Tátulerawagun aban binadu abürüdǘni
Dan le tadarirubei murusun tárigirugu hóuburatu lidan fulasu le gíribei Ein Gedi, lidan irumu 1970, siñati meha taliihóun ladüga gudaaru meha. Gama lumoun seremei lídehan aban luwuyeri máhina escaneo tridimensional dariwati fiu bérusu le lánina tagumeserun haliburun Fádirigu le ñein lubéi ladarirúa liri Bungiu.
Lidan irumu 1970, daritiña fiu akutihatiña libügürü binadu burí umegeguni aban binadu abürüdǘni gudaaru lidan aban fulasu gíriti Ein Gedi (Ísüraeli), yarafa lun barana Hilaali. Darí hamutu lidan hachiahaña lan tidan aban haligilisin huríu to agudúnboun dan le lagünrinchawagunbei fulasu ligía, másiñati lidan lan sígulu sisi lidan wadaani. Wéiriti tágudun hóuburatu tuguya darí lun siñá lan taliihóun. Le lúgubu, siñati meha tátulerawagun lun mafuruhanboun lan. Kati adügǘbei lun tátulerawagun binadu abürüdǘni tuguya luma lun laliihóun le abürüdǘbei tidan? Seremei lun aban luwuyeri máhina escaneo tridimensional luma lun aban programa tídangiñeti konputadora le ídehabei lun ladügǘniwa akutihani tuagu iyawaü.
Arufudatu iyawaü tuguya aban lan binadu abürüdǘni tídangiñeti Bíbülia. Lidan lárigirugu le águdubei dariwati fiu bérusu le lánina tagumeserun haliburun Fádirigu. Anihein Tetragrámaton, gádürü létüra burí le aubei labürüdǘwa liri Bungiu lidan ebüréu tidan. Genegeti hóuburatu lan tuguya lúmagiñetu lan labadinagua irumu 50 darí irumu 400 lidan wadaani. Adügati katei le lun tasubudiruniwa kei aban binadu abürüdǘni tídangiñeti Bíbülia tótima binaduharuboun to adarirúboun lúmagiñe tadarirúniwa hóuburatu to adarirúboun yarafa lun barana Hilaali lidan aban fulasu gíriti Qumrán. Abürühati Gil Zohar tidan aban periodiku gíritu The Jerusalem Post: “Chülüdüga dan lun gayaraabei lan laliihóuniwa fánreinti tídangiñe haliburun Fádirigu to adarirúboun Ein Gedi, sügühali meha kéiburi milu irumu lúmagiñe tadarirún Hóuburatu to adarirúboun yarafa lun barana Hilaali (bián milu irumu tau hóuburatu tuguya lidan lagumuhóun tidaani tibiaman ténpulu) lumoun tadarirún Dugumedu to adarirúboun Alepu (to abürüdǘboun lidan sígulu diisi lárigiñe lidaani Hesusu). Ariñagatiña sásaamu ídeha lan hibihin haliihanu hóuburatu to lun lachoururúniwa madügüngili lan lásügürün saragu milu irumu ni charati le hadügübei abürühatiña lun lasansirun ariñahani le tídanbei dugumedu to unboun hagúara Torá”.