ATURIAHANI 21
UREMU 107 Arufudahati Bungiu ínsiñehabuni woun
Ida luba hadarirun kaba lan uma hamarieida?
“Würi buitu hénrenguti tadarirúniwa, gebegitu sügǘ lau dübü buíduburiti!” (ARI. 31:10).
LE LUNBEI WATURIAHANI
Lidan aturiahani le, warihuba adundehani tídangiñeti Bíbülia le gayaraabei lahuudun houn ha áluahabaña hamarieidun, lun hadarirun gürigia ha buítiña, líderagubadiwa giñe aturiahani le, wagía le lílana damuriguaü, lun wasubudiruni ida luba lan wíderaguniña íbirigu ha busenbaña hamarieidun.
1, 2. a) Anhein bayumahaña lubéi bamarieidun, ka lunbei basaminaruni lubaragiñe bádaruni furumiñeti pasu? b) Ka uagu wayanuha dan le wadimurehan luagu adarigu? (Arihabéi “Ariñahani súdiniti”).
HÍNSIÑETI hamuga san bun bamarieidun? Íbini mama lan mosu gámari hamá gürigia lun gunda hamá, dandu nibureintiña kei wéinamuhaña, ayumahatiña hamarieidun. Ligíati, lubaragiñe bádaruni pasu le, lunti aranseñu ban dandu lidan bumadagua luma Heowá kei lidan luáguti seinsu luma ligaburi basandiragun bungua (1 Ko. 7:36). a Ítarati, chóuruti buídubei lan lidin hun lidan hibagari keisi maríeitiña.
2 Le linarün katei, anihein dan hénrengu lan hadarirún gürigia buítiña lun maríei (Ari. 31:10). Íbini ladarirun aban wügüri aban würi to hínsiñetu lun o aban würi aban wügüri le hínsiñeti tun, gayaraati hénrengubei lan houn hagumeserun aban daradu. b Lidan aturiahani le, warihiba ka lan gayaraabei hadügüni gürigia ha áluahabaña gürigia ha buíduti hagaburi lun gadaradun hamá hama. Warihibei giñe ka lan lunbei hadügüni lílana damuriguaü lun híderaguniña ha busenbaña hamarieidun.
KA LUNBEI BADÜGÜNI LUN BÁLUAHAN ABAN GÜRIGIA BUIDU TIGABURI BUNGUA?
3. Ka lunbei hasaminaruni kristiánugu ha mamarieidungiña lubaragiñe háluahan kaba lan uma hamarieida?
3 Lubaragiñe hasaminarun gadaradun humá, súdiniti lun hasaminaruni ka lan igaburi habusenrubei lun gagaburi hamani ha lúnbaña hamarieidun huma. Anhaün masaminarun luagu katei le, gayaraabei heferidiruni chansi lun hamarieidun hama ha buídubaña hun. Lun lira, mosu hanúadirun hádangiñe gefentiña luagu Heowá ha badiseihaña (1 Ko. 7:39). Íbini ítara, mosu hanúadirun buidu, lugundun úati buídurügü lan lun gefén hamá luagu Heowá ha badiseihaña lun buídubaña lan hun lun hamarieidun hama. Buídubei lun hálügüdagun hungua: “Ka san nabusenrubei nibihin lidan nibagari? Ka igaburi lunbei náluahani dan náluahaña lan kaba lan uma namarieida? Gíbeyati funa san le nálugubei?”.
