1. Ka bián katei chouru wabéi?

GÜRIGIA ha áhuduragubaña lun Heowá hínsiñetiña lun. Súnwandan hínsiñe hamá lun ani hínsiñememebaña lun. Ani hínsiñeti giñe irichaü lun (Sal. 33:5). Ligíati chouru wabéi bián katei. Furumiñe, gáriti lun larihini hasufurirun lubúeingu marichaü. Libiaman, ladügüba lun ñein lan irichaü. Lidan furumiñeti arütíkulu le lídanbei gádürü arütíkulu burí le *, ariha wamuti ínsiñeni lan lébunabei lúrudu le líchugubei Bungiu houn ísüraelina ani ínchaha lumutiña gürigia lun hóuserun lau irichaü, íbini houn ha mínsiñegunbaña (2 Lur. 10:18). Arufuda lumuti Lúrudu le lanarime berese lan Heowá hau ha áhuduragubaña lun.

2. Kaba burí álügüdahani wóunaba?

² Gumuti Lilurudun Moisesi lidan irumu 33, dan le lagumeserunbei damuriguaü kristiánu. Mini lan san lira úabei lan buga aban lúrudu hadan kristiánugu le ídanbei larihúa irichaü ani ínsiñeni lébunabei? Uá. Anihein meha aban iseri lúrudu hama kristiánugu, lilurudun Kristu. Lidan arütíkulu le, warihibei ka lan iseri lúrudu ligía ani lárigiñe ábame wóunabuni álügüdahani burí le: Ka uagu wariñaga ínsiñeni lan lébunabei lúrudu le? Ka uagu wariñaga adüga lan lun ñein lan irichaü? Ani, lidan lúrudu le, ida luba hóuseruniña ichügüdinaü amu?

3. Ka katei aniheinbei lidan “lilurudun Kristu” según Galasiana 6:2?

³ (Aliiha huméi Galasiana 6:2). Lábugiñeñanu “lilurudun  Kristu” kristiánugu. Míchugunti Hesusu aban lísüta lau lúrudu houn lani disipulugu, gama lumoun ruti adundehani houn, gumadi luma adundehani méiniti. Lidan “lilurudun Kristu” ñeinñein sun le larufudahabei. Lun gunfuranda wamani buidu, óunaba wamá fiu álügüdahani luagu lúrudu le.

4, 5. a) Ida liña larufudahan Hesusu? b) Ídabuga larufudaha?

⁴ Ida liña larufudaha Hesusu houn gürigia? Furumiñe, lau lererun. Gabafuti meha lererun ladüga larufudahani inarüni luagu Bungiu, luagu lisuini ibagari luma Larúeiha lan Bungiu láranibei sun hasufurirun gürigia (Luk. 24:19). Arufudahati giñe Hesusu houn lani disipulugu lau lani hénpulu luma lau ligaburi lawinwandun (Huan 13:15).

⁵ Ídabuga larufudaha Hesusu? Dan meha le ya lubéi ubouagu (Mat. 4:23). Arufudahati giñe houn ha afalarubalin murusun dan lárigiñe láguyugun. Kei hénpulu, aba larufudagun lungua houn fiu hádangiñe, másiñati hóugiñe lan seingü-san, aba líchugun gumadi houn lun hadügün disipulugu (Mat. 28:19, 20; 1 Ko. 15:6). Kei lichügüdina damuriguaü, sigimémeti arufudaha houn lani disipulugu lárigiñe lagiribudun sielun. Kei hénpulu, lidan irumu 96, yusu lumuti Hesusu apostolu Huan lun líchugun dǘgüdaguaü luma adundehani houn kristiánugu anuadirúaaña (Kol. 1:18; Aruf. 1:1).

6, 7. a) Halía labürüdǘwa le larufudahabei Hesusu? b) Ka lunbei wadügüni lun gaganbadi wamá lun lilurudun Kristu?

