1. Ka uagu gayara lubéi wariñagun wawinwanduña lan lidan aban dan súdiniti?

 MA LUBUIDUN dan le ídanbei wawinwanda! Sagü weyu warihini lau wagu guánarügü ida liña lan lagunfulirun profesía le tídanbei Bíbülia. Kéiburi wuribu le warihibei haganagua “lurúeite nórute” luma “lurúeite suru” lidan hálugun hagumadiruni ubóu (Dan. 11:40). Lanwoun lira, lapurichihóuña uganu buiti luáguti Larúeihan Bungiu lidan sun ubóu, ani heseriwiduña saragu míñunu gürigia lun Heowá (Isa. 60:22; Mat. 24:14). Weresibiruña giñe saragu ariñahani le tídangiñeti Lererun Bungiu “lidan dan” (Mat. 24:​45-47).

2. Ka lunbei wachoururuni ani ka lunbei wasubudiruni?

² Anihagua Heowá íderaguawa lun buidu lan gunfuranda wamani sügǘ súdiniti le lunbei lasuseredun yarafa madise (Ari. 4:18; Dan. 2:28). Danme le lagumeserun óunwenbu asufuriruni, aniheinhalime sun ariñahani le wemegeirubei wama lun úaragua wamá luma lun lidan wamá aban lídanme dan hénrenguti ligía. Lau sun lira, lunti gabaroun wamani anihein lan katei le ibidiñeti woun luáguti le lunbei lasuseredun ámuñegü. Wayanuhaba lidan aturiahani le luagu ka lan uagu lasansira ligaburi gunfuranda wamani fiu lídangiñe sügǘ burí le. Lárigiñe, wakutihaba fiu lídangiñe katei le subudi wamaalibei luagu ámuñegü luma ida luba lan ligaburi ladügüni Wáguchi Bungiu le siélubei katei lídanme dan ligía.

 LE IBIDIÑEBEI WOUN

3. Ka meha wariñagubei luagu aban dan luáguti le lunbei meha lasuseredun houn gürigia danme le lagumeserun óunwenbu asufuriruni, ani ka uagu?

³ Ariñagatiwa meha luagu aban dan, danme lan le lagumeserun óunwenbu asufuriruni machansinhaaña lanme gürigia lun hárügüdün luéigiñe lóubadina Heowá ni lun hásügürün lau ibagari lídangiñe Arümahedón. Wariñagunbalin meha katei le, ladüga meha samina wamá sun lan le asuseredubei lidan lidaani Guran, ligiamémeba lan asusereda ámuñegü. Kei hénpulu, ariñagatiwa meha, ítara kei meha ladouruni Heowá tubenari árüka lubaragiñe lagumeserun Guran, ítarameme luba lan giñe lagumuchun chansi hawéi gürigia danme le lagumeserun óunwenbu asufuriruni ani úabaña lan ni aban lun hesefurun (Mat. 24:​37-39).

4. Ka uagu mariñagunhaadiwa lubéi sun lan le asuseredubei lidan lidaani Noé ligiamémeba lan asusereda uguñe weyu?

⁴ Mini lan san le sun lan le asuseredubei lidan lidaani Guran ligíaba lan asusereda ámuñegü? a Uá, lugundun mariñagun tumuti Bíbülia lira. Íbini góubaguagüda lani Hesusu “lidaani Noé” luma lidaani lagumeserun arúeiha, mama meha lariñaguña sun lan le asuseredubei lidan lidaani Guran ligiamémeba lan asusereda ámuñegü kei burí ladouruni Heowá tubenari árüka. Lau sun mítaranbei lan, gayaraabei wafurendeirun saragu lídangiñe abahüdaguni le.

5. a) Ka ladügübei Noé lubaragiñe Guran? (Ebüréu 11:7; 1 Féduru 3:20). b) Ka ida genegegua lan apurichihani le wadügübei uguñe weyu lumoun le meha ladügübei Noé?

