ARÜTÍKULU LÁNINA ATURIAHANI 24
Günringua waméi “sun aritaguni le múaranbei luma linarün Bungiu”
“Lau lubafu Bungiu günringua wamuti sun aritaguni le múaranbei luma linarün Bungiu, luma sun katei le abusenrubei lerederuni lasubudirúniwa Bungiu” (2 KO. 10:5).
UREMU sn 18 Lueirin línsiñehabu Bungiu
LE LUNBEI WATURIAHANI *
1. Ka eweridihani líchugubei apostolu Pábulu houn kristiánugu anuadirúaaña?
ARIÑAGATI apostolu Pábulu houn kristiánugu ha awinwandubaña lidan furumiñeti sígulu: “Hebé habagaridun keisi lirahüñü ubóu le” (Rom. 12:2). Ka meha uagu líchigei eweridihani furanguti le houn wügüriña hama würiña ha deregeguaañabaña houngua lun Bungiu ani anuadirúaaña lau sífiri sandu? (Rom. 1:7).
2, 3. a) Ida liña láluahan Satanási lun wíchuguni wanagan luagun Heowá? b) Ida luba wagidarun somu katei le ragühali lidan wasaminan?
2 Nidiheriti meha Pábulu lugundun genege lan ígira hamá fiu kristiánugu lun labadülerun hasaminan wügüriña luma saminaü mabuidunti le lídanbei ubóu le lábugiñebei lubafu Mafia hawagu (Efe. 4:17-19). Gayaraati lasuseredun katei le lun furumiñeguarügü wádangiñe. Yúsuti Satanási, le lubungiutebei ubóu le, ámuñegueinarügü katei lun láfaagun ladisedagüdüniwa luéi Heowá. Aban lídangiñe layusuruni furumiñeguarügü ayumahani le wawagubei lun wibihin somu katei wóunguarügü o lun súdini wamá ubouagu. Gayaraati giñe layusuruni ligaburi wagüriarún, wechun o arufudahani le weresibirubei lun ladügün lun wasaminarun kei ligía.
3 Gayaraati san wagidarun somu katei le ragühali lidan ligaburi wasaminan? (2 Ko. 10:4). Ariha waméi óunabagülei le líchugubei Pábulu: “Lau lubafu Bungiu günringua wamuti sun aritaguni le múaranbei luma linarün Bungiu, luma sun katei le abusenrubei lerederuni lasubudirúniwa Bungiu. Sun giñe hasaminan gürigia ubouagu ru wamuti lábugiñoun lubafu Kristu lun lúaraduba lan lau le lubeibei” (2 Ko. 10:5). Ítara liña, lau lídehan Heowá gayaraabei wóunigiragun woungua luéi lagübüri saminaü. Ítara kei adüga lan aban árani lun masigirun lan somu péisini adüga dañu, gayaraati giñe tíderaguniwa Lererun Bungiu lun wóunigiragun woungua luéi labadülerun lagübüri saminaü le lídanbei ubóu le lábugiñebei lubafu Satanási wawagu.
SANSI WAMÉI LIGABURI WASAMINAN
4. Ka asansiruni wadügübei saragu wádangiñe dan le wánharunbei lun inarüni?
4 Samina wamá luagu asansiruni le meha wadügübei dan le wánharunbei lun inarüni le tídanbei Lererun Bungiu ani seriwi wagía lun Heowá. Saragu wádangiñe mosu meha wígiruni wadügüni katei le wuribabei (1 Ko. 6:9-11). Wéiriti weteingiruni Bungiu lau líderaguniwa ígirei luriban échuni burí le.
5. Ka bián katei lariñagubei Rómana 12:2 woun lun wadügüni?
5 Ligíati, moun lumuti tarumugun wadunurun. Íbini madügün wamaali lan figóu wéiriti le meha wadügübei lubaragiñe wabadiseirun, mosu wasigirun áfaagua lun wadisedun luéi furumiñeguarügü katei le adügüti lun wábürühan lidoun. Ida luba wadisedun? Ariñagati Pábulu: “Hebé habagaridun keisi lirahüñü ubóu le; lubaragiñe lira, sansi huméi ligaburi hisaminan” (Rom. 12:2). Ligíati mosu wadügün bián katei. Furumiñe, moun lumuti wasigirun abagarida kei lirahüñü ubóu le. Libiaman, mosu wasansiruni ligaburi wasaminan.