⁶ Halía labürüdǘwa le larufudahabei Hesusu? Abahüdaguati gádürü ewanhéliu luagu saragu katei le ladügübei luma le lariñagubei Hesusu dan le ya lubéi ubouagu. Le líbiri Abürüdǘni Güriegu Kristiánu íderagua lumutiwa lun gunfuranda wamani buidu ligaburi lasaminarun Hesusu, ladüga ha abürühabalin bürǘ hamuti lau lídehan sífiri sandu lugundun “anihein lisaminan Kristu” hama (1 Ko. 2:16).

⁷ Le wafurendeirubei: Huuti larufudahan Hesusu lidan sun le wadügübei lidan wabagari. Ligíati, lunti larihíniwa falá wamani larufudahan Kristu lidan wabagari hadan waduheñu, lidan wadagimanu o leskuelarugu, luma giñe lidan damuriguaü. Furendeitiwa luagu lúrudu le lau waliihani Abürüdǘni Güriegu ani samina wagía luagu. Gaganbaditiwa lun lau wafalaruni adundehani, lúrudu burí luma adundehani méiniti le wadarirubei lidan fánreinti burí le tidan  Bíbülia. Lau wafalaruni lilurudun Kristu, warufuduña gaganbadi wamá lun Wabungiute le hínsiñehabubei, Heowá, le úmagiñebei liabin sun le larufudahabei Hesusu (Huan 8:28).

8. Ka lébunabei lilurudun Kristu?

⁸ Ha awinwandubaña tidan aban muna to buiti tábunawagun ani derebuguti tugudina chóuruti hasandiragun houngua tidan. Ligiaméme hasandirubei ha gaganbadibaña lun aban lúrudu buiti le derebuguti lebu. Derebugutimati lilurudun Kristu: ínsiñeni. Ka uagu wariñagei?

9, 10. a) Ka arufudubalin adüga lani Hesusu katei lau ínsiñeni? b) Ida luba wáyeihani?

⁹ Furumiñe, ladüga adüga lumuti Hesusu sun katei lau ínsiñeni. Gudemehabu ínchahabalin lun larufudahan houn gürigia, lareidaguagüdün sanditiña, léigagüdün lamatiña luma láguyuguagüdün hilaaña ligía arufudubalin línsiñehabu (Mat. 14:14; 15:32-38; Mar. 6:34; Luk. 7:11-15). Inarüni sun lan le ladügübei Hesusu megei lan meha dan luma erei. Gama lumoun, lau sun lugundan ru lumuti lidan furumiñeti lúgaaru le hemegeirubei amu. Ani ligibuagun sun katei, arufuda lumuti lanarime línsiñehabu lau lederegeruni libagari hawagu gürigia (Huan 15:13).

¹⁰ Le wafurendeirubei: Gayaraati wáyeihani Hesusu lau wíchuguni le hemegeirubei amu lidan furumiñeti lúgaaru. Luma giñe lau wasandirun gudemehabu hawagu gürigia ha lídanbaña fulasu le ñein lubéi wapurichiha. Dan le ladügün gudemehabu le lun wapurichihan luma lun warufudahan houn amu, warufuduña gaganbadi wamá lun lilurudun Kristu.

11, 12. a) Ida liña wasubudiruni berese lan Heowá wau saragu? b) Ida luba wáyeihani línsiñehabu Heowá?

¹¹ Libiaman, ladüga subudigüda lumuti Hesusu línsiñehabu Lúguchi. Lidan meha lani ministeriu arufuda lumuti saragu wéiyaasu berese lan Heowá hau lubúeingu. Kéiburi, arufudahati gebegi lan kada aban wádangiñe lun Wáguchi le siélubei (Mat. 10:31). Ani ariñagati giñe ayumaha lan Heowá lun hasakürihan ha féridihañabaña luma lun hagiribudun lidoun damuriguaü lun leresibiruniña lau larüna daragu (Luk. 15:7, 10). Ariñagati arufuda lani Bungiu línsiñehabu woun lau líchuguni libagari Liráü lun lesefuruniwa (Huan 3:16).

