1. Ka lariñagubei Hesusu luagu irisini siélugiñeti?

ANIHEIN san idewesei o irisini le marihínwati? Anha; le linarün katei, idewesei létima gebegibei marihínti. Dan le layanuhabei Hesusu luéigiñe wübü, adimurehati luagu irisini siélugiñeti le gebegitimabei sügǘ lau umegeguni. Ani ariñagati: “Le ñein lumuti hirisin, ñeinboun giñe hanigi” (Mat. 6:19-21). Tínchahabadiwa wanigi lun wáluahani irisini le gebegitimabei woun. Óundaraguatiwa “irisini sielu” dan le wadügün aban lubuidun iri ligibugiñe Bungiu ani ibiha waméi lufulesein. Kei lafuranguagüdüni Hesusu, úati ni aban gayaraati líweruhani irisini ligía wawéi.

2. a) Ka un línchahawa Pábulu tidan 2 Korintuna 4:17, 18? b) Kaba wakutiha lidan arütíkulu le?

² Ínchaha lumutiwa apostolu Pábulu lun wakipuruni warihin “luagun [katei] le marihínwabei” (aliiha huméi 2 Korintuna 4:17, 18). Laganagua idewesei o irisini le marihínbei anihein abiniruni burí le lunbei weresibiruni lidan iseri ubóu le füramase láalibei Bungiu woun. Lidan arütíkulu le, wakutihaba gádürü idewesei o irisini marihínti le ídangiñebei wasagara buiti guentó: wamadagua luma Bungiu, furíei, lídehan sífiri sandu, luma ídemuei le líchugubei Heowá, Hesusu hama ánheligu lidan wani ministeriu. Lanwoun lira, warihibei giñe ida luba lan warufuduni weteingiradi luagu sun idewesei o irisini le marihínbei.

3. Katei irisini marihínti létima gebegibei, ani ida liña gayara lan wibihini?

³ Irisini marihínti létima gebegibei, wamadagua luma Heowá (Sal. 25:14). Gama lumoun, ida liña san gayara lan gamadagua lan Bungiu lungua hama gürigia gafigountiña, íbini ítara sandu mémegili? Ladüga adüga lan lani Hesusu sákürifisiu lun “lagidaruni  hafigoun gürigia” (Huan 1:29). Íbini lubaragiñe lounwen Hesusu, subudi laali meha Heowá úaraguabei lan Liráü darí lagumuhóun lun lesefuruniña gürigia. Ligía meha gayara lubéi gamadagua lan Heowá hama gürigia ha awinwandubaña lubaragiñe lounwen Kristu (Rom. 3:25).

4. Írida humá somu hádangiñe lumadagu Bungiu ha meha awinwandubaña lubaragiñe lounwen Hesusu?

⁴ Adimureha wamá hawagu somu lumadagu Bungiu ha awinwandubaña lubaragiñe lounwen Hesusu. Wéiriti meha liderebugu lafiñen Abüraámü. Lóugiñe milu irumu lárigiñe lounwen ariñagati Heowá luagu: “numada” (Isa. 41:8). Ligíati ni óunweni siñati lafanreinraguniwa luéi wamadagua luma Heowá. Le linarün katei, wínwangili Abüraámü lidan laritagun Heowá (Luk. 20:37, 38). Hobu ligía ábaya lubuidun hénpulu. Luagu aban dan, lidan meha hóundaraguña lan ánheligu sielu, ariñagati Heowá lau ichouruni ua lan ni aban gürigia kei Hobu ubouagu. Lidan layanuha luagu, ariñagati: “Seriwi lumutina lau úarani ani suruti labagaridun, ani áfaaguati lun madügün lan wuribani ni ka un” (Hob. 1:6-8). Ati Danieli, le meha eseriwidubei lun Bungiu kéiburi 80 irumu lidan aban ageiraü le ñein lubéi háhuduragua gürigia houn amu búngiugu, ka meha san lasaminarubei Bungiu luagu? Dan meha wéiyaali lubéi Danieli, chóurugüda hamuti ánheligu lun ǘrüwa wéiyaasu: “Wéiriti bínsiñe lun” Bungiu (Dan. 9:23; 10:11, 19). Chouru wamuti weiri lan layumahan Heowá láguyuguagüdüniña lumadagu ha hínsiñebaña lun (Hob. 14:15).