6. Ka wafurendeirubei lídangiñe hénpulu le líchugubei Hesusu lidan Matéu 12:43-45?
6 Asansiruni le uágubei layanuhan Pábulu, úati mini lan asansiruni lérügü wadügübei bóugudigiñe wabiti, layanuhaña giñe luagu asansiruni le wadügübei múnadagiñe Asansiruni o afamura?”). Mosu wasansiruni wasaminan, lidan amu dimurei, wasansiruni wayumahan, wagaburi luma le wasandirubei tidan wanigi. Ligíati, súngubei wagía lunti wálügüdagun woungua: “Ida liña burí asansiruni le nadügübei lun náyeihani Kristu? Le san arihuarügübei? Náfaaguña san tídangiñe sun nanigi lun aban nan kristiánu?” Súdiniti asansiruni le. Lidan Matéu 12:43-45, daritiwa aban hénpulu le líchugubei Hesusu ani arufuda lumuti woun le lunbei wadügüni (aliiha huméi). Arufudati hénpulu le aban leksióun súdiniti woun: úati buídürügüla wagidaruni luriban saminaü wawariua; mosu giñe wabuinchagüdüni wasaminan lau burí katei le aubei lagundaara Bungiu.
wabiti (ariha huméi rekuáduru “SANSI WAMÉI LIGABURI WASAMINAN
7. Ida luba wasansiruni le tídanbei wanigi?
7 Gayaraati san wasansiruni le tídanbei wanigi? Ru tumuti Lererun Bungiu óunabagülei: “Iserigua humá lidan hani sífiri luma lidan hisaminan, daügua humá lau iseri igaburi, igaburi le ladügübei Bungiu kei ligaburi guánarügü, lidan irichaü le tímatimaati luma arumani” (Efe. 4:23, 24). Kei aubei warihei, gayaraati wadügüni asansiruni le, íbini gürewei lan. Úati buídurügüla wígiruni luriban saminaü o luriban igaburi. Mosu wasansiruni ligaburi wasaminan. Lidan amu dimurei, wasansiruni wayumahan, wagaburi luma lébuna wadügüni katei. Lun wibihini, mégeiwati lun wadügün saragu áfaaguni.
8, 9. Ida liña larufuduni le asuseredubei lun aban íbiri megei wamá wadügün asansiruni tidan wanigi?
8 Ariha waméi le asuseredubei lun aban íbiri le meha furundebei, gátadi, ani ganigi ligía lágieru. Dan ladügün baali asansiruni le mégeiwabei, gayara ligía labadiseirun, adügati asansiruni burí le lun hayanuhan lílana liraüraü fulasu le ñein lubéi lawinwanda buidu tuagu lóundarun Heowá. Gama lumoun, aban weyu rábounweyu, murusun dan lárigiñe labadiseirun, aba lagagibudagun íbiri le luma aban óuchawaguni le magurabun lumuti, aba lachülürün aban bacharuati lárigiñe lúbiñoun áluaha lágieru luma. Furumiñe, aba lárügüdagun íbiri le lungua luéi lageindagun luma. Gama lumoun, siñá lumuti íbiri awanda dan le laganbubalin lanabaguni bacharuati ligía liri Heowá. Ábati láfuridun íbiri, aba lagayuahan luagu. Ka uagu ladügei? Ladüga, íbini adügaali lan meha aturiahani tídangiñeti Bíbülia lun mafasi lan, masansirungili meha sunsuinagubei. Lidan amu dimurei, magida lágili igaburi le tídangiñe lanigi.
9 Lau sun lira, mábürühanti larüna (Ari. 24:16). Lau hídehan wéiyaaña lidan afiñeni sigiti lubaruaguóun ani dan lárigiñe aba gayara haali lan líridun kei aban wéiyaali lidan afiñeni. Gama lumoun, aban weyu guñoun, bóugudi tun Luban Adamuridaguni, aba lagagibudagun luma aban óuchawaguni lenege meha le úmabei lagagibudagua fiu irumu lubaragiñe: lagayuaha yebe aban bacharuati luagun amu wéiyaali lidan afiñeni. Ka ladügübei íbiri? Aba layanuhan luma bacharuati lau darangilaü luma ǘnabuguni, adügati lun lagalumarun bacharuati ligía ani aba lidin íchigei lúbiñoun. Ka uagu lóusera ítara? Ladüga sansi laali meha ligaburi lisaminan. Sansi laali meha le tídanbei lanigi lun aban lan gürigia le darangiluti ani le ǘnabuguti, ani ruti asansiruni le uéiriguni lun Heowá.
