ARÜTÍKULU LÁNINA ATURIAHANI 26
Íderagua wamaaña wíbirigu agagibudagua luma lénrengunga
“Abagarida humá sun huguya lidan úarani luma lau gudemehabu hídangua, hínsiñegua huguyame hungua keisi iduheñu luéigiñe Hesukrístu. Areida humá, ǘnabugu ligíame hanaagun hungua” (1 FE. 3:8).
UREMU sn 50 Arufudahati Bungiu ínsiñehabuni woun
LE LUNBEI WATURIAHANI *
1. Ka gayaraabei wadügüni lun wáyeihani Wáguchi Heowá le hínsiñehabubei?
WÉIRITI wínsiñe lun Wáguchi Heowá le hínsiñehabubei (Huan 3:16). Kei busén wabéi wáyeihani, áfaaguatiwa lun warufudun areiduni, ínsiñehabuni luma saragu gudemehabu houn sun gürigia, “hóuntima waduheñu lidan afiñeni” (Gal. 6:10; 1 Fe. 3:8). Busentiwa wíderaguniña waduheñu lidan afiñeni dan le hásügürün lídangiñe lénrengunga.
2. Kaba wakutiha lidan arütíkulu le?
2 Sun ha busenbaña lun lubúeingu hamá Heowá, hagagibudaguba luma burí sügǘ hénrenguti (Mar. 10:29, 30). Másiñati wagagibudaguba lan luma saragu óuchawaguni eibu agumucheina lan ubóu le. Ida luba wíderagun wámagua? Furumiñe, akutiha wamá luagu le tabahüdagubei Bíbülia luagu Lotu, Hobu tuma Noemí. Lárigiñe, wayanuhaba luagu fiu lénrengunga le úmabei hagagibudagua wábirigu luma ida luba lan wíderaguniña agagibudagua luma.
GAGURAASUN WAMÁ
3. Ida liña larufuduni 2 Féduru 2:7, 8 chará lan Lotu lau lanúadirun lawinwandun Sodoma ani ka asuseredubei?
3 Charati meha Lotu lau lanúadirun lawinwandun Sodoma, aban uburugu le buinbei lau magíaguni (aliiha huméi 2 Féduru 2:7, 8). Inarüni awanse lan meha uburugu ligía, lau sun lira, wuribati lidin lun Lotu lau láguyun awinwanda ñeinhin (Agu 13:8-13; 14:12). Genegeti weiri lan línsiñe uburugu ligía tun lani weiriou o hínsiñe hamá fiu gürigia ha ñéinbaña tun ha maganbadibaña lun Heowá. Hilatu danbei lóunahanbei Bungiu watu luma súfuru luagun fulasu ligía. Samina wamá hawagu bián lisaanigu Lotu gadaradun haaña meha hama wügüriña ha óunwegubaña Sodoma. Ligíati féridi lumutu Lotu luban, lúmati ani létima hírubei, féridi lumutu giñe lani weiriou (Agu. 19:12-14, 17, 26). Íbini lidan dan hénrengu ligía, meferidirun lumuti Heowá liguraasun lubá Lotu.
Arufudati Heowá gudemehabu lun Lotu luma houn liduheñu, aba lóunahan bián ánheligu lun lesefuruniña. (Ariha huméi párafu 4).
4. Ida liña gaguraasun lan Heowá lubá Lotu? (Ariha huméi dibuhu le luágubei tidáü)
4 Íbini anúadira lan Lotu lawinwandun Sodoma, gaguraasunti Heowá lubá ani óunahati fiu ánheligu lun lesefuruni hau liduheñu. Gama lumoun lubaragiñe hamuga gaganbadi lan lun láfuridun lídangiñe uburugu lau lóufudagun, ábarüga “ladarasahan Lotu”. Mosu buga hárügüdüni ánheligu dandu lúhabu, kei túhabu lani weiriou luma háhabu lisaanigu lun híderaguniña anuraha (Agu. 19:15, 16). Ábati hariñagun ánheligu houn lun hanurahan luagun burí wübü (Agu. 19:17). Lubaragiñe hamuga gaganbadi lan, aba lamuriahan Lotu luma Bungiu lun lígiruni awinwanda lidan aban uburugu le yarafati (Agu. 19:17-20). Gaguraasunti Heowá lubá ani aganba lumuti ani ígirati lun ladügüni le lariñagubei. Fiu dan lárigiñe, aba lanufudedun Lotu lerederun awinwanda lidan fulasu ligía ani aba lidin aganawa dabíararugu, ítara kei meha lariñaguni Heowá lun furumiñe lun lidin ñeinhin (Agu. 19:30). Chóuruti arufuda lan Heowá óunwenbu gurasu. Ariha waméi ida luba lan wáyeihani.
5, 6. Ida liña líderaguniwa le lariñagubei 1 Tesalónikana 5:14 áyeihei Bungiu?
5 Ítara kei Lotu, gayaraati anihein lan aban íbiri lidan damuriguaü le adügübei somu katei le mabuidunti ani aban lasufurirun saragu ladüga le lanügübei le ladügübei. Anhein ítara liña lubéi, kaba wadüga? Háfuga liabin woun lun wariñagun lun lalubahañein lan le lábunagubei, íbini inarüni lan (Gal. 6:7). Gama lumoun gayaraati wadügün aban katei buídutimati: Lau wáyeihani ligaburi líderaguni Heowá Lotu. Ida?
6 Óunahati Heowá ánheligu mámarügü lun hawisaruni Lotu luagu lagünrinchawagúa lan Sodoma, íderagua hamuti giñe anuraha. Ítarameme, háfuga mosu lan giñe wíchugun eweridihani lun aban íbiri dan le wíchugun fe ladügüña lan somu katei le lunbei lanügün turobuli lun. Ani háfuga giñe gayara lan wíderaguni. Íbini anhein ásügüra saragu dan lun lafalaruni adundehani tídangiñeti Bíbülia, gaguraasun wamá lubá. Áyeiha wamaña bián ánheligu hagüra. Lubaragiñe weferidiruni waguraasun luma wadisedun luéi íbiri, áluaha wamá ida luba lan wíderaguni (1 Huan 3:18). Háfuga mosu lan wíchugun aban úhabu lun lun wíderaguni afalarei adundehani huuti le tídanbei Bíbülia (aliiha huméi 1 Tesalónikana 5:14).
7. Ida luba wáyeihani ligaburi larihini Heowá Lotu?
7 Gayaraati hamuga buga lúnrügü lan lichara Lotu letenira Heowá, lau sun lira, madügün lumuti. Saragu dan lárigiñe, yusu lumuti Bungiu apostolu Féduru lun lariñagun luagu Lotu aban lan meha wügüri richati. Ma wagundan luagu mama lan lun wachara letenira Heowá (Sal. 130:3). Áyeiha waméi lani hénpulu ani lun lan lubuidun hagaburi wíbirigu wetenira. Anhein wadüga ítara, gaguraasun timaabadiwa habá, ani ménrenguntimabei giñe houn hánharun lun wíderaguniña.
ARUFUDA WAMÁ GUDEMEHABU
8. Kaba ínchahawa arufuda gudemehabu?
8 Gagibuguati giñe Hobu luma saragu lénrengunga, gama lumoun mama luagu luriban lanúadirun kei Lotu. Kei wasubudiruni, féridi lumuti lúmati, lubara hadan lílana fulasu luma lubuidun látuadi. Ani létima hírubei, féridi lániña sun lisaanigu. Lanwoun lira, chülütiña ǘrüwa ha uágubaña hariñaga lumadagu lan íchiga lidurun, lubaragiñe hamuga híchugun gurasu lun. Ka uagu marufudun
habéi gudemehabu lun? Aban lídangiñe ladüga, máfaagun hamá hasubudiruni kátima lan asuseredubei lun Hobu. Ábati hagumeserun asaminara wuriba luagu, ru hagía lidurun. Kaba íderaguawa lun masuseredun lan ligiaméme woun? Furumiñe, gunfuranda waméi Heowarügüñein lan asubudirei sun le asuseredubei lun aban gürigia. Ru wamá burí arigei lun le lariñagubei aban íbiri le asufurirubei. Ua lan gufuruma wamá láurügü waganbuni. Áfaagua wamá wasandiruni ligarigu. Ítararügübei gayara lan warufudun gudemehabu inarüniti lun.9. Anhein gudemehabu wabéi, kaba katei madügün wamá, ani ka uagu?