¹² Le wafurendeirubei: Ida luba wáyeihani línsiñehabu Heowá? (Efe. 5:1, 2). Lau wasaminarun gebegi hamá wíbirigu luma lau buidu lan weresibiruniña ha yuriguaañabaña ha agiribudubaña lun Heowá (Sal. 119:176). Warufudubei hínsiñe hamá wíbirigu woun lau wíchaagun woungua lun wíderaguniña dan le hemegeiruniwa (1 Huan 3:17). Dan le wóuseruniña amu lau ínsiñeni, warufuduña gaganbadi wamá lun lilurudun Kristu.

13, 14. a) Ka lugumadin Hesusu wadarirubei lidan Huan 13:34, 35, ani ka uagu iseri lubéi? b) Ida liña gaganbadi wamá lun iseri gumadi le?

¹³ Lǘrüwan, ruti Hesusu gumadi houn lani disipulugu lun hínsiñe hamá amu houn kei hínsiñe lánigu lun (aliiha huméi Huan 13:34, 35). Iseriti gumadi le ladüga úati meha lidan Lúrudu le líchugubei Bungiu houn ísüraelina. Ariñagati Hesusu lunti lan hínsiñe hamá wábirigu woun kei wínsiñe lun. Lunti hínsiñe hamá woun sügǘ lau ínsiñeni le wasandirubei wawougua, mosu hínsiñe hamá woun darí lun wíchuguni wabagari hawagu kei meha ladügüni Hesusu. Lunti lira mégeiwati aban ínsiñeni libe le larufudubei Hesusu. *

¹⁴ Le wafurendeirubei: Ida liña gaganbadi wamá lun iseri gumadi? Lidan murusun dimurei, lau wadügün sákürifisiu hawagu wábirigu. Mámarügü aranseñu waña lun wadügüni sun  wayaraati hawagu mini lubéi le, mini lan giñe wíchuguni wabagari hawagu. Aranseñu waña giñe íbini lun wadügün sákürifisiu le ñǘbüriti. Kei hénpulu gayaraati wadireirun luéi le lunbei wadügüni lun wanügüni aban íbiri derebuguhali lidoun adamuridaguni, wígiruni wadügün somu katei le hínsiñeti woun lun wagundaaragüdüni somu íbiri o wárügüdün bakechanu lun woudin ídeha dan le ñein lan somu mégeiti. Lau wadügün katei kei burí le, warufuduña gaganbadi wamá lun lilurudun Kristu ani wídehaña lun chouru lan hasandiragun lílana damuriguaü houngua.

15-17. a) Ida liña larufuduni le ladügübei Hesusu hínsiñe lan irichaü lun? b) Ida luba wáyeihani ligaburi Hesusu?

¹⁵ Tidan Bíbülia, létima mini lubéi irichaü ladügüni gürigia le lariñagubei Bungiu buidu lan luma lun ladügüni úouga himei lan aban gürigia luéi aban. Ka uagu wariñaga adüga lan lilurudun Kristu lun ñein lan irichaü?

¹⁶ Furumiñe, ariha waméi ida liña lan larufuduni le ladügübei Hesusu hínsiñe lan irichaü lun. Lidan meha dan ligía, mínsiñetiña meha gürigia ha lílana amu néchani houn huríu ha lábutigu relihión, iyereegutiña meha gürigia ha lóuguabei haleskuelan houn ani menebentiña meha würiña houn. Ánheinti Hesusu óusera lumutiña súngubei lau irichaü ani úati hime lan ni aban. Mamahanti houn gürigia ha lílana amu néchani ha meha afiñebaña luagu (Mat. 8:5-10, 13). Úati iyereehabu lan lugundun apurichihati houn sun gürigia dandu houn rísitiña kei houn gudemetiña (Mat. 11:5; Luk. 19:2, 9). Móuserun lumutiña würiña wuriba ineberügütiña lun, íbini ha wuribabei houserún (Luk. 7:37-39, 44-50).