 ⁵ Dan meha le laganbunbalin Noé uganu luáguti le meha lunbei lasuseredun, arufuda lumuti lafiñen luagu Heowá lau ladügünu árüka (aliiha huméi Ebüréu 11:7; 1 Féduru 3:20). Ítarameme, gürigia ha aganbubalin uganu buiti luáguti Larúeihan Bungiu, mosu harufuduni hafiñen lau le hadügübei (Adü. 3:​17-20). Ariñagati meha Féduru luagu Noé: “Le apurichihabei houn gafigountiña lun hasakürihan” (2 Fe. 2:5). Kei warihini lidan aturiahani le lubaragiñebei le, ibidiñeti woun anhein meha ibiha lubéi Noé lun lawisaruniña kada aban hádangiñe gürigia ha meha ubouagubaña lidoun dan ligía luagu anite lan meha aban Guran. Uguñe weyu, áfaaguatiwa lun wapurichihan lidan sun ubóu ani adüga wamuti sun wayaraati lun wagunfulirun lau dasi le lau ubebeni. Gama lumoun, íbini wáfaagun saragu, siñabei wapurichihan houn sun gürigia ha wayaraatiña lubaragiñe lagumuchun ubóu wuribati le. Ka uagu wariñagei le?

6, 7. Ka uagu siñabei lubéi wapurichihani uganu buiti houn sun gürigia lubaragiñe lagumuchun ubóu wuribati le?

⁶ Ariha waméi le lariñagubei Hesusu luáguti halíaba lan lébeda wapurichihan. Ariñagati: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu” (Mat. 24:14). Lagunfuliruña dimurei le uguñe weyu sügǘ luéi lidan amu dan. Wapurichihañein uganu luáguti Larúeihan Bungiu lidan lóugiñe 1,000 iñeñein, seremei wani páhina jw.org, aniheinhali chansi lun hafurendeiruni hiibe-agei gürigia ha ubouagubaña uganu buiti.

⁷ Ariñagati giñe Hesusu houn lani disipulugu: “Magumu hubéi luburugute Ísüraeli egeyedagua lubaragiñe niabin, au le Wügüri Garaüwarügüti”. Mini lan le mapurichihóunbei lan houn sun gürigia lubaragiñe liabin Hesusu aguseragüdaña (Mat. 10:​23, TNM; 25:​31-33). Inarünimémegili lidan wadaani dimurei le lariñagubei Hesusu. Hawinwanduña saragu míñunu gürigia lidan burí fulasu le ñein lubéi siñá lan lapurichihóun. Lanwoun lira, sagü minutu hagüriahóun saragu san irahüñü. Ligíati, íbini wáfaagun lun wapurichihani uganu buiti houn “sun néchanigu, rasa, luwuyerigu dimurei luma sun fulasu” siñabei wegeyedaguni sun ubouagu (Aruf. 14:6).

8. Ka álügüdahani gayaraabei liabin wachügüwagun? (Ariha humóun giñe iyawaü).

⁸ Lárigiñe le ariha wamaalibei, másiñati wálügüdagun woungua: “Kaba san asusereda houn gürigia ha machansinbaña lun haganbuni uganu buiti lubaragiñe liabin saragu asufuriruni? Kaba ladüga Heowá luma Lisaani le eresibirubei ubafu lun laguseragüdün?” (Huan 5:​19, 22, 27; Adü. 17:31). Haritaguagüda lumutiwa bérusu le ídangiñebei lasagarúa aturiahani le, mabusenrun lan Heowá “lun leferidirun ni aban”. Le labusenrubei “lun hasakürihan sun gürigia” (2 Fe. 3:9; 1 Tim. 2:4). Lau sun lira, subudi wamuti masubudiragüdün lágili lan Heowá kaba lan ladüga hau gürigia burí ha. Ani subudi wamuti giñe mama lan mosu lariñaguni woun kaba lan ladüga hau.