5. Ka lunbei wadügüni lun gamadagua wamá woungua luma Heowá?

⁵ Uguñe weyu, añahein saragu míñunu gürigia charatiña gamadaguatiña luma Heowá. Arihúati lira, ladüga añahein wügüriña, würiña, irahüñü ha arufudubalin lau ligaburi habagaridun lumadagu hamá Bungiu. Ariñagatu Bíbülia luagu Heowá “gamadaguati lungua” hama ha buídubaña (Ari. 3:32). Gayaraati hagundaarun lau hamadagua luma Heowá ladüga afiñe hamá luagu lani Hesusu sákürifisiu. Seremei lebegi asalbaruni, ruti Heowá chansi woun lun wederegeragun woungua lun ani badisei wagía. Dan le wadügüni katei súdiniti le, aba wóundarun hamoun míñunu kristiánugu ha deregeguaaña houngua lun Heowá ani badisei hagía ani ‘gamadaguatiña houngua’ luma Gürigia le íñugutimabei ligibuagu sun ubóu.

6. Ida luba gayara lan warufuduni weteingiradi luagu wamadagua luma Bungiu?

⁶ Ida luba gayara lan warufuduni weteingiradi luagu wamadagua luma Bungiu? Lau wáyeihani Abüraámü luma Hobu. Úaraguatiña meha lun Bungiu lóugiñe san irumu. Lunti giñe wadügüni ligiaméme, meberesenga átirihali lan dan wau eseriwida lun Heowá lidan binadu ubóu le (Dan. 6:7, 10, 16, 22). Lau lídehan Heowá, gayaraabei wawandun furumiñeguarügü óuchawaguni ani kipu wameime lubuidun wamadagua luma (Fili. 4:13).

7. a) Según Ariñawagúni 15:8, ida liña larihini Heowá wafurieidun? b) Ida liña lóunabuni Heowá wafurieidun?

⁷ Furíei, ligía ábaya idewesei le marihínbei. Hínsiñeti houn umadagu buítiña lun hadimurehan luagu le hasaminarubei luma le hasandirubei. Ligiaméme giñe asuseredubei lidan wamadagua luma Heowá. Adimurehati woun tídangiñe Lererun, tidan ariñaga lumuti woun le lasaminarubei luma le lasandirubei. Ánheinti wagía ayanuhatiwa luma lau wafurieidun lun. Dan le wafurieidun lun, gayaraati wabahüdahani lun le wasaminarubei luma le wasandirubei tídangiñe tilulin-agei wanigi. Lau sun lugundan Heowá laganbei wafurieidun lun (aliiha huméi Ariñawagúni 15:8). Aban umadaü hínsiñehabuti Heowá ani mama aganbarügü lumuti furíei óunaba lumuti giñe. Anihein dan ibiha wamuti óunabagülei lau lóufudagun. Gama  lumoun anihein dan mosu lan wasigirun afurieida. Lau sun lira, gayaraati wachoururuni lóunabubei lan wafurieidun lidan dan le buídutimabei luma lidan aban lubuidun igaburi. Inarüni, háfuga óunabagülei lan le wibihibei mama lan yebe ligía wagurabubei. Kei hénpulu, lubaragiñe lagidaruni óuchawaguni, másiñati aban lan líchugun lichú au luma erei woun lun wawanduni (1 Ko. 10:13).

