1-3. a) Según Sálumu 5:4-6, ida liña larihini Heowá wuribani? b) Ka uagu wariñaga múaran lan “lilurudun Kristu” luma ladügǘn iwiyei hau irahüñü?

IYEREEGUTI sun luwuyeri wuribani lun Heowá (aliiha huméi Sálumu 5:4-6). Ligíati iyereegu lubéi ladügǘn iwiyei hau irahüñü lun, aban katei wuribati ani ahahürühati. Ítara kei Heowá, iyereeguti giñe ladügǘn iwiyei hau irahüñü houn lani Gefentiña ani máhatiwa lun igaburi le lidan damuriguaü (Rom. 12:9; Ebü. 12:15, 16).

² Múaranti ladügǘn iwiyei hau irahüñü luma “lilurudun Kristu”, lidan amu dimurei, múaranti luma sun le lariñagubei luma le larufudahabei Hesusu (Gal. 6:2). Ka uagu wariñagei le? Kei warihini lidan arütíkulu le lubaragiñebei le, ínsiñeni lébunabei lilurudun Kristu ani adügati lun ñein lan irichaü. Kei kristiánugu inarünitiña falá wamuti gumadi le, óusera wamutiña irahüñü lau aban igaburi lun hasandiragun hougua inarüniti lan hínsiñewa hamá luma lun chóurugua lan hasansiragun houngua. Dan le ladügün aban gürigia katei wuribati kei houserún irahüñü wuriba, lasaminaruña luouguoun ani salufuriti ani adügati lun lasandiragun irahü lungua lau machouruni luma lun lasaminarun irahü ua hamá ni aban abusenrei.

³ Híruti kamanitimahali lan lidan sun fulasu ubouagu ladügǘn iwiyei hau irahüñü, ani susereti giñe íbini hadan kristiánugu inarünitiña. Ka uagu? Lugundun lidan wadaani añahein saragu “wuribatiña hama ha geyeehadibaña”, másiñati añahein lan hádangiñe háluguba hebelurun lidoun damuriguaü (2 Tim. 3:13). Ani añahein giñe fiu ha ariñagubaña lílana hamá damuriguaü ígiraguagüdaaña houngua lun luriban hayumahan ani adügaaña iwiyei hau irahüñü. Wariha ka lan uagu aban lubéi katei hanarimeti luriban figóu le. Lárigiñe, wakutihabei ka lan hadügübei wéiyaaña lidan  afiñeni dan le ladügün aban gürigia figóu wéiriti, kei burí houserún irahüñü wuriba, luma ida luba lan hóunigiruniña agübürigu hasaanigu. *

4, 5. Ka uagu aban lubéi figóu houn ha súfuri hamaalibei houserún irahüñü wuriba?

⁴ Ha asufurirubalin wuribani le súfuritiña luagu saragu irumu. Ani mámarügüñanu hagía asufurira, súfuritiña giñe ha hínsiñehabubaña houn, kei burí: haduheñu hama lílana damuriguaü. Aban figóu wéiriti houserúniwa irahüñü wuriba.

⁵ Aban figóu houn ha asufurirubalin. * Aban figóu lira dan le ladügün gürigia dañu houn amu luma lun hasufurirun. Keime warihini lidan leweñegua arütíkulu, anihá le hadügübei ha óuserubaliña irahüñü wuriba, adügatiña wuribani houn le abuleiseirubarun hanigi. Adügatiña lun hasandiragun irahüñü hougua lau machouruni luma lun mafiñe hamá hawagu amu. Mosu wóunigiruniña irahüñü luéi burí lanarime wuribani le. Ani mosu giñe wíchugun gurasu houn ha asufurirubalin wuribani le (1 Tesa. 5:14).

6, 7. Ka uagu aban lubéi figóu lun damuriguaü luma houn gumadimatiña ladügǘn wuribani lau aban irahü?