10. Ka mini lubéi wadügün asansiruni tidan wanigi?
10 Madügǘnti asansiruni le ítaraguarügü. Háfuga mosu lan wáfaagun saragu irumu (2 Fe. 1:5). Úati buídurügü lan barühadiwa lan saragu irumu lidan inarüni. Mosu wadügüni sun wayaraati lun wasansiruni le tídanbei wanigi. Kaba íderagua adügei? Ariha wamá fiu lídangiñe.
IDA LUBA WASANSIRUNI LIGABURI WASAMINAN
11. Ida liña líderaguniwa furíei asansirei ligaburi wasaminan?
11 Furíei ligía furumiñeti katei le lunbei wadügüni. Mosu wamuriahani lememe lamuriahabei abürühati sálumu le ariñagubei: “Adügabá aban anigi to harumatu nidan, Nubungiute! Ru buguyame aban iseri sífiri le gúnfuliti nidoun!” (Sal. 51:10). Mosu wasubudiruni megei wamá wadügün asansiruni lidan ligaburi wasaminan luma lun wamuriahan ídemuei luma Heowá. Ka uagu chouru wabalin líderagubadiwa lan? Ariha waméi le füramase lubéi hawagu deré taganbun ísüraelina lidan lidaani Esekiéli: “Nagidaruboun anigi deretu kei dübü to hawaguboun, ábame níchugun aban iseri anigi luma iseri sífiri houn”, lidan amu dimurei lun gaganbadi hamá lun ladundehan Bungiu (Ese. 11:19). Ruti dimurei le dǘgüdaguaü woun. Aranseñu liña meha Heowá lun líderaguniña ísüraelina hagía asansira ítara kei aranseñu lan lun giñe líderaguniwa.
12, 13. a) Según Sálumu 119:59, kaba uagu wararamagua asaminara? b) Ka burí álügüdahani lunbei wadügüni wóuniwagua?
12Le biama,súdiniti lun wararamagun asaminara. Sagü weyu mosu waliihanu Bíbülia, sagá wagíame dan lun wararamagua asaminara luagu saminaü le gayaraabei wagidaruni wawariua (aliiha huméi Sálumu 119:59; Ebü. 4:12; Sant. 1:25). Subudi waméi le úarabei luma arufudahani ubouaguna. Mosu wasubudiruni tídangiñe sun taruman wanigi ka lan wadebilinbei luma lun wáfaagun lun wígiruni.
13 Lun lira, mosu wadügüni álügüdahani le woungua: “Anihein san somu emeidini o gimugaü tidan nanigi?” (1 Fe. 2:1). “Wéiriti san napantahan lau ligaburi nagüriaruniwa, arufudahani le neresibirubei luma lau númati? (Ari. 16:5). Ariha numutiña san amu gürigia ha míbeti hámati o ha lídangiñetiña amu rasa, kei ni kata?” (Sant. 2:2-4). “Hínsiñeti san katei le lídanbei ubóu le nun?” (1 Huan 2:15-17). “Hínsiñeti san nun lun naríaagun katei le gaganati magíaguni o anarimeni?” (Sal. 97:10; 101:3; Amos. 5:15). Háfuga ladügün óunabagülei le wíchugubei lun álügüdahani le lun wasubudiruni kaba lan katei wasansira. Ánhawa agidarei katei le ragühalibei lidan wasaminan, wagundaragüdübei Wáguchi Bungiu le siélubei (Sal. 19:14).
14. Ka uagu súdini lubéi lun wanúadiruniña wamadagu buidu?
14 Le lǘrüwan, súdiniti giñe lun wanúadiruniña wamadagu buidu. Ru wagía yebe fe o míchugun wamá gánitiña ha úmabei gamadagua wamá saragu wawagu (Ari. 13:20). Dandu leskuelarugu o lidan wadagimanu, geyegu waña hau gürigia ha míderagun hamutiwa asaminara kei ligaburi lisaminan Heowá. Ánheinti lidan adamuridaguni gayaraati wadarirun umadagu buítiña ha íderagubaliwa arufuda ínsiñeni luma adügei le buídubei (Ebü. 10:24, 25).
