1. Según Kolosana 2:4, 8, ida liña láluahan Satanási labuguruni wasaminan?

BUSENTI Satanási lun wíchuguni wanagan luagu Heowá. Lun libihini, áfaaguati lun lasansiruni ligaburi wasaminan. Le linarün katei, áluahati lun labuguruni wasaminan lun wasaminarun kei ligía. Yusu lumuti wayumahan lun leyeeduniwa luma lun léredun wawagu lun wafalaruni (aliiha huméi Kolosana 2:4, 8).

2, 3. a) Ka uagu lunti lubéi gaganbadi wamá lun eweridihani le lídanbei Kolosana 2:8? b) Kaba wariha lidan arütíkulu le?

² Le linarün katei, wéiriti san dencha lan wígirun lun leyeeduniwa Satanási? Anha. Haritagua waméi mama lan houn ha mámabaña kristiánugu labürüdei Pábulu eweridihani le lídanbei Kolosana 2:8, hounti meha kristiánugu anuadirúaaña lau sífiri sandu (Kol. 1:2, 5). Lídanñanu meha denchaü, wagía giñe sun wawinwanduña lidan aban dan le denchatimabei (1 Ko. 10:12). Ka uagu? Ladüga lagurún Satanási ubouagun ani le labuserunbei leferidiraguagüdüniña lubúeingu Bungiu ha úaraguabaña (Aruf. 12:9, 12, 17). Lanwoun lira, wawinwanduña lidan aban dan le ídanbei wuribatimahaña lan gürigia (2 Tim. 3:1, 13).

³ Lidan arütíkulu le wafurendeiruba ida liña lan láluahan Satanási lasansiruni wasaminan lau burí layusurun “arufudahani málati”. Wafurendeiruba tuagu ǘrüwa sádara to layusuruboun (Efe. 6:11). Lidan leweñegua arütíkulu wakutihabei kaba lan wadüga lun madügün tan lisadaran dañu lun ligaburi wasaminan. Furumiñe ariha waméi ida liña lan leyeeduniña Satanási ísüraelina lárigiñebei hebelurun lidoun Fulasu Füramasewati luma ka lan gayaraabei wafurendeiruni lídangiñe.

4-6. a) Según 2 Lúrudu 11:10-15, ka asansiruni luáguti ligaburi lábunawaguniwa hadügübei ísüraelina dan le hawinwandubei lidan Fulasu Füramasewati? b) Ka eweridihani líchugubei Heowá houn ísüraelina ani ka uagu?

⁴ Lau lichú au, hóuchagua lumutiña Satanási ísüraelina lau ladügün lun háhuduragun houn amu búngiugu. Lun lira, yusu lumuti hayumahan busén hamá habihin éigini. Dan le hebelurunbei lidoun Fulasu Füramasewati, mosu meha hafurendeirun aban iseri ligaburi lábunawaguniwa. Dan meha le Ehiptu habéi túguarügü hamuti hábunagun lau duna le hadaburubei lídangiñe duna Nilu. Gama lumoun úati meha aba duna le ítarati kei duna Nilu lidan Fulasu Füramasewati lun láturawaguniwa bunaguaü, lubaragiñe lira yusu hamuti meha serenu luma lidunari huya le áhuyubei lidan lidaani húyouga lan (aliiha huméi 2 Lúrudu 11:10-15; Isa. 18:4, 5). Ligía mosu lubéi meha hafurendeirun ísüraelina aban iseri ligaburi lábunawaguniwa. Hénrengubei meha houn, lugundun hilagua meha hiibe-agei gürigia ha subudihabubaña luáguti bunaguaü lidan fulasu mageirawati.

⁵ Afuranguagüda lumuti Heowá houn sánsigua lan katei. Lárigiñe aban líchugun aban eweridihani houn le meha genegebei mani lan luma ábunaguni. Ariñagati: “Mígiraguagüda humá hungua lun heyeedun, madireira humá luéi Bungiu lun heseriwidun houn amu búngiugu, máhuduragun huguyame houn” (2 Lur. 11:16, 17). Ka uagu leweridiraña Heowá lun máhuduragun hamá houn búngiugu mama inarünitiña anhein layanuhaña lubéi hama luagu iseri ligaburi lábunawaguniwa?

