1, 2. a) Ka katei súdiniti úmabei hagagibudagua sun gürigia? b) Ka uagu súdini lubéi gunfurandawa lan katei le?

HOUN saragu gürigia, seinsu súdinitimabei. Ligía hetenirunbei áluaha hibihin irisini o lun meferidirun hamani le ibiha hamaalibei. Houn amu, súdinitimatiña iduheñu, átuadi luma hibihini le hayumahabei.

² Gama lumoun, anihein aban katei súdinitimati luéi furumiñeguarügü lídangiñe katei burí le ani lunti mabulieidun wamani: luéigiñe wamá lóubadina liricha Heowá lun larúeihan. Ánhawa móunigi, gayarati wetenirun saragu lun wadagimanu le lánina sagü weyu o wadiheridun saragu luagun waturobulin darí lun wabulieidagun luéi lisudinin katei le. Luagu amu oubaü, eibu buídutima lan gunfuranda wamani súdini lan wánharun lun Heowá keisi warúeite, aransetimabadiwa lun wararamun lun turóbuli le lánina ibagari ani buídutimabei giñe wamadagua luma Heowá.

3. Ka lariñagubei Satanási luagu lugumadin Bungiu?

³ Adügaali Mafia lun hálügüdagun gürigia houngua anhein garicha lubéi Heowá lun larúeihan. Ariñagati lau ichouruni luagu mabuidun lan lagumadihan Heowá, mabusenrun lani le buídubei  woun ani gúndaatimabaña lan hamuga gürigia ánhaña agumadiragua houngua (Agu. 3:1-5). Ariñagaali giñe úati lan ni aban gürigia úaraguati lun Bungiu tídangiñe sun lanigi, ani ánhaña lan adarúa gürigia lidoun saragu lénrengunga hígirubei lan lagumadihan (Hob. 2:4, 5). Ligía aniheingua lubéi Heowá íchiga dan lun lafurangudun luagu wuriba lan resultóu le lanügübei hamahadun gürigia lun lugumadin.

4. Ka uagu lunti lubéi laransehóun luáguti liricha Bungiu lun larúeihan?

⁴ Furanguti subudi lani Heowá iyeeni lan sun le lariñagubei Satanási. Kati uagu desidírü lubéi Heowá lasigirun íchiga dan lun Satanási lun larufuduni anhein inarüni lubéi le lariñagubei lubaragiñe hamuga laransehani sun katei lau lóufudagun? Lun harihini ánheligu hama gürigia resultóu (aliiha huméi Sálumu 83:18). Lau sun luwuyeri, gíbeeña amahadutiña lun lagumadihan Heowá, ítara kei meha furumiñetiña bián gürigia. Gayarati ladügün katei le lun hasaminarun fiú gürigia háfuga lan inarüni lan lariñagubei Mafia. Kei le úagili lan furangu lan katei le dandu houn gürigia kei houn ánheligu, ñéinbei magundani hadan néchanigu, rasa, türibu, iduheñu hama gürigia. Gama lumoun, lárigiñeme larihíniwa Heowá lan garichabei lun larúeihan, ábame wawinwandun lun súnwandan lábugiñe lagumadihan le richabei ani ábayame ñein lan darangilaü haganagua sun ha ladügübaña Bungiu (Efe. 1:9, 10).

5. Ida liña luéigiñe wamá lóubadina liricha Heowá lun lagumadihan?

⁵ Larufudúba richá lan lagumadihan Bungiu ani mabuidun lan lagumadihan Satanási luma hagumadihan gürigia, ligía aba lubeime lagidarúniwa. Lagañeiruba lagumadihan Bungiu lau Mesíasi keisi urúei. Arufuda hamaalime gürigia ha úaraguabaña luagu gayara lan úaragua hama gürigia lun lagumadihan Heowá (Isa. 45:23, 24). Hínsiñeti hamuga san woun lun wabahüdǘn hadan lubúeingu Bungiu úaraguatiña ha? Anha. Lun wibihini katei le, lunti waritaguni ani gunfuranda wameime súdini lan katei le.

6. Wéiriti san lisudini larumadahóun liricha Heowá lun larúeihan?

⁶ Kei lariñawagún, larumadahóun liricha Heowá lun larúeihan ligía katei súdinitimabei houn gürigia. Súdinitimati sügǘ lau wagundan sun wagía. Mini lan san le ua lan súdini lan wasalbarun ani meberesen lan Heowá wau? Uá, mítaranti. Ka uagu?

