ATURIAHANI 22
UREMU 127 Kátima san tídanbei nanigi?
Ida luba buidu lan lidin hun lidan hidaradun?
“Tídanla hanigi hewendeda, […] ligía katei gebegibei saragu ligibugiñe Bungiu” (1 FE. 3:4).
LE LUNBEI WATURIAHANI
Ka lunbei hadügüni adarigu lun buidu lan lidin houn lidan hadaradun, ani ida luba gayara lan híderaguniña lílana damuriguaü?
1, 2. Ka hariñagubei fiu íbirigu luagu adarigu?
GAYARAATI aban lan dan lánina ugundani gadaradun hamá bián gürigia. Anhein gadaradun bubéi tuma aban würi, agurabatibu lun buidu lan léibugun katei. Ani ligía asuseredubei houn saragu gadaraduntiña. Ariñagatu aban íbiri etiopíana gíritu Tina: a “Aban dan le gúndaatimabei lidan nibagari, dan le gadaradun nubéi meha luma eyeri le nánibei weiriei guenlé. Ayanuhatiwa meha luagu katei súdiniti, ani éherahatiwa meha giñe. Ma meha lubuidun nadarirun aban gürigia le hínsiñetina lun ani hínsiñe ligía nun”.
2 Luagu amu oubaü, ariñagati aban íbiri gíriti Alessio, le awinwandubei Países Bajos: “Wéiriti meha ugundani le nasandirubei dan meha le nasubudiruñoun lubéi würi to nániboun weiriou guentó dan meha le gadaradun wabéi. Gama lumoun, gagibuguatiwa meha giñe luma turobuli”. Lidan aturiahani le, wayanuhaba luagu fiu turobuli luma luagu ida luba lan tíderaguniña Bíbülia adarigu lun buidu lan lidin houn lidan hadaradun. Warihibei giñe ka lan gayaraabei hadügüni lílana damuriguaü lun híderaguniña.
KA LÉBUNABEI GADARADUN HAMÁ BIÁN GÜRIGIA?
3. Ka lébunabei gadaradun hamá bián gürigia? (Ariñawagúni 20:25).
3 Íbini aban lan dan buiti lagumeserun aban adarigu, aban giñe pasu sériuti ladüga ligía anügübei lidoun maríei. Lidan luéyuri maríei, adügatiña adarigu aban füramasei ligibugiñe Heowá luagu hínsiñeguabaña lan hámagua ani inebeguabaña lan hámagua lidan sun habagari. Lubaragiñe ladügǘn füramasei le o furumiñeguarügü amu füramasei, lunti lasaminarún buidu (aliihabéi Ariñawagúni 20:25). Seriwiti gadarigua hamá bián gürigia lun hasubudiragun houngua buidu luma lun hanúadiruni buidu kaba lan hadüga. Anihein dan, aba hanúadirun hamarieidun ani anihein dan aba hadüraaguni hadaradun. Anhein háhalachagua daradu, úati mini lan lira wuriba lan lagumuchun katei. Mini lan gúnfuli lani daradu ligía lisuuni: íderagua lumutiña lun hasubudiruni ka lan buídutimabei lun hadügüni.
4. Ka uagu súdini lubéi gunfurandawa lan ka lan lébunabei adarigu?
4 Ka uagu buidu lubéi lasubudirúniwa ka lan lisuunibei gadaradun hamá bián gürigia? Ladüga anhein furangu lubéi katei le lun aban wügüri le mamarieidungili, maweiyasunbei gadaradun tuma aban würi to úmaboun masaminarun lan lamarieidun. Ani mámarügüñanu ha mamarieidungiñabaña lun gunfuranda hamani lébuna adarigu, lunti gunfuranda wamani sun wagía. Lugundun añahein saminatiña dan le lan gadaradun hamá bián gürigia, mosu lan hamarieidun. Ani gayaraati ladügün katei le lun wuriba lan hasaminarun ha mamarieidungiñabaña luagun adarigu. Ariñagatu Melissa, aban íbiri mamarieidungiru merigana: “Añahein íbirigu héreti hadügüdarun hawagu adarigu. Ligía añahein lubéi gadaraduntiña, máhalachagun hamuti hadaradun íbini mabuidun lan léibugun katei hadan. Añahein amu himei hamuti madari hamá luéi hásügürün lídangiñe sun burí turobuli le”.
HOUCHA HUMÁ HASUBUDIRAGUN HÚMAGUA BUIDU
5, 6. Ka katei lunbei hasubudiruni ha gadaradunbaña? (1 Féduru 3:4).