4. Ka katei hamuriahabei fiu mamarieidungiña lidan hafurieidun?
4 Anhein busén bubéi bamarieidun, chóuruti furieihadibu lan lun Heowá libügürü katei le (Fili. 4:6). Lau sun ua lan füramase lan Heowá láluahaba lan kaba lan uma hamarieida, bereseti lau le hasandirubei luma lau le hemegeirubei ani gayaraati líderagunün lidan le háluahabei. Ligíati, ariñaga huméi lun ka lan hasandirubei luma ka lan habusenrubei (Sal. 62:8). Amuriaha humá gurasu luma lichú aau luma (Sant. 1:5). Ariñaga lumuti aban íbiri merigana gíriti John c ka lan meha lamuriahabei lidan lafurieidun: “Ariñaga numuti lun Heowá ka lan igaburi náluahabei tuagu aban íbiri. Amuriahatina luma lun ñein lan chansi lun nasubudirun aban íbiri. Ani amuriahatina giñe luma lun nabuiduragüdüni nigaburi lun aban nan wügüri buiti danme le namarieidun”. Ariñagatu giñe aban íbiri siri lánkana gíritu Tanya: “Amuriahatina luma Heowá lun líderagunina lun úaragua nan lun, lun nasaminarun luagu katei buiti luma lun gunda nan sun anaha lan áluaha aban eyeri le buiti nun”. Ánheinti ásügüra dan ani madarigidibu kaba lan uma bamarieida? Íbini ítara, füramaseti Heowá líchugubei lan sun le bemegeirubei bun (Sal. 55:22).
5. Ida luba hasubudirun íbirigu ha mamarieidungiña amu íbirigu ha hínsiñebei Heowá houn? (1 Korintuna 15:58; arihabóun giñe iyawaü).
5 Ínchaha tumutiwa Bíbülia lun beresegu wamá “lidan luadigimari Wabureme” (aliihabéi 1 Korintuna 15:58). Anhein basigira adundehani le, gachansinbadibu lun básügürün saragu dan hama íbirigu wügüriña hama würiña. Anhein bafalara adundehani le, badariruba umadagu buítiña ani mámarügübaña hagía badarira, gachansinbadibu giñe lun basubudirun íbirigu mamarieidungiña ha etenirubaña lun heseriwidun lun Heowá. Lanwoun lira, kei badügüñein lan sun biyaraati lun beseriwidun lun Heowá, gúndaabadibu.
Ánhabu etenira lun beseriwidun lun Heowá, basubudiruba saragu íbirigu ani hadan, másiñati ñéinbaña lan ha giñe busentiña hamarieidun. (Arihabéi párafu 5).
6. Ka lunbei haritaguni ha mamarieidungiña ani busentiña hamarieidun?
6 Manügabéi haluahóun adari kei katei súdinitimati lidan bibagari (Fili. 1:10). Mama anhein maríeihadün lubéi o mamarieidungidün lan adügübei lun gunda humá. Lumadagua gürigia luma Heowá adügübei lun gunda lan aban (Mat. 5:3). Lanwoun lira, sun mamarieidungidibu lan, gachansintibu lun baganwoundagüdüni beseriwidun lun Heowá (1 Ko. 7:32, 33). Ligíati, yusubéi bidaani buidu sun mamarieidungidibu lan. Ariñagatu Jessica, aban íbiri merigana to amarieiduboun dan meha le bián-wein lubéi irumu tau: “Íbini busenhadina lan meha namarieidun, íderagua lumutina netenirun lun apurichihani lun gunda nan”.
WÜGÜRI, BARÜBEI BIDAANI LUN BASUBUDIRUNU WÜRI BUIDU; WÜRI, BARÜBEI BIDAANI LUN BASUBUDIRUNI WÜGÜRI BUIDU
7. Ka uéigiñe súdini lubéi betenirun lun tigaburi aban gürigia lubaragiñe badarihanu? (Ariñawagúni 13:16).
7 Ánheinti darihadün lubéi ka lan uma gayara lan hamarieidun? Lunti san hóufudahan ariñagei le hasandirubei? Ariñagatu Bíbülia gürigia lan ha chúbaña aau, asibiha hamani katei buidu lubaragiñe hadügüni (aliihabéi Ariñawagúni 13:16). Ligíati, súdini lubéi lun marufudun bani le basandirubei lau lóufudagun. Ariñagati aban íbiri gíriti Albert, le awinwandubei Paises Bajos: “Ítara kei liabin le lasandirubei gürigia, ítara liña giñe gayara lan lagumuchagun lau lóufudagun. Ligíati, buídubei banügüni bidaani asubudira aban gürigia, mama lun bóufudahan gadaradun tuma”. Luagu le aban oubaü, eibu basubudiruni tigaburi aban würi, gayaraabei bíchugun fe mama lan buntu.
8. Ida luba hasubudiruni íbirigu ha mamarieidungiña ida liña lan hagaburi gürigia ha hínsiñebaña houn? (Arihabóun giñe iyawaü).