7, 8. Ka lánibei larumadahóun liricha Heowá lun larúeihan luma lagunfulirun lani füramasei?

⁷ Wéiriti hebegi gürigia lun Heowá. Hínsiñetiwa lun saragu, darí lun layusuruni lita Liráü lun lesefuruniwa luma lun gayara lan wibihin ibagari magumuchaditi (Huan 3:16; 1 Huan 4:9). Lun hamuga magunfulirun lani Heowá lani füramasei, gachansinti hamuga Mafia lun lariñagun ye lan Heowá ani aban lan gumadimati le marichati le máhabei lau katei buiti houn gürigia. Ani líchuguñein hamuga giñe irichaü houn láganiñu, ha adügübaña bula lau ani aba hálügüdahan: “Ka san mégeibei lau füramasei luagu lagiribuduba lan Kristu? Hilagua wagübürigu ani ítaramemegili sun katei kei meha lúmagiñe dan le ladügǘnbei ubóu” (2 Fe. 3:3, 4). Ligía lachoururubei lubéi Heowá hesefurun gürigia ha gaganbadibaña danme le larumadahóun liricha lun larúeihan (aliiha huméi Isaíasi 55:10, 11). Ani subudiwati giñe lagumadihan Heowá luagu línsiñehabu. Ligía chouru wabalin luagu hínsiñebaña lan lubúeingu ha úaraguabaña lun súnwandan (Afu. 34:6).

⁸ Dan le wánharun luagu liricha lan Heowá lun larúeihan súdinitimabei mama warufuduña mebegi lan wasalbarun woun ni luagu mebegi wamá ni kata ligibugiñe Bungiu. Wíchigarügüñein kada katei lidan lilugaarun, liricha Bungiu lidan lilugaarun, esefuruni  lidan lilugaarun. Lunti gunfuranda wamani katei le buidu lun madireirun wamá luéi le súdinitimabei ani lun luéigiñe wamá lóubadina lagumadihan Heowá.

9. Ka meha lariñagubei Satanási luagu Hobu? (Ariha huméi dibuhu le lídanbei lagumeseha arütíkulu).

⁹ Furanguti tidan liliburun Hobu, aban tídangiñe líburu to binadutimaharuboun, luagu megei wamá wasubudiruni saminaü le richabei. Aliihatiwa ñein ariñaga lan Satanási lau ichouruni anhein lan asufurira Hobu saragu, ladiseduba lan luéi Bungiu. Aba lariñagun lun Heowá lun ladügün dañu lun Hobu. Madügün lumuti Heowá katei ligía, íbini ígira lan lun lóuchaguni Mafia lubúein. Aba lariñagun lun: “Adügabéi le babusenrun lau sun le lúmabei Hobu” (aliiha huméi Hobu 1:7-12). Lidan murusun dan féridi lumutiña Hobu lubúeingu, diisi lisaanigu luma sun le lúmabei lun lawinwandun. Adügati Mafia lun larihín kamá hamuga Bungiu gadurunbei luagu sun lasufurirun Hobu (Hob. 1:13-19). Lárigiñe, aba ladügün lun ladagarun aban lanarime sandi luagu Hobu, aban sandi gáriti ani le háhünewati lun (Hob. 2:7). Lúntima laweiridagun turóbuli, aba tadügün lani weiriou hama ǘrüwa wügüriña ha ariñagubaña lumadagu hamá lun leferidiruni luguraasun (Hob. 2:9; 3:11; 16:2).

10. a) Ida liña meha larufuduni Hobu úaragua lan lun Bungiu? b) Ka idan lacharara?

¹⁰ Inarüni meha san le lariñagubei Satanási? Uá, bulíeiguati meha Satanási ladüga míchugun lumuti Hobu lanagan luagun Bungiu (Hob. 27:5). Gama lumoun, luagu fiú dan bulíei lumuti ka lan súdinitimabei. Aba lálugun larufuduni luagu richá lan darí lun lamuriahan lun lariñawagún lun ka lan uagu lasufurira (Hob. 7:20; 13:24). Háfuga wasaminarun, gunfurandawa lan ligaburi lóunabun ladüga gibe lan lasufurirun, gama lumoun, arihati meha Bungiu megei lan Hobu lererehóun lun. Ka lariñagubei lun?

11, 12. a) Ka gunfuranda lubéi Hobu lau lídehan Heowá? b) Ida liña lóunabun Hobu?

