1. Ka anufudei úmabei gayara lan wagagibudagun?

 SAMINA wamá luagu le hásügürübei fiu gefentiña luagu Heowá. Busenti meha Nestor tuma María, to lani weiriou, lun hapurichiha lidan aban fulasu le ñein lubéi hemegeirúa apurichihatiña. * Lun hadügüni lira, mosu meha hafurendeirun awinwanda lau murusun seinsu. Ani ruti le anufudei houn. Afiñetiña yebe lau magundanbaña lan anhein mibe hámati. Guentó ariha waméi le asuseredubei lun Biniam, le awinwandubei lidan aban fulasu le ñein lubéi máhawa lan lun wapurichihan. Dan le ladügagübei lungua aban gefenti luagu Heowá, aba líchugun fe léibahouba lan giñe. Lau sun ru lan le anufudei lun, anihein meha ábaya katei létima íchugubei anufudei lun: ida luba lan hóunabun liduheñu danme le híchugun fe tuagu iseri lani relihión. Lagumuhóun, ariha waméi tikesin Valeria, to meha uáguboun ladeirúa kánserü. Busentu meha gaganbadi tan lun le tariñagubei Bíbülia lun michugún lan hitaü tuagu ani hénrenguti meha tadarirun aban surusia le inebehabubei lun le tanúadirubei. Le linarün katei, hanufudetu meha luéi tounwen.

2. Ka uagu lunti lubéi wáfaagun lun wárügüdagun woungua luéi anufudei?

² Sandí humaali san aban lídangiñe anufudei le uágubei wayanuha lidan párafu aban? Sandi hamaali fiu wádangiñe. Ánhawa márügüdagun woungua luéi anufudei gayaraati wanúadirun wuriba ani gayaraati giñe lagadeiruni wamadagua luma Heowá. Ani ligía labusenrubei Satanási. Áfaaguati lun maganbadi wamá lun lilurudun Bungiu kei gumadi lun wapurichihani uganu buiti (Aruf. 12:17). Inarüni wuriba lan Mafia, furundeti ani  gabafuti. Íbini ítara anihein aban katei le gayaraabei líderaguniwa agagibudagua luma. Ka katei?

3. Kaba íderaguawa agagibudagua luma anufudei?

³ Siñabei lanufudedagüdüniwa Satanási anhein chouru wabalin hínsiñe wamá lun Heowá ani anihein lan wama (Sal. 118:6). Kei hénpulu, sügüti le abürüdübalin Sálumu 118 lídangiñe fiu lénrengunga. Gíbetiña meha láganigu ani fiu hádangiñe íñuti meha habara (bérusu 9 luma 10). Anihein dan mosu meha lagagibudagun luma ladügüdarun luagu (bérusu 13). Ani ererehati Heowá lun buidu (bérusu 18). Lau sun lira, ariñagati lidan leremun: “Manufudedunbadina”. Ka uagu chouru lubéi lasandiragun lungua? Ladüga subudi lumuti hínsiñememegili lan lun Heowá Lúguchi le siélubei lau sun erereha lan lun. Subudi lumuti abürühati Sálumu aranseñu liña lan Bungiu le hínsiñehabubei lun líderaguni, meberesenga le asuseredubei (Sal. 118:29).

4. Ka luwuyeri anufudei gayaraabei wagidaruni wawariua ánhawa achoururei hínsiñe wamá lun Heowá?

⁴ Mosu lachoururuni kada kristiánu lungua hínsiñe lan lun Heowá. Anhein chouru wabalin le, líderagubadiwa agagibudagua luma ǘrüwa luwuyeri anufudei: 1) anufudei siñabei lan wanuriahaniña waduheñu, 2) anufudei hawéi gürigia luma 3) anufudei luéi óunweni. Íbirigu ha uágubaña wayanuha lidan párafu aban, gidá hamuti anufudei hawariua ladüga hachoururuni hínsiñe hamá lun Heowá.

5. Ka katei gayaraabei ladiheridagüdüniña hachügüdina tílana muna? (Ariha humóun iyawaü to luáguboun tidáü garüdia).

⁵ Kristiánugu ha hachügüdina tílana muna ténitiña buidu buidu lun kárugu le líchugubei Heowá houn lun hóunigiruniña haduheñu (1 Tim. 5:8). Anhein ítara liña lubéi gayaraati nidiheri huma heferidiruni huwadigimari lidan lidaani sandí COVID-19. Gayaraati nidiheri humá luagu siñabei lan héigagüdüniña tílana huban o nidiheri humá luagu siñabei lan hafayeirunu huban. Ani gayaraati hasaminarun anhein lan heferidira huwadigimari siñabei lan hadarirun amu. O, ítara kei Néstor tuma María, ha iridúbaña lidan párafu aban gayaraati samina humá siñabei lan hawinwandun lau murusun seinsu. Ladüga anufudei burí le, ibihaali Satanási lun hígiruni saragu íbirigu heseriwidun lun Heowá.

6. Ka labusenrubei Satanási lun wafiñeruni?

⁶ Busenti Satanási lun wasaminarun meberesen lan Heowá lau kada aban wádangiñe, mínsiñe wamá lun, ani míderagun lubadiwa lan óunigiraña waduheñu. Ánhawa éiguada tidoun sádara to gayaraabei wasaminarun mosu lan wíchuguni wawadigimari lidan furumiñeti lúgaaru, íbini wadüraaguni adundehani le tídanbei Bíbülia.

7. Ka lachoururubei Hesusu woun?

⁷ Úati ni aban asubudiruti Heowá buidu luéidügü Hesusu. Ligía lariñagubei Hesusu woun lau ichouruni: “Lubaragiñe hafurieidun lun Bungiu subudi laali ka lan habusenrubei” (Mat. 6:8). Ani subudi lumuti giñe Hesusu luagu aranseñu liña lan Heowá lun líchuguni le wemegeirubei woun. Wagía kristiánugu hádangiñetiwa giñe liduheñu Bungiu. Ani kei ichügüdinaü lubéi Hesusu gayaraati wachoururuni ladügübei lan lememe lamuriahabei hámagiñe ichügüdinaü lidan 1 Timotéu 5:8.

8. a) Kaba íderaguawa agidarei anufudei luagu siñabei lan wanuriahaniña waduheñu? (Matéu 6:31-33). b) Ida luba wasigiruni hani feru maríeitiña ha tídanbaña iyawaü hénpulu?

⁸ Anhein chouru wabalin hínsiñe wamá lun Heowá ani hínsiñetiña lan giñe waduheñu lun, wachoururubei giñe luagu líchugubei lan le wemegeirubei woun (aliiha huméi Matéu 6:31-33). Busenti Heowá líchuguni  le wemegeirubei woun, ani ru lumuti woun lau ínsiñeni luma areini. Dan le ladügünbalin Bungiu Ubóu, míchugun lumuti lérügü wemegeirubei lun wawinwandun. Lubaragiñe lira, lau saragu ínsiñeni buíngüda lumuti Ubóu lau saragu katei buiti lun gayara lan wagundaarun (Agu. 2:9). Íbini anhein anihein lubéi lérügü wemegeirubei lubá weyu ligía wama, ru wamá eteingiruni luagu anihein lan le wemegeirubei wama. Mígirun lumutiwa Heowá ani anihagua íchigoun “fein to lánina sagü weyu woun” (Mat. 6:11). Lunti gabaroun wamani furumiñeguarügü lan sákürifisiu le wadügübei ni kata lumoun le lunbei líchuguni Wáguchi hínsiñehabuti woun dandu guentó kei ámuñegü. Anihán le larihubei Nestor tuma María houngua (Isa. 65:21, 22).

9. Ka larufudahabei lani Néstor tuma María hénpulu hun?

⁹ Buiti meha libagari Néstor tuma María Kolonbia. Ariñagatiña: “Busentiwa meha lun mibe lan wámati lun waganwoundagüdüni weseriwidun lun Heowá, gama lumoun hanufudetiwa meha wawinwandun láurügü murusun seinsu. Afiñetiwa meha magundanbei lan wabagari ítara”. Ida liña lagidarun anufudei le hawéi? Aba hasaminarun luagu ínsiñeni le larufudubei Heowá houn saragu wéiyaasu. Lau ichouruni luagu lóunigirubaña lan Heowá súnwandan aba hígiruni hawadigimari le fáyeiti. Aba giñe halugurunu haban aba háguyun lidoun aban fulasu le ñein lubéi hemegeirúa apurichihatiña. Ida liña hasandiragun houngua luagu le hanúadirubei? Ariñagati Néstor: “Ariha wamaali lagunfulirun dimurei le lídanbei Matéu 6:33. Ibiha wamuti sun le wemegeirubei. Le linarün katei gúndaatimahadiwa uguñe weyu”.

