san méiguadun wamá lidoun peliguru le? Haritagua waméi lúmagiñe lan Heowá liabin sun ariñahani le weresibirubei. Ariñagatu Bíbülia: “Au Aburemeibei le Bubungiute; arufudaha numuti le buídubei bun” (Isaíasi 48:17). Lidan arütíkulu le warihiba ǘrüwa adundehani le lunbei líderaguniwa lun wasagaruni sun buiti le wayaraati tídangiñe Bíbülia. Warihibei giñe ida luba lan wasagarun buiti lídangiñe sun ariñahani le líchugubei Heowá woun.

7. Ka uagu mosu lubéi wadaaruni wasaminan dan le waliihanu Bíbülia?

⁷ Dará waméi wasaminan dan le waliihan. Inarüni anihein lan fánreinti tidan Bíbülia le abürüdǘbei lun aban gürigia o houn bandi gürigia. Gama lumoun ariñagati 2 Timotéu 3:16: “Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni”. Ligía mosu lubéi wadaaruni wasaminan dan le waliihanu Bíbülia (ariha huméi rekuáduru “Ka mini lubéi?”). Anihein aban íbiri ariñaguti houcha lan laritaguni gayarati lan larufudahan ábanrügü fánreinti tidan Bíbülia saragu katei lun. Íderagua lumuti katei le lun ladarirun ariñahani le hénrenguti ladarirún. Ligíati, lubaragiñe waliihanu Bíbülia, amuriaha wamá luma Heowá lun ladaaruni wasaminan ani lun líchugun  lichú aau woun lun warihini sun le labusenrubei larufudahan woun (Ésüdürasi 7:10; aliiha huméi Santiagu 1:5).

8, 9. a) Ka burí álügüdahani gayarabei wadügüni wóuniwagua dan le waliihanu Bíbülia? b) Sun le lamuriahabei Heowá hámagiñe wéiyaaña lidan afiñeni, ka larufudahabei woun luagu Heowá?

⁸ Adüga wamá álügüdahani wóuniwagua. Dan le waliihanu Bíbülia, gayarati wadügüni ǘrüwa álügüdahani le wóuniwagua: “Ka larufudahabei le nun luagu Heowá? Ida liña gayara lan nayusuruni ariñahani le lidan nibagari? Ida luba nayusuruni lun níderagun amu?”. Ánhawa asaminara luagun álügüdahani burí le, wasagaratimaba buiti lídangiñe waliihanu Bíbülia. Ariha wamá aban hénpulu. Rutu Bíbülia aban lísüta lau burí katei le lunbei hagunfuliruni wéiyaaña lidan afiñeni (aliiha huméi 1 Timotéu 3:2-7). Inarüni hibe-agei lan wádangiñe mama wéiyaaña lidan afiñeni wagía. Ligía gayara lubéi wasaminarun meseriwin lan bérusu burí le woun saragu. Gama lumoun, wayusuraali ǘrüwa álügüdahani le lídanbei párafu le lun warihini gayara lan lahuudun fánreinti tídangiñeti Bíbülia le woun sun wagía.

⁹ “Ka larufudahabei le nun luagu Heowá?”. Ruti Heowá aban lísüta lau sun katei le lunbei hagunfuliruni wéiyaaña lidan afiñeni. Ani agurabati Heowá lun hagunfulirubei lan lúrudu íñuburiti ligía. Ka uagu? Ladüga weiri lan lebegi damuriguaü lun Heowá.  Ariñagatu Bíbülia agañeiha lániña “lau guánarügü lita Liráü” (Adügaü 20:28). Ligíati, agurabati Bungiu lun híchugun wéiyaaña lidan afiñeni aban hénpulu buiti. Ani laguseragüdübaña giñe luagu ligaburi hóuseruniña lílana damuriguaü. Busenti lun chouru lan wasandiragun woungua lábugiñe hadundehan wéiyaaña lidan afiñeni (Isaíasi 32:1, 2). Kei warihini, sun le lamuriahabei Heowá hámagiñe wéiyaaña lidan afiñeni arufudati berese lan wau saragu.

10, 11. a) Ida liña lahuudun woun wakutihanu lísüta lau sun le lunbei hagunfuliruni wéiyaaña lidan afiñeni? b) Ida liña gayara lan wayusurunu lísüta lun wíderagun amu gürigia?

¹⁰ “Ida liña gayara lan nayusuruni ariñahani le lidan nibagari?”. Anhein weseriwiduña lubéi keisi wéiyaaña lidan afiñeni, mosu wáguyuguagüdünu lísüta to kada átiri dan ani ábame wáfaagun lun buídutima wamá. Ani anhein mama lubéi wéiyaaña lidan afiñeni wagía, ani ligía wabusenrubei wadügün, mosu wadügüni sun wayaraati lun wagunfuliruni sun lúrudu ligía (1 Timotéu 3:1). Gama lumoun, sun wagía gayarati wafurendeirun tídangiñe lísüta to. Kei hénpulu, agurabati Heowá lun wárügüdagun sun wagía woungua luéi wuribati ani óusera wagíame lau lichú aau (1 Féduru 4:7; Filipuna 4:5). Dan le híchugun wéiyaaña lidan afiñeni aban hénpulu buiti houn lílana damuriguaü, gayarati hafurendeirun íbirigu hámagiñe ani áyeiha hameime hafiñen (Ebüréu 13:7; 1 Féduru 5:3).

¹¹ “Ida luba nayusuruni ariñahani le lun níderagun amu?”. Gayarati teseriwidun lísüta to woun lun wafuranguagüdüni houn gürigia ha aturiahabarun Bíbülia wama mítaran hamá wéiyaaña lidan afiñeni kei lábutigu amu relihión. Haritaguagüda tumutiwa giñe lísüta tuguya weiri lan hawadigimari wéiyaaña lidan afiñeni. Inebetimatiña woun dan le wasaminarun luagun sun áfaaguni le hadügübei (1 Tesalónikana 5:12). Ani éibume warufudun inebesei houn, gúndaatimabaña lau hawadigimaridun lun damuriguaü (Ebüréu 13:17).

12, 13. a) Ka gayarabei wakutihani dan le waliihanu Bíbülia? b) Ru humá aban hénpulu luagu le gayarabei wadariruni dan le wakutihan libügürü le asuseredubei dan le labürüdǘnbei somu abahüdaguni.

¹² Áluaha wamá lanwoun ariñahani. Dan le waturiahanu Bíbülia, gayarati wáluahani lóunabagüle álügüdahani burí le:

• Ka abürüdübalin fánreinti tídangiñeti Bíbülia le?

• Halía ani ídabuga labürüdǘwa?

• Ka meha katei súdiniti asuseredubei dan le tabürüdǘnwabei líburu to?

Gayarati líderaguniwa wáluahani ariñahani le lun wadarirun leksióun le hénrengubei ladarirún.

¹³ Ariha wamá aban hénpulu. Lidan Esekiéli 14:13, 14 ariñagati Heowá anhein lan afigouha aban néchani ligibugiñe, lagumuchuba lan hau ani lagumuchuba giñe lau sun heigin luma hau habiñanigu. Gama lumoun ariñagati giñe: “Anhein lidan lubéi ageiraü ligía laganawa Noé, Danieli luma Hobu, hagíarügübaña esefura ladüga richagua hamá”. Ánhawa áluaha lanwoun ariñahani, warihibei bürǘ lani Esekiéli bérusu burí le kéiburi 612 irumu lubaragiñe Kristu. Íbini sügühali lan meha lóugiñe san irumu lúmagiñe lounwen Noé luma Hobu, haritagua lágili meha Heowá úaragua hamá meha lun. Gama lumoun, wínwangili meha Danieli. Ani háfuga kéiburi lan meha 20 irumu lau dan le lariñagunbei Heowá úaragua lan kei Noé luma Hobu. Ka wafurendeirubei? Luagu ariha lániña Heowá sun lubúeingu ha úaraguabaña ani gebegitiña lun, íbini ha nibureingiñabaña (Sálumu 148:12-14).

14. a) Sun ariñahani le abürüdǘbei houn nibureintiña, ida liña líderaguniña? b) Ida liña lahuudun ariñahani ligía houn amu? (Ariha humóun iyawaü to lídanboun lagumeseha arütíkulu).

¹⁴ Ariñahani houn nibureintiña. Ariha wamaali súngubei lan wagía gayarati wafurendeirun saragu katei dandu tídangiñe Bíbülia kei tídangiñe sun burí wani agumeiraguagüdüni. Ariha wamá fiú hénpulu. Lidan lagumuhóun burí irumu, rúhali Heowá saragu arütíkulu woun tuma burí líburu hountu nibureintiña ^[1] (ariha huméi abürüdǘni lidan lagumuha arütíkulu). Íderagua lumutiña ariñahani burí le nibureintiña lun hagagibudagun luma óuchawaguni leskuelarugu luma burí luma turóbuli le gádanbaliña ladüga harumudiri. Gama lumoun, ida luba san lahuudun arütíkulu burí tuma líburu tuguya woun súngubei? Anhein waliiha, wasubudirubei turóbuli burí le gádanbaliña nibureintiña ani gayarabei wíderaguniña luma wíchugun dǘgüdaguaü houn.