8. Ida luba warufuduni seremei wamani Bungiu luagu idewesei le lánina furíei?

⁸ Ida luba warufudun seremei luagu idewesei gebegiti le lánina furíei? Kéiburi lau wafalaruni adundehani le: “Afurieida humá lun Bungiu sun dan” (1 Tesa. 5:17). Mafosurun lumutiwa Heowá lun wafurieidun lun. Ineberügüti le wanúadirubei wadügün lun. Ani amuriahati wama: “Furíei humá, eteingirei Bungiu, súnwandan” (Rom. 12:12). Ligíati, gayara lubéi warufuduni weteingiradi lau wafurieidun lun saragu wéiyaasu luagu weyu. Anha, dan le wafurieidun lun Bungiu mabulieida waméi lun weteingiruni luma lun walawahani (Sal. 145:2, 3).

9. a) Ida liña larihini aban íbiri gíriti Chris furíei? b) Ka hisaminanbei luagu furíei?

⁹ Eibu wálüdün eseriwida lun Heowá ariheina wabéi ida liña lan lóunabuni wafurieidun, ábameti ínsiñedeina lan furíei woun. Teni wamá lun le lariñagubei Chris, aban íbiri le seriwihalibei lidan dan dayarüti luagu 47 irumu, ariñagati: “Hínsiñeti nun saragiñe nan lun nafurieidun lun Heowá binaafingiua dan le manigagili lan luma dan le narihini labouchun weyu ámiriha luagu serenu. Dan le nadügüni katei le, aba lebelurun nun lun níchugun seremei lun Heowá luagu sun idewesei le líchugubei woun, mabulieidunganéi lubuidun chansi lánina furíei. Lárigiñe nafurieidun guñoun, darangilati nasandiragun nungua lubaragiñe nidin arumuga”.

10. Ka uagu mosu lubéi gebegi lan lani Bungiu sífiri sandu woun?

¹⁰ Sífiri sandu, ligía ábaya idewesei marihínti le lunbei weiri lan lebegi woun. Ínchaha lumutiwa Hesusu lun gabügürügua lan wamuriahani sífiri sandu (Luk. 11:9, 13). Yusu lumuti Heowá lani sífiri sandu lun wibihini “óunwenbu ubafu  le wawagubei” (2 Ko. 4:7; Adü. 1:8). Lau lídehan sífiri sandu gayaraati wawandun furumiñeguarügü óuchawaguni le úmabei wagagibudagua.

11. Ida luba líderaguniwa sífiri sandu?

¹¹ Íderagua lumutiwa sífiri sandu lun wagunfulirun buidu lau burí dasi le weresibirubei lidan weseriwidun lun Bungiu. Lagawoundagüdübei iarani le wawagubei. Le linarün katei, subudi wamuti tau sun taruman wanigi mama lan lau wabafu guánarügü wibihei sun buiti le wasagarubei lidan weseriwidun lun Heowá, seremei lun sífiri sandu le líchugubei woun wibihei.

12. Según Sálumu 139:23, 24, ka katei gayaraabei wamuriahani lidan wafurieidun?

¹² Ámuya igaburi lun warufuduni gebegi lan sífiri sandu woun lau wamuriahan luma Heowá lun líderaguniwa asubudirei luriban saminaü o luriban ayumahani le tídanbei wanigi (aliiha huméi Sálumu 139:23, 24). Lau lóunabuni Heowá wafurieidun gayaraati warihini lau lídehan lani sífiri sandu anhein anihein lubéi somu katei le wuribati tidan wanigi lun waransehani. Anhein asusereda le, amuriaha wamá luma Heowá lun líchugun sífiri sandu woun lun líchugun erei woun lun wasagaruni luriban saminaü o ayumahani wuribati tídangiñe wanigi. Ítara luba warufuduni lun Heowá mabusenrun wamá wadügün ni kata wuribati, ani gayaraabei lasigirun íderaguawa lau lani sífiri sandu (Efe. 4:30).

13. Ida luba warufuduni gebegitima lan sífiri sandu woun?

¹³ Gayaraabei waganwoundagüdüni weteingiradi luagu lani Bungiu sífiri sandu ánhawa asaminara hulili luagu le ladügübei uguñe weyu. Lubaragiñe lamudeirun Hesusu sielun, aba lariñagun houn lani disipulugu: “Danme le liabin [s]ífiri [s]andu huagun, hibihuba ubafu lun gefén humá nuagu, [...] chülǘ lumoun lidise-agei fulasu ubouagu” (Adü. 1:8). Gúnfulihali dimurei le buidu buidu. Lau lídehan sífiri sandu, añaheinhaña kei burí widü míñunu dimí gürigia lidan sun ubóu derege hamaali habagari lun Heowá. Lídanñadiwa hóundaragun lumutuniña Bungiu lidan darangilaü, ladüga íderagua lumutiwa sífiri sandu abuiduragüdei wagaburi, kei ínsiñehabuni, ugundani, darangilaü, gaguraasuni, areiduni, lubuidun igaburi,  afiñeni, ǘnabuguni luma ragüguaü unguaü. Anihán “igaburi le líchugubei [s]ífiri” (Gal. 5:22, 23). Ligíati, chouru wamuti aban lan óunwenbu idewesei sífiri sandu.

14. Ka ídemuei le marihínti weresibirubei lidan wani ministeriu?

¹⁴ Anihein ábaya katei wama le gebegibei ani le marihin wamuti: wídehan luma Heowá, luma fánreinti le tani lóundarun to siéluboun (2 Ko. 6:1). Íderagua tumutiwa lóundarun sagü wadügün disipulugu. Dan le layanuhanbei Pábulu luougua luma hawagun amu apurichihatiña, ariñagati: “Íbirigu wagía lidan wadagimanu eseriwida lun Bungiu” (1 Ko. 3:9). Dan le wapurichihan wídehaña giñe luma Hesusu. Haritagua waméi lárigiñebei lan líchugun Hesusu gumadi houn lani disipulu lun houdin “habügürü gürigia ha lílana sun fulasu, adüga [...] disipulugu”, ariñagayati houn: “Subudi huméi luagu anahein lan huma” (Mat. 28:19, 20). Kaba wariñaga hawagu ánheligu? Seremei wamutiña luagu hadundehaniwa lidan lapurichihóun “uganu le magumuchaditi [...] houn ha aganóubaña ubouagu” (Aruf. 14:6).

15. Abahüdagua humá aban abahüdaguni tídangiñeti Bíbülia le arufudubalin tisudini ligaradan Heowá lidan wani ministeriu.

¹⁵ Ka ibihúbei lau lanarime ídemuei le? Dan le wábunaguni ilaü lánina uganu luáguti Larúeihan Bungiu, anihein lídangiñe ilaü ábürühati lidoun múa buiti o anigi buitu (Mat. 13:18, 23). Ka adügübei lun labouchun ilaü le luma lun lagindun? Afuranguagüdati Hesusu siñati lan liabin ni aban lumoun “anhein mama lubéi lanügün Bungiu Úguchili” (Huan 6:44). Daritiwa aban sügǘ tidan Bíbülia le ñein lubéi larufudúa furangu. Lidan aban ókaasion, apurichihati Pábulu houn fiu würiña ha bóugudibaña luéi uburugu Filipu. Teni wamá lun le tariñagubei Bíbülia tuagu aban hádangiñe würiña hagía to gíriboun Lidia: “Aba ladaarunu Bungiu tanigi lun tadügün gasu lau le lariñagubei Pábulu” (Adü. 16:13-15). Ítara kei ladügün tun Lidia, achawahaali giñe Heowá saragu míñunu gürigia tidoun lóundarun.

16. Ka un yu lan uéiriguni dan le buidu lan lidin woun lidan wani ministeriu?

¹⁶ Ka lunbei leresibiruni uéiriguni dan le buidu lan lidin woun lidan wani ministeriu? Óunaba lumuti Pábulu álügüdahani le dan le labürühanbei houn lílana damuriguaü kristiánu le Korintubei: “Au ábunagubei, Apolosu áturagua, gama lumoun Bungiu aweiridagüdübalin nadü. Ni lubeiti le ábunagubei, ni le áturagubei, ni kata hagía; anati Bungiu, lugundun ligía aweiridagüdübarun nadü” (1 Ko. 3:6, 7). Sagü buidu lan lidin woun lidan wani ministeriu, lunti wíchuguni sun uéiriguni lun Heowá, ítara kei ladügüni Pábulu.