8 Gayaraati hálügüdagun hungua: “Ida luba netenirun lun tigaburi aban würi míchugunga tuguya fe, o lidan tikesin aban würi, lun ligaburi aban wügüri míchugunga ligía fe?”. Gayaraati hágurun agu hawagun lidan burí adamuridaguni luma dan le hóundaragun íbirigu lun hásügürün dan úara, ñeinba harihei ida liña lan hagaburi luma hamadagua luma Heowá. Ka san hamadagubaña? Ka uagu hayanuha? (Luk. 6:45). Háfaaguña san biángubei huguya luagu ligiaméme lidan heseriwidun lun Heowá? Gayaraabei hálügüdahan hawagu ha úmabei habusenra gadaradun humá hama kristiánugu ha derebuguti hafiñen ha subudihabúbaña houn luma hama wéiyaaña lidan afiñeni ha lídanbaña damuriguaü le ñein habéi (Ari. 20:18). Gayaraabei hálügüdüniña ida liña lan hasubudirúniwa lidan damuriguaü luma ka lan hagaburibei (Rudu 2:11). Sunme aünha lan asubudira aban gürigia lubaragiñe gadaradun humá hama, houcha humá lun merederun humá yarafañahadügü houn sun oura lun masandiragun hamá houngua wuriba. Inebelá le hasandirunbei hun ani mádaragua humá hungua lidoun habagari.
Lubaragiñe bariñagun tun aban íbiri hínsiñe tan bun, direibá dan lun barihini ka lan tigaburibei, míchugunga tuguya fe. (Arihabéi párafu 7, 8).
9. Ka lunbei bachoururuni lubaragiñe bariñaguni tun aban würi hínsiñeta bun?
9 Átiribeiti dan bau asubudirei tigaburi aban würi lubaragiñe bariñagun tun hínsiñe tan bun? Ánhabu óufudaha ariñagei tun hínsiñe tan bun, gayaraabei tasaminarun masaminarun bani katei buidu lubá badügüni (Ari. 29:20). Ani anhein tariha aban würi hínsiñe tan bun ani mariñagun bumuti tun, gayaraabei tasaminarun machourun bani kaba lan badüga (Apur. 11:4). Haritaguabéi memegeirun ban bachoururuni furumiñe anhein túmaba lubéi würi tuguya bamarieida lubaragiñe bariñaguni tun hínsiñe tan bun. Lau sun lira, lunti bachoururuni aransedibu lan lun bamarieidun ani másiña lan anuhán lan würi to lunboun túmaba lan bamarieida.
10. Ka lunbei ladügüni aban wügüri anhein ariha hínsiñe lan tun aban würi, o anhoun ariha aban würi hínsiñe tan lun aban wügüri ani masandi hamuti ligiaméme?
10 Ánheinti ariha aban wügüri hínsiñe lan tun aban würi o anhoun ariha aban würi hínsiñe tan lun aban wügüri, ka lunbei hadügüni? Anhein masandirun hubéi ni kata hawagu ha asandirubaña ínsiñeni huagu ariñaga huméi houn furangu ani arufuda humeime lidan ligaburi hóuseruniña. Anhein madügün humá, mámame harufuduñein ínsiñeni le lunbei larufudún houn íbirigu. Anhaün ígira lun hasaminarun sandí humá ínsiñeni hawagu, harufuduña magudemehabu humá (1 Ko. 10:24; Efe. 4:25).
11. Ka lunbei gabaroun hamani gürigia ha lídanbaña fulasu le ñein lubéi échuni lun laransehóun hadaradun bián gürigia?
11 Anihein ageiraü le ñein lubéi agübürigu lan o amu gürigia ha wéinamugaaña anúadirubalin kaba lan uma hamarieida haduheñu. Lidan amu ageiraü, iduheñu o umadagu áluahabaña adari houn ha mamarieidungiñabaña, meberesenga anhein wügüri lubéi o würi lan, ani lárigiñe, aba hadügün aransehani lun hasubudiragun houngua lun harihini anhein hínsiñeguabaña lubéi hámagua. Ánhaña amuriaha wamá lun wadügün aban lídangiñe bián katei le, mosu gabaroun wamani le hemegeirubei kada aban hádangiñe luma le hínsiñebei houn. Anhein darihadiwa lubéi adari houn wamadagu o houn waduheñu, áfaagua wamá lun wasubudiruni buidu ida liña lan housan, hagaburi ani lóugiñe sun katei, ida liña lan hamadagua luma Heowá. Súdinitimati aban lubuidun umadaguaü luma Heowá sügǘ lau seinsu, furendei o ubaraü lidan ubóu le. Lidan furumiñeguarügü kesi, mabulieida waméi ha lan gadaradunbaña lúnbaña harihini anhein hamarieiduba lubéi o háhalachagubei lan daradu (Gal. 6:5).