¹¹ Darí wamuti lererun lidan Hobu kapítulu 38 darí 41, ani maliihantiwa lidan ni aban fánreinti luagu afuranguagüda lani lun ka lan uagu lasufurira. Mama meha lira súdinitimabei lidan le lariñagubei Heowá, ladüga mama mosu líchugun fe luagu le ladügübei. Busenti meha Bungiu líderaguni Hobu gunfurandei luagu ni kata lan ligía lóubawagu Heowá. Ani íderagua lumuti lun gunfuranda lani anihein lan katei súdinitimati lidan sun katei ligía (aliiha huméi Hobu 38:18-21). Seremei katei ligía, aba lasansiruni Hobu ligaburi larihini katei.

¹² Magudemehábuti san Heowá dan le layanuhan lun Hobu furangu lárigiñe súfurihali lan saragu? Uá, ani marihin lumuti  giñe Hobu ítara. Lau sun súfurihali lan meha saragu, gunfuranda laali meha katei buidu. Íbini lun lariñagun: “Nibusigaritina luagu sun le ariñaga náalibei, ligía nasakürihanbei, ñun lidan kaliki luma baligi”. Buiti léiguadun lererun Heowá lun Hobu ani ruti gurasu lun (Hob. 42:1-6). Furumiñe, ererehaali meha giñe aban nibureinti gíriti Eliú lun Hobu (Hob. 32:5-10). Ariha lumuti meha Heowá lubuidun lóunabun Hobu ani ariñagati hínsiñe lan úaraguni le larufudubei lun (Hob. 42:7, 8).

13. Ida liña lasigirun lererun Heowá íderaguei Hobu saragu dan lárigiñe lagumuchun lasufurirun?

¹³ Sagamémeti Hobu buiti lídangiñe lererun Heowá íbini lárigiñe lagumuchun liturobulin. Inarüni “biní lumuti [lan] Bungiu Hobu lidan lagumuhóun lirumudiri sügǘ lau meha furumiñeti”, gama lumoun, barüti dan lubá lárügüdagun lungua, lárigiñe, aba gasaanigu lan sedü wügüriña hama ǘrüwa würiña (Hob. 42:12-14, TNM). Chóuruti áluga lan meha Hobu hawagu lisaanigu ha meha leferidirubaña ladüga Satanási. Ani másiñati haritagua lani sun le lasufurirubei luagu fiú dan. Íbini anhein chülǘ lubéi oura lun gunfuranda lani ka lan uagu lasufurira, háfuga anihein lan burí dan lálügüdagun lungua ka lan uagu mosu lubéi meha lasufurirun saragu. Gama lumoun, gayarati meha lasaminarun luagun sun le lariñagubei Bungiu lun. Líderagubei meha katei le lun lakipuruni saminaü le richabei ani líchuguba meha giñe gurasu lun (Sal. 94:19).

14. Ka gayarabei wafurendeiruni lídangiñe le asuseredubei lun Hobu?

¹⁴ Gayarati giñe líderaguniwa abahüdaguni luáguti Hobu lun wakipuruni saminaü le richabei luma lun líchugun gurasu woun. Lau sun luwuyeri, kipu lumuti Heowá “lun larufudahóun woun, [...] lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu” (Rom. 15:4). Ka larufudahabei le woun? Moun lumuti lan wetenirun saragu lun le suserebei woun darí lun wabulieidagun luéi katei súdiniti le: larumadahóun liricha Heowá lun larúeihan. Ani haritagua waméi arufuda wamani luéigiñeñadiwa lan lóubadina lugumadin Bungiu dan le úaragua wamá íbini lidan turóbuli le hénrengutimabei, ítara kei meha Hobu.

15. Ka lanügübei úaraguni le warufudubei dan le lidan wamá lénrengunga?

¹⁵ Ka uagu ru lubéi dǘgüdaguaü woun wasaminarun luagun lisudinin úaraguni lun Bungiu? Ladüga haritaguagüda lániwa gasuuni lan wasufurirun. Dan le wasufurirun óuchawaguni úati mini lan luagu gáñiñein lan Bungiu wama; ruti óuchawaguni chansi woun lun warufuduni luagu luéigiñeñadiwa lan lóubadina larúeihan (Ari. 27:11). Ánhawa awanda, lagundaaruba Heowá wau  ani léredatimaba giñe wemenigin (aliiha huméi Rómana 5:3-5). Chóurugüda lumuti abahüdaguni luáguti Hobu luagu “areidati [lan] Bungiu, gudemehabu ligía” (Sant. 5:11). Ligía gayara lubéi wachoururuni líchuguba lan Bungiu hafayeiruaha sun ha luéigiñebaña lóubadina larúeihan. Íderagua lumutiwa wasubudiruni katei le lun wawanduni sun lénrengunga lau gurasu luma lau ugundani (Kol. 1:11).

16. Ka uagu buidu lubéi lun waritaguagüdüni wóuniwagua súdini lan larumadahóun liricha Heowá lun larúeihan?

¹⁶ Mama súnwandan lun ménrengunbei lan wakipuruni liricha Heowá lun larúeihan lidan wasaminan, dántima le gibe lan waturóbulin. Íbini turóbuli le ñǘbüriti gayarati lagidaruni sun were ánhawa asaminara saragu luagun. Ligíati, buiti lun waritaguagüdüni wóuniwagua súnwandan luagu súdini lan lun luéigiñe wamá lóubadina liricha Heowá lun larúeihan dan le wásügürün somu lénrengunga.

17. Ka uagu ídeha lubéi beresegu wamá lidan wadagimanu le ru láalibei Heowá woun lun magidarun wamani warihin luéi katei le súdinitimabei?

¹⁷ Dan le beresegu wamá lidan wadagimanu le líchugubei Heowá woun gayarati líderaguniwa lun magidarun wamani warihin luéi katei le súdinitimabei. Ariha wamá aban hénpulu. Súfuritu aban gefentu luagu Heowá gíritu Renee ladüga ladagarun bandi sandi tuagu, kánserü aban lídangiñe, héreti meha ladagahan gáriti tuagu. Dan le meha lagaranihóun tun, apurichihatu meha houn nadagimeintiña háspitalirugu, houn amu sánditiña luma houn ha ñǘdünbaña arihoun. Lidan aban ókaasion, apurichihatu 80 oura lidan bián dimaasu dimí le taubei háspitalirugu. Madireirun tumuti tarihin luéi liricha Heowá lun larúeihan ni dan le tounwe lubéi. Ruti giñe katei ligía awalidaguni tun lidan tasufurirun.

18. Ka larufudahabei le asuseredubei tun aban íbiri woun luagu luéigiñe wamá lóubadina liricha Heowá lun larúeihan?

¹⁸ Inarüni sagü lan weyu wagagibudagun luma turóbuli le ñǘbüritimati, ani íbini lidan kesi burí ligía busentiwa lun wetenirun lun liricha Heowá lun larúeihan. Rédeitu Jennifer ǘrüwa weyu lidan aban fulasu le ñein lubéi tadagara awión agurabaha aban paséi lun tidin túbiñoun. Aba terederúniwa sun awión to lunboun yebe táfuridun. Lidan kesi ligía, ménrengunti hamuga tagumeserun asandira gudemehabu tuougua ladüga tábuguarügüñoun lan ani buchá tuagu. Ani madügün tumuti lira. Aba tamuriahan luma Heowá lun ladundehanu lun tíderagun amu gürigia asubudirei, ladüga buchá giñe hawagu gürigia burí hagía. Ida liña san lidin tun? Apurichihatu houn saragu gürigia ani ígiratu saragu agumeiraguagüdüni houn. Abahüdaguatu: “Íbini hénrengu lan katei ligía, sanditina luagu biní lánina Heowá ani ruti erei nun lun nayanuhan luagu liri lau lubuidun igaburi”. Furanguti magidarun tani tarihin luéi katei le súdinitimabei.

19. Ka igaburi harufudubei lumutuniña Heowá lidan luáguti liricha lun larúeihan?

¹⁹ Lúmagiñe furumiñeti dan, gunfuranda hamuti lumutuniña Heowá súdini lan liricha lun larúeihan. Ligía adügübei lun amu hamá hawéi lílana relihión mama inarüniti. Lunti lachoururuni kada aban wádangiñe wadügüñein lan ligiaméme, ladüga lídanñadiwa áhuduraguni le inarünibei.

20. Ida liña larihini Heowá le wadügübei lun wídehan lidan liricha lun larúeihan?

²⁰ Gayarati wachoururuni weiri lan lebegi ídemuei le wíchugubei lun liricha Heowá lun larúeihan lau wawandun luma lau weseriwidun lau úaraguni (Sal. 18:25). Lidan leweñegua arütíkulu, wakutihaba buidu luagu ka lan uagu lunti lubéi wíchuguni sun wídehan lun liricha Heowá lun larúeihan luma ida luba lan wadügüni.