9 Anhein gudemehabu wabéi, maburuchaguagüdübadiwa ariñahani luáguti haturóbulin wíbirigu. Gadei lumuti gürigia le adügübalin katei le damuriguaü, madügünti lun derebugu lan damuriguaü (Ari. 20:19; Rom. 14:19). Mabuidunti ligaburi, ua ligía gunfuranda lániña amu, ani bulesei lumuti le lariñagubei hanigi gürigia ha asufurirubaña (Ari. 12:18; Efe. 4:31, 32). Ligía buídutima lubéi lun wetenirun lun lubuidun hagaburi gürigia luma lun wasaminarun ida luba lan wíderaguniña agagibudagua luma lénrengunga.
Anhein ayanuha aban íbiri lidan aban igaburi masaminarunga, aganba waméi lau gaguraasuni ani ru wama gurasu lun lau le wariñagubei lidan dan le buídutimabei. (Ariha huméi párafu 10 luma 11). *
10. Ka larufudahabei le ariñawagúbei lidan Hobu 6:1-3 woun?
10 (Aliiha huméi Hobu 6:1-3). Anihein burí dan le ídanbei layanuha Hobu lau “anarimeni” o masaminarunga. Dan lárigiñe aban lariñagun mabuidun lan fiu katei le lariñagubei (Hob. 42:6). Ítara kei Hobu, gayaraati burí giñe hariñagun gürigia ha asufurirubaña ladüga somu turobuli wéiriti somu katei masaminarunga ani lárigiñe aban hasakürihan luagu le hariñagubei. Ida luba hamuga wóunabun? Lubaragiñe wíchugun lidurun gürigia, arufuda wamá gudemehabu lun. Haritagua waméi lúmagiñe lan furumiñeti dan mabusenrun lan Heowá lun yebe hasufuriruba lan gürigia ni lun gaturobulin hamá ni lun hasufuriruni idiheri le aniheinbei uguñe weyu. Ligíati gunfurandawati dan le layanuhan aban lubúein Bungiu úaraguati lidan aban igaburi masaminarunga dan le lásügürüña lan lídangiñe lénrengunga. Íbini hamuga anhein ariñaga somu katei luagu Heowá o wawagu le mama inarüni, moun lumuti wóufudahan agañida luma ni lun wíchugun lidurun (Ari. 19:11).
11. Ida luba háyeihani wéiyaaña lidan afiñeni Eliú dan le híchugun eweridihani?
11 Anihein dan megei lan aban kristiánu le asufurirubei ladüga somu turobuli wéiriti lun lererehóun lun (Gal. 6:1). Ida luba hídehan wéiyaaña lidan afiñeni? Lau háyeihani Eliú, le aganbubalin Hobu lau saragu gudemehabu (Hob. 33:6, 7). Lubaragiñe lererehan lun, áfaaguati Eliú furumiñe lun lachoururuni buidu gunfuranda lani le lasaminarubei Hobu. Gayaraati háyeihani wéiyaaña lidan afiñeni le ladügübei Eliú lau híchugun arigei lun le lariñagubei gürigia le asufurirubei, áfaagua hagíame gunfuranda hamani lásügürün. Ítara, gayaraabei ménrenguntima lan lun gürigia lánharun tídangiñe sun lanigi lun eweridihani le ichugúbei lun.
RU WAMÁ GURASU LAU WERERUN
12. Ida liña tasandiragun Noemí tungua lárigiñebei lounwen tani weiriei hama bián tisaanigu?
12 Aban meha würi úaraguatu Noemí ani hínsiñeti meha Heowá tun. Lau sun lira, lárigiñebei lounwen tani weiriei hama bián tisaanigu aba busén tan tasansiruni tiri luagu Mará, mini lan iri le, ‘igifini’ (Rudu 1:3, 5, 20, 21). Rédeitu meha Rudu, aban hádangiñe tídiñugu Noemí, tuma lidan sun tasufurirun. Mama íderaguarügü tumutu lidan le temegeirubei, rutu giñe gurasu tun lau le tariñagubei. Íderagua tumutu ani arufudatu ínsiñehabuni tun lau burí dimurei le áfuriduti tídangiñe sun tanigi ani le ménrengunti (Rudu 1:16, 17).
13. Ka uagu mégeiwa lubéi lun lichugún ídemuei tun würi to eferidirubalin tani weiriei o wügüri le eferidirubarun lani weiriou?
13 Dan le tounwen lani aban íbiri lídangiñeti damuriguaü weiriou, megei lumuti wídehan. Gayaraati wariñagun ítara haña lan aban feru maríeitiña kamá bián tídibu wewe le aweiridubei úara aban lóubagiñe aban. Lau lásügürün dan aba lárügüdagun lílagüle lúmagua. Anhein áluguchua aban lídangiñe tídibu wewe ani aba lounwen, gayaraati giñe lasufurirun le aban tídibu wewe saragu. Ítarameme, barüti lounwen aba hádangiñe maríeitiña lanarime íruni luagu saragu dan. Ariha waméi le asuseredubei tun Paula, * to eferidirubalin tani weiriei sódini. Ariñagatu: “Aba lasansirun gádantina ani aba nasandiragun nungua nábugua. Aba neferidiruni besi numada. Adimurehatina meha luma nani weiriei luagu furumiñeguarügü katei. Ñeinñein meha numa dan le gunda nan luma dan le hiru nan. Súnwandan meha laganbunina dan le nabahüdaguni nituróbulin lun. Aba nasandirun kamá hamuga guchaaña somu fánreinti nuéigiñe”.
Ida luba wíderaguniña ha eferidirubaña hámari? (Ariha huméi párafu 14 luma 15). *
14, 15. Ida luba wíderaguniña ha hilaañabaña úmari?
14 Ida luba wíderaguniña ha hilaañabaña úmari? Furumiñeti katei le lunbei wadügüni, ayanuha wamá hama gürigia hagía íbini mabuidun lan wasandiragun woungua lun wayanuhan hama o ibidiñe lan woun kaba lan wariñaga houn. Sigitu Paula ariñaga: “Gunfuranda numuti masandiragun hamá gürigia houngua buidu dan le hayanuhan luagu óunweni. Nidiheritiña luéi hariñagun somu katei le mabuidunti. Gama lumoun wuribatimati ánhaña mariñagun ni kata”. Másiñati magurabun hamá gürigia ha egeburihaña lun wariñaguba lan somu katei le dǘgüdati houn. Ariñagatu Paula: “Seremei numutiña meha numadagu láurügü hariñagun nun, ‘sarí numuti’”.
15 Ariñagati William le eferidirubarun lani weiriou fiu irumu guentó: “Hínsiñeti nun lun habahüdahan amu nun katei buiti le haritagubei tuagu nani weiriou. Arufudati le nun hínsiñe tan meha nani weiriou houn. Íderagua lumutina katei le saragu. Ruti le hariñagubei gurasu nun, ladüga hínsiñe tan meha nani weiriou nun tídangiñe sun nanigi ani súdinitu meha nun”. Ariñagatu Bianka: “Ruti gurasu nun lau hafurieidun amu numa, aliiha hagía aban o bián bérusu tídangiñeti Bíbülia nun. Íderagua lumutina dan le hayanuhan nun luagu nani weiriei aganba hamana dan le nayanuha houn luagu”.
16. a) Ka lunbei wasigirun adüga hawagu ha hilaañabaña úmari? b) Según Santiagu 1:27, ka wánibei buligasion?
16 Ítara kei redei tan Rudu tuma Noemí, lunti giñe wasigirun íderaguaña ha hilaañabaña úmari. Ariñagatu Paula to buga uáguboun wayanuha: “Ibihatina saragu ídemuei lárigiñebei lounwen nani weiriei. Dan lárigiñe, aba hagiribudun gürigia lidoun hadeiragun houngua. Gama lumoun sánsiha meha nibagari sunsuinagubei. Lunti gunfuranda hamani gürigia megei hamá ha egeburihabaña ídemuei luagu saragu hati o luagu saragu irumu”. Inarüni luagu ámuñegueinarügü hamá gürigia ani ámuñegueinarügüti hawinwanduni hagarigu. Añahein hagía fureseti hánharun lun iseri gádantiña. Ánhañati amu, súfuritiña sagü hadügün somu katei le meha hadügübei hama ha óunwegubaña. Mabulieida waméi ru lani Heowá chansi luma buligasion woun lun wíderaguniña ha hilaañabaña úmari (aliiha huméi Santiagu 1:27).