5 Kaba íderaguabu arihei anhein bamarieiduba lubéi o mamarieidunbadibu lan tuma würi to úmaboun gadaradun ban? Áfaaguaba lun basubudirunu buidu. Chóuruti ariha ban fiu igaburi buiti tuagu würi tuguya lubaragiñe gadaradun ban tuma. Guentoti, chülüha lidaani basubudiruni ka lan tídanbei tanigi (aliihabéi 1 Féduru 3:4). Mini lan le basubudiruni ida liña lan tumadagua luma Heowá, tigaburi luma ligaburi tisaminan. Lau lásügürün dan, lunti gayaraagua ban bungua lun bóunabuni álügüdahani kei burí le: “Buíduboun san lun nánime weiriou? Lidan tikesin aban würi, buídubei san lun nánime weiriei? Buídubei san nasandiragun nungua lau tigaburi? Buídubei san nasandiragun nungua lau ligaburi?” (Ari. 31:26, 27, 30; Efe. 5:33; 1 Tim. 5:8). “Gayaraabei san wíchuguni ínsiñeni le wemegeirubei ani teni wagíame wámagua? Gayaraabei san nawanduni tigaburi, o lidan tikesin würi, ligaburi?” (Rom. 3:23). b Ani haritaguabéi le: Gürigia lan ha buídubei hanaagun hámagua, mama ladüga ábanmeme lan hagaburi, ladüga héchudun luagu hagaburi hámagua.
6 Ka amu katei lunbei hasubudiruni dan le gadaradun humá? Lubaragiñe laganwoundun ínsiñeni le hasandirubei, buídubei lun hayanuhan luagu katei le súdiniti, kei burí ka lan habusenrubei hibihin lidan heseriwidun lun Heowá. Ani lunti giñe hayanuhan luagu le hásügürübei lidan hibagari, kei burí luagu turobuli lánina átuadi, luagu seinsu o luagu somu turobuli wéiriti le susereelibei lidan hibagari. Mama mosu hayanuhan luagu katei burí le dan le hagumeseruñein lan hidaradun (arihabéi giñe Huan 16:12). Anhein samina bubéi mámagili lan dan lun bayanuhan luagu somu katei le asuseredubei lidan bibagari, ariñagabéi tun badari, lidan tikesin würi, lun tadari. Gabarounbéi megei tubéi lan ariñahani ligía lun gayara lan tasubudiruni kaba lan tadüga, o lidan likesin wügüri, kaba lan ladüga. Ligíati, lachülürüba dan lun mosu lan hayanuhan luagu katei burí le.
7. Ka katei lunbei hadügüni ha gadaradunbaña lun hasubudiragun houngua buidu? (Arihabéi giñe rekuáduru “ Dan le dísegua humá huáriuagua” tuma burí iyawaü).
7 Kaba íderaguaün lun hasubudiragun hungua buidu? Lunti hayanuhan manufudeuga ani furangu, lunti giñe hadügün álügüdahani ani aganbagua huguyame húmagua buidu (Ari. 20:5; Sant. 1:19). Gayaraati hadügün katei úara le ídanti ménrengun lan hun hayanuhan, kei burí heigin úara, hasariñahan úara lidan fulasu le ñein habéi gürigia luma háfuridun apurichiha úara. Gayaraati giñe hasubudiragun húmagua buidu lau hásügürün dan úara hama humadagu luma hama hiduheñu. Adüga humá katei le ídanbei gayara lan harihini ida liña lan hóuserun biángubei huguya lidan ámuñegueinarügü kesi luma dan le hadan humá saragu gürigia. Ligía meha ladügübei Albert, le awinwandubei Países Bajos, dan le gadaradun lubéi tuma Alicia: “Adügatiwa meha aransehani lun wadügün katei úara le lunti líderaguniwa lun wasubudiruni wagaburi. Liibe-agei dan, katei ménrengunti wadügübei, kéiburi wábougun luma wadügüni fisiu le tánina muna úara. Ítara liña warihini ka lan hínsiñetimabei woun luma ka lan katei lóuguabei línsiñe woun”.
Ánhaña adüga ha gadaradunbaña fiu katei úara, líderagubaña lira lun gayara lan hayanuhan hámagua luma lun hasubudiragun hámagua buidu. (Arihabéi párafu 7 luma 8).
