1. Ka inarüni lariñagubei urúei Salomón lidan Apurichihati 7:20?

 ARIÑAGATI urúei Salomón: “Úati ni aban gürigia úaraguati ubouagu le adügati buiti súnwandan lun mafigouhanbei lan” (Apur. 7:20). Inarüni katei le! Sun wagía gafigountiwa (1 Huan 1:8). Ligíati sun wagía mégeitiwa ferudun lúmagiñe Bungiu luma hámagiñe amu gürigia.

2. Ida liña wasandiragun woungua dan le feruduna lániwa aban wamada?

² Adügaadiwa san somu katei le adügüti lun wuriba lan lasandiragun somu wamada lungua? Sun wagía susereeli le woun. Ani lun meferidirun wamani wamadagua luma, mosu wamuriahan ferudun luma tídangiñe sun wanigi. Ida liña wasandiragun woungua dan le feruduna lániwa wamada? Ma buiti wasandiragun woungua ani gúndaatiwa giñe, adián? Chóuruti ítara liña lan.

3. Kaba uagu wayanuhan lidan aturiahani le?

³ Sun wagía busentiwa lun Heowá lan besi wamada, gama lumoun anihein dan wadügün o wariñagun katei le mínsiñebei lun. Ligíati, ka uagu gayara lubéi wachoururuni busén lan feruduna lániwa? Ka uagu wariñaga mítaran lan ligaburi feruduna lan Heowá kei ligaburi feruduna hamá gürigia? Ani, le lagumuhóun, kátaña feruduna lubaña Heowá?

4. Ka uagu chouru wabalin aranseñu liña lan Heowá lun feruduna lániwa?

⁴ Chóurugüda tumuti Lererun Bungiu woun aranseñu liña lan Heowá lun feruduna lániwa. Kei hénpulu, afuranguagüda  lumuti Heowá lun Moisesi lidan wübü Sinaí, ka lan luwuyeribei Bungiu ligía. Ariñagati aban ánheli lun: “Au Haburemebei! Au Búngiubei lun súnwandan! Gudemehabutina, gaguraasuntina, wéiritina lidan ínsiñeni luma inarüni! Deregüdaguati nínsiñehabu súnwandan, feruduna numuti wuribani, maganbadi, luma figóu” (Afu. 34:6, 7). Aban Bungiu hínsiñehabuti Heowá ani gudemehabuti súnwandan, aranseñu liña lun feruduna lani hafigoun ha asakürihabaña (Neem. 9:17; Sal. 86:15).

5. Según Sálumu 103:13, 14, ida liña lóuseruniwa Heowá ladüga subudi lániwa buidu buidu?

⁵ Kei Heowá lan Adügübaliwa, subudi lumutiwa buidu buidu. Ma wéirigüda lumutu wanigi wasubudiruni subudi lani Heowá buidu buidu sun hawaguti gürigia ha awinwandubaña ya ubouagu? (Sal. 139: 15-17). Ligía gayara lubéi larihini sun figóu le galagante wabéi lúmagiñe Adán tuma Ewa. Lanwoun lira, subudi lumuti Heowá kada aban lídangiñe sügǘ le adügaalibei lun ítara lan wagaburi kei lubéi. Ka ladügübei Heowá lau sun subudi le? Ínchaha lumuti lasubudiruniwa buidu buidu lun larufudun gudemehabu woun (Sal. 78:39; aliiha huméi Sálumu 103:13, 14).

