SUN wagía, subudi wamuti adundeha lumutiña lan Heowá lumutuniña ani góunigilei hamadagua luma lidan “lagumuhóun dan” le (2 Tim. 3:1). Gama lumoun kada aban wádangiñe lunti gaganbadi wamá lun. Genegeguati le wawinwandubei luma le hawinwandubei ísüraelina lidan fulasu mageirawati. Mosu meha hadügün gasu dan le tinwinrún fidu.

Ariñagati Heowá lun Moisesi lun ladügün bián fidu lautu pülata, nadagimeinwatu lau marüdiyu lun teseriwidun lun lagúarun “houn gürigia lun hóundaragun” (1 Lur. 10:2). Lunti meha hínwinrunu fádirigu fidu lidan ámuñegueinarügü igaburi lun hasubudiruni ísüraelina ka lan lunbei hadügüni (1 Lur. 10:3-8). Uguñe weyu, wagía lubúeingu Bungiu aganbatiwa ámuñegueinarügü ligaburi “tinwinrún fidu”. Ariha wamá ǘrüwa sügǘ le genegeguabei luma tinwinrún fidu lidan binadu dan, kéiburi: dan le wagunbirahóun lidoun burí adamurini wéinamuti, dan le lichugún adundehani houn wéiyaaña lidan afiñeni luma dan le lichugún iseri adundehani lun burí damuriguaü.

Dan meha busén lan Heowá lun “hóundaragun gürigia” ligibugiñe tubenari kianpu lánina óundaruni, aba meha hínwinrunu fádirigu biángubei fidu (1 Lur. 10:3). Sun meha türibu ha meha erederubaña geyegu tau kianpu lánina óundaruni lidan gádürü fánreinti, aganba hamuti tinwinrún fidu. Másiñati furesetimati lan hachülürün ísüraelina ha meha yarafatimabaña tun kianpu. Gama lumoun háfuga barǘ lan saragu dan luma áfaaguni lun hachülürün hátima erederubaña dise. Meberesenga halía lan hawinwanda, busenti meha Heowá lun hóundaragun súngubei luma lun haganbuni ladundehan.

Uguñe weyu, agunbirahouatiwa lidoun adamurini wéinamuti. Gama lumoun, mama tidoun aban kianpu woudin, lidoun burí adamurini wéiriti luma burí amu adamurini espechaliti woudin le ñein lubéi wibiha ariñahani luma adundehani súdiniti. Lidan sun ubóu, sun lubúeingu Bungiu ha ánharubaña lun agunbirahani le sagatiña buiti lídangiñe ligiaméme ariñahani kei lumutuniña Bungiu ha gúndaabaña. Lun hachülürün lidoun adamurini ligía añahein amu dísegiñe hayabin hawéi ha híbiri. Íbini ítara, sun ha ánharubaña lun agunbirahani ligía ariha hamuti barǘ lan áfaaguni le hadügübei buiti.

Kaba hamugati wariñaga hawagu íbirigu ha lídanbaña sétanu le burí díseti luéi fulasu le ñein lubéi ladügǘwa adamurini wéiriti? Seremei lun teknolohía le uguñebei weyu, sagatiña íbirigu buiti lídangiñe ligiaméme ariñahani ani sandiguatiña houngua kamá hamuga añaha haganagua ha híbiri íbirigu. Lidan aban bisida le ladügübei íbiri le lóunahabei musu úaraguati abisidahóun Beteli to Beninboun, sügügüdawati programa lidoun Arlit (Níger), aban aüdü le lídanbei fulasu mageirawati Sahara. Chülütiña 21 íbirigu hama gürigia ha busentiña hafurendeirun. Íbini dísetiña lan hawéi 44,131 íbirigu ha achülürübaña  lidoun adamurini, sandiguatiña houngua kamá hamuga añahein lan haganagua. Abürühati aban íbiri: “Busentiwa weteingirunün tídangiñe sun wanigi ladüga hásügüragüdüni adamurini le woun. Arufudati katei le woun awanhein lan tidan hanigi”.

Dan le hínwinrunu fádirigu aban tídangiñe fidu, “hábutirügübaña türibu” óundaragua tigibugiñe kianpu (1 Lur. 10:4). Ñein meha líchiga Moisesi ariñahani luma adundehani houn luagu ida luba lan hetenirun lun hani türibu. Lun hamuga wagía lan aban hádangiñe ábutigu hagía, wadügüñein hamuga san sun wayaraati lun ñein wamá lidan adamurini ligía luma lun wasagarun buiti lídangiñe?