⁶ Aban figóu hagibugiñe lílana damuriguaü. Dan le ladügün aban lílana damuriguaü iwiyei lau aban irahü, wíyeda laali damuriguaü (Mat. 5:16; 1 Fe. 2:12). Marichati lun hasufuriruba lan míñunu íbirigu ha ‘áfaagubaña luagu hafiñen’ ladügarügü luriban lóuserun aban gürigia (Hud. 3). Madouraguntiwa hau ha óuserutiña wuriba ani masakürihantiña, ani wíyeda hamuti liri damuriguaü.

⁷ Aban figóu hagibugiñe gumadimatiña. Sun kristiánugu “lunti gaganbadi hamá houn gumadimatiña” (Rom. 13:1). Arufuda wamuti gaganbadi wamá houn gumadimatiña lau gaganbadi wamá lun lilurudun ageiraü. Anhein ladüragua aban lílana damuriguaü gumadi, kéiburi, lau ladügün wuribani lun aban irahü, lafigouhaña hagibugiñe gumadimatiña (góubagüagüda huméi luma Adügaü 25:8). Íbini siñá lan hadügün wéiyaaña lidan afiñeni lun lagunfulirún lau lúrudu, madouraguntiña hau ha adügübaña wuribani houn irahüñü (Rom. 13:4). Alubaha lumuti le afigouhabei le lábunagubei (Gal. 6:7).

8. Ida liña larihini Bungiu figóu le ladügübei gürigia lun gürigia líledi?

⁸ Lóugiñe sun katei aban figóu le ligibugiñe Heowá (Sal. 51:4). Dan le lafigouhan gürigia lun gürigia líledi lafigouhaña giñe ligibugiñe Bungiu. Ariha wamá aban sügǘ le wadarirubei lidan Lúrudu le líchugubei Heowá houn ísüraelina. Ariñagati Lúrudu le lan íweruhabei luéi gürigia líledi lafigouhaña lan “ligibugiñe Wabureme” Heowá (Fad. 6:2-4). Chóuruti adüga lan lílana damuriguaü le adügübei wuribani lun aban irahü, lun lasandiragun irahü lungua lau machouruni ani larufuduña gürigia ligía ua lan úaragua lan lun Bungiu ani lawiyeduñein giñe liri Bungiu. Ligíati warihibalin houserún irahüñü wuriba kei aban katei mabuidunti: aban figóu iyereeguti woun ani wíyeti ligibugiñe Bungiu.

9. Ka ariñahani tídangiñeti Bíbülia tíchugubei lóundarun Heowá lidan burí irumu le sügühalibei, ani ka uagu?

⁹ Lidan sun irumu le sügühalibei, rúharu lóundarun Heowá saragu ariñahani tídangiñeti Bíbülia luagu houserún irahüñü wuriba. Kéiburi, Garüdia Awisahatu tuma Agaguduabá! adügǘwaali burí arütíkulu luáguti ida luba lan hagagibudagun ha asufurirubaña ladüga iwiyei le  adügǘbei hau irahüñü, ida luba lan híderawagun amu luma lun lichugún gurasu houn, luma ida luba lan hóunigiruniña agübürigu hasaanigu. Ru waali giñe adundehani tídangiñeti Bíbülia le dǘgüdati houn wéiyaaña lidan afiñeni luáguti kaba lan hadüga dan le ladügün somu lílana damuriguaü aban figóu libe le. Sun oura tau lóundarun Heowá echekürei ariñahani le lunbei hafalaruni wéiyaaña lidan afiñeni dan le hadunragun luma kesi libe burí le. Ítarati, wachoururubei buidu úaragua lan wahandilihani turobuli le luma lilurudun Kristu.

10-12. a) Ka gabaroun habéi wéiyaaña lidan afiñeni dan le hetenirun lun aban figóu wéiriti ani kátima súdinitimabei houn? b) Según Santiagu 5:14, 15, ka habusenrunbei wéiyaaña lidan afiñeni hadügün?