IDA LUBA LAGUMESERUN ABAN DARADU?
12. Anhein busén bubéi gadaradun ban tuma aban würi, ka gayaraabei badügüni lun bariñaguni tun?
12 Anhein busén bubéi gadaradun ban tuma aban würi, ida luba bariñaguni tun hínsiñeta bun? d Gayaraati bayanuhan tuma lidan fulasu le ñein habéi gürigia o bariñaguni tun luéigiñe gágamuru. Ariñagabéi tun furangu hínsiñe tan bun ani busén ban basubudirunu buidu (1 Ko. 14:9). Anhoun ariñaga bun megei tan dan lun tasaminaruni, ruba dan tun (Ari. 15:28). Ánhounti ariñaga bun mínsiñe ban tun, inebelá le tasandirubei bun.
13. Anhein ariñaga aban wügüri tun aban würi hínsiñe tan lun o tariñagun aban würi lun aban wügüri hínsiñe lan tun, ka lunbei hadügüni? (Kolosana 4:6).
13 Würi, ka gayaraabei badügüni anhein ariñaga aban íbiri bun hínsiñe ban lun? Subudibei ragürügü lan ganigi lun lariñaguni le lasandirubei bun, ligíati, buidulá bóuseruni ani laulá inebesei (aliihabéi Kolosana 4:6). Anhein megei bubéi dan lun basaminaruni, ariñagabéi lun. Anhein ítara liña lubéi, áfaaguaba lun bóunabuni lau lóufudagun (Ari. 13:12). Ánheinti mínsiñe lubéi bun lun badarime, ariñagabéi lun lau aban lubuidun igaburi ani furangu. Ariñaga lumuti aban íbiri áustriana gíriti Hans ka lan ladügübei dan le tariñagunbei aban íbiri lun busén tan tasubudiruni buidu: “Lau aban igaburi buiti, aba nariñagun tun ouraméme ligía masaminarungidina lan gadari nan. Ani lúmagiñe oura ligía, aba nóunigiruni ligaburi nóuserunu luéi tasaminarun anihein lan emenigini”. Luagu aban oubaü, anhein ánhara hun, ayanuha humá luagu le hasandirubei tidan hanigi luma luagu ida luba lan habusenrun lun léibugun hidaradun. Segunme hechun kada aban hídangiñe, gayaraati ámuñegueinarügü lan le hagurabubei húmagiñegua.
KA GAYARAABEI WADÜGÜNI SUN WAGÍA LUN WÍDERAGUNIÑA ÍBIRIGU HA BUSENBAÑA HAMARIEIDUN?
14. Anhein busén wabéi wíderaguniña ha mamarieidungiñabaña ka lunbei wadügüni?
14 Ka gayaraabei wadügüni sun wagía lun wíderaguniña íbirigu ha busenbaña hamarieidun? Furumiñe, mosu wóunigiruni le wariñagubei (Efe. 4:29). Álügüdagua wamá woungua: “Héchutina san adüga ‘bula’ hau mamarieidungiña? Dan le narihin aban würi luma aban wügüri ayanuha, aba san nasaminarun hínsiñegua hamá hámagua?” (1 Tim. 5:13). Luagu amu oubaü, madüga wamá lun lasandirun somu íbiri anihein lan lemegeirun ladügarügü mamarieidungili lan. Ariñagati Hans le uágubei wayanuha lidan párafu le lubaragiñebei le: “Añahein íbirigu, ariñagatiña: ‘Ka san uéigiñe mamarieidungidibu lubéi, baweiyaduñatia’. Adügarügüti dimurei líbeina le lun hasandirun ha mamarieidungiñabaña mebegi hamá ani mosu lan hamarieidun lau lóufudagun”. Chóuruti buídutimati lan wáluahan chansi lun wariñagun dimurei le ruti dǘgüdaguaü houn (1 Tesa. 5:11).
15. a) Según Rómana 15:2, ka lunbei gabaroun wamani lubaragiñe wíderagun aban íbiri áluaha adari? (Arihabóun giñe iyawaü). b) Ka hínsiñebei hun lidan bidéu? (Arihabéi abürüdǘni).
15 Ánhawati ariha buídubei lan ítaga íbiri tun aban íbiri kaba wadüga? Ariñagatu Bíbülia lunti lan gabaroun wamani le hasandirubei gürigia (aliihabéi Rómana 15:2). Gíbetiña íbirigu mabuseeruntiña lun haluahóun adari houn ani lunti inebe lan hasaminan woun (2 Tesa. 3:11). Añahein amu, gúndaatiña lau híderawagun murusunraü ani gayaraati wíderaguniña dánrügü le hamuriahani wama (Ari. 3:27). e Añahein amu himei hamuti lun ua lan furangu lan ligaburi híderawagun. Ariñagatu aban íbiri mamarieidungiru yámanina gíritu Lidia: “Gayaraati bóundaraguniña bián íbirigu hagía úara hama saragu amu íbirigu. Ítarati adügarügütibu lun hadunragun ani le líbiri, aba bígiruni houn”.
Gayaraati gachansin hamá íbirigu ha mamarieidungiñabaña lun hayanuhan hámagua dan burí le hóundaragun íbirigu lun hásügürün dan úara. (Arihabéi párafu 15).
16. Ka lunbei haritaguni ha mamarieidungiñabaña?
16 Meberesenga anhein maríeihadiwa lubéi o mamarieidungidiwa lan, sun wagía, gayaraati gunda lan wabagari (Sal. 128:1). Ligíati, anhein busén hubéi hamarieidun ani madarigidün kaba lan uma hamarieida, sigí humá etenira lun heseriwidun lun Heowá. Ariñagatu aban íbiri to awinwanduboun Makao gíritu Sin Yi: “Dan le lasaminarúniwa luagun Paraísu, murusunrügübei dan le lunbei hásügürüni ha mamarieidunbaña hábugua guenlé lumoun dan le lunbei hawinwanduni maríeiñu ámuñegü, ligíati winwanbéi dan le lau lubuidun ani gundaabá”. Ánheinti dariguaadibu lubéi bungua ani gumeseedibu gadaradun? Lidan leweñegua aturiahani, warihibei le lunbei badügüni lun buidu lan lidin bun lidan bidaradun.
UREMU 137 Würiña úaraguatiña lun Heowá
a Lahuuduba bun lun baliihani ariñahani le gíribei “Ser novios. Parte1: ¿Estoy listo para salir con alguien?”, le lídanbei jw.org.
b ARIÑAHANI SÚDINITI: Dan le layusurún dimurei adarigu lidan aturiahani le luma lidan le lunbei liabin lárigiñe, wayanuhaña luagu dan le ídanbei lasubudiraguña lan aban wügüri lungua tuma aban würi lun harihini anhein buídubei lubéi lun hamarieidun. Anihein fulasu le ídanbei layusurúa dimurei kei burí adarigu, gadaradun, háfuridun asariñaha, hasubudiraguña hámagua. Gumeseti daradu dan le furangu lan lun aban wügüri luma tun aban würi luagu hínsiñegua hamá hámagua, ani aba hasigirun lau hadaradun darí lun hamarieidun, ánhaña ariha luagu siñabei lan hawinwandun hámagua, aba háhalachaguni daradu.
c Sánsiwaali fiu iri.
d Anihein échuni wügüri ayanuhabei tuma würi. Ani maribanti giñe larihín würi lan ayanuha luma wügüri (Rudu 3:1-13). Hadariruba lanwoun ariñahani tidan líburu “Los jóvenes preguntan. ¿Cómo le digo lo que siento por él?”, tidan ¡Despertad! to lánina 22 de octubre de 2004.
e Ariha huméi bidéu le gíribei Buiti lidin houn lidan háfaagun luagu hafiñen: Ha mamarieidungiña lidan jw.org.