8. Ka buiti hasagarubei ha gadaradunbaña dan le haturiahanu Bíbülia úara?
8 Hakutihan ariñahani tídangiñeti Bíbülia úara, ligía ábanya katei le gayaraabei líderagunün lun hasubudiragun húmagua buidu. Ani anhaün amarieida, mósume hadireirun dan lun hadügüni áhuduraguni keisi iduheñu lun gayaraabei lan ñein lan Bungiu lidan hibagari keisi maríeitiña (Apur. 4:12). Ligíati, ma buiti hamuga lun hagumeserun adireira dan lúmagiñe guentó lun haturiahan úara? Inarüni mámagili lan tichügüdina würi adari. Íbini ítara, anhaün échuda aturiaha úara, harihibei ida liña lan humadagua luma Heowá. Ariñagati Max tuma Laysa, aban feru maríeitiña merigana, íderagua lániña haturiahanu Bíbülia úara lidan saragu katei. Afuranguagüdati: “Lúmagiñebei wagumeserun gadaradun, gumesetiwa aturiaha agumeiraguagüdüni to ayanuhatu luagu adarigu, maríei luma luagu ibagari keisi iduheñu. Seremei wadügüni ítara, ligía meha gayara lubéi wayanuhan luagu saragu katei súdiniti le ani saragu lídangiñe katei ligía, maweiyasunbadiwa hamuga ayanuha luagu lun hamuga wadügün wamani ítara”.
AMU BURÍ KATEI LE LUNBEI GABAROUN HAMANI
9. Ka lunbei gabaroun hamani adarigu lun hanúadiruni kaba lan un habahüdahei gadaradunhaaña lan?
9 Kaba un hariñagei? Huguya lunbei hanúadiruni kaba lan un hariñagei gadaradunhaadün lan. Anhein málügili lubéi hagumeseruni hidaradun, másiñati himei humani hariñaguni hóunrügü fiu gürigia (Ari. 17:27). Ítara luba málügüdawagun humá ani madügüdarúniwa ligíame huagu. Ani anhein mariñagun humá ni ka un, gayaraabei ladügün katei le lun herederun hábuguarügü ladügame hanufude luéi hasubudiruni amu gürigia. Ani gayaraabei dencha lan katei le hun. Ligíati, buídutimabei lun habahüdahani houn gürigia ha gayaraabei híderagunün o houn ha gayaraabei híchugun lubuidun adundehani hun, kei burí houn fiu hiduheñu, humadagu ha derebuguti hafiñen o houn wéiyaaña lidan afiñeni (Ari. 15:22).
10. Kaba íderaguaña íbirigu ha gadaradunbaña lun mawiyedun hamani hadaradun? (Ariñawagúni 22:3).
10 Kaba íderaguaün lun mawiyedun humani hidaradun? Gunfurandawati eibu lanme laganwoundun ínsiñeni le hasandirubei húmagua wéiritimabei lan habusenrun hásügürün dan húmagua. Ani chóuruti mabusenrun humá hadügün ni kata le mínsiñeti lun Heowá (1 Ko. 6:18). Ligíati, mayanuha humá luagu katei lánina magíaguni, meredera humá hábugua, mátagun huguyame (Efe. 5:3). Sun lira, gayaraati ladügün lun busén humá harounrun húmagua luma lun hénrengutima lan hun hakipuragun húmagua harumañu ligibugiñe Bungiu. Ligíati, hechu humá ayanuha luagu kaba lan hadüga lun inebe lan lilurudun Heowá hun lidan hidaradun (aliihabéi Ariñawagúni 22:3). Ariha huméi le ladügübei Dawit tuma Almaz, ha etiopíana: “Súnwandan meha hama wamá wamadagu o woudin lidan fulasu le ñein hamuti saragu gürigia. Meredetiwa meha wábuguarügü ni tidan karü ni tidan burí muna. Ítara liña meha wadisedun luéi óuchawaguni”.
11. Ka lunbei gabaroun hamani ha gadaradunbaña dan le harufudun ínsiñeni hámagua?
11 Lunti san harufudun ínsiñeni húmagua? Eibu lawanserun hidaradun, másiñati harufuduba lan ínsiñeni húmagua lidan aban lubuidun igaburi (Ure. 1:2; 2:6). Gama lumoun, anhein here lubéi hayumahan lun harounrun húmagua, háfuga hénrengubei lan hun hadügüni katei lau lichú aau nime lun hetenirun lun lubuidun igaburi le huágubei kada aban. Ani anhein here lubéi hínchuahan, gayaraabei ladügün katei le lun hénrengu lan hun lun hárügüdagun hungua ábameti héiguadun lidoun figóu le wéiriti (Ari. 6:27). Ligíati, lúmagiñe lagumeseruni hidaradun, lunti hayanuhan luagu adundehani le tíchugubei Bíbülia luagu kaba lan hadüga luma kaba lan madügün humá dan le harufudun ínsiñeni húmagua c (1 Tesa. 4:3-7). Álügüdagua humá hungua: “Ida liña san harihini gürigia ha lídanbaña fulasu le ñein lubéi wawinwanda ligaburi larufudúniwa ínsiñeni? Adügati san lira lun nayumahan lun narounrun tuma o lun tarounrun numa?”.