¹⁰ Dan le ladügün aban gürigia figóu wéiriti, aba hetenirun wéiyaaña lidan afiñeni lun turobuli le ani gabaroun hamuti lun lan hasigiruni lilurudun Kristu lunti lan hóuseruniña lumutuniña Bungiu lau ínsiñeni luma lun hadügüni le richabei ani úaragua ligía ligibugiñe lagu Bungiu. Ani anihein saragu katei le adiheridagüdübaliña. Létima súdinibei houn hakipuruni liri Bungiu harumañu (Fad. 22:31, 32; Mat. 6:9). Ani ténitiña giñe buidu buidu lun hóunigiruni hamadagua íbirigu luma Bungiu luma lun híderaguni le asufurirubei.

¹¹ Áfaaguatiña wéiyaaña lidan afiñeni lun híderaguni le adügübalin figóu wéiriti le lun labuiduragüdüni lumadagua luma Heowá anhein gayara (aliiha huméi Santiagu 5:14, 15). Kristiánu le ígiraguagüdübei lungua lun luriban ayumahani ani aban ladügün aban figóu wéiriti, débiliti lumadagua luma Bungiu. Mini lan le gádeihali lan lumadagua luma Heowá. * Ítara haña wéiyaaña lidan afiñeni kamá surusiagu ladüga háfaagun lun hareidaguagüdüni le afigouhabei. Gayaraati líderaguni adundehani le tídanbei Bíbülia lun labuidurun lumadagua luma Bungiu. Gayaraati libihini ánheingubeirügü asaküriha tídangiñe sun lanigi (Adü. 3:19; 2 Ko. 2:5-10).

¹² Inarüni hanarime lan hadasin wéiyaaña lidan afiñeni. Ténitiña buidu houn lumutuniña Heowá ha líchugubaña lábugiñoun haríaahan (1 Fe. 5:1-3). Busentiña lun hasandiragun íbirigu houngua chóuruñu lidan damuriguaü. Ligía madarasahan habéi dan le híchugun fe adügǘwaali lan somu figóu wéiriti, kei burí houserún irahüñü wuriba. Ka hadügübei? Akutiha waméi álügüdahani le áfuachubei lidan lagumeseha  párafu 13,  15 luma  17.

13, 14. Gaganbaditiña san wéiyaaña lidan afiñeni houn lúrudugu lun habuyaruni le adügübei wuribani houn irahüñü? Afuranguagüda huméi.

 ¹³ Gaganbaditiña san wéiyaaña lidan afiñeni houn lúrudugu lun habuyaruni le adügübei wuribani houn irahüñü? Anha, lidan fulasu le ñein lubéi lúrudu burí le, gaganbaditiña wéiyaaña lidan afiñeni lun (Rom. 13:1). Madüraagun lumuti lúrudu le, lilurudun Bungiu (Adü 5:28, 29). Ligíati, dan le lachülürün aban ariñahani kei le harigeirugun wéiyaaña lidan afiñeni, lau lóufudagun aba hamuriahan adundehani tuma sukursáli kaba lan hadüga lun gayara lan hagunfuliruni le lariñagubei gumadi lun habuyaruni le adügübei wuribani lun aban irahü.

¹⁴ Ariñaga hamuti wéiyaaña houn ha asufurirubaña, houn hagübürigu luma houn amu ha asubudirubalin turobuli gayara lan habuyaruni le adügübalin wuribani le, houn lúrudugu. Ánheinti aban lubéi lílana damuriguaü íridahoubei ani buruguaali le asuseredubei? Gayaraati san lasaminarun íbiri le abuyahabei dasei laali lan liri Heowá? Uá. Le adügübalin wuribani le, ligía adaseirubalin liri Heowá.