6. Ida liña larufuduni Heowá busén lan feruduna lániwa?

⁶ Arufuda laali Heowá busén lan feruduna lániwa. Gunfuranda lumuti ladüga lan lafigouha furumiñeti wügüri le gíribei Adán ligía sun lubéi wagía lábugiñeñadiwa figóu luma óunweni (Rom. 5:12). Ani siñati wadügün ni kata lun wesefuragun woungua ni lun wesefurun ni aban gürigia lídangiñe íñarawaguni le (Sal. 49:7-9). Lau sun lira aba gudemehabu lan Bungiu woun. Aba ladügün somu katei lun lesefuruniwa ítara liña lafuranguagüdüni Huan 3:16, ladüga línsiñehabu Heowá aba lóunahani liráü le ábanrügüti lun lounwe wawagu (Mat. 20:28; Rom. 5:19). Hilati Hesusu hawagu sun gürigia lun lesefuruniña sun ha afiñebaña luagu (Ebü. 2:9). Samina wamá luagu óunwenbu igarigu le lasandirubei Heowá dan le larihini liráü le hínsiñebei lun asufurira luma ounwe wawagu? Chóuruti mígirunbei lan yebe Heowá lun lounwe liráü lun hamuga mabusenrun lan lun feruduna lániwa.

7. Írida humá fiu gürigia ha awinwandubaña lidan tidaani Bíbülia ha únbaña másuhan lan Heowá lun feruduna lániña.

⁷ Ayanuhatu Bíbülia hawagu saragu gürigia  ha feruduna lubaña Heowá (Efe. 4:32). Haritaguatün san hawagu somu hádangiñe? Háfuga háritaguña lan luagu urúei Manasési. Wéiriti meha luriban lóuserun Manasési ani adügati figóu wéinamuti ligibugiñe Heowá. Adügati lun láhudurawagun houn búngiugu mama inarünitiña ani gudá laña lirahüñü lidan watu lun adagaragüdüni houn búngiugu. Lau mabusigari aba lebelaagüdün aban guáriua tidoun litenpulun Heowá, fulasu le sándubei. Ariñagatu Bíbülia luagu: “Wéiriti bugaha luriban lóuserun ligibugiñe Wabungiute darí lun lagañidagüdüni saragu” (2 Kro. 33:2-7). Gama lumoun dan le larufudun Manasési luagu asakürihaali lan tídangiñe sun lanigi, aba feruduna lani Heowá darí lun ábaya lan líchuguni lubara lun kei urúei (2 Kro. 33:12, 13). Másiñati wasaminarun luagu likesin urúei Dawidi, héiguati meha lidoun figóu wéinamuti kei agabarahani luma áfarahani. Dan le lánharunbei Dawidi lun lichara aba lasakürihan tídangiñe sun lanigi, aba feruduna lani giñe Heowá (2 Sam. 12:9, 10, 13, 14). Ligíati, gayara lubéi wachoururuni busén lan Heowá feruduna lániwa. Ani warihubei amu ligaburi feruduna lan Heowá luéi ligaburi feruduna hamá gürigia.

8. Ka uagu Heowá lubéi aguseragüdüti létima buídubei hawéi amu, ani ida liña larihín le, lidan feruduna lan?

⁸ Heowá ligía “aguseragüdüti íñugutimati lidan sun ubóu” (Agu. 18:25). Aban aguseragüdüti buiti mosu lasubudiruni lúrudu buidu buidu. Gúnfuliti Heowá lau dasi le ladüga mámarügüñein wani Aguseragüdüti, ru lumuti giñe lúrudu woun (Isa. 33:22). Úati ni aban kei Heowá asubudiruti ka lan buídubei luma ka lan wuribabei. Ka amu dasi lunbei lagunfuliruni aban aguseragüdüti buiti? Mosu lasubudiruni kesi ligía buidu lubá lanúadirun kaba lan ladüga. Ligía Heowá lubéi aguseragüdüti le buídutimabei ladüga súnwandan subudi lan lun ida liña lan kada kesi.

9. Ka gabaroun lubéi Heowá dan le lanúadirun anhein feruduna lubéi lubéi aban gürigia o úabei lan feruduna lani?

⁹ Mítaranti laguseragüdün Heowá kei gürigia. Subudi lumuti Heowá le asuseredubei lidan kada kesi (Agu. 18:20, 21; Sal. 90:8). Maguseragüdüti láurügü le harihubei o le haganbubei gürigia. Gunfuranda lumuti Heowá buidu adüga lan igaburi le galagante wabéi lúmagiñe Adán tuma Ewa, ligaburi wagüriarún, le geyegubei wau, ligaburi wