1. Ka tarufudahabei Lererun Bungiu woun?

LAU lídehan Heowá gayaraabei wagagibudagun luma furumiñeguarügü turobuli ladüga ligía Wamaisturun le Buídutimabei (Isa. 30:20, 21). Arufudaha tumuti Lererun sun le lunbei wemegeiruni ‘lun aranseñu wamá’ luma lun wadügün “sun luwuyeri wadagimanu buiti” (2 Tim. 3:17). Dan le wadügüni le tariñagubei Bíbülia, chútimaati wau sügǘ hau ha afalarubalin “lichú aau le lánina ubóu” (1 Ko. 3:19; Sal. 119:97-100).

2. Kaba wakutihan lidan arütíkulu le?

² Kei le lunbei warihini, ádaha lumutiwa lichú aau le lánina ubóu lun wasaminarun wawounguarügü. Ligíati, háfuga adügati lun hénrengu lan woun lun masaminarun wamá luma lun madügün wamani le hadügübei ubouaguna. Ligía tariñagubei Bíbülia: “Góunigi humá; mígiraguagüda humá hungua houn ha busenbaña heyeehan lau burí arufudahani málati. Mama lúmagiñeti Kristu katei le harufudahabei” (Kol. 2:8). Lidan arütíkulu le, lakutihóuba bián hénpulu luáguti “arufudahani málati” o saminaü málati le lánina ubóu le, luma ida liña lan laburuchagun. Lidan kada kesi warihinbei ka lan uéigiñe libidiounigan lubéi aau lichú aau le lánina ubóu ani ka lan uagu iñu lubéi lichú aau le tídanbei Bíbülia sügǘ luéi furumiñeguarügü katei le línchahanbei ubóu.

3, 4. Ka meha igaburi asansirubei lidan burí lagumeseha sígulu 20?

³ Lidan burí lagumeseha sígulu wein, anihein meha aban lanarime asansiruni luáguti harihini gürigia laruman ibagari. Lidan meha dan ligía saminatiña saragu gürigia maríeitiñarügüñanu  lan gayara harounrun hámagua ani moun lumuti lan giñe layanuhóun luagu agamariduni hadan gürigia. Aba lasansirun ligaburi saminaü le, aba hagumeserun gürigia ánhara lun luriban igaburi.

⁴ Subudiwati meha irumu burí 1920 kei irumu lánina libidiounigan aau ladüga lanarime asansiruni le hadügübei gürigia lidan habagari lidan dan ligía. Ariñagatu aban sásaamu: “Aban hagumeserun arufuda katei lánina agamariduni tidan burí pelikula o pikchá, tidan tiáturu, uremu, tidan burí nowela luma burí lidan ariñahani”. Lidan burí irumu ligía, aba hanarimetimahali lan luriban habinahan gürigia ani aba giñe madünamaharu lan hadaüragun. Kei tariñaguni Bíbülia, ha lan awinwandubaña lidan lagumuhóun dan “háluahabei hagundan guánarügü” (2 Tim. 3:4).

5. Ka asuseredubei lun laruman ibagari lúmagiñe irumu burí 1960?

⁵ Lidan burí irumu 1960 aba hagumeserun gürigia arihei ígiraguni, lerederun wügüri tuma würi sin hamarieidun luma hagamaridun wügüriña wügüriña háledi o würiña würiña háledi kei aban katei maribanti. Ani éibutima dan aba giñe hagumeserun arufuda katei lánina agamariduni lidan isebáhari. Ka lanügübei heferidiruni gürigia laruman ibagari? Ariñagatu aban abürühatu “adügaali mafalarun hamani gürigia laruman ibagari luáguti agamariduni” lun ñein lan turobuli hadan iduheñu kei burí fánreinguaü, ámuñegueinarügü hamá hagübürigu hasaanigu, hasandirun igarihabu luma lun héchudun aríagua iyawaü o bidéu lánina agamariduni. Saragu sandi le lanügübei magíaguni, sida laganagua, ligía aban katei le achoururagüdübalin woun libidiounigan lan aau lichú le lánina ubóu (2 Fe. 2:19).

6. Ka uagu busén lubéi Satanási lun maruman lan habagari gürigia?

⁶ Luriban ibagari libe le, ligía labuserunbei Satanási houn sun gürigia. Chóuruti gunda lan larihini ua lan inebe lan maríei ni agamariduni houn gürigia, idewesei lúmagiñeti Bungiu (Efe. 2:2). Mámarügüñein harufuduña gürigia menebenehabuni lun idewesei lúmagiñeti Bungiu lun gasaanigu hamá, gayaraabei giñe heferidiruni chansi lun hawinwandun lun súnwandan (1 Ko. 6:9, 10).

7, 8. Ka uagu buídutima lubéi le tariñagubei Bíbülia luagu agamariduni luéi le lariñagubei ubóu?

⁷ Gürigia ha ígiraguagüdübaña houngua lun lichú aau le lánina ubóu le, adügatiña bula lau lúrudu le tídanbei Bíbülia ani ariñagatiña mabuidun lan lúrudu ligía lidan wadaani. Másiñati álügüdagua hamá houngua ka lan uagu ladügawa Bungiu lau ayumahani lun agamariduni ani  lárigiñe aba lariñagun lun lan mígiraguagüdün wamá woungua lun ayumahani. Charatiña gürigia lau hasaminarun lunti lan híchugun ugundani lun sun le hayumahabei. Amu tariñagun Bíbülia. Ariñagatu gayara lan lárügüdagun gürigia lungua luéi luriban layumahan, ani adügati katei le lun haruma lan wabagari (Kol. 3:5). Gama lumoun adüga lumuti Heowá maríei lun gayara lan hagundaarun maríeitiña lidan harounrun hámagua (1 Ko. 7:8, 9). Ítarati gayaraabei hagundaaragun biángubei hagía lau harounrun hámagua masandirunga idiheri libe le hasandirubei ha adügübaña magíaguni.

⁸ Mítaranti adundehani le tíchugubei Bíbülia luagu agamariduni lumoun le líchugubei ubóu. Ariñaga tumuti gayara lan aban lan ugundani agamariduni (Ari. 5:18, 19). Ru tumuti giñe eweridihani le woun: “Lun lasubudiruni kada aban ida luba lan lagumadiruni lúgubu guánarügü lidan sánduni luma inebesei, mama lau luriban ayumahani kei hadügüni gürigia ha ibidiñehabúbaña lun Bungiu” (1 Tesa. 4:4, 5).

9. a) Ida liña híderawagun lubúeingu Heowá lidoun burí lagumeseha sígulu 20 lun hafalaruni liñun lichú aau le tídanbei Bíbülia? b) Ka adundehani buiti wadarirubei lidan 1 Huan 2:15, 16? c) Según Rómana 1:24-27, ka échuni mabuidunti lunbei wamahadun lun?

⁹ Lidoun burí lagumeseha sígulu 20, mígiraguagüdütiña lubúeingu Heowá houngua lun ligaburi hasaminan ha “deregeguaaña houngua lun féridiguaü” (Efe. 4:19). Áfaaguarügütiña lun gaganbadi hamá lun lúrudu le lúmagiñeti Bungiu. Ariñagatu Garüdia Awisahatu to lánina 15 lidan seingü-hati, irumu 1926 lidan inglesi “dandu lan wügüriña kei würiña mosu lan haruma hamá lidan ligaburi hasaminarun luma hóuserun lídantima hóuseruniña wügüriña würiña o hóuseruniña würiña wügüriña”. Íbini lasusereduña lan katei mabuidunti ubouagu, falá hamuti lubúeingu Heowá liñun lichú aau le tídanbei Bíbülia (aliiha huméi 1 Huan 2:15, 16). Gúndaatiwa lau anuhein lan Lererun Bungiu wama luma saragu ariñahani le líchugubei Heowá woun lun líderaguniwa lun wamahadun lun lisaminan ubóu luáguti agamariduni * (aliiha huméi Rómana 1:24-27).

10, 11. Ka tariñagubei Bíbülia luagu le lunbei lasuseredun lidan lagumuhóun dan?

¹⁰ Ariñagatu Bíbülia lidan lanme lagumuhóun dan “hóunguarügübei burí gürigia habusenra buiti” (2 Tim. 3:1, 2). Ligía maweiridun tubéi wanigi luagu línchahaniña ubóu le gürigia lun hasaminarun hawouguoun. Ariñagatu aban líburu lidan lan irumu burí 1970 aba kamanitimaharu lan líburu burí lun híderawagun gürigia”. Anuhein tídangiñe “ínchaha tumutiña ha aliihabarun lun hasubudiragun houngua, luma lun hagundaarun luagu ida haña lan luma lun laganbahóun hawagu”. Ariñagatu aban tídangiñe líburu to lun le aliihabarun lunti lan hínsiñegua lan lungua ladüga ligía lan “gürigia le buídumeraübei, le gebegitimabei, le buídutimabei laríawagun”. Ariñagatu giñe gürigia lan lunbei lariñagun “inarüni lan lani relihión, ani ligía lan guánarügü lunbei lanúadiruni kaba lan igaburi láyeihan según lariñagun lisaminan lun luma igaburi le geyegubei lau le aubei lagundaara”.

¹¹ Ma genegeti saminaü le woun? Ínchaha lumutu Satanási Ewa lun tadügün aban katei ítarati. Ariñagati tun “léfegechuba lan hagu lun hasubudiruni le buídubei luma le wuribabei, ábameti ítara humá kei Bungiu” (Agu. 3:5). Uguñe weyu gíbetiña gürigia hanarimeti hasaminarun hawouguoun, ani saminatiña ua lan ni aban lunti lariñaguni houn ka lan buídubei luma le wuribabei, ni Bungiu. Ani buruguaali igaburi le, íbini lidan le hasaminarubei gürigia luagu maríei.

12. Ka saminaü lawanseragüdübei ubóu le?

 ¹² Ariñagatu Bíbülia lunti lan inebe tan lani wügüri weiriou lun, ani inebe ligíame tani würi weiriei tun luma lun hagunfuliruni le füramase habéi. Haritaguagüda tumutiña giñe lunti lan inebegua hamá hámagua luma lun hagunfulirun hámagua. Ligía tariñagubei: “Ligía lígirubei lubéi wügüri lúguchi tuma lúguchu, lun laganóun tuma lúmari, ábame hayabin lun ítara haba lan kei ábanrügü gürigia” (Agu. 2:24). Ánhañati ha awanseradügübalin saminaü le ubouaguna amu hasaminan ani ariñagatiña kada lan gürigia lunti lan letenirun lun le lemegeirubei. Ariñagatu aban líburu to adimurehaboun luagu tema lánina ígiraguni: “Lidan fiu maríei, sánsiwati füramasei, herederuba lan maríeitiña hámagua lidan ‘sun habagari darime lafanreinraguagüdüniwa óunweni’, luagu füramasei le lánina murusun dan ‘darime masandi wamá ínsiñeni wámagua’”. Adügati harihini gürigia maríei ítara lun hafanreinragun saragu luma lun hasandirun lanarime igarigu. Chóuruti aban lan libidiounigan aau saminaü le línchahanbei lichú aau le lánina ubóu ani arufudati menebenehabuni lun maríei.