¹⁷ Le wafurendeirubei: Gayaraati wáyeihani Hesusu lau úa lan hime wamá aban gürigia luéi aban luma lau wapurichihan houn sun ha aganbubaliwa, meberesenga kátaña lan o ka lan hánibei relihión. Ánhañati wügüriña kristiánugu áyeiha hamuti Hesusu dan le hóuseruniña würiña lau inebesei. Lau hadügüni katei le, harufuduñein gaganbadi hamá lun lilurudun Kristu.

18, 19. Ka larufudahabei Hesusu luagu irichaü, ani ka wafurendeirubei lídangiñe?

¹⁸ Libiaman, ariha waméi le lariñagubei Hesusu luagu irichaü. Arufudahati adundehani méiniti houn lani disipulugu lun líderaguniña lun hóuseruniña amu lau irichaü. Samina wamá luagu lunti lan wóuseruniña amu kei wabusenrun lun wouserúniwa (Mat. 7:12). Kei busén wamá lun wouserún lau irichaü ligíati lunti lubéi wóuseruniña amu lau irichaü. Kaba ibihúa lau lira? Línchahabaña katei le gürigia lun hóuseruniwa lau irichaü. Gama lumoun, ánheinti sufurihadiwa lubéi somu marichaü? Arufudahati giñe Hesusu houn ha afalarubalin lun hafiñerun luagu Heowaba lan ariha lau ladügǘn irichaü houn “ha ayumuragutiña lun áriebu, wéyuagu” (Luk. 18:6, 7). Le linarün katei, aban füramasei dimurei burí le: subuditi lun Wabungiute, le richabei, buidu buidu lénrengunga le wawinwandubei lidan lagumuhóun dan le ani ligíaba adüga lun ladügǘn irichaü woun danme le lachülürün dan (2 Tesa. 1:6).

¹⁹ Le wafurendeirubei: Ánhawa afalarei adundehani le larufudahabei Hesusu, wóuserubaña amu lau irichaü. Ánheinti sufurihadiwa lubéi somu marichaü lidan ubóu le lábugiñebei lagumadihan Satanási, ruti gurasu woun wasubudiruni ladügüba lan Heowá lun ladügǘn irichaü woun.

20, 21. a) Ida luba hóuseruniña ichügüdinaü amu? b) Ida luba harufuduni wügüriña maríeitiña ínsiñeni libe le larufudubei Kristu? c) Ida luba hóuseruniña agübürigu hasaanigu?

²⁰ Kei le aubei warihei ínsiñeni lébunabei lilurudun Kristu. Ligíati, lábugiñe lúrudu le, sun ichügüdinaü lunti hóuseruniña amu buidu luma lau ínsiñehabuni. Lunti giñe haritaguni  aguraba lan Kristu lun warufudun ínsiñeni lidan sun le wadügübei.

²¹ Hadan iduheñu. Lunti hínsiñe tan lúmari wügüri lun “kei lueirin wínsiñe lun Kristu” (Efe. 5:25, 28, 29). Áyeiha hamuti wügüriña maríeitiña Kristu lau híchuguni le temegeirubei luma le hínsiñebei tun hani weiriou furumiñe, lubaragiñe le hínsiñebei houn. Hénrenguti houn fiu wügüriña harufuduni libe ínsiñeni le, másiñati hadan lan iduheñu ha méchutiña óuseraña amu lau ínsiñehabuni luma irichaü haweirida. Íbini hénrengu lan houn hígiruni hechun, lunti hasansirun lun gaganbadi hamá lun lilurudun Kristu. Wügüriña maríeitiña ha arufudubaña ínsiñehabuni libe le larufudubei Kristu ibiha hamuti tinebese hani weiriou. Ánhañati agübürigu ha hínsiñehabubaña houn hasaanigu maweiyasunbaña adüga wuribani houn ni lau hererun ni lau le hadügübei (Efe. 4:31). Arufudarügü habéi hínsiñehabu houn luma gunda hamá hau lau aban igaburi le adügübei lun hasandiragun hasaanigu houngua chóuruñu. Ani ítara, hagañeirubei hínsiñehabu hasaanigu ani afiñebaña giñe hawagu.

