ARÜTÍKULU LÁNINA ATURIAHANI 22
Buídugüda waméi ligaburi waturiahan
“Chouru huméi heteniruña lan lun katei le súdinitimabei” (FILI. 1:10, TNM).
UREMU sjj 35 Teni wamá lun le súdinitimabei
LE LUNBEI WATURIAHANI *
1. Ka uagu hénrengu lubéi houn fiu íbirigu haturiahan?
UGUÑE weyu hénrenguti hadarirun gürigia wadagimanu. Hiibe-agei íbirigu nadagimeintiña lúmagiñe larugadun darí laguñeedun lúnrügü hibihini létima hemegeirubei houn haduheñu. Saragu hádangiñe aweiyasuhatiña saragu oura lun hachülürün lidoun hawadigimari luma lun hagiribudun hábiñoun. Añahein gañei hamuti habagari lau hadügün wadagimanu le dereti ani le buchagüdati hawagu. Dan le lagumuchun weyu, buchá hawagu íbirigu darí lun mabusenrun haaña lan ni lun haturiahan.
2. Ka weyu hasagara dan lun haturiahan?
2 Le linarün katei mosu wasagarun dan lun waturiahanu Lererun Bungiu luma lun waturiahanu wani agumeiraguagüdüni, gama lumoun, mosu waturiahan le tímatimaati, lugundun lídangiñe le dipeni lan wamadagua luma Heowá luma weresibiruni ibagari magumuchaditi (1 Tim. 4:15, 16). Añahein íbirigu saragiatiña sagü weyu lun haturiahan dan le manimaniga lan múnada ani darangilañu liña hasaminan lárigiñe hásaarun. Ha híbiri díreitiña fiu minutu lárigiñe hagiribudun lídangiñe hawadigimari lun haturiahan lidan aban fulasu darangilati lun hasaminarun hulili luagu le haturiahabei.
3, 4. Ka asansiruni adügǘbei lidan saragu ariñahani le rúaalibei, ani ka uagu?
3 Sun wagía úaratiwa luagu súdini lan lun lasagarún dan lun aturiahani. Kábati waturiahan? Másiñati wasaminarun anihein lan saragu katei lun waliihani, ani hénrengu lan lun waliihani sun ariñahani tuma agumeiraguagüdüni to weresibiruboun. Añahein hádangiñe íbirigu aliiha hamutu súngubei, añahein hádangiñe hénrenguti houn. Subudi lumuti Musu Úaraguati, ligía lalouguagüdübalin ariñahani le áfuridubei tidan gárada luma le áfuridubei lidan wani páhina lidan Internet.
4 Kei hénpulu madügǘnwaaru Anuario de los testigos de Jehová, Fili. 1:10). Ariha waméi kábatima lan un katei súdinitimati wetenira ani ida luba lan wasagarun buiti lídangiñe waturiahanu Bíbülia wábuguarügü.
gayaraati wadarirun saragu sügǘ buíduburiti lidan wani páhina lidan Internet, jw.org®, luma lidan programa le áfuridubei sagü hati lidan JW Broadcasting®. Ani guentó ǘrüwarügaali wéiyaasu lidan irumu táfurida Garüdia Awisahatu tuma Agaguduabá! houn sun gürigia. Mama ladügǘña sánsiguaü le lun gadaani wamá lun amu burí katei, ladügǘnbei lun gadaani wamá “lun katei le súdinitimabei” (KÁBATIMA UN WETENIRA DAN LE WATURIAHAN
5, 6. Ka amu katei lunbei waturiahani?
5 Kábatima un wetenira? Furanguti mosu lan wetenirun sagü weyu lun waturiahanu Lererun Bungiu. Uguñe weyu, tidan programa dimaasu-auti to lánina taliihoun Bíbülia lidan damuriguaü murusunrügaali kapítulu. Ítarati gadaanibadiwa lun wasaminarun luagu le waliihabei luma lun wáluahan lanwoun ariñahani. Mámarügü lun waliihani kapítulu le lunbei waliihani, le wabusenrubei lun lachülürün uganu le tídanbei Bíbülia tidoun wanigi luma lun wayarafaduntima lun Heowá (Sal. 19:14).
6 Ka amu katei lunbei waturiahani buidu? Mosu waturiahanu Garüdia Awisahatu, líburu to aturiahounboun lidan adamuridaguni luma lun waranserun lubá adamuridaguni le labadinaguabei dimaasu. Mosu giñe waliihanu sun Garüdia Awisahatu to áfuriduboun tuma giñe Agaguduabá!