17. Ida luba warufudun geteingiradi luagu lubuidun chansi luagu wídehan luma Bungiu, luma Kristu luma hama ánheligu?

¹⁷ Ida luba warufuduni seremei wamani Bungiu luagu lueirin chansi le líchugubei woun lun wídehan luma, luma Kristu luma hama ánheligu? Lau wáluahan chansi lun wayanuhan hama sun gürigia ha wayaraati luagu uganu buiti. Gayaraati wadügüni le lidan ámuñegueinarügü igaburi, kéiburi lau wapurichihan lidan guririguaü luma tidan burí muna (Adü. 20:20). Hínsiñeti houn saragu íbirigu hapurichihan sagü gachansin hamá. Dan le hadunragun hama gürigia ha ibidiñetiña houn, aba habusurun houn lau gamadóuni ani aba hagumeserun ayanuha hama luagu le tariñagubei Lererun Bungiu. Anhein busén habéi haganbun, aba wapurichihan houn luagu Larúeihan Bungiu.

18, 19. a) Ida liña wáturaguni ilaü le lánina inarüni? b) Ida liña líderaguni Heowá aban aturiahati Bíbülia?

¹⁸ Kei ídehatiña luma Bungiu, mama bunarügü wabéi ilaü le lánina inarüni, mosu giñe wáturaguni. Dan le berese lan aban gürigia lau uganu  le wanügübei lun busentiwa wadügüni sun wayaraati lun wagiribudun bisidei o wamuriahan luma somu íbiri lun líchugun aturiahani tídangiñeti Bíbülia lun. Dan le lawanseruña lan aban aturiahati lun aban lan disipulu, gúndaatiwa warihini asansireina lani Heowá lisaminan luma le tídanbei lanigi gürigia ligía.

¹⁹ Ariha waméi likesin aban íbiri suruafürikana ani buyei meha luagu aban dan. Hínsiñeti meha sun le lafurendeirubei lun lidan laturiahanu Bíbülia. Gama lumoun, aba lagagibudagun luma aban katei le güreweiti lun lígiruni dan le laliihabei luagu le lariñagubei Bungiu luagu layanuhóun hama hilaaña (2 Lur. 18:10-12). Murusun murusun aba lígirun lun laransehani Bungiu ligaburi lisaminan. Lau lásügürün dan, aba lígiruni íbiri le abuyeihani, íbini lídangiñe lan meha abuyeihani lagañeirei libagari. Ǘrüwa-wein irumu lau íbiri le guentó, ani ariñagati: “Teinki numutiña gefentiña luagu Heowá lau híderagunina saragu, kéiburi, lau híderagunina adarira wadagimanu. Lídantima sun katei, lúntima Heowá níchiga seremei, lau líderagunina arumadahei nibagari, ani guentó gayaraahali napurichihan kei aban Gefenti le badiseihali”.

20. Ka katei aranseñu waña lun wadügüni?

²⁰ Lidan arütíkulu le, ayanuhaadiwa luagu gádürü idewesei o irisini le marihínti. Létima gebegitimabei lídangiñe súngubei lubuidun wamadagua luma Heowá. Seremei lubuidun chansi le, gayaraati wagundaarun lau ámuya burí irisini o idewesei le gebegibei ani marihinti, kei burí: wafurieidun lun, wasandiruni lídehan lani sífiri sandu, luma weresibirun ídemuei siélugiñe lidan wani ministeriu. Aranseñu waña lun warufuduni gebegi lan irisini marihínti burí le woun súnwandan. Maweiyasunbadiwa araramei weteingiruni Heowá luagu aban lan umadaü buiti ligía.