15, 16. a) Lau gabaroun wamani le lariñagubei 1 Timotéu 5:19, ka uagu mégeiwa habéi bián gefentiña lun hagumeserun wéiyaaña adamuridagua lau le gadurunbei? b) Ka hadügübei wéiyaaña dan le lichugún duru luagu aban lílana damuriguaü luagu adügaali lan wuribani houn irahüñü?

  ¹⁵ Lidan damuriguaü, ka uagu mégeiwa habéi bián gefentiña lun gayara lan hadamuridagun wéiyaaña lau le afigouhabei? Ladüga ítara liña lan tariñaguni Bíbülia. Aniha aban lídangiñe liñun lilurudun Heowá. Dan le magufeseru lani le afigouhabei lifigoun, mégeiwatiña bián gefentiña ha arihibalin lun harufuduni gadurun lan luma lun hagumeserun wéiyaaña lidan afiñeni adamuridagua lau (2 Lur. 19:15; Mat. 18:16; aliiha huméi 1 Timotéu 5:19). Mini lan giñe san le mégeiwa hamá bián gefentiña lun gayara lan labuyarún houn lúrudugu? Úa. Lidan kesi le mama mosu hafalaruni wéiyaaña lidan afiñeni ni gürigia ha busenbaña habuyaruni gürigia le adügübalin wuribani le gumadi le.

¹⁶ Dan le lariñawagún luagu adügaali lan aban lílana damuriguaü wuribani lun aban irahü, adügatiña wéiyaaña lidan afiñeni bián katei. Furumiñe, áfaaguatiña lun hagunfuliruni lúrudu lun habuyaruni le óuserubaliña irahüñü wuriba. Lárigiñe aba hadügün aban akutihani tídangiñeti Bíbülia lun harihini kátima lan asuseredubei luma giñe lun harihini anhein lunti lubéi hadamuridagun wéiyaaña lidan afiñeni lau le gadurunbei. Anhein eyeedagua le gadurunbei luagu madurun lan, aba haganbuniña wéiyaaña le lunbei hariñaguni ha gefenbaña. Hadamuridaguba wéiyaaña anhein arufudúa anihein lan somu figóu íbini biánrügüñanu lan gefentiña: le ariñagubei gadurun lan gürigia ligía luma le ariñagubei luagu inarüni lan adüga lani gürigia ligía wuribani le o amu burí wuribani houn irahüñü. * Íbini ábanrügüñein lan gefenti, úati mini lan leyeehaña lan le abuyahabei. Íbini anihein lan dan siñá lan larufudún anhein inarüni lubéi susere lan wuribani ligía, ladüga marihin hamani bián gefentiña, másiñati hasubudiruni wéiyaaña lidan afiñeni luagu adügǘwa lan figóu wéiriti le, aban figóu le adügaalibei saragu wuribani houn amu. Ligíati ítarameme humá íderaguaña ha bulesei láañabaña wuribani le ani agagudúañu humá lidan hóunigiruniña lílana damuriguaü luéi wuribani le gayaraabei ladügüni le uágubei líchugua duru (Adü. 20:28).

17, 18. Afuranguagüda huméi ka lan hadasibei íbirigu ha adamuridagubaña hau ha afigouhabaña.

 ¹⁷ Ka lisuunibei hadamuridagun wéiyaaña lau gürigia? Wéiyaaña lidan afiñeni ha lídanbaña adamuridaguni le ariha hamuti anhein gayaraagili lubéi lasigirun gürigia kei lílana damuriguaü. Dimurei hadamuridagun lau gürigia mama lun harihini anhein lunti lunbei lafayeiragüdüniwa gürigia le adüraagubalin lúrudu luagu le ladügübei o mama lan lunti lafayeirawagüdün. Mádaraguntiña wéiyaaña houngua lidoun katei le; ígira hamuti katei háhaburugu lúrudugu (Rom. 13:2-4; Titu 3:1).

