“Dan le lagumeserubei aban niduhe asigeneha numa, aba nárügüdüni luéigiñe ligiina lun nátigiruni. Busentina meha náfaruni hilagubei” (Paul).

“Dan meha le wábiñe nubéi, ménrengunti meha nun lun nagañidun luagu furumiñeguarügü katei. Günringua numuti meha sun le nadarirubei nubarua, kéiburi haláü, adibiri o amu katei” (Marco).

Másiñati masuseredun lan katei burí le woun. Íbini ítara, anihein dan hénrenguti woun lun wárügüdagun woungua. Ka uagu? Lóugiñe sun katei, ladüga figóu le galagante wabéi lúmagiñe Adán, ligía ménrengun lubéi woun lun wafigouhan (Rom. 5:12). Ítara kei Paul luma Marco, añahein gürigia ha hénrenguti houn lun hárügüdagun houngua. Añahein amu áfaaguatiña lun mígiraguagüdün hamá houngua lun anufudei luma lun luriban saminaü. Añahein giñe amu hénrenguti houn hárügüdagun houngua luéi luriban ayumahani, luéi átaguni o luéi düroga.

Ha márügüdagunbaña houngua luéi luriban saminaü, luriban ayumahani luma luéi luriban igaburi, gayaraati hagadeiruni habagari. Ka gayaraabei wadügüni lun masuseredun lan le woun? Lau warufudun ragüguaü unguaü. Lun lira, akutiha wamá ǘrüwa álügüdahani. Furumiñe, ka san mini lubéi ragüguaü unguaü? Libiaman, ka uagu mégeiwa lubéi? Lǘrüwan, ida luba warufuduni igaburi le, le “líchugubei sífiri”? (Gal. 5:22, 23). Lárigiñe, warihibei ka lan gayaraabei wadügüni kada aban wádangiñe anhein anihein lubéi dan márügüdagun wamá woungua?

Gürigia le arufudubei ragüguaü unguaü mígiraguagüdünti lungua lun le lasandirubei. Lubaragiñe lira, ragüguati lungua luéi lariñagun o ladügün somu katei le mínsiñeti lun Bungiu.

Arufuda lumuti Hesusu woun ka lan mini lubéi ragüguaü unguaü lau lani hénpulu. Ariñagatu Bíbülia: “Dan le hanabuni, móunabunti lau anabahani; dan le hasufuriragüdüni, masíadirun lumutiña; lubaragiñe lira, deregeguarügüti lungua lun Bungiu le aguseragüdübei lau ísuruni” (1 Fe. 2:23). Arufuda lumuti Liráü Bungiu igaburi le lidan anihán lan dibiñu asufurira luagu wagabu ani adüga hagía láganiñu bulu lau (Mat. 27:39-44). Arufuda lumuti meha giñe dan le háluahabei lábutigu relihión “hadügün lun hariñagagüdüni Hesusu katei le uáguti gayara lan hadarirun lidurun” (Mat. 22:15-22). Ani arufudati aban lubuidun hénpulu dan le hagañidunbei fiu huríu luma, áluaha hagía hachamuragun dübü luagun. Lubaragiñe lafayeiragüdüniña luagu le hadügübei, ábarüga “laramudagun, aba láfuridun ténpulurugugiñe” (Huan 8:57-59).

Gayaraati san wáyeihani lani Hesusu hénpulu? Anha, íbini mama lan sunsuinagubei. Abürühati apostolu Féduru: Súfuriti “Kristu huagu lau gurasu, íchiga aban hénpulu hun lun hafalaruni” (1 Fe. 2:21). Íbini gafigoun wamá, gayaraati wáfaagun lun wáyeihani lani Hesusu hénpulu. Ka uagu mégeiwa lubéi lun wadügüni?

Anhein busén wabéi lun wagundaaragüdüni Heowá, mosu warufudun ragüguaü unguaü. Lau sun sügühadiwa lan saragu irumu eseriwida lun Heowá lau úaraguni, gayaraati weferidiruni wamadagua  luma anhein móunigirun wamá le wariñagubei luma le wadügübei.

Ariha waméi lani Moisesi hénpulu, ligía meha “wügüri le manaaguntimabei lungua ubouagu” lidan dan ligía (1 Lur. 12:3). Luagu saragu dan, awanda lumuti lau gurasu hekeharun ísüraelina. Lau sun lira, aban weyu márügüdagunti lungua, aba lagañidun hama ladüga ábaya hekeharun ua lan duna. Lau igañi, aba lariñagun houn: “Aganba humá, maganbaditiña huguya le: Wasagaruba funagia duna lídangiñe dübü le lun hatun?” (1 Lur. 20:2-11).

Márügüdagunti Moisesi lungua. Míchugunti uéiriguni lun Heowá, le úmagiñebei liabin milaguru lun líchugun duna houn (Sal. 106:32, 33). Ligía mígirun lubéi Heowá lun lebelurun lidoun Fulasu Füramasewati (1 Lur. 20:12). Chóuruti asaküriha lan darí weyu le lóunwenbei ladüga márügüdagun lan lungua (2 Lur. 3:23-27).

Ka wafurendeirubei? Furendeitiwa, lau sun sügühadiwa lan saragu dan lidan inarüni, moun lumuti wayanuhan lau menebenehabuni houn gürigia ha adügübaña lun wagañidun o ha mégeibaña somu ererehóuni (Efe. 4:32; Kol. 3:12). Inarüni anihein lan dan féridi lumuti gürigia luguraasun ladüga burí lirumudiri. Gama lumoun haritagua wamá luagu Moisesi. Mabuseruntiwa hamuga weferidiruni wamadagua luma Heowá lárigiñe saragu irumu eseriwida lun lau úaraguni, ladügarügü márügüdagun wamá woungua. Ligíati, ida luba warufuduni igaburi súdiniti le?

Amuriaha wamá sífiri sandu lidan wafurieidun. Ka uagu mosu lubéi wadügüni? Lugundun lídangiñeti igaburi le líchugubei lani Bungiu sífiri ragüguaü unguaü, ani ru lumuti Bungiu lun le amuriahabalin luma (Luk. 11:13). Lau lídehan lani sífiri, ru lumuti Heowá erei le wemegeirubei woun lun warufuduni igaburi le (Fili. 4:13, TNM). Lanwoun lira, gayaraati líderaguniwa arufuda amu igaburi le líchugubei sífiri, kéiburi ínsiñeni, íderagua lumutiwa lúntima ménrengun lan woun warufudun ragüguaü unguaü (1 Ko. 13:5).

Dise wamá luéi sun le adügübei lun hénrengu lan woun lun warufudun ragüguaü unguaü. Dise wamá luéi páhina lánina Internet luma luéi isebáhari le ídanbei larihíwa luriban igaburi (Efe. 5:3, 4). Le linarün katei, lunti wadisedun luéi sun katei le gayaraabei lanügüniwa adüga somu katei wuribati (Ari. 22:3; 1 Ko. 6:12). Kei hénpulu, gürigia le unbei ménrengun lan lun ladügün somu katei le wíyeti, lunti láfaagun lun maliihan lan o lun marihin lan pelikula to ñein lubéi larihíwa achuuhani.

 Háfuga hénrengu lan woun lun wafalaruni adundehani le. Gama lumoun, ánhawa áfaagua, líchugubei Heowá erei le wemegeirubei woun lun wárügüdagun woungua luéi luriban saminaü (2 Fe. 1:5-8). Líderagubadiwa lun wóunigiruni ligaburi wasaminan, ligaburi wayanuhan luma ligaburi wóuserun. Ariha wamuti le lidan likesin Paul luma Marco, ha uágubaña wayanuhan lidan lagumeseha arütíkulu, ibihatiña hárügüdagun houngua lun ua lan furunde hamá. Samina wamá luagu likesin aban íbiri le meha agañidubei lau lumenrengun dan le labugahan. Darí lun lasigeneha hama amu abugahatiña. Ka ladügübei lun lasansiruni igaburi le? Ariñagati: “Furíeitina meha sagü weyu lau sun nere. Aturiahatina meha arütíkulu le burí ayanuhabei luagu ragüguaü unguaü ani furendeitina meha bérusu tídangiñeti Bíbülia le gayaraabei líderagunina. Íbini anahagua lan áfaagua luagu saragu irumu lun nígiruni igaburi le, íderagua lumutina nagumeseruni weyu, asaminara mosu lan nárügüdagun nungua lun darangilu nan. Ani anhein mosu lubéi nidin adüga somu katei, fürigiñetina múnadagiñe lun móufudaha nan”.

Anihein dan marufuduntiwa ragüguaü unguaü. Dan le lasuseredun lira, másiñati samina wamá madüna wamá lun wafurieidun lun Heowá. Gama lumoun ligíatima megei wamá lun wafurieidun lun. Adüga waméi lau lóufudagun. Ayumuragua wamá lun Heowá lun feruduna lániwa, amuriaha wamá luma lun líderaguniwa ani áfaagua wamá lunya madügün wamani ligiaméme charati (Sal. 51:9-11). Laganbubei wafurieidun, ánhawa amuriaha luma tídangiñe sun wanigi lun gudemehabu lan woun (Sal. 102:17). Haritaguagüda lumutiwa apostolu Huan “chibá lumuti lita Hesukrístu sun wafigoun” (1 Huan 1:7; 2:1; Sal. 86:5). Mabulieida waméi ariñaga lan Heowá woun mosu lan feruduna wamaniña amu súnwandan. Ligíati, chouru waméi ladügübei lan ligiaméme woun (Mat. 18:21, 22; Kol. 3:13).

Aba lagañidun meha Heowá luma Moisesi ladüga marufudun lan ragüguaü unguaü luagu murusun dan lidan fulasu mageirawati. Lau sun lira, feruduna lumuti Heowá. Ani ariñagatu Lererun Bungiu aban lan hénpulu lánina afiñeni Moisesi (2 Lur. 34:10; Ebü. 11:24-28). Inarüni mígirun lan Heowá lun lebelurun lidoun Fulasu Füramasewati, íbini ítara, ladügüba lun lawinwandun lidan Paraísu ámuñegü ani líchuguba giñe chansi lun lun lawinwandun lun súnwandan. Gayaraabei giñe wibihini chansi le, ánhawa asigira áfaagua lun warufudun ragüguaü unguaü, aban igaburi le mégeiwati (1 Ko. 9:25).