15. Ka uagu lunti lubéi súdini lan harihini wéinamuhaña ariñahani le áfuridubei houn nibureintiña?

¹⁵ Moun lumuti hasaminarun kristiánugu ha wéinamuhañabaña memegeirun hamá haliihani ariñahani le abürüdǘbei houn nibureintiña. Barüguaü unguaü lira. Mosu giñe hararamun gürigia wéinamuhaña lun saragu lídangiñe turóbuli le uágubei layanuha arütíkulu burí ligía. Sun wagía mosu wóunabun dan le layanuhóun wuriba luagu wafiñen, mosu wárügüdagun woungua luéi wagañidun saragu, luéi wéiguadun lidoun katei mabuidunti dan le héredun amu wawagu lun wadügüni, lun wadisedun hawéi hagübüri umadagu luma luéi isebáhari le mabuidunti. Sun ariñahani le abürüdǘbei houn nibureintiña tídangiñe Bíbülia lasagarúa. Ligíati, sun kristiánugu gayarati wasagarun buiti lídangiñe.

16. Ka idan gayara lan giñe tíderaguniña agumeiraguagüdüni nibureintiña?

¹⁶ Agumeiraguagüdüni to abürüdǘboun houn nibureintiña íderagua tumutiña lun buídutima lan hamadagua luma Heowá (aliiha huméi Apurichihati 12:1, 13). Gama lumoun, gayarati giñe lahuudun houn ha wéinamuhañabaña. Kéiburi tidan ¡Despertad! to lánina gádürü-hati irumu 2009 furiti meha aban arütíkulu hounti nibureintiña le gíribei “¿Cómo disfrutar la lectura de la Biblia?”. Anihein meha saragu adundehani lidan arütíkulu ligía luma aban rekuáduru le gayarabei libigún lun lareidún lubá laturiahóun. Seriwiti meha san adundehani le houn ha wéinamuhañabaña? Anha! Abahüdaguatu aban würi maríeiharu ani gasaanigu tuguya luagu hénrengu lan meha tun taliihanu Bíbülia, ligía aba lubéi tafalaruni adundehani le lídanbei arütíkulu ligía. Guentó, hínsiñeti tun taliihanu Bíbülia ariheinatéi ida liña lan úara lan le tariñagubei kada líburu tuma to tíbiri. Íderagua lumutu katei le lun gunfuranda tanu sun Bíbülia. Ariñagatu: “Mínsiñedunñahagili meha taliihóun Bíbülia nun ítara”.

17, 18. Ida liña lahuudun ariñahani le áfuachubei tidan agumeiraguagüdüni to auboun wapurichiha woun? Ru humá aban hénpulu.

 ¹⁷ Ariñahani hounti sun gürigia. Lidan irumu 2008 ligía wagumeserun adügoun Garüdia Awisahatu, to hountu gefentiña luagu Heowá. Gama lumoun adügatiwa giñe garüdia to hountu gürigia ha mama gefentiña luagu Heowá. Ida luba wasagarun saragu buiti tídangiñe? Ru wamá aban hénpulu. Samina wamá aba lan wamisurahan aban gürigia tidoun Luban Wadamuridagun, ani aba lachülürün gürigia ligía. Chóuruti gúndaabadiwa lan. Ani dan le lichugún yanu, chóuruti wasaminaruba lan ida liña lan funa lasandiragun gürigia ligía lungua ani ida liña lan gayara lan líderaguni ariñahani ligía lun lasansirun libagari. Ladügüba sun katei le lúntima geteingiradi wamá luagu ariñahani le ichugúbei lidan yanu.

¹⁸ Háfuga susereti ligiaméme woun dan le waliihanu agumeiraguagüdüni to aranserúboun houn sun gürigia. Samina wamá san tuagun Garüdia Awisahatu to lánina apurichihani luma burí arütíkulu le lídanbei jw.org. Afuranguagüda lumutu ariñahani le Bíbülia lidan aban igaburi lun ménrengun lan gunfuranda hamanu gürigia ha mámabaña Gefentiña. Dan le waliihani ariñahani ligía, aba buídutima lan gunfuranda wamani arufudahani tídangiñeti Bíbülia le subudiñaha wamaali buidu. Adügati le lúntima tínsiñedun woun. Arufudahatu giñe iseri igaburi woun ida luba lan wafuranguagüdüni wafiñen lidan apurichihani. Íderagua tumutiwa giñe garüdia ¡Despertad! lidan katei le. Adügatu lúntima wafiñerun luagu Bungiu luma luagu sun le ladügübei, arufudahatu giñe woun ida luba lan wóunabun luagu wafiñen (1 Féduru 3:15).

19. Ida luba warufuduni weteingiradi luagu sun ariñahani le líchugubei Heowá woun?

¹⁹ Furanguti rúhali lan Heowá saragu ariñahani woun lun wabuidun guánarügü (Matéu 5:3). Ligíati, sigí wamá aliihei luma awinwanda según adundehani burí le líchugubei woun. Anhein wadüga, buídubei lidin woun ani warufudubei lun Heowá teinki wamani luagu sun ariñahani le líchugubei woun (Isaíasi 48:17).