13. Ka aban lídangiñe resun iyereegu lubéi pantaü lun Heowá?

¹³ Ariñagatu Bíbülia: “Magundanti Bungiu hau gürigia pántatiña (Ari. 16:5). Ka uagu iyereegu habéi pántatiña lun Heowá? Aban lídangiñe resun, ladüga ha asandiragubaña houngua ítara, adügatiña lun hóuserun gürigia ítara, arufuda hamuti giñe ligaburi Satanási. Wéiriti lupantan darí lun lasaminarun, lunti lan láhuduragun Hesusu lun, Hesusu le íderagubalin Bungiu adügei sun katei (Mat. 4:8, 9; Kol. 1:15, 16). Igaburi le harufudubei gürigia ha pántabaña chóurugüda lumuti woun ka lan uéigiñe libidiounigan lubéi au lun Bungiu lichú aau le lídanbei ubóu.

14. Ida liña líderaguniwa Rómana 12:3 lun masaminarun wamá saragu wawouguoun?

¹⁴ Íderagua tumutiwa Bíbülia lun maweirin lan wasaminarun wawouguoun. Ariñagatu luagu buidu lan lun wasandirun murusunraü ínsiñeni wawouguoun. Ariñagati Hesusu: “hínsiñe hagíame bíbirigu bun kei bínsiñegua bungua” (Mat. 19:19). Arufudati dimurei le lunti lan wetenirun  lun le wemegeirubei. Gama lumoun, mariñaguntu Bíbülia lunti lan wasaminarun wagía lan súdinitimabei hawéi amu. Ariñagarügütu madüga humá “ni kata huouguarügü lun hanügǘniwa weiri, ni lau pantaü; lubaragiñe lira lau lan ǘnabuguni, ani buidulá hanügüniña amu gürigia huéi guánarügü” (Fili. 2:3; aliiha huméi Rómana 12:3).

15. Ka uagu afiñe bubéi le lan tariñagun Bíbülia luagu pantaü buidu lan?

¹⁵ Saragu gürigia ha únbaña lagúahan ubóu chu tau adügatiña bula lau le tariñagubei Bíbülia luagu pantaü. Ariñagatiña ánhawa lan asaminara iñu hamá amu wawéi, hásuruba lan gürigia adüga wau. Le linarün katei, ka lanügübei lóuserun gürigia lau pantaü le línchahanbei ubóu le lábugiñebei lubafu Satanási? Gúndaatiña san gürigia ha pántabaña? Gúndaatiña san haduheñu? Gamadatiña san ha inarünitiña? Gamadaguatiña san luma Bungiu? Kátima buídubei?, bariñaguña hamuga san: lichú au le lúmagiñeti ubóu, odi le lúmagiñeti Bungiu?

16, 17. Ka uagu seremei wabalin Heowá?

¹⁶ Ha afalarubalin hadundeha “chu tau” ha lídanbaña ubóu le, ítara haña kei aban asariñahati le eferidirubei ani aba lálügüdaha luma aban asariñahati líledi le giñe eferidirubei kei ligía ida luba lan lachülürün lidoun ítaga fulasu. Ariñagati Hesusu hawagu “chu tau” ha meha lídanbaña lidaani: “Marihintiña ha adundehatiña marihintiña háledi hagía. Ani anhein adundeha aban marihinti aban marihinti líledi, héiguaduba biángubei hagía lidoun aban huyu” (Mat. 15:14). Inarüni lichú lan aau le lánina ubóu le, libidiounigan lan aau lun Bungiu.

¹⁷ Súnwandan hu lan adundehani buíduburiti le tídanbei Bíbülia ‘ani huuti lun larufudahan, lun ladeinhan, adügati lun hígiruni gürigia katei le mabuidunbei ani arufudahati houn gürigia lidan richaguaü’ (2 Tim. 3:16). Seremei wamuti Heowá luagu lóunigiruniwa luéi lichú au le lídanbei ubóu lau layusurunu lóundarun (Efe. 4:14). Seremei lun ariñahani le weresibirubei lúmagiñe here wabéi lun gaganbadi wamá lun lilurudun. Ma lubuidun chansi anihein lan aban adundehani chóuruti wama le tídangiñeti Lererun Bungiu.