9. Ka lasubudirágüdübei Heowá woun tidan Lererun?

⁹ Ariñagaali Heowá tidan Lererun luagu fiu lídangiñe katei le lunbei ladügüni. Kei hénpulu, ariñagati láguyuguagüdübaña lan “ha wuribabaña” o ha meha machansinbaña lun hafurendeiruni uganu buiti ni lun hasansiruni hagaburi (Adü. 24:15; Luk. 23:​42, 43). Másiñati liabin amu burí álügüdahani wachügüwagun.

10. Ka amu katei ñǘbuinbei wachügüwagun?

¹⁰ Lagumuchúba san hau gürigia ha óunwegutiña lídanme saragu asufuriruni lun súnwandan ani machansin hañame lun háguyugun?  Furanguti tariñaguni Bíbülia máguyugunbaña lan gürigia ha lúnbaña lagünrinchaguniña Heowá hau lisudaranigu lídanme Arümahedón ladüga hebedaagun lun (2 Tesa. 1:​6-10). Kábati wariñaga hawagu gürigia ha óunwegutiña lídanme lidaani saragu asufuriruni ladüga sandi, danaguaü o afarúarügü hamá? (Apur. 9:11; Sak. 14:13). Ñéinbaña funa san hádangiñe gürigia ha haganagua “ha wuribabaña” ha lúnbaña háguyugun lídanme iseri ubóu? Le linarün katei, ibidiñeti woun.

LE WASUBUDIRUBEI

11. Kaba lébuna aguseragüdüni le lunbei ladügǘn lun kada gürigia lídanme lidaani Arümahedón?

¹¹ Anihein saragu katei le wasubudirubei luagu le lunbei lasuseredun ámuñegü. Kei hénpulu, subudi wamuti lidan lanme Arümahedón houserúaba gürigia ítara kei hóuseruniña líbirigu Kristu (Mat. 25:40). Sun ha íderagubalin Kristu ani ru hagía ídemuei houn kristiánugu anuadirúaaña, houserúaba kei mudún. Subudi wamuti giñe añahagua lanme hádangiñe líbirigu Kristu ya ubouagu danme le lagumeserun saragu asufuriruni ani hanügǘba sielun murusun dan lubaragiñe Arümahedón. Ligíati, sunme añahagua lan kristiánugu anuadirúaaña ya ubouagu, gayaraati gachansingiña lanme gürigia ha haruma tanigi lun híderaguniña luma hídehan lidan dasi le hadügübei (Mat. 25:​31, 32; Aruf. 12:17). Ka uagu súdini lubéi sun katei le?

12, 13. Ka gayaraabei hadügüni hádangiñe gürigia danme le harihini tagünrinchawagun “Babilónia to Wéiriboun”? (Ariha humóun giñe iyawaü).

¹² Íbini lárigiñe lagumeserun saragu asufuriruni, másiñati haritagubei lan hádangiñe gürigia ha lúnbaña harihini tagünrinchawagun “Babilónia to wéiriboun” barühaña lan gefentiña luagu Heowá saragu irumu ariñagei lasusereduba lan le. Gayaraati san ñéinbaña lan hádangiñe árügüdütiña luéigiñe lóubadina Heowá? (Aruf. 17:5; Ese. 33:33).

¹³ Samina wamá luagu le asuseredubei lidan meha lidaani Moisesi. Dan meha le háfuridunbei ísüraelina Ehiptugiñe, “ñǘdüntiña saragu hawuyerigu gürigia hama” (Afu. 12:38). Háfuga aba lan meha hagumeserun hádangiñe afiñera luagu Heowá dan le harihinbalin lagunfulirun diisi íñenaü le meha uágubei  layanuha Moisesi. Anhein asusereda aban katei ítarati lárigiñe tagünrinchawagun Babilónia to Wéiriboun, warihibei san kei aban marichaü hóundarun gürigia wamoun murusun dan lubaragiñeme liabin lagumuchagüle ubóu? Chóuruti mítaranbei lan warihini katei! Busentiwa wáyeihani Wáguchi Bungiu le siélubei, le ariñagubei: “Gudemehabutina, gaguraasuntina, wéiritina lidan ínsiñeni luma inarüni!” (Afu. 34:6). b