⁶ Subudi lumuti meha Heowá busenbaña lan ísüraelina hafurendeirun fiu katei luáguti lábunawaguniwa nadü hámagiñe gürigia ha  máhuduragunbaña lun. Inarüni subudi hamá meha kananna saragu luáguti ábunaguni sügǘ hau lubúeingu Bungiu ani busenbaña meha ísüraelina hafurendeirun hámagiñe. Gama lumoun denchabei meha. Lugundun buin liña meha le hadügübei kananna lau afiñeni luagu Baali, le meha hanügübei kei labureme sielu le áhuyagüdübei huya houn. Mabusenrunti meha Heowá lun héiguadun ísüraelina lidoun afiñeni iyeeniti le. Lau sun lira, héiguamemetiña ísüraelina lidoun áhuduraguni lun Baali (1 Lur. 25:3, 5; Ali. 2:13; 1 Uru. 18:18). Ida liña libihin Satanási lun héiguadun ísüraelina tidoun lisadaran? Ariha waméi.

7. Ida liña lóuchawagun hafiñen ísüraelina dan le hebelurunbei lidoun Fulasu Füramasewati?

⁷ Furumiñeti katei le ladügübei Satanási lanügün chansi luagu hayumahan le kamanibei lun láhuyun huya luma lun háturaguni hanadüri. Maweirinti meha láhuyun huya lidan Fulasu Füramasewati lidoun lagumuchagüle gádürü-hati darí nefu-hati. Según meha huya le áhuyubei lúmagiñe diisi-hati, ítara luba meha buídubei lan halubahan. Saminatiña meha néchanigu ha yarafabaña houn ísüraelina mosu lan meha hadügün somu kultu lun háhuyagüdün habungiutegu huya houn. Adügati Satanási lun hafiñerun ísüraelina mosu lan giñe háyeihani luriban échuni le anhein busén habéi lun lidin houn buidu. Gumesetiña ísüraelina ha mafiñenbaña luagu Heowá áhuduragua lun Baali ladüga aba hasaminarun ítararügübei lan láhuyun huya lidan lidaani lumabeigan.

8. Ka tibiaman sádara layusuruboun Satanási? Afuranguagüda huméi.

⁸ Yusu lumuti Satanási hayumahan ísüraelina. Lidan meha kultu le hadügübei néchanigu ha máhuduragunbaña lun Heowá, adügatiña meha lanarime magíaguni lidan, kéiburi ahoruhani hadan würiña luma hadan wügüriña tidan ténpulu. Mama meha ánharügütiña néchanigu ha lun lagamaridun wügüri wügüri líledi o würi würi tíledi o lun amu luwuyeri magíaguni, ariha hamuti meha giñe kei aban katei le maribanti (2 Lúr. 23:17, 18; 1 Uru. 14:24). Afiñetiña meha ladügüba lan hadügüni sun katei le lun hadügün búngiugu lúntima larandarun múa. Áyeiha hamuti saragu ísüraelina kultu lánina magíaguni le ani aba heseriwidun houn búngiugu mama inarünitiña. Le lúgubu, ígiratiña lun héiguadun tidoun lisadaran Mafia.

9. Kei lariñawagún lidan Oseasi 2:16, 17, ida liña ladügün Satanási lun labulieidúniwa liri Heowá?

⁹ Yúsuti Satanási aban tǘrüwan sádara: Ladügün lun labulieidúniwa liri Heowá. Lidan lidaani profeta Heremíasi, ariñagati Heowá adüga hamá profetagu yéetiña lun habulieiduni ísüraelina liri lun houdin lárigi Baali (Her. 23:27). Genegeti ígira hamani ísüraelina hayusuruni liri Bungiu, aba hasansiruni luagu Baali ani mini lan iri le: “nabureme”. Ábati habulieiduni lubúeingu Bungiu ha, amu lan Heowá luéi Baali; adügati katei le lúntima ménrengun lan houn hamigisiraguni áhuduraguni lun Baali luma áhuduraguni lun Heowá (aliiha huméi Oseasi 2:16, 17). *

10. Ka burí sádara layusuruboun Satanási uguñe weyu?

¹⁰ Yusu lumutu Satanási tuguyaméme sádara uguñe weyu. Yusu lumuti hayumahan gürigia le kamanibei, ayumahani lun hadügün gürigia magíaguni, adüga ligía lun masubudiruniwa lan luagu Heowá. Gumese wamá akutiha tuagu tagumuhóun sádara to.