10. Ka uagu maweiridun tubéi wanigi lanufudedun gürigia luéi gürigia líledi?

¹⁰ Lúmagiñe lebedaagun Adán tuma Ewa lun Heowá, adügaña gürigia dañu hóuniwagua (Apur. 8:9). Kei hénpulu añahein gürigia ha ayusurubalin habafu lun hóuseruniña gürigia wuriba. Añahein furundetiña, anabahatiña ani siadi hamaña hapanaagu ha leskuelarugubaña ani óusera hamutiña haduheñu lau anarimeni. Ligía hanufude lubéi gürigia luéi gürigia líledi! Ida liña layusuruni Satanási anufudei le?

11, 12. Ida liña layusuruni Satanási anufudei le wasandirubei hawéi amu gürigia?

¹¹ Yusu lumuti Satanási anufudei le wasandirubei hawagu amu gürigia lun wígiruni wapurichihan o lun magunfulirun wamá lau amu lugumadin Heowá. Adügati lun hamahadun  fiu gumadimatiña lun wapurichihan luma lun héibaahaniwa (Luk. 21:12; Aruf. 2:10). Lidan ubóu le lábugiñebei lubafu Mafia, añahein saragu gürigia aburuchaguagüdütiña iyeeni hawagu gefentiña luagu Heowá. Ha afiñerubaña lun iyeeni burí le gayaraati hagarabaagun wawagun, hadügün bula wau o hóuseruniwa wuriba (Mat. 10:36). Ani maweiridagüdün tumuti sádara to layusuruboun Satanási wanigi, ladüga lúmagiñe furumiñeti sígulu tuguya layusuruboun (Adü. 5:27, 28, 40).

¹² Mámarügü anufudei luéi héibaahaniwa gumadimatiña layusura Mafia. Yusu lumuti giñe anufudei le hasandirubei gürigia luagu kaba lan hariñaga haduheñu hawagu ánhaña adügagua houngua gefentiñame luagu Heowá. Añahein hagía hanufudetimaatiña luéi kaba hariñaga hawagu sügǘ luéi lagayuahóun hawagu. Kei le weiri lubéi hínsiñe haduheñu houn busentiña lun hasubudiruni Heowá luma lun línsiñedun houn. Gáriti houn haganbuniña ayanuha wuriba luagu Bungiu le inarüniti luma hawagun lubúeingu. Gama lumoun añahein hádangiñe iduheñu ha máhabaña lun inarüni lau lásügürün dan aba hánharun lun. Kábati wadüga anhein añahein lubéi hádangiñe waduheñu ha mabuseeruntiña hasubudirun ni kata wawagu?

13. Ka uagu súdiniti lubéi wachoururuni hínsiñe wamá lun Heowá dan le hachagaruniwa waduheñu? (Sálumu27:10).

¹³ Gayaraati wibihin dǘgüdaguaü lídangiñe lubuidun burí dimurei le lídanbei Sálumu 27:10 (aliiha huméi). Anhein gabaroun wamá lanarime wínsiñe lun Heowá séfuñu luba wasandiragun woungua. Íbini hagarabaagun amu wawagu, chouru wabéi luagu líchugubei lan Bungiu afayeiruahaü woun ladüga awanduni le warufudubei. Leteniruba Heowá lun sun le wemegeirubei dandu lidan ligaburi wasandiragun woungua luma lidan wamadagua luma ani buídutimabei ladügüni sügǘ luéi furumiñeguarügü gürigia. Ruti Biniam, le uágubei layanuhóua lidan párafu aban fe luagu le.

14. Ka larufudahabei lani Biniam hénpulu hun?

¹⁴ Aba ladügagun Biniam lungua gefentime luagu Heowá íbini subudi lani héibaahabei lan gumadimatiña. Ariñagati: “Wuribatimati éibaahouni hámagiñe gumadimatiña luéi le yebe nasaminarubei. Gama lumoun hanufudetimaatina meha luéi éibaahani le ñǘbuinbei hámagiñe niduheñu. Hanufudetina meha ladügüba lan le nanúadirubei lun magundan lan núguchi le mámabei gefenti nau, ani féridineime inebesei le hasandirubei niduheñu nuagu ladüga gefén nan luagu Heowá.” Ka  íderagubalin agidarei anufudei le luéi? Lau gabaroun lani hínsiñe lan lun Heowá ani súnwandan lan lóunigiruniña Heowá gürigia ha hínsiñehabubaña lun. Ariñagati Biniam: “Aba nasaminarun luagu le adüga laalibei Heowá lun líderaguniña ha awandañabaña gudemei, íderagua lumutiña giñe ha uágubaña lasaminarúa wuriba hama giñe ha habuleseirubaña saragu gürigia. Subudi numuti ánhana lan meha úaragua lun Heowá labinirubadina lan. Ragüwatina saragu wéiyaasu ani adügatiña lun nasufurirun saragu. Lidan dan hénrenguti le, ariha numuti nungua dan lan le úaragua wamá lun Heowá íderagua lumutiwa saragu”. Ariha lumuti Biniam Heowá keisi Lúguchi ani ariha lumutiña íbirigu keisi meni liduheñu.

15. Ka uagu mariban lubéi lasandirún anufudei luéi óunweni?

¹⁵ Ariñagatu Bíbülia aban lan ágani óunweni (1 Ko. 15:25, 26). Gayaraati ladiheridagüdüniwa saragu wasaminarun luagu óunweni, dántima sandi wamá o sandi lan somu waduhe. Ka uagu líchiga saminaü luagu óunweni anufudei woun? Ladüga adüga lániwa Heowá lau ayumahani lun wawinwandun lun súnwandan (Apur. 3:11). Lau sun lira, ábanraü anufudei luéi óunweni gayaraati lóunigiruni wabagari. Kei hénpulu línchahabadiwa lun wóunigiruni le wéigibei, lun wadügün ehersísiu, lun míchugun wamani wabagari lidan denchaü, lun woudin lumoun surusia luma lun wátuni árani le líchugubei surusia woun.

16. Ida liña layusuruni Satanási anufudei le wasandirubei luéi óunweni?

¹⁶ Subudi lumuti Satanási luagu weiri lan lebegi ibagari woun. Ligíati según ligía aranseñuwaña lun wadügün furumiñeguarügü sákürifisiu, íbini wádüraagüni wamadagua luma Heowá lúnrügü wasigirun wínwanñu (Hob. 2:4, 5). Gama lumoun bulíeiguati Mafia! Kei gabafu lubéi Mafia lun láfarahan, yusu lumuti anufudei le wasandirubei luéi óunweni lun wadüraaguni wamadagua luma Heowá (Ebü. 2:14, 15). Anihein dan yúsuti Satanási fiu gürigia lun hasiadirúniwa luma lun hariñagun woun anhein lan mígirun wamá wafiñen háfaragubadiwa lan. O dan le anihein lan aban sandi wéiriti wawagu, gayaraati layusuruni Satanási le gádanbaliwa lun wadüraaguni wamadagua luma Heowá. Gayaraati ladügün Mafia lun hadügüdarun surusiagu o waduheñu ha mama gefentiña wawagu lun wánharun lun lichugún hitaü wawagun, katei le múaranbei luma lilurudun Heowá. Háfuga houchun hadügüni sun hayaraati lun wánharun lun árani le múaranbei luma le tariñagubei Bíbülia.