¹⁸ Lun katei le lánina damuriguaü o le luáguti líderawagun gürigia lun gamadagua lan luma Bungiu hetenira wéiyaaña lidan afiñeni dan le hadamuridagun luma gürigia. Yusu hamutu Bíbülia lun harihini anhein asakürihaali lubéi gürigia le gadurunbei. Ánheinti masakürihan, aba labugún ani aba lichugún awisahani luagu mámaali lan gefenti luagu Heowá gürigia ligía (1 Ko. 5:11-13). Ánheinti asakürihaali lubéi tídangiñe sun lanigi gayaraati lasigirun lidan damuriguaü. Gama lumoun, hawisarubei wéiyaaña másiñati lan meresibirundigiaali lan dasi lidan damuriguaü. Ani kei le berese habéi hau irahüñü, ladügǘba fiu katei lun hounigirún, másiñati lariñawagún houn kada agübürigu hábuguarügü, ha ñǘbürigiña hasaanigu, lun hóunigiruni hasaanigu hóuserun hama híbena gürigia  ha. Lau hafalaruni adundehani le, hóunigiruña luéi hasubudirún kátaña lan unbei ladügǘwa wuribani le.

19-22. Ida luba hóunigiruniña agübürigu hasaanigu? (Ariha humoun iyawaü to luáguboun tidáü garüdia).

¹⁹ Hadasin agübürigu lun hóunigiruniña hasaanigu luéi furumiñeguarügü wuribani. * Agübürigu, isaanigu “ha wágurahabaña, aban abiniruni rísiti hagía lun Aburemei” (Sal. 127:3). Hidasin lun hóunigiruni idewesei le. Ka gayaraabei hadügüni lun hóunigiruniña hisaanigu luéi ladügǘn wuribani houn?

²⁰ Furumiñe, subudi humá buidu luáguti houserún irahüñü wuriba. Furendei humá ka lan hawuyeri gürigia adügübaña wuribani houn irahüñü luma ida liña lan heyeeduniña. Gabaroun huméi turobuli (Ari. 22:3; 24:3). Haritagua huméi liibe-agei lan dan gürigia le lasubudirubei irahü ani afiñe ligía luagu ligía adügübei wuribani lun.

²¹ Libiaman, gayanuhadin humá hama hisaanigu (2 Lur. 6:6, 7). Le lílabei le, lichugún arigei lun le hariñagubei irahüñü (Sant. 1:19). Haritagua huméi giñe hénrengu lan houn irahüñü habahüdahani le asuseredubei. Háfuga hanufudetiña luéi mafiñerúniwa lan houn. O siadi hamaniña ha adügübaña wuribani houn lun mabahüdahan hamani lun ni aban. Anhein amalisiha hubéi luagu wuriba lan léibugun katei, adüga humá álügüdahani houn lau ínsiñeni ani gaguraasun humá danme haganbuniña.

²² Lǘrüwan, ru humá ariñahani houn hisaanigu. Según harumudiri ariñaga huméi houn le lunbei hasubudiruni luagu agamariduni. Arufudaha humá houn kaba lan hadüga luma kaba lan hariñaga anhein abusenra somu gürigia laguruhaniña. Yusu humóun agumeiraguagüdüni to tadügün lóundarun Bungiu to ayanuhaboun luagu ida luba lan hounigirún irahüñü (ariha huméi rekuáduru “ Ariñahani houn agübürigu luma houn isaanigu”).

23. Ka wasaminarubei libügürü ladügǘn iwiyei hau irahüñü, ani kaba álügüdahani ounabúa lidan leweñegua arütíkulu?

²³ Wagía gefentiña luagu Heowá, saminatiwa aban lan figóu ahahürühati ani le salufuriti ladügǘn iwiyei hau irahüñü. Falá hamuti lílana damuriguaü lilurudun Kristu, ligía madouragun habéi hau ha adügübaña wuribani houn irahüñü. Guentoti, ida luba wíderaguniña ha asufurirubalin wuribani le? Lóunabuba álügüdahani le lidan leweñegua arütíkulu.