11. Ida liña ladügün Satanási lun masubudiruniwa lan luagu Heowá?

¹¹ Adügati Satanási lun masubudiruniwa lan  luagu Heowá. Lárigiñebei hóunwegun lani Hesusu apostolugu, gumesetiña fiu kristiánugu aburuchaguagüda iyeeni (Adü. 20:29, 30; 2 Tesa. 2:3). Adügatiña agarabaguntiña luagu Bungiu ha lun masubudiruniwa lan luagu Bungiu inarüniti le ábanrügübei. Kei hénpulu aba hagidaruni liri Bungiu tídangiñe Bíbülia lun híchugun “Aburemei” o amu burí iri. Adügati katei le lun gürewei lan houn aliihatiña hasubudiruni amu lan Heowá hawéi amu “aburemeigu” ha uágubaña tayanuha Sandu Bürütu (1 Ko. 8:5). Yusu hamuti ligiaméme dimurei, “Aburemei”, lun hayanuhan luagu Heowá luma luagu Hesusu, adügati katei le lun gürewei lan houn gürigia hasubudiruni amu lan Bungiu luéi Lisaani ani ámuñegueinarügüti habara (Huan 17:3). Adügati yuriguaü le lun hafiñerun gürigia ǘrüwañanu lan bungiu lidan aban, aban arufudahani le marufudahan tumuti Bíbülia. Adügati katei le lun hafiñerun gürigia siñá lan lasubudiruniwa Bungiu. Ma lanarime iyeeni! (Adü. 17:27).

12. a) Ka tadügübei relihión mama inarüniti? b) Ida liña lidin houn según Rómana 1:28-31?

¹² Yusu lumuti Satanási layumahan ǘgürügü. Lidan binadu Ísüraeli yusu lumuti Satanási relihión mama inarüniti lun línchahaniña gürigia adüga magíaguni. Ligiamémegili ladüga uguñe weyu. Ánhati relihión mama inarüniti lun magíaguni, darí lun adüga lan lun larihíniwa kei aban katei le maribanti. Ligíati, saragu gürigia ha ariñagubaña hawougua heseriwiduña lan lun Bungiu mawinwanduntiña lau aban laruman ibagari. Ida liña lidin houn? Ariñaga lumuti apostolu Pábulu tidan gárada to labürühaboun houn rómana (aliiha huméi Rómana 1:28-31). Laganagua katei “le moun lubéi hadügüni” anihein sun luwuyeri magíaguni kéiburi, lagamaridun wügüri wügüri líledi o wuri wuri tíledi. (Rom. 1:24-27, 32; Aruf. 2:20). Chóuruti súdini lan lun gaganbadi wamá lun arufudahani furanguti le tídanbei Bíbülia.

13. Ka amu sádara layusuruboun Satanási?

¹³ Barüti Satanási chansi luagu le hayumahabei gürigia. Maribanti wayumahan busén wamá wibihini le wemegeirubei luma le hemegeirubei waduheñu luma lun wibihini aransehani le mégeiwabei (1 Tim. 5:8). Ida liña wadügüni? Liibe-agei dan, lau burí waleskuelahan luma aban wamá aturiahatiña buítiña. Lau sun lira, lunti góunigi wamá. Lidan saragu ageiraü, mámarügüñein katei le  lunbei lahuudun lidan libagari aturiahati arufudahóua, arufudahóuati giñe katei málati le lánina ubóu. Ínchahouatiña aturiahatiña lun mafiñen hamá anihein lan Bungiu luma lun hamaharun tun Bíbülia. Ariñawagúati houn arufudahani lan luagu saliguarügü lan katei ligía lan arufudahani buídubei luáguti lagumeserun ibagari (Rom. 1:21-23). Múaranti arufudahani le luma “lichú lau Bungiu” (1 Ko. 1:19-21; 3:18-20).

