ARÜTÍKULU LÁNINA ATURIAHANI 25
Afiñe wamá luagu Heowá dan le nidiheri wamá
“Hírutina, níchuguñein nuáguti ligibugiñe Wabureme” (1 SAM. 1:15).
UREMU sn 51 Úaraguatiwa bun, Heowá
LE LUNBEI WATURIAHANI *
1. Ka uagu mosu lubéi gaganbadi wamá lun leweridihan Hesusu?
DAN le layanuhabei Hesusu luagu profesía libügürü lagumuhóun dan, ariñagati: “Góunigi humá, mígira humá lun tabuinchun hanigi lau katei málati kei [...] katei lánina ibagari le” (Luk. 21:34). Ka uagu mosu lubéi gaganbadi wamá wagía kristiánugu lun eweridihani le? Lugundun uguñe weyu wagagibudaguña luma ligiaméme turobuli luma asufuriruni kei ha híbiri gürigia.
2. Ka turobuli úmabei hagagibudagua wábirigu?
2 Anihein dan, ñǘbuinguati turobuli woun lidan aban ani nidiherigüda lumutiwa. Ariha wamá fiu sügǘ. Gagibuguati aban Gefenti gíriti John, * luma aban sandi le gíribei esclerosis múltiple, laganagua lira aba laganwoundun gádanti dan le tígirubalin lani weiriou ani 19 yebe irumu hau lúmagiñe hamarieidun. Lárigiñe, aba hígiruni bián lisaanigu würiña heseriwidun lun Heowá. Gagibuguatiña giñe aban feru maríeitiña Bob tuma Linda luma amu turobuli. Biángubei hagía aba herederun mawadigimaridunga ani dan lárigiñe aba heferidirunun haban. Laganagua lira, aba tasandirun Linda tuéigiñe tanigi, aban sandi le gayaraabei láfarunu hilagubei ani aba giñe ladagarun aban sandi tuagu le gíribei sistema inmunitario.
3. Según le lariñagubei Filipuna 4:6, 7 ka gayaraabei wachoururuni?
3 Gayaraati wachoururuni gunfuranda lani Heowá, Bungiu le adügübaliwa ani Wáguchi le hínsiñehabubei woun ida liña lan wasandiragun woungua lidan wasufurirun. Ani busenti líderaguniwa lun wagagibudagun luma turobuli (aliiha huméi Filipuna 4:6, 7). Daritiwa tidan Lererun, saragu abahüdaguni le ayanuhabei luagu saragu lénrengunga le hawandubei lubúeingu ani ariñaga tumuti ida liña lan líderaguniña Heowá. Ariha wamá fiu hénpulu.
“ABAN MEHA WÜGÜRI PROFETA ELÍASI KEI WAGÍA”
4. Ka lénrengunga úmabei lagagibudagua Elíasi ani ka ichouruni lasandirubei luagu Heowá?
4 Seriwiti meha Elíasi lun Heowá lidan aban dan hénrenguti ani aba lagagibudagun luma turobuli. Aabü aban hádangiñe urúeigu ha múaragunbaña Ísüraeli aba lamarieidun tuma Hesawéli, aban würi salufuritu to áhuduragunboun lun Baali. Biángubei hagía aba habuinchagüdüni ageiraü lau láhuduragun lun Baali ani áfaragua hamaaña saragu hádangiñe lani Heowá profetagu. Gama lumoun, anurahati Elíasi. Ani máfarun lumuti giñe méigini seremei lafiñerun luagu Heowá (1 Uru. 17:2-4, 14-16). Áluaha lumuti giñe Elíasi Heowá dan le lagagibudagunbei hama lani Baali profetagu ani ínchaha lumutiña ísüraelina lun háhuduragun lun Bungiu le inarüniti (1 Uru. 18:21-24, 36-38). Arihati Elíasi saragu katei le achoururagüdübalin lun, Heowá lan óunigirubalin ani ligía lan giñe íderagubalin lidan sun dan hénrenguti ligía.
Aba lóunahan Heowá aban ánheli lun líderaguni Elíasi lun lárügüdün erei. (Ariha huméi párafu 5 luma 6). *
5, 6. Según 1 Urúeigu 19:1-4, ida liña lasandiragun Elíasi lungua, ani ka ladügübei Heowá lun larufuduni hínsiñe lan lun?