7. Lunti san lábürühan warüna anhein siñá lubéi waliihani sun ariñahani le áfuridubei lidan wani páhina lidan Internet luma lidan JW Broadcasting?
7 Gayaraati lariñagun somu gürigia: “Kábati nadüga lau sun le áfuridubei lidan wani páhina lidan Internet luma le lídanbei JW Broadcasting? Ladüga gíbeti...”. Samina wamá luagu sügǘ le. Tidan aban éigagülei to ñein lubéi gürigia lan eseriwidei leigin lungua anihein ámuñegueinarügü luwuyeri éigini semeburiti ñein. Siñabei léigini gürigia súngubei, ligíati aba lanúadirun fiu lídangiñe. Ligíati, mábürüha lan warüna, anhein siñá lubéi waliihani, haganbahani sun ariñahani o waríaguni sun programa le lídanbei wani páhina. Aríagua waméi ani aliiha waméi le wayaraati. Guentoti, ka mini lubéi aturiahani, ani ida luba wasagarun buiti lídangiñe waturiahan?
MÉGEITI ATURIAHANI ÁFAAGUNI
8. a) Ka lunbei wadügüni dan le waranserun lubá Taturiahoun Garüdia Awisahatu? b) Ida luba líderaguniwa wasigiruni adundehani le?
8 Mámarügü láurügü laliihani gürigia ariñahani luma lamakürüni óunabagülei mini lubéi aturiahani. Mini lan letenirun lun le laliihabei luma lun lafurendeirun lídangiñe. Ariha waméi ida luba lan wadügüni le lidan waranserun lubá Taturiahoun Garüdia Awisahatu. Furumiñe, teni wamá lun le lídanbei fánreinti le lunbei waturiahani, le wadarirubei lidan lagumeseha arütíkulu. Lárigiñe ábame wakutihani títulu, subtítulu luma álügüdahani le lánina águyuguagüdüni. Lárigiñe aliiha waméi arütíkulu hámaru ani teni wagíame lun le waliihabei. Teni wamá lun burí dimurei le arufudubalin kaba lan uagu layanuhóua lidan kada párafu, liibe-agei dan dariwati lidan lagumeseha kada párafu. Ani liibe-agei arufuda lumuti ka lan uagu layanuhan párafu. Lidan awanha lan aliihei arütíkulu, samina wamá ida liña lan úara lan kada párafu luma subtítulu ani úara ligía luma tema le lani arütíkulu. Bürǘ waméi dimurei le ibidiñeti woun luma saminaü le wabusenrubei wakutihan buidu.
9. a) Ka uagu mosu lubéi wetenirun saragu lun bérusu tídangiñeti Bíbülia dan le waturiahanu Garüdia Awisahatu, ani ida luba wadügüni? b) Kei lariñawagún lidan Hosué 1:8, ka lunbei wadügüni amu luéi waliihani bérusu?
9 Le linarün katei dan le laturiahanu gürigia Garüdia Awisahatu kei gubeirügü laturiahañoun lan Bíbülia. Ligíati, teni wamá lun bérusu Hosué 1:8).
tídangiñeti Bíbülia, létima lunbei laliihóun dan le lakutihóuña lan arütíkulu lidan damuriguaü. Teni wamá lun burí dimurei le lídanbei bérusu, le ídehabei lun furangu lan saminaü le lafuranguagüdübei párafu. Ani direi wamá dan lun wasaminarun hulili luagu burí bérusu, luma ida luba lan wafalaruni lidan wabagari (aliiha huméiAgübürigu arufudaha humá houn hisaanigu ida luba lan haturiaha. (Ariha huméi párafu 10). *
10. Lau gabaroun wamani le lariñagubei Ebüréu 5:14, ka uagu mosu lubéi hayusuruni agübürigu áhuduraguni hadan iduheñu lun harufudahan houn hasaanigu ida luba lan haturiahan luma háluahan ariñahani?
10 Ayanuha wamá luagu áhudurawaguni hadan iduheñu. Ani buiti busén hamá agübürigu lun hagundaarun hasaanigu lidan ókaasion dimaasu-auti le. Íbini mosu lan aranseñu hamá agübürigu lau somu arufudahani lubá áhuduraguni hadan iduheñu, mama mosu sagü lan dimaasu lun hadügün aransehani espechaliti. Inarüni luagu gayara lan harihini programa JW Broadcasting le áfuridubei sagü hati o hadügün somu katei le espechaliti, kéiburi hadügün aban tiraüraü árüka. Súdiniti giñe lun harufudahan agübürigu houn hasaanigu ida luba lan haturiahan. Mosu hafurendeirun irahüñü aransera lubá adamuridaguni o hakutihan luagu somu turobuli le úmabei hagagibudagua leskuelarugu (aliiha huméi Ebüréu 5:14). Ánhaña adireira agübürigu dan lun háluahan ariñahani luagu aban tema tídangiñeti Bíbülia múnada, ménrenguntimabei houn hasaanigu lun híchugun arigei lun le ariñawagúbei lidan adamuridaguni luma lidan adamurini, lídantima le ñein lubéi ua lan burí bidéu. Inarüni según lan harumudiri irahüñü luma hagaburi ítara luba lidura aturiahani.
11. Ka uagu súdini lubéi lun warufudahan houn ha aturiahabarun Bíbülia wama lun hahulilidun lidan haturiahanu Bíbülia?
11 Lunti giñe hafurendeirun ha aturiahabarun Bíbülia aturiaha. Furumiñe, gúndaatiwa burí lau hamakürüni óunabagülei lubá aturiahani tídangiñeti Bíbülia luma lubá adamuridaguni. Súdiniti giñe lun warufudahan houn ida luba lan háluahan ariñahani luma lun hahulilidun lidan haturiahan danme le hábuguarügü hamá. Ítarati, danme le hagagibudagun luma burí somu turobuli méibagunbaña áluaha ídemuei luma somu lílana damuriguaü, subudibei houn halíaba lan háluahan luma halíaba lan hadarira ariñahani le hemegeirubei tidan wani agumeiraguagüdüni.
GABAROUN WAMÉI KA LAN UAGU WATURIAHA
12. Ka lunbei gabaroun wamani dan le waturiahan?
12 Anhein mínsiñe lubéi aturiahani woun, háfuga wasaminarun hénrengubei lan wafurendeirun lun hínsiñe lan aturiahani woun. Gama lumoun, gayaraabei hínsiñe lan woun. Gumese wamá láurügü murusun dan ani murusun murusun ábame waganwoundagüdüni dan le lunbei wásügürüni aturiaha. Gabaroun waméi le. Inarüni le lan súdinitimabei woun, wabuiduragüdüni
wamadagua luma Heowá. Ani luma giñe lun wóunabun álügüdahani le ladügübei somu gürigia woun o wáluahan ariñahani luagu somu waturobulin.13. a) Ka lunbei ladügüni aban nibureinti lun lafuranguagüdüni lafiñen leskuelarugu? b) Ida luba wadügüni le lariñagubei Kolosana 4:6?
13 Kei hénpulu, anhein aban bubéi nibureinti ani bídiña leskuela. Másiñati sun lan bánigu paaná leskuelarugu afiñetiña luagu saliguarügü lan sun katei. Hínsiñeti hamuga bun lun bayanuhan luagu le tarufudahabei Bíbülia, gama lumoun masandiraguntibu bungua buidu lun bayanuhan tuagu Bíbülia. Ligíati mosu báluahan ariñahani. Gayaraati biámañein lan lébuna babusenrun lun badarirun ariñahani. Le furumiñeti, lun bederebudagüdüni ichouruni le buágubei luagu Bungiu lan adügübalin sun katei. Ani le libiaman, babuiduragüdüni ligaburi bayanuhan luéigiñe inarüni le tídanbei Bíbülia (Rom. 1:20; 1 Fe. 3:15). Furumiñeti katei le lunbei badügüni bálügüdagun bungua ka lan uagu hariñaga bánigu paaná afiñe hamá saliguarügü lan sun katei. Lárigiñe lunti bakutihani buidu ka lan tariñagubei wani agumeiraguagüdüni. Bíchuguba fe luagu ménrengunbei lan bafuranguagüdüni bafiñen. Hiibe-agei gürigia afiñetiña saliguarügü lan katei ladügarügü lariñaguni aban gürigia le inebebei houn luagu inarüni lan. Danme le darihadibu fiu saminaü le buiti, gayaraabei bíchugun aban óunabagülei le buiti lun le adügübei álügüdahani libe burí le bun (aliihabei Kolosana 4:6).
GÁNWOUNGÜDA WAMÉI BUSÉN WAMÁ WAFURENDEIRUN
14-16. a) Ka lunbei wadügüni lun wasubudirunu buidu buidu somu líburu tidan Bíbülia to ibidiñeboun woun saragu? b) Ida luba líderaguniwa bérusu le lídanbei lamidangua ubanaü lun wasubudirunu liliburun Amosu? (Ariha huméi rekuáduru “ Subudi wamaaña buidu gürigia ha uágubaña tayanuhan Bíbülia”).
14 Samina wamá lakutihóuba lan lidan leweñegua adamuridaguni aban tídangiñe tirahüñü líburu lánina profesía to tídanboun Bíbülia, másiñati aban lan tídangiñe to ibidiñeboun woun saragu. Furumiñeti katei le lunbei wadügüni, waganwoundagüdüni wabusenrun wasubudiruni buidu le labürühabei profeta. Ida luba wibihini?
15 Gumese wamá álügüdagua woungua ka lan wasubudirubei luagu le abürühabarun líburu tuguya: katei meha, halía lawinwanda, ani ka lifisiutebei. Lau wasubudiruni ariñahani le líderagubadiwa lun gunfuranda wamani ka lan uéigiñe layusura ítaga dimurei o ka lan uagu layusura ítaga sügǘ. Lidan awanha lan aliiha, áluaha wamá katei le arufudubalin ligaburi abürühati ligía.
16 Lárigiñe, akutiha waméi ídabuga lan tabürüdǘwa líburu. Lun lira buídubei lun warihini “Tabla de los libros de la Biblia”, le áfuachubei lidan tagumeseha Traducción del Nuevo Mundo de las Santas Escrituras (con referencias). Gayaraabei giñe wásügüragüdün agu luéigiñe fánreinti, Profetagu hama lurúeitegu Hudá luma Ísüraeli, le wadarirubei lidan seksióun 3 tidan garüdia Adundehani lun taturiahóun Lererun Bungiu. Anhein tayanuhaña lubéi líburu to waturiahaboun luagu somu profesía, buídubei lun wakutihani ka lan gádanbaliña gürigia dan le tabürühóunbei. Gayaraati giñe wakutihani ka lan igaburi mabuidunti labuserunbei profeta laransehan ani ka meha awinwandubaña lidan lidaani. Lun wasubudiruni sun le, másiñati lunti lan wáluahan ariñahani tidan amu burí líburu tidan Bíbülia. Kéiburi, lun gunfuranda wamani buidu le asuseredubei lidan lidaani profeta Amosu, gayaraati waliihani bérusu burí le adarirúbei lidan 2 Urúeigu luma lidan 2 Krónikasi le ídounbei lóunahawa abürüdǘni le lídanbei Amosu 1:1 le adarirúbei lamidangua ubanaü. Gayaraati giñe tíderaguniwa liliburun Oseasi, le meha awinwandubei lidan lidaani Amosu. Seremei burí ariñahani le, gunfuranda wabéi ida liña lan meha dan le ídanbei lawinwanda Amosu (2 Uru. 14:25-28; 2 Kro. 26:1-15; Ose. 1:1-11; Amos. 1:1).
TENI WAMÁ LUN LE ARIÑAWAGUNBEI
17, 18. Afuranguagüda huméi ida luba lan wasagarun saragu buiti lídangiñe waliihanu Bíbülia luma lun wetenirun lun burí lirahüñü ariñahani súdiniti. Yusu huméi hénpulu le lídanbei párafu o amu burí hénpulu.
17 Lunti wakutihanu Bíbülia dan le waliihanu. Samina wamá waliihañein lan kapítulu duusu tidan liliburun Sakaríasi, le ayanuhabei luagu lounwen Mesíasi (Sak. 12:10). Dan le wachülürün lidoun bérusu 12, aba waliihan hayahuahabei lan liduheñu Natán lounwen Mesíasi. Lubaragiñe wásügürün lau lubuidun ariñahani le, aba wálügüdagun woungua: “Ka lánibei Mesíasi hama liduheñu Natán? Halíaba náluahan lanwoun ariñahani?”. Ábati wakutihan murusun luagu. Kei hénpulu gayaraati harihini bérusu burí le wadarirubei lamidangua ubanaü le tídanbei Traducción del Nuevo Mundo de las Santas Escrituras. Anihein biama le adarirúbei lidan Sakaríasi 12:12. Le furumiñeti, lanügübadibu lidoun 2 Samueli 5:13, 14 le ñeinba lubéi bafurendeira Natán lan aban hádangiñe lirahüñü urúei Dawidi. Le aban bérusu darí wamuti lidan Lúkasi 3:23, 32 le arufudubalin Hesusu lan aban hádangiñe ladügawagun Natán luéigiñe tóubadina María (ariha humóun Garüdia Awisahatu to lánina widü-hati, irumu 2017, páhina 32, párafu 4). Ma lubuidun ariñahani le! Subudi wamuti ariñawagúa lan ladügawagun lan Dawidi Hesusu (Mat. 22:42). Gama lumoun hóugiñeñanu meha wein lisaanigu Dawidi. Lau wetenirun lun ariñahani le maweiriduntu wanigi lau lariñagun Sakaríasi hayahuba lan tílana luban Natán lárigi Hesusu.