14. Ka ladügübei hasaminan wügüriña?

¹⁴ Múaranti lisaminan wügüri luma lúrudu richati le lani Bungiu. Mínchahan lumutiña gürigia arufuda igaburi le líchugubei sífiri, ínchaharügü lumutiña lun “layumahan ǘgürügü” (Gal. 5:19-23). Adügati lun panta hamá gürigia luma lun barügua hamá houngua ani ínchaha lumutiña igaburi le gürigia lun hóunguarügü lan habusenra buiti (2 Tim. 3:2-4). Múaranti igaburi le luma darangilaü luma ǘnabuguni le labuserunbei Heowá lun warufuduni (2 Sam. 22:28). Ka burí susereelibei houn fiu kristiánugu ha ñǘdünbaña aturiaha tidan luban furendei íñuti? Sansi lumuti lisaminan ubóu le hasaminan. Ariha wamá aban sügǘ.

15, 16. Ka wafurendeirubei lídangiñe le asuseredubei tun aban íbiri?

¹⁵ Ariñagatu aban íbiri to barüharuboun lóugiñe 15 irumu eseriwida lun Heowá lidan dan dayarüti: “Aban meha Gefentu to badiseiharu nuguya, ani aliihadina meha aganba nuguya dencha lan aturiahani tidan luban furendei íñuti. Lau sun lira, madügüntina meha gasu. Saminatina meha mama lan nun adundehani ligía”. Ka turobuli úmabei tagagibudagua íbiri to? Ariñagatu: “Adügati meha aturiahani lun madaani nan ani maguraasun nuguya lun nayanuhan  luma Heowá lidan furíei kei meha nadügüni; hanarimeti meha lubucha nuagu darí lun madaani nan lun naranserun buidu lubá adamuridaguni ani masandi nuguya ugundani dan le napurichihan. Aba níchugun fe lagadeiruñein lan aturiahani tidan luban furendei íñuti numadagua luma Heowá. Aba narihini mosu lan nígiruni naturiahan tidan luban furendei íñuti. Ani aba nadügüni”.

¹⁶ Ka lánibei aturiahani ligía lidan ligaburi tisaminan? Ariñagatu: “Ruti busiganu nun nasubudiruni adüga lan aturiahani tidan luban furendei íñuti lun narihini hachara amu, hacharatima íbirigu; lau burí nagurabun saragu hámagiñe luma lau nadisedun hawéi. Sügüti saragu dan lun nígiruni igaburi le. Arufudati sügǘ le nun dencha lan maganbadi wamá lun eweridihani le líchugubei Wáguchi le siélubei woun lau tídehan lóundarun. Subudi lumutina meha Heowá buidu buidu sügǘ luéi nasubudiragun nungua. Masuseredunti hamuga le nun lun hamuga meha gaganbadi nan lun Heowá!”

17. a) Ka lunbei wadügüni? b) Kaba uagu layanuhóua lidan leweñegua arütíkulu?

¹⁷ Ligíati, áfaagua wamá lun mígiraguagüdün wamá woungua lun weyeedúniwa “lau burí arufudahani málati” le lídanbei ubóu le lábugiñebei lubafu Mafia. Góunigigua wamá wougua tuéi lisadaran súnwandan (1 Ko. 3:18; 2 Ko. 2:11). Maweiyasun wamá ígira lun ladügün Mafia lun wabulieiduni ka lan Heowabei luma ida liña lan labusenrun Heowá lun wáhuduragun lun. Gaganbadi wamá lun liñun lilurudun le luáguti laruman ibagari. Mígira wamá giñe lun ladügün Mafia lun wadüraaguni ladundehan Bungiu. Gama lumoun, ka lunbei wadügüni ánhawa íchiga fe adügaali lan lisaminan ubóu lun lasansirun ligaburi wasaminan? Lidan leweñegua arütíkulu lakutihóuba ida luban lan gayara lan tíderaguniwa Lererun Bungiu agünrinchagua saminaü o échuni le güreweiti ligirúniwa (2 Ko. 10:4, 5).