22. Según 1 Féduru 5:1-3, ka haburemebei lumutuniña Heowá, ani ida luba lunti lan houserún?

²² Lidan damuriguaü. Lunti haritaguni wéiyaaña lidan afiñeni mama lan hagía haburiñabaña lumutuniña Heowá (Huan 10:16; aliiha huméi 1 Féduru 5:1-3). Dimurei “lirahüñü Bungiu” haritaguagüda lumutiña wéiyaaña lidan afiñeni luagu lani hamá Heowá lílana damuriguaü; ani busenti lun houserún lau ínsiñehabuni (1 Tesa. 2:7, 8). Wéiyaaña lidan afiñeni ha óuserubaliña lumutuniña Heowá lau ínsiñehabuni, ibiha hamuti lufulesein Heowá, línsiñehabu ani inebetiña houn íbirigu.

23, 24. a) Ka dasi hadügübei wéiyaaña lidan afiñeni dan le ladügün aban lílana damuriguaü aban figóu wéiriti? b) Lidan kesi le, ka burí katei hakutihabei wéiyaaña lidan afiñeni?

²³ Lidan Lúrudu le líchugubei Heowá houn ísüraelina, alidihatiña hama wéiyaaña etenirubaña lun hamadagua gürigia luma Bungiu ani  ténitiña meha giñe lun haransehani haturóbulin gürigia luma burí turobuli le wéinamuti. Ánheinti lábugiñe lilurudun Kristu, amu dasi hadügübei wéiyaaña. Dan le ladügün aban lílana damuriguaü aban figóu wéiriti aba hetenirun lun katei le lánina lumadagua gürigia luma Bungiu. Subudi hamuti rúhali lan Bungiu ubafu houn gumadimatiña ha ubouaguna lun haguseragüdün dan le ñein lan turobuli o turobuli wéinamuti hadan gürigia. Ligíati, garichatiña gumadimatiña lun hafayeiragüdüni gürigia luagu le ladügübei luma lun hadaürüni (Rom. 13:1-4).

²⁴ Ka hadügübei wéiyaaña lidan afiñeni dan le ladügün aban lílana damuriguaü aban figóu wéiriti? Yusu hamutu Bíbülia lun hakutihani kaba lan adügǘwa lun líderawagun lílana damuriguaü le ouserúaalibei wuriba. Ánheinti lun le afigouhabei, línchahabaña ínsiñeni wéiyaaña lidan afiñeni lun harihini anhein asakürihaali lubéi luma anhein gayara lubéi líderawagun lunya gamadagua lan luma Bungiu.

25. Kaba akutihóua lidan leweñegua arütíkulu?

²⁵ Chóuruti gunda wamá lau lábugiñeñadiwa lan lilurudun Kristu. Dan le wáfagun súngubei wagía lun gaganbadi wamá lun, ídehatiwa lidan damuriguaü lun hasandiragun súngubei houngua hínsiñewa hamá, gebegi hamá luma lun hasandiragun houngua chóuruñu. Gama lumoun, wawinwanduña lidan aban ubóu le ñein lubéi ‘wuribatimarügaaña lan gürigia’ (2 Tim. 3:13). Ligíati mábürühala warüna! Ida luba larufuduni damuriguaü liricha Bungiu dan le mosu lan hetenirun wéiyaaña lidan afiñeni lun duru le hanarimetimabei kei burí ladügǘn iwiyei hau irahüñü? Lóunabuba álügüdahani le lidan leweñegua arütíkulu.