12. Ka lunbei gabaroun hamani ha gadaradunbaña dan le ñein lan turobuli luma magundani haganagua?
12 Kaba hadüga dan le gaturobulin humá? Anhein anihein lubéi dan ua lan gunfurandagua humá húmagua, mini lan san le wuriba lan léibugun katei lidan hidaradun? Uá. Lugundun sun gadaraduntiña o maríeitiña, anihein dan múaran lan hasaminan luagu somu katei. Aban feru maríeitiña ha buiti hanaagun houngua nadagimeintiña úara lun hagagibudagun luma turobuli. Líderagubadün ligaburi haransehani hiturobulin guentó lun harihini ida luba lan léibugun katei lidan hibagari danme le hamarieidun. Álügüdagua humá hungua: “Gayaraati san wayanuhan wámagua lau darangilaü luma lau inebesei? Ánhatiwa san lun wachara ani áfaagua wagía lun wabuiduragüdüni wagaburi? Ígiratiwa san lun lásügürün somu charati? Amuriahatiwa san ferudun wámagua? Gíchigaditiwa san ferudun wámagua?” (Efe. 4:31, 32). Luagu amu oubaü, anhein gabügürügua lubéi magundani luma asigenehani haganagua lau adarigugidün lan, masaminara humá lasansiruba lan katei danme le hamarieidun. Anhaün íchiga fe ua lan gunfurandagua humá húmagua, buídutimabei hun biángubei lun hadüraaguni daradu. d
13. Ka lunbei gabaroun hamani adarigu lubá hanúadiruni átiribei lan dan hau gadaradun?
13 Átiribei san dan hau gadaradun? Aransehani le fureseti wuribati lagumuchun (Ari. 21:5). Ligíati, ruba dan búniwagua lun basubudirunu badari buidu, ani ligiaméme giñe lunbei tadügüni würi. Íbini ítara, machawaraguagüda huméi dan le haubei gadaradun anhein memegeirun hubéi hadügüni, lugundun ariñagatu Bíbülia: “Emenigini masaliti, anigi nidiheritu” (Ari. 13:12). Lanwoun lira, eibu hálüdün gürigia gadaradun, éibutima weiri lan habusenrun harounrun hámagua (1 Ko. 7:9). Lubaragiñe hasaminarun átirihali lan dan hau gadaradun, álügüdagua humá hungua: “Ka san amu katei nemegeirubei nasubudirun tuagu nadari lubaragiñe namuriahan tuma lun wamarieidun?”.
IDA LUBA HÍDEHAN ÍBIRIGU?
14. Ida luba wíderaguniña íbirigu ha gadaradunbaña? (Arihabóun giñe iyawaü).
14 Anhein subudi wabéi íbirigu ha gadaraduntiña, ida luba wíderaguniña? Gayaraati wagunbirahaniña eiga luma lidoun wáhuduragun keisi iduheñu o lidoun somu isebáhari (Rom. 12:13). Ítara, gayaraabei hasubudiragun houngua buidu. Ani anhein megei habéi paaná, gayaraabei woudin hama lidan somu fulasu, o wagunbirahaniña wábiñoun lun gayara lan hayanuhan merederunga hagía hábugua (Gal. 6:10). Ariñagatu Alicia, to buga uáguboun wayanuha lidan párafu 7: “Dandu nuguya kei Albert, seremei wamutiña íbirigu ha meha ariñagubaña woun gayara lan woudin hábiñe dan le busén wamá wásügürün dan úara merederunga wagía wábugua”. Ánhañati ariñaga somu gadaraduntiña woun lun wáfuridun asariñaha hama? Ariha waméi kei aban chansi lun wíderaguniña. Ani arufuda wamá lichú aau. Danme le warihin megei hamá chansi lun hayanuhan, gayaraati wadisedun murusun lun wíchuguni chansi ligía houn, mígirunga wamaña hábugua sunsuinagubei (Fili. 2:4).