18 Samina wamá luagu amu abahüdaguni. Aliihatiwa lidan furumiñeti kapítulu lidan Lúkasi, luagu ñüdün lan ánheli le gíribei Gabüriéli bisidoun María ani ariñagati tun luagu irahü le lunbei tiraübei lan, “Wéirigubei, Liráü Bungiu le íñubei luba laguarúniwa, ani larúeigüdübei Wabureme Bungiu lidan lubara larúeihan Dawidi, le lagücha. Lagumadirubei Ísüraeli lun sun dan” (Luk. 1:32, 33). Gayaraati aban lan wetenirun lun furumiñeti fánreinti le lídanbei uganu le líchugubei ánheli, le ariñagubei luagu laguarúba lan lun Hesusu “Liráü Bungiu le íñubei”. Ariñagati giñe Gabüriéli luagu urúeibei lan Hesusu. Ligíati gayaraati wálügüdagun woungua, ka lan gunfuranda tubéi María dan le taganbunbalin dimurei burí le. Saminatu san Hesusuba lan leweñegua Erodesi o leweñegua aban hádangiñe ha meha arúeihabaña Ísüraeli? Saminatu san luagu tarúeihaba lan kei lúguchu urúei ani hawinwanduba lan tiduheñu tidan luban urúei? Úati ariñahani tidan Bíbülia luagu adüga tani María álügüdahani burí le lun Gabüriéli. Mamuriahatu giñe lun iñu lan tubara lidan Arúeihani, kei meha hadüga bián lani Hesusu disipulugu (Mat. 20:20-23). Arufudahati katei libe le woun luagu aban lan meha würi ǘnabugutu María.
19, 20. Según Santiagu 1:22-25 luma 4:8, kátima lébubei waturiahan?
19 Aritagua waméi létima lan lébubei waturiahanu Lererun Bungiu tuma burí wani agumeiraguagüdüni lúntima wayarafadun lun Heowá. Gama lumoun, busentiwa giñe warihini ka lan hawuyeri gürigia wagía ani ka lan asansiruni lunbei wadügüni lun wagundaaragüdüni Bungiu (aliiha huméi Santiagu 1:22-25; 4:8). Ligíati ságüme waranserun lun waturiahan súdiniti lun wamuriahan luma Heowá lun líchuguni lani sífiri woun. Ítarameme, mégeitiwa lun webegirun lun Heowá lun líderaguniwa asagara buiti lídangiñe waturiahan luma lun warihini kaba lan asansiruni wadüga lidan wabagari.
20 Lunti ítara wamá sun wagía kei lubúeingu Bungiu ha uágubaña labürühóua lidan Sálumu 1:2, 3, le ariñagubei: “Lídanñein lilurudun Aburemei hínsiñehabu, luagu lúrudu ligía hasaminara, áriebu wéyuagu. [...]. Buíduti lidin houn lidan sun le hadügübei!”.
UREMU sn 11 Gúndaaguagüda wamóun lanigi Heowá
^ par. 5 Ruti Heowá, Wáguchi le gíchigadibei, saragu katei lun waríagun, lun waliihan luma lun waturiahan. Líderagubadiwa arütíkulu le lun warihini kaba lan waturiahan ani líchuguba adundehani woun lúntima wasagarun buiti lídangiñe aturiahani.
^ par. 61 LE ARIÑAWAGÚNBEI TUAGU IYAWAÜ: Harufudahaña agübürigu houn hasaanigu ida luba lan haranserun lubá taturiahoun Garüdia Awisahatu.
^ par. 63 LE ARIÑAWAGÚNBEI TUAGU IYAWAÜ: Aban íbiri lakutihaña luagu Amosu. Dibuhu le yagurounmemebei mini lan lasaminaruña lan íbiri luagu abahüdaguni le tídanbei Bíbülia ani lasaminaruña hulili luagu.