Uguñe weyu, mama “ábutigu” lidan damuriguaü wéiyaaña lidan afiñeni, móuserun hagía “kamá hamuga” hagía haburiña lumutuniña Bungiu ha lábugiñebaña haríaahan (1 Fe. 5:1-3). Íbini ítara, áfaaguatiña lun hadundehaniña lumutuniña Bungiu lau sun hayara. Ligíati hánharunbei lau sun hagunda dan le hagunbirahóun lun hibihin lanwoun adundehani, kei dan le houdin tidan Leskuela houn Wéiyaaña hama Ídehatiña. Ítara liña habuiduragüdüni ligaburi hetenirun lun sun katei lánina damuriguaü. Seremei adundehani le heresibirubei, dandu wéiyaaña lidan afiñeni hama amu íbirigu gayaraatimahali hayarafadun lun Heowá. Íbini anhein mídingidiwa lubéi tidan burí leskuela to, gayaraati wasagarun buiti lídangiñe le hafurendeirubei wéiyaaña lidan afiñeni.

Anihein meha dan, gabügürüguati ani chátiti meha hínwinrunu fádirigu fidu. Ítara liña meha hawisarúniwa ísüraelina busén lan Heowá lun hasigirun awansera (1 Lur. 10:5, 6). Arufudati ligaburi hawanserun furí hamá lidan aban lubuidun aransehani, lau sun lira, mégeiwati meha saragu áfaaguni hámagiñe súngubei. Háfuga hénrengu lan houn fiu hádangiñe lun hamufurun. Ka uagu?

Háfuga añahein hagía saminatiña gabügürügua lan tinwinrún fidu lun hamufurun ani lidan dan magurabunti. Ariñagatu Bíbülia anihein lan meha dan “árieburügüñein leredera dúeri, larugan binaafin aba liñuragun lungua” ani anihein meha giñe dan barüti “bián weyu, o aban hati o aban irumu” lubaragiñeya liñuragun (1 Lur. 9:21, 22). Átiri ñein meha san wéiyaasu hamufurun ísüraelina? Ariñagatu Bíbülia lidan 2 Lúrudu kapítulu 33, bián-weinñein lan fulasu le ñein lubéi hararamagua ísüraelina.

Másiñati darí hamá meha ísüraelina somu fulasu le ñein lubéi lamuña, aban fulasu buiti lidan lueirin fulasu mageirawati le denchati (2 Lur. 1:19). Másiñati aba lan hasaminarun ánhaña lan ñüdün ñéingiñe madaribubaña lan aban fulasu buiti libe le lunbei hígiruni.

Dan meha le gabügürügua lan tínwirun fidu ani chati ligía, sun meha türibu aganba hamuti ani mama súngubei lun háfuriduba lidan ligiaméme dan. Másiñati sandí hamá fiu ísüraelina maguraasuni ladüga machülügili lan hadaani lun háfuridun. Dan meha le chati lan tínwirun fidu, arufudati mosu lan hiñuragun furumiñeti ǘrüwa türibu ha meha luéigiñebaña oubaü le ñéingiñe lubéi laboucha weyu: Hudá, Isakárü luma Sabulón (1 Lur. 2:3-7; 10:5, 6). Lárigiñe meha ñǘdünhaña furumiñeti türibu, ábaya hínwinrunu fádirigu fidu luagu murusun dan lun meha harufuduni houn türibu ha meha luéigiñebaña suru óuraali lan lun hiñuragun. Ítara liña hadügüni darí lun houdin súngubei.

Háfuga hénrengu lan woun lun wánharun lun somu asansiruni le tadügübei lóundarun Heowá. Másiñati aba lan wadiheridun dan le warihin saragu asansiruni le magurabunti. Gayaraati sandigua wamá woungua buídutimati lan meha ladügǘniwa katei lidan binadu dan ani mabusenruntiwa hamuga lun lasansirun ni kata. Meberesenga le asusereduti, háfuga genege lan woun lóuchawaguña lan waguraasun ani barüti saragu dan lun wéchudun. Íbini ítara, subudi wamuti mosu lan wadügüni. Ánhawa áfaagua, warihibei labinirubadiwa lan Bungiu.

Lidan lidaani Moisesi, adundeha lumutiña Heowá saragu míñunu gürigia, dandu wügüriña, würiña hama irahüñü lidan haweiyasuha lidan fulasu mageirawati. Siñabei hamuga hawinwandun lun hamuga móunigirun lániña Heowá madundehalaña. Lidan lagumuhóun dan hénrenguti le, adundeha lumutiwa giñe Heowá íderagualawa lun héreñu lan wamadagua luma. Ligíati, adüga waméi sun wayaraati lun gaganbadi wamá kei meha gaganbadi hamá ísüraelina úaraguatiña, ha meha adügübaña gasu lun ámuñegueinarügü ligaburi tinwinrún fidu.