17. Ka uagu megei habéi ha ígiruabaña lun wíderaguniña?
17 Ámuya katei le anügübei saragu idiheri luma anufudei houn maríeitiña dan le hígiragun. Kei hénpulu, aba lígirunu tani Joyce weiriei tuagu amu würi, ariñagatu: “Gáritimati ígiraguni nun sügǘ luéi hamuga hilaarügü lan nani weiriei. Lun hamuga hilaarügü lan lidan somu danaguaü o láfarun lan somu sandi, subudi numuti mama lan ligía anúadirubalin. Lidan kesi le, ígirarügü lumutina. Aba nasandiragun nungua kei ni kata”.
18. Ka lunbei wadügüni lun wíderaguniña ha eferidirubaña hámari?
18 Mégeitiña ha ígiruabaña o ha hilaañabaña úmari umadagu buítiña sügǘ lau amu dan (Ari. 17:17). Ida luba warufuduni houn aban wamá umadaü buiti? Lau wadügün lirahüñü katei buiti hawagu le arufuduti houn hínsiñe hamá woun. Háfuga gayara lan wagunbirahaniña eiga murusunraü wama, wásügürün murusun dan hama, o wagunbirahaniña apurichiha wama. Anihein dan gayaraati giñe wagunbirahaniña lidoun wáhuduragun lun Bungiu kei iduheñu. Anhein wadüga ítara, wagundaragüdüboun lanigi Heowá, lugundun yarafati houn “ha gáribei hasandirunu hanigi”, ágüdaha laña “würiña ha hilaguaaña hámari” (Sal. 34:18; 68:5).
19. Kei lariñaguni 1 Féduru 3:8, ka katei aranseñu wabéi lun wadügüni?
19 Yarafa madise, danme le lagumadihan Larúeiha Bungiu Ubouagu, labulieidúaba “binadu burí nidiheri”. Ayumahatiwa lun lachülürün dan lun “labulieidúaba sun le sügühalibei, úaalime aritaguti luagun” (Isa. 65:16, 17). Ligíati, íderagua wamá wámagua ani arufuda waméi lau le wariñagubei luma le wadügübei hínsiñe hamá sun ha tílanabaña lóundarun Heowá woun (aliiha huméi 1 Féduru 3:8).
UREMU sjj 111 Katei le íchugubei ugundani woun
^ par. 5 Seriwiti meha Lotu, Hobu tuma Noemí lun Heowá lau úaraguni, lau sun lira, gagibuguatiña luma lénrengunga lidan habagari. Lidan arütíkulu le, wakutihaba luagu le wafurendeirubei lídangiñe le asuseredubei houn. Warihuba giñe ka lan uagu súdini lubéi lun gaguraasun wamá habá íbirigu ha asusufurirubaña lau warufudun gudemehabu houn luma lun wíchugun gurasu houn lau wererun.
^ par. 13 Lidan arütíkulu le, sánsiwaali iri.
^ par. 57 LE ARIÑAWAGÚNBEI TUAGU IYAWAÜ: Aban íbiri lauñein saragu idiheri lidan anihán lan layanuhaña masaminarunga laganbuñein aban wéiyaali lidan afiñeni lau gurasu. Dan lárigiñe, dan le darangilu haali íbiri, ruti wéiyaali lidan afiñeni adundehani lun lau ínsiñehabuni.
^ par. 59 LE ARIÑAWAGÚNBEI TUAGU IYAWAÜ: Aba feru maríeitiña ásügüra dan luma aban íbiri le sun líñabei leferidirunu lani weiriou. Lidan añahán lan aríagua fiu iyawaü aba hayanuha luagu lubuidun meha hásügürüni tuma.