17. Kei lariñaguni Rómana 8:37-39, ka uagu moun lumuti lubéi wanufudedun luéi óunweni?

¹⁷ Úati ni aban wádangiñe busenti lounwen, íbini ítara subudi wamuti anhein lan weferidira wabagari hínsiñememebadiwa lan lun Heowá (aliiha huméi Rómana 8:37-39). Dan le hóunwegun lumadagu Heowá rédeitiña lidan lisaminan, mini lan le kamá hamuga wínwangiña (Luk. 20:37, 38). Memeniha lanigi lagiribudagüdüni habagari houn (Hob. 14:15). Fáyeihali Heowá aban óunwenbu ebegi lun gayara lan wibihin ibagari magumuchaditi (Huan 3:16). Subudi wamuti buidu weiri lan wínsiñe lun Heowá ani góunigi lumutiwa buidu. Ligíati dan sandi wamá o aba lan wasiadirun wáfarawagua lan madüraagun wamuti wamadagua luma Heowá. Lubaragiñe lira, amuriahatiwa lun líchugun dǘgüdaguaü, lichú aau luma erei woun. Ligía tadügübei Valeria luma tani weiriei (Sal. 41:3).

18. Ka larufudahabei tani Valeria hénpulu hun?

¹⁸ Aba ladagarun kánserü tuagu Valeria dan le 35 lubéi irumu tau. Ariha wamá ida liña lan líderagunu línsiñehabu Heowá lun tígiruni tanufude luéi óunweni. Ariñagatu: “Dan le nasubudirubalin  anihein lan kánserü nuagu, aba wadiheridun saragu nuguya luma nani weiriei. Mégeitina meha nibugún. Ayanuhatina hama saragu surusiagu ani úati ni aban abusenruti líbugunina mayusurunga hitaü. Wéiriti meha nanufude, lau sun lira, kei busén nan lun gaganbadi nan lun Bungiu, maweiyasunbadina buga ígira lun híchugun hitaü nuagu! Lidan sun nibagari, arufudaali Heowá, saragu ínsiñeni nun, guenlé anihán nichansi lun narufuduni nínsiñehabu lun. Sagü lichugún luriban ñunsu nun, héretimati nasandiragun nungua lun mígirun nan lun lagañeirun Satanási. Busentina buga lun lagundaarun Heowá nau. Lau lásügürün dan aba nibugún mayusurunga hitaü, ani buiti lasalirun sun katei. Anahagua ageindagua luma luriban nátuadi, lau sun lira mígirun lágidiwa Heowá ani ru lumuti sun le wemegeirubei woun. Kei hénpulu, dimaasu lubaragiñe lariñawagún nun anihein lan kánserü nuagu, aturiaha wamuti lidan adamuridaguni aturiahani le gíribei ‘Awanda waméi lénrengunga lau ganigi’. * Ruti aturiahani le dǘgüdaguaü woun. Aliiha wamuti saragu wéiyaasu. Seremei aturiahani libe le, luma woudin apurichiha ñüdün wagía adamuridagua, íderagua lumutiwa lun darangilu wamá, ligía gayara lubéi wanúadirun buidu”.

19. Kaba asusereda yarafa madise?

¹⁹ Añahein íbirigu lidan sun ubóu ha hiñuguaña lídangiñe sügǘ hénrenguti, lau lídehan Heowá ibihaaña mígiraguagüdün hama houngua lun Mafia (1 Fe. 5:8, 9). Gayaraati giñe hadügüni ligiaméme. Yarafa madise lariñaguba Heowá lun Hesusu luma houn ha arúeihabaña luma chülühali lan dan lun “lagünrinchaguni luadigimari Mafia” (1 Huan 3:8). Lárigiñe katei le, harihubei lubúeingu Bungiu ha yáabaña ubouagu ida luba lan lagunfulirun füramasei le: “Bagidarúba lábugiñegiñe lidere dan luma anufudei” (Isa. 54:14; Mik. 4:4). Lidan awanhán lan agurabahei weyu ligía, áfaagua wamá lun wígiruni anufudei.

20. Kaba íderaguawa agidarei anufudei wawariua?

²⁰ Mosu wafiñerun hínsiñe wamá lun Heowá ani góunigi lumutiña lan lubúeingu. Kaba íderaguawa lun wadügüni katei le? Wararamagun asaminara luagu ida liña lan lóunigiruniña Heowá lubúeingu ani ayanuha wagíame luagu katei le hama amu. Gabaroun waméi giñe ida liña lan líderaguniwa dan le wásügürün lídangiñe lénrengunga. Lau lídehan Heowá gayaraabei wagidaruni anufudei wawariua (Sal. 34:4).