Anhein subudi wabéi bián gürigia ha gadaraduntiña, áluaha wamá chansi lun wíderaguniña. (Arihabéi párafu 14 luma 15).
15. Ka amu igaburi ídanbei gayara lan wíderaguniña ha gadaradunbaña? (Ariñawagúni 12:18).
15 Ábanya giñe ligaburi wíderaguniña ha gadaradunbaña dan le wóunigiruni le wariñagubei. Anihein dan mosu lan wárügüdagun woungua (aliihabéi Ariñawagúni 12:18). Kei hénpulu, gayaraati weiri lan wagundan dan le wíchugun fe gadaradunhaaña lan ítaga íbirigu ani aba wabusenrun wabahüdaguni houn amu, lau sun lira, másiñati himei habéi lan adarigu hagía lan íchigei ñunsu le. Moun lumuti wayanuhan hawagu adarigu ha ni lun wachuraguniña luagu le hanúadirubei hadügün (Ari. 20:19; Rom. 14:10; 1 Tesa. 4:11). Moun lumuti giñe wadügün álügüdahani o wariñagun katei le adügüti lun hasaminarun adarigu ladügüdarúña lan hawagu lun hamarieidun. Ariñagatu aban íbiri gíritu Elise luma tani weiriei: “Dan meha le gadaradun wabéi, sandiguatiwa meha woungua wuriba dan le walügüdǘn ídaba lan wamarieida ani mayanuhangubeigidiwa meha luagu maríei”.
16. Ka lunbei wadügüni ánhawa íchiga fe dürügua hamá lan ha gadaradunbaña hadaradun?
16 Ánheinti áhalachagua daradu? Máluga wamá wasubudiruni ka lan uagu ni lun wariñagun ka lan hádangiñe gadurunbei (1 Fe. 4:15). Ariñagatu aban íbiri gíritu Lea: “Aba meha níchugun fe añahein lan ayanuhatiña luagu ka lan uagu láhalachagua nidaradun luma nadari, ani gáriti meha katei le nun”. Kei buga aubei warihei, anhein háhalachagua adarigu hadaradun, úati mini lan lira luagu meseriwidun lan buga adarigu ligía lun ni kata. Le buídubei, íderagua lániña dan le gadaradun habéi lun hasubudiruni ka lan buídubei lun hadügüni. Íbini ítara, magida lumuti lira igarigu le hasandirubei luagu le asuseredubei ani gayaraati sandigua hamá houngua hábugua, ligía lunti lubéi aranseñu wamá lun wíderaguniña (Ari. 17:17).
17. Ka lunbei hasigirun ha gadaradunbaña adüga?
17 Íbini anihein lan katei hénrenguti lidan adarigu, anihein katei buidu buriti lidan. Ariñagatu Jessica: “Le linarün katei, dan le gadaradun hamá gürigia, mégeitiña saragu dan luma áfaaguni. Lau sun lira, buiti lanügübei”. Ligíati, anhein gadaradunñadün lubéi, áfaagua humá lun hasubudiragun húmagua buidu. Ítara luba buidu lan lidin hun lidan hidaradun, lugundun ladügüba lun hasubudiruni ka lan lunbei hadügüni.
UREMU 49 Gúndaaguagüda wamóun lanigi Heowá
a Sánsiwaali fiu iri.
b Hadariruba lanwoun ariñahani tidan líburu Lo que los jóvenes preguntan. Respuestas prácticas (bolumen 2), kapítulu “¿Será esta la persona para mí?”, página 39 luma 40.
c Mabuidunti lun laguruhani wügüri tubaragiñeti o lasupahani lan tede ladari, ni giñe lun tadügüni würi ligiaméme lun tadari, lau hadügüni lira, hadügüña magíaguni ani mosu harihin wéiyaaña lidan afiñeni lau kesi le. Mabuidunti nírügü lun lasupahani wügüri taniguagu ladari, ni lun hayanuhan luagu burí katei wíyeti le, ni luéigiñe gágamuru ni lidan mensahitu, ladüga anhein asusereda katei ítarati hadan adarigu lunti haguseragüdüniña wéiyaaña lidan afiñeni adarigu ha luagu wuribani le hadügübei segunme lafansehóun hakesin.
d Hadariruba lanwoun ariñahani lidan fánreinti le gíribei “Preguntas de los lectores” le tídanbei La Atalaya del 15 de agosto de 1999 luáguti daradu.