DEREGÜDAGU WAMÁ LIDAN WAFIÑEN
15, 16. Ida liña lálugun Satanási lasansiruni ligaburi wasaminan?
15 Haritagua waméi láfaaguña lan Satanási lun lasansiruni ligaburi wasaminan. Yúsuti ámuñegueinarügü luwuyeri saminaü lun lagadeiruni lubafu inarüni le tídanbei Lererun Bungiu.
16 Anihagua Satanási adügei ligiaméme álügüdahani libe le ladügübei tun Ewa lidan fuluri-agei Edén: “Lariñahare lubeiti Bungiu hun lun...?” (Agu. 3:1). Lidan ubóu le lábugiñebei lubafu, liibe-agei dan adügatiña gürigia álügüdahani woun le gayaraabei ladügün lun wéiguadun lidoun machouruni, kéiburi: “Inarüni san maha lan Bungiu lun lamarieidun aban wügüri luma wügüri líledi o würi tuma würi tíledi? Inarüni san mínsiñe lan lun Bungiu hefeduhani 25 lidan duusu-hati luma lagunfulirún irumu? Inarüni san maha lan Hubungiute lun lichugún hitaü huagu? Inarüni san maha lan aban Bungiu hínsiñehabuti lun hóundaragun hama hiduheñu ha bugawaañabaña lídangiñe damuriguaü?”
17. a) Ka lunbei wadügüni dan le hadügün gürigia álügüdahani woun le gayaraabei ladügün lun liábingua machouruni woun? b) Según Kolosana 2:6, 7, kaba wibiha ánhawa adügei ítara?
17 Lunti chouru wamá luagu wafiñen. Gayaraati ladügün álügüdahani le erederubei wachügüwagu móunabunga lun liábingua saragu machouruni woun darí lun lagadeiruni ligaburi wasaminan luma wafiñen. Ligíati, ka lunbei wadügüni? Ariñagatu Lererun Bungiu woun lun wasansiruni ligaburi wasaminan luma lun wachoururuni wagía woungua ka lan lugundanbei Bungiu woun, ‘le buídubei, luma le úaraguabei’ (Rom. 12:2). Líderagubadiwa waturiahanu Bíbülia sagü weyu lun wachoururuni inarüni lan le wafurendeirubei tídangiñe. Lanwoun lira, wachoururubei sunsuinagubei buidu lan lilurudun Heowá. Ábameti ítara wamá kei aban wewe to héreti tílagüle ani werederuba ragüñu ‘deregüdagu lidan wafiñen’ (aliiha huméi Kolosana 2:6, 7).
18. Kaba íderaguawa adiseda luéi lagübüri saminaü le lídanbei ubóu le lábugiñebei lubafu Satanási?
18 Úati ni aban lunti lederebudagüdüni wafiñen; wagía woungua lunbei wadügüni. Ligíati, sigí wamá asansirei ligaburi wasaminan. Furíei wamá súnwandan lun Heowá ani amuriaha waméi lani sífiri sandu. Ráramagua wamá asaminara hulili, akutiha waméi ligaburi wasaminan luma le wadügübei. Áluaha wamá umadagu buítiña; óundaragua wamá hama gürigia ha lúnbaña híderaguniwa asansirei ligaburi wasaminan. Lau wadügüni sun katei le, gayaraabei wadisedun luéi lagübüri saminaü le lídanbei ubóu le lábugiñebei lubafu Satanási ani wagünrinchagubei “sun aritaguni le múaranbei luma linarün Bungiu, luma sun katei le abusenrubei lerederuni lasubudirúniwa Bungiu” (2 Ko. 10:5).
UREMU sjj 48 Adüga waméi lugundan Heowá sagü weyu
^ par. 5 Buidu lan yebe o wuriba lan, gániti ligaburi wasaminan luma ligaburi wagüriarún, ligaburi wéchugüdüniwa luma ligaburi arufudahani le weresibirubei. Másiñati ru wamá fe luagu fiu luriban igaburi le aniheinbei wawagu. Wafurendeiruba lidan arütíkulu le ida luba lan wagidaruni luriban igaburi le wawariua.