5 (Aliiha huméi 1 Urúeigu 19:1-4). Gama lumoun, dan le tasiadirubalin urúei Hesawéli táfaralin lan Elíasi hilagubei, aba lanufudedagun. Ligíati lanurahanbei Bérüsewoun. Láfaraali lanarime maguraasuni darí lun lamuriahan lun lounwen. Ka uagu lasandiragua lungua ítara? Ladüga gafigoun lan ani aban meha wügüri “kei wagía” (Sant. 5:17). Másiñati ladüga lan anufudei luma lubucha uagu adügübei lun ladiheridun. Genegeti giñe samina lan sun lan le ladügübei luagu áhuduraguni inarüniti meseriwín lan lun ni kata, mabuidunmemégili lan léibugun katei Ísüraeli ani ligíarügaali lan meha eseriwida lun Heowá (1 Uru. 18:3, 4, 13; 19:10, 14). Másiñati laweiridagüdünu wanigi ligaburi lóunabun profeta úaragua le, gama lumoun, gunfuranda lumuti Heowá.
6 Mébechun lumuti Bungiu Elíasi ladügarügü lariñaguni le lasandirubei, íderaguarügü lumuti lun here lan (1 Uru. 19:5-7). Lárigiñe aba lererehan lun lau ínsiñehabuni lau larufuduni lanarime lubafu lun. Ani lárigiñe aba lariñagun lun añahagua lan sedü milu ísüraelina ha máhuduraguntiña lun Baali (1 Uru. 19:11-18). Arufuda lumuti Heowá lun Elíasi hínsiñe lan lun.
IDA LIÑA LIDERAGUNIWA HEOWÁ
7. Ka uagu ru lubéi darangilaü woun wasaminarun luagu ligaburi líderaguni Heowá Elíasi?
7 Wásügürüña san lídangiñe somu sügǘ le adiheridagüdübadiwa? Ruti gurasu woun warihini gunfuranda lani Heowá lidiheri Elíasi. Ani ruti giñe darangilaü woun wasubudiruni gunfuranda lani wadiheri. Subudi lumuti ka lan wayaraabei adüga lumoun le wásiñarubei adüga íbini le wasaminarubei luma le wasandirubei (Sal. 103:14; 139:3, 4). Ánhawa ayarafada lun Heowá kei ladügüni Elíasi, líderagubadiwa lun wagagibudagun luma lénrengunga le adiheridagüdübaliwa (Sal. 55:22).
8. Ida luba líderaguniwa Heowá agagibudagua luma turobuli?
8 Gayaraati ladügün saragu anufudei lun liábingua luriban saminaü wachügüwagu ani lun lábürühan warüna. Anhein asusereda le woun, haritagua waméi líderagubadiwa lan Heowá. Ida? Agunbiraha lumutiwa lun wabahüdaguni sun le adiheridagüdübaliwa lun ani chóurugüda lumuti woun laganbubei lan wayumuragun (Sal. 5:3; 1 Fe. 5:7). Ligíati ayanuha wamá súnwandan luma luagu waturobulin. Íbini mayanuha lan wama kei meha layanuhan luma Elíasi, layanuhaba wamá tídangiñe Lererun luma lau le tariñagubei lóundarun. Líchuguba abahüdaguni le áfuachubei tidan Bíbülia gurasu luma emenigini woun. Ani líchuguba giñe gurasu houn wíbirigu (Rom. 15:4; Ebü. 10:24, 25).
9. Ida luba líderaguniwa aban umadaü le afiñetiwa luagu?
9 Ariñagati Heowá lun Elíasi lun lan líchugun lídangiñe luadigimari lun Eliséu. Ligía líchugubei aban umadaü le gayaraabei líderaguni danme le maguraasun lan. Ligíati, anhein gamada wabéi le gayaraati wafiñerun luagu gayaraabei líderaguniwa dan le wasufuriruña lan (2 Uru. 2:2; Ari. 17:17). Ánheinti ua lubéi ni aban lun wabahüdahani waturobulin lun? Amuriaha wamá luma Heowá lun líderaguniwa adarira aban íbiri le derebuguti lafiñen lun líchugun gurasu woun danme le wemegeiruni.
10. a) Ka emenigini líchugubei woun le asuseredubei lun Elíasi? b) Ida liña líderaguniwa füramasei le waliihabei lidan Isaíasi 40:28, 29?
10 Íderagua lumuti Heowá Elíasi lun manufudedun lan luma lun leseriwidun lun lau úaraguni luagu saragu irumu. Le asuseredubei lun profeta le, ruti emenigini woun. Másiñati wagagibudaguba lan luma saragu idiheri le adügübei lun labuchadun wawagu. Ánhawa afiñera luagu Heowá líchuguba erei woun lun woudin wabaruaguóun lidan weseriwidun lun (aliiha huméi Isaíasi 40:28, 29).
DANDU ANA KEI DAWIDI LUMA ASAFÜ AFIÑETIÑA MEHA LUAGU HEOWÁ
11-13. Ka asuseredubei houn ǘrüwa lubúeingu Bungiu ha lánina binadu dan?
11 Tidan Bíbülia daritiwa amu burí gürigia ha meha asufurirubaña saragu. Kéiburi Ana, 1 Sam. 1:2, 6). Wéiriti meha tidiheri darí lun tayahun ani malama tuguya (1 Sam. 1:7, 10).
mosu meha tawandun busiganu ladüga siñá lan garáü tan, lúmati tadügün tubuyamu bula tau (12 Wínwanti meha urúei Dawidi lidan dan hénrenguti. Ariha wamá fiu lídangiñe. Sandiguati Dawidi lungua féridi lan lan luguraasun ladüga saragu charati le ladügübei (Sal. 40:12). Mosu meha lagagibudagun luma lebedaagun Abüsalón le lisaani le meha óunwebei ladüga lálugun láfaruni lúguchi (2 Sam. 15:13, 14; 18:33). Lanwoun lira, aba lagarabaagun aban hádangiñe besi lumada luagun (2 Sam. 16:23–17:2; Sal. 55:12-14). Saragu lídangiñe sálumu le labürühabei arufuda lumuti maguraasuni le lasandirubei, arufuda lumuti giñe weiri lan lafiñen luagu Heowá (Sal. 38:5-10; 94:17-19).
Ka íderagubalin abürühati Sálumu lun leseriwidun lun Heowá lau ugundani? (Ariha huméi párafu 13 darí 15). *
13 Dan lárigiñe aba giñe ladagarun aba lanarime maguraasuni luagu aba abürühati sálumu, másiñati aban lan hádangiñe ladügawagun Asafü le lewita ani seriwiti meha tidan óunwenbu lani Bungiu sanduariu. Aba lagumeserun agimugarei habagari salufuritiña ani ligía katei le adügübei lun magundan lan. Ani aba lagumeserun lau machouruni luáguti abiniruni le heresibirubei lubúeingu Bungiu (Sal. 73:2-5, 7, 12-14, 16, 17, 21).
14, 15. Ka wafurendeirubei lídangiñe ǘrüwa hénpulu le tídanbei Bíbülia?
14 Ǘrüwagubei lubúeingu Bungiu ha, áluahatiña ídemuei luma. Dará hamutu hanigi lun lidan furíeigi. Afuranguagüda hamuti lun ka lan uagu gibe lubéi hadiheri. Ani mígirun hamuti houdin lidan fulasu le ñein lubéi láhudurawagua lun Heowá (1 Sam. 1:9, 10; Sal. 55:22; 73:17; 122:1).
1 Sam. 1:18). Abürühati Dawidi: “Sügütiña ha harumabaña lídangiñe saragu wuribani, gama lumoun sefu lumutiña Aburemei lídangiñe súngubei” (Sal. 34:19). Sanditi abürühati Sálumu ragǘ lani Heowá ‘lúhabu le lóunwenren’ adundehalei lau larufudahan lun lau ínsiñehabuni. Eremuhati: “Ánheinti au, nayarafahóuba lun Bungiu, ladüga anihán lubuidun-ágeibei katei nun. Buguya, Nabureme, buguya naramudaguagülebei” (Sal. 73:23, 24, 28). Ka wafurendeirubei lídangiñe hénpulu burí le? Anihein lan dan Sandiguatiwa woungua lau saragu idiheri ladüga turobuli. Gama lumoun wasigiruba wabaruaguóun ánhawa asaminara luagu ida liña lan líderaguniña Heowá amu, furíei wagíame ani gaganbadi wagíame lun lidan sun katei (Sal. 143:1, 4-8).
15 Óunaba lumuti Wabungiute le gudemehabubei hafurieidun sun hagía. Aba tasandiragun Ana tungua lau darangilaü (AFIÑE WAMÁ LUAGU HEOWÁ ÁBAME BUIDU LAN LIDIN WOUN
Furumiñe, busentu meha aban íbiri tadisedun, gama lumoun aba labuidurun léibugun katei dan le táluahan tíderagun amu. (Ariha huméi párafu 16 luma 17).
16, 17. a) Ka uagu moun lumuti lubéi lun wadisedun hawéi gürigia? b) Ida luba wárügüdün erei?
16 Furendeitiwa aban katei súdiniti lídangiñe ǘrüwa hénpulu le: moun lumuti lan wadisedun luéi Heowá ni hawéi lubúeingu (Ari. 18:1). Súfuritu Nancy saragu, dan le lígirubarun tani weiriei. Abahüdaguatu: “Liibe-agei dan mabuseruntina meha narihin ni nayanuhan hama ni aban. Aba narihin, eibu lan nadisedun hawéi gürigia, éibutima nírudun”. Aba lasansirun léibugun katei dan le tagumeserunbei áluaha ida luba lan tíderaguniña ha gaturobulinbaña. Ariñagatu: “Aba burí naganbuniña dan le hafuranguagüdüni nun ida liña lan hasandiragun houngua. Aba níchugun fe eibu lan níchaagun nungua lidan halugaarun, éibutima masandiragun nan nungua lau gudemehabu núniwagua”.
17 Gayaraati wárügüdün erei lau wabasihan adamuridagua. Dan le wadügüni wíchuguña chansi lun Heowá lun líderaguniwa ani ruti gurasu woun (Sal. 86:17). Ruti Heowá erei woun lau lani sífiri sandu, tau Lererun luma hau lubúeingu. Gama lumoun lidan adamuridaguni gayaraati wíchugun gurasu ani resibi wagía (Rom. 1:11, 12). Ariñagatu aban kristiána gíritu Sofía: “Íderagua lumutina Heowá hama íbirigu lun nasigirun nubaruaguóun. Le meha súdinibei nun nadamuridagun. Arihaadina eibu lan napurichihan luma nídehan lidan damuriguaü, ménrenguntimati nun nagagibudagun luma lénrengunga luma idiheri”.
18. Ka gayaraabei líchuguni Heowá woun dan le maguraasun wamá?
18 Danme le maguraasun wamá, haritagua waméi mámarügü lan füramaserügüti Heowá lagidaruni asufuriruni lun súnwandan ámuñegü, líderagubadiwa giñe íbini guentó. Ru lumuti giñe dandu ayumahani kei erei woun lun mígiraguagüdün wamá woungua lun lábürüha warüna ni lun maguraasuni (Fili. 2:13).
19. Ka lachoururagüdübei Rómana 8:37-39 woun?
19 (Aliiha huméi Rómana 8:37-39). Chóurugüda lumuti apostolu Pábulu woun ua lan ni aban lun lafanreinraguagüdüniwa luéi línsiñehabu Bungiu. Guentoti, ida luba wíderaguniña íbirigu ha agagibudagubaña luma lénrengunga? Lidan leweñegua arütíkulu warihuba ida luba lan gudemehabu wamá luma lun wíderaguniña, ítara kei ladügüni Heowá.
UREMU sjj 44 Lafurieidun le nidiheribei
^ par. 5 Wasufurirun saragu o luagu saragu dan, gayaraati ladügün dañu lun wasaminan luma lun wágubu. Ida luba gayara lan líderaguniwa Heowá? Lidan arütíkulu le, warihinbei ida liña lan líderaguni Heowá Elíasi. Wakutihaba giñe ǘrüwa hénpulu tídangiñeti Bíbülia le lunbei larufudahan woun ida luba lan wibihini lídehan.
^ par. 2 Sánsiwati iri lidan arütíkulu le.