14, 15. Ida liña wasubudiruni ua lan dipeni lan ídabuga lan lounwen ni halía lan lawinwanda aban gürigia lun lawinwanduba lan lun súnwandan ámuñegü? (Sálumu 33:​4, 5).

¹⁴ Másiñati aganbaadiwa lan lariñagun somu íbiri luagu somu liduhe le meseriwidunbei lun Heowá: “Himei numuti hamuga lun lounwen lubaragiñe lagumeserun saragu asufuriruni gachansin láamuga lun láguyugun ámuñegü”. Chóuruti mama lan lau wuribani lariñagei dimurei le. Le linarün katei, mama ka lan dan lounwe aban gürigia adügübei lun gayaraabei lan lawinwandun lun sun dan ámuñegü. Aguseragüdüti le macharabei Heowá, súnwandan richá lan ani lau úaraguni laguseragüda (aliiha huméi Sálumu 33:​4, 5). Gayaraati wachoururuni lauba lan irichaü laguseragüda Bungiu, aguseragüdüti le “íñugutimati lidan sun ubóu” (Agu. 18:25).

¹⁵ Mama giñe ladüga hawinwandun gürigia lidan ítaga fulasu adügübei lun lawinwanduba lan lun sun dan ámuñegü. Maweiyasunbei Heowá anügaña saragu míñunu gürigia keisi “gábara” ladügarügü hawinwandun lidan  aban fulasu o ageiraü le ñein lubéi machansin hamá lun haganbuni uganu luáguti Larúeihan (Mat. 25:46). Anhein samina wabéi hawagu gürigia ha, saminati giñe Heowá saragu hawagu ladüga ligía lan Aguseragüdüti le lídanbei sun ubóu. Ibidiñeti woun ida luba lan lahandilihani Heowá katei lídanme saragu asufuriruni. Háfuga gachansinbaña lan hádangiñe gürigia ha lun hasubudirun luagu Heowá luma lun hafiñerun luagu danme le lasubudiragüdüni lun sun ubóu káteiñein lan (Ese. 38:16).

16. Ka katei wasubudirubei luagu Heowá? (Ariha humóun giñe iyawaü).

¹⁶ Seremei waturiahanu Bíbülia, furendeihadiwa gebegi lan habagari saragu gürigia lun Heowá. Derege lumuti Heowá libagari Liráü lun gachansin wamá sun wagía lun wawinwandun lun súnwandan (Huan 3:16). Sun wagía, sandí wamaali línsiñehabu Heowá luma lugudemehabu (Isa. 49:15). Subudi lumutiwa kada aban wádangiñe lau wiri. Subudi lumutiwa buidu buidu, darí lun ánhawa lan óunwegua, gayaraabei ladügüniwa kei wabéi meha íbini le waritagubei lubaragiñe wounwen (Mat. 10:​29-31). Ligíati, anihein saragu resun wama lun wafiñerun laguseragüdübaña lan Wáguchi Bungiu le siélubei kada gürigia lidan aban igaburi buiti, lugundun chuti lau, richati ani gudemehabuti (Sant. 2:13).

17. Kaba wariha lidan leweñegua aturiahani?

¹⁷ Kei gunfuranda wamaali lubéi katei le buidu, rútiwa fe luagu súdinitima lan apurichihani guentó sügǘ luéi amu dan. Ka uagu wariñagei le? Kaba ínchahawa lun ítarameme wamá apurichihei uganu buiti mararamagunga? Lounabúba álügüdahani le lidan leweñegua aturiahani.