1. Ka wafurendeirubei lidan adamuridaguni irumu-auti le adügǘbei lidan irumu 2023?

 MA LUBUIDUN adamuridaguni irumu-auti le adügǘbei lidan irumu 2023! a Ñein, afuranguagüdawati fiu lídangiñe katei le wafiñerubei rua ligía ñunsu luáguti apurichihani woun. Kei hénpulu, afuranguagüdawati másiña lan gachansinbaña lan fiu gürigia lun houdin luéigiñe lóubadina Heowá íbini lárigiñe tagünrinchawagun Babilónia to Wéiriboun. Ariñawagúati giñe lúmagiñe lanme unsu-hati, irumu 2023, mabürüdün wamaali lanme sun le wadügübei lidan apurichihani. Mini lan san le masudininhaali lan apurichihani kei luagu aban dan? Uá, mítaranti!

2. Ka uagu súdinitima lubéi apurichihani eibu lásügürün dan? (Márükosu 13:10).

² Súdinitimati apurichihani eibu lásügürün dan. Ka uagu wariñagei? Ladüga achatireina liña lan dan. Samina wamá luagu le lariñagubei Hesusu luagu lagumuhóun dan, luagu apurichihani, ítara kei lariñawagún lidan Márükosu 13:10 (aliiha huméi). Ítara kei Márükosu, abahüdagua lumuti giñe Matéu ariñaga lan Hesusu lapurichihóuba lan uganu buiti lidan sun fulasu lubaragiñe lachülürün “lagumuchun ubóu” (Mat. 24:14). Mini lan dimurei le, lagünrinchawaguba lan luriban ubóu le lábugiñebei lubafu Mafia sunsuinagubei. Anúadira laali Heowá “weyu luma oura” le lunbei lasuseredun burí katei le ariñaga láalibei (Mat. 24:36; 25:13; Adü. 1:7). Éibume lásügürün dan, ayarafadeinatima waña lun luéyuri Heowá (Rom. 13:11). Ligíati, sunme machülügili lan dan ligía, mosu wasigirun apurichiha.

3. Ka uagu wapurichiha?

 ³ Lárigiñe katei le, súdiniti lun wálügüdagun súngubei wagía woungua: ka uagu wapurichihei uganu buiti? Lidan fiu dimurei, ladüga ínchaha lániwa ínsiñeni lun wapurichihan. Dan le wapurichihan, arufuda wamuti hínsiñe lan uganu buiti hama gürigia woun, ani lóugiñe sun katei, hínsiñe lan Heowá woun luma liri. Akutiha waméi puntu burí le aban lárigi aban.

APURICHIHATIWA LADÜGA HÍNSIÑE LAN UGANU BUITI WOUN

4. Ka wadügübei dan le weresibirun aban uganu buiti?

⁴ Samina humá luagun lagumuhóun ñunsu buiti le ichugúbei hun. Másiñati ariñawagúa lan hun gasaanihali lan aban hiduhe o aba lan hadarirun aban wadagimanu le barühadün saragu dan áluahei. Ida liña hasandiragun hungua? Chóuruti weiri lan ugundani le hasandirubei darí lun busén humá habahüdaguni houn sun hiduheñu luma houn humadagu. Ma ítara liña hasandiragun hungua dan le haganbunbalin uganu buiti luáguti Larúeihan Bungiu, uganu buídutimati le gayaraabei laganbuni somu gürigia?

5. Ida liña hasandiragun hungua dan le haturiahanbarun Bíbülia? (Ariha humóun giñe iyawaü).

⁵ Samina humá ida liña lan hasandiragun hungua dan le haturiahanbarun Bíbülia. Furendeitün hínsiñe humá lun Heowá, ani busén lan lun hádangiñe humá liduheñu ha áhuduragubaña lun, furendeitün giñe füramase lan lagumuchuba lan lau igarigu luma lau asufuriruni sunsuinagubei, ani lídanme iseri ubóu, láguyuguagüdübaña lan hiduheñu lídangiñe óunweni (Mar. 10:​29, 30; Huan 5:​28, 29; Rom. 8:​38, 39; Aruf. 21:​3, 4). Sun burí inarüni le, chülüti tidoun hanigi (Luk. 24:32). Aba línsiñedun arufudahani tídangiñeti Bíbülia le hafurendeirubei hun ani busentün meha habahüdaguni houn sun gürigia (ariha huméi giñe Heremíasi 20:9).

6. Ka hafurendeirubei lúmagiñe Ernest tuma Rose?

⁶ Ariha waméi likesin aban íbiri gíriti Ernest. b Abahüdaguati, dan lan meha le diisi lubéi irumu lau, aba lan lounwen lúguchi. Ani ariñagati:  “Aba meha nálügüdagun nungua: ‘Ñǘdünha funa san sielun, odi aba lounwen lun súnwandan?’. Gimugatina meha houn irahüñü ha wínwangiñabaña hagübürigu”. Gabügürüguati meha lidin Ernest gabusándu, ábaha láhuduragun ligibugiñe lumúaha lúguchi ani aba meha lafurieidun: “Bungiu núguchi, mégeitina nasubudiruni halíañein lan núguchi”. Dan le 27 lubéi irumu lau, aba lalügüdǘn anhein busén lubéi laturiahanu Bíbülia ani ánhati lau lóufudagun. Ani aba lagundaarun dan le lasubudirunbalin ibidiñe lan ni kata houn hilaaña, ítara liña lan kamá hamuga harumuguña, ani füramase tan Bíbülia luagu hásaaruba lan hilaaña lídangiñe óunweni (Apur. 9:​5, 10; Adü. 24:15). Chülüdüga buga dan lun ladariruni Ernest óunabagülei lun álügüdahani le meha adiheridagüdübalin luagu saragu dan! Wéiriti meha ugundani le lasandirubei lau inarüni tídangiñeti Bíbülia le lafurendeirubei. Aba giñe tagumeserun Rose to lani weiriou aturiahoun Bíbülia úara luma, ani gúndaatu meha giñe lau le tafurendeirubei. Dan lárigiñe, aba habadiseirun biángubei hagía lidan irumu 1978. Lau saragu ubebeni, aba hayanuhan luagu hafiñen houn haduheñu houn hamadagu luma houn sun gürigia ha busenbaña haganbuniña. Lau lásügürün dan, íderaguaali Ernest tuma Rose hóugiñe 70 gürigia lun hasubudiruni Heowá luma lun habadiseirun.

7. Anhein hínsiñe lubéi inarüni le wafurendeirubei tídangiñe Bíbülia woun tau sun wanigi, kábagia wadüga? (Lúkasi 6:45).

⁷ Le linarün katei, anhein hínsiñe lubéi inarüni le tídanbei Bíbülia woun tau sun wanigi, chóuruti, busenbadiwa lan wabahüdahani houn amu (aliiha huméi Lúkasi 6:45). Ítara liña wasandiragun woungua kei disipulugu ha lánina furumiñeti sígulu, ha ariñagubaña: “Wagía, siñati wámanichun lau katei le ariha wamaalibei luma le aganba wamaalibei” (Adü. 4:20). Hínsiñeti inarüni woun saragu darí lun busén wamá wabahüdahani houn sun gürigia ha wayara.

APURICHIHATIWA LADÜGA HÍNSIÑE HAMÁ GÜRIGIA WOUN

8. Ka ínchahabaliwa lun wanügüni uganu buiti houn sun gürigia? (Ariha huméi rekuáduru le gíribei: “ Laulá ínsiñeni wadüga disipulugu”, ariha humóun giñe iyawaü).

⁸ Ítara kei Heowá luma Hesusu, hínsiñetiña gürigia woun (Ari. 8:31; Huan 3:16). Gudemehabutiwa houn ha memeniginbaña hama ha ‘ibidiñebei Bungiu’ houn (Efe. 2:12). Súfuritiña gürigia uguñe weyu ladüga saragu turobuli le lídanbei habagari kamá hamuga hañaradaguña baranaha, lau sun lira, anuhein salufu o lesefuha ibagari le hemegeirubei wama: uganu buiti luáguti Larúeihan Bungiu. Ínchaha lumutiwa ínsiñeni luma gudemehabu lun wadügüni sun wayaraati lun haganbuni sun gürigia uganu buiti le wanügübei houn. Aban idewesei lira lun habuinchun lau emenigini, ani líderagubaña lun gunda hamá íbini guentó luma lun gachansin hamá lun hibihin “ibagari magumuchaditi”, mini lan lira, ibagari magumuchaditi lidan iseri ubóu (1 Tim. 6:19).

9. Ka awisahani wanügübei houn gürigia, ani ka uagu? (Esekiéli 33:​7, 8).

 ⁹ Ínchaha lumutiwa giñe ínsiñeni lun wawisaruniña gürigia luagu yarafaali lan lagumuchagüle ubóu wuribati le (aliiha huméi Esekiéli 33:​7, 8). Híruti wasandiragun woungua dan le warihini ida liña lan habagaridun waduheñu ha mámabaña Gefentiña luma habagaridun gürigia ha awinwandubaña lidan fulasu le ñein lubéi wapurichiha, ladüga míchugun hamá fe luagu le lunbei liabin. Ariñagati Matéu 24:21: “Ñeinbei saragu asufuriruni le úagili libe lúmagiñe lagumeserun ubóu, úabei giñe lárigiñe”. Busentiwa lun hasubudiruni gürigia kaba lan asusereda lídanme lidaani aguseragüdüni: furumiñe tagünrinchawaguba sun relihión to mama inarünitu ani lárigiñe, lagünrinchawaguba ubóu wuribati le lábugiñebei lubafu Mafia lidan Arümahedón (Aruf. 16:​14, 16; 17:​16, 17; 19:​11, 19, 20). Amuriahatiwa luma Heowá guentó lun haganbuni saragu gürigia uganu le wanügübei houn luma lun hánharun heseriwidun lun úara wama. Gama lumoun, kaba san asusereda houn gürigia luma houn waduheñu ha mabusenrunbaña haganbuni awisahani le wanügübei houn?

10. Ka uagu súdini lubéi lun wasigirun awisaraña gürigia?

¹⁰ Kei warihini lidan aturiahani le lubaragiñebei le, másiñati lesefuruni Heowá habagari ha asansirubalin ligaburi hasaminan o ligaburi habagaridun danme le harihini tagünrinchawagun Babilónia to Wéiriboun. Líderagubadiwa katei le lun gunfuranda wamani buidu súdini lan lun wasigirun awisaraña gürigia luagu katei le lunbei liabin. Samina wamá luagun le: le wariñagubei houn guentó, másiñati haritaguba lan luagun ámuñegü (ariha huméi giñe Esekiéli 33:33). Gayaraati haritaguni awisahani le wanügübei houn, ani ábame heseriwidun lun Heowá úara wama lubaragiñe ladarüdün o úaali lanme dan. Ítara kei lánharun óunigiruti furisun Filipu lun inarüni dan le liábinbei aban óunwenbu hárabaganali, másiñati giñe ñéinbaña lan hádangiñe gürigia ha máhabaña lun uganu buiti uguñe weyu ánharutiña lun ámuñegü danme le labürühóun tuagun Babilónia to Wéiriboun, leme ítarabei kei aban “hárabaganali” (Adü. 16:​25-34).

APURICHIHATIWA LADÜGA HÍNSIÑE LAN HEOWÁ LUMA LIRI WOUN

11. Ida liña wíchugun “uéiriguni, inebesei, luma ubafu lun Heowá”? (Arufudúni 4:11; ariha humóun giñe iyawaü).

¹¹ Lébunatima wapurichihanbalin uganu buiti, ladüga ínsiñeni le wasandirubei luagu Heowá luma luagu liri le sándubei. Ariha wamuti apurichihani kei aban igaburi lun walawahani Bungiu le hínsiñebei woun. Úarati wasaminan luagu gadüna lan Heowá ani garicha ligía lun leresibiruni “uéiriguni, inebesei, luma ubafu” (aliiha huméi Arufudúni 4:11). Ida liña wíchugun uéiriguni luma inebesei lun Heowá? Lau wafuranguagüdüni houn gürigia luagu Heowá lan adügübalin sun katei ani ligía lan íchugubei ibagari woun. Ani ida liña leresibirun Heowá ubafu wámagiñe? Dan  le wayusuruni wadaani, were luma wámati lidan apurichihani según le gádanbaliwa (Mat. 6:33; Luk. 13:24; Kol. 3:23). Lidan fiu dimurei, hínsiñeti woun wayanuhan luagu Bungiu le hínsiñebei woun. Busentiwa giñe wayanuhan luagu liri luma ka lan mini lubéi iri le. Ka uagu?

12. Ida liña wíchugun inebesei lun liri Heowá dan le wapurichihan?

¹² Kei le hínsiñe lubéi Heowá woun, busentiwa lun inebewa lan liri le sándubei (Mat. 6:9). Lidan amu dimurei, busentiwa wídehan lidan larumadahóun liri lídangiñe sun iyeeni le lariñagubei Satanási luagu (Agu. 3:​1-5; Hob. 2:4; Huan 8:44). Ligíati, aransetiwa lun wariñaguni inarüni luagu Heowá houn sun ha busenbaña haganbuniwa. Busentiwa lun hasubudiruni sun gürigia ínsiñeni lan igaburi le súdinitimabei luagu Heowá, luma giñe aban lan urúei richati ligía ani lagumuchuba lan Larúeihan lau asufuriruni, ani lanügüba lan ugundani luma darangilaü houn sun gürigia yarafa madise (Sal. 37:​10, 11, 29; 1 Huan 4:8). Dan le wadügüni sun burí katei le, wíchuguña inebesei lun liri Heowá. Luéigiñe le aban oubaü, gúndaatiwa ladüga wagunfuliruña lan lau wadasin keisi lánigu gefentiña. Ka uagu wariñagei katei le?

13. Ka uagu gunda wabéi lau lánigu wamá Heowá gefentiña? (Isaíasi 43:​10-12).

¹³ Anúadira láadiwa Heowá lun lánigu wamá gefentiña (aliiha huméi Isaíasi 43:​10-12). Ariñagati Musu Úaraguati tidan aban gárada fiu irumu guentó: “Úati amu katei buídutimati luéi aban wamá gefenti luagu Heowá”. c Ru wamá aban hénpulu. Samina wamá lídanñadiwa lan aban aguseruni lugundun rúhali lan aban gürigia wadurun luagu adügaadiwa lan aban katei wuribati, ani mégeitiwa aban gürigia lun ladimurehan luéigiñe wafulesein. Chóuruti wáluahaña lan hamuga aban gürigia le subudi wamuti buidu, le afiñetiwa luagu, le subudiwati kei aban gürigia le buiti ligaburi lun lafiñerúniwa luagu le lariñagubei. Ligíati, anúadira láadiwa lubéi Heowá lun  wariñaguni houn gürigia ligíarügüñein lan Bungiu ábanrügüti ani inarüniti ladüga subudi lumutiwa buidu ani afiñeti wawagu. Wéiriti wagundan luagu lánigu wamá Heowá Gefentiña darí lun meferidirun wamani sun chansi le wadarirubei lun wasubudiragüdüni liri houn gürigia luma lun wariñagun iyeeni lan sun katei wuribati le ariñawagúbei luagu. Ítara liña wagunfulirun lau dasi le líchugubei woun: lun gefén wamá luagu (Sal. 83:18; Rom. 10:​13-15).

WASIGIRUBA APURICHIHA DARÍ LAGUMUCHUN UBÓU

14. Ka katei buiti wagurabubei lun lasuseredun yarafa madise?

¹⁴ Memeniha wanigi warihini le lunbei lasuseredun yarafa madise! Agurabatiwa lau lan labinihan Heowá, añahagua lan saragu gürigia ha lúnbaña hánharun lun inarüni lubaragiñe lagumeserun óunwenbu asufuriruni. Lanwoun lira, gúndaatiwa giñe wasubudiruni íbini lan laganagua óunwenbu asufuriruni —dan le lunbei hénrengutimabei lan houn gürigia— ñéinbaña lan ánharutiña lun inarüni luma lun hadisedun luéi ubóu le lábugiñebei lubafu Mafia, ábameti halawahani Heowá úara wama (Adü. 13:48).

15, 16. Kaba wasigira adüga, ani ídaba wagumucha?

¹⁵ Sun awanha lan agurabaha, anihein aban dasi lunti wadügüni. Aban lubuidun chansi lun wídehan lidan dasi le lunbei madügǘnbei lan lidan amu dan, lapurichihóun uganu buiti luáguti Larúeihan Bungiu lidan sun ubóu. Úara luma uganu le, mosu wasigirun awisaraña gürigia luagu yarafaali lan lagumuchagüle luriban ubóu le lábugiñebei lubafu Mafia. Danme lachülürün lidaani aguseragüdüni, ábame híchugun gürigia fe lúmagiñe lan buga Heowá liabin uganu le wapurichihabei houn (Ese. 38:23).

¹⁶ Ligíati, ka lunbei wadügüni? Kei hínsiñe lan uganu buiti hama gürigia woun, ani lóugiñe sun katei, hínsiñeti Heowá luma liri woun, wasigiruba apurichihei uganu buiti le lau ubebeni darime lariñagun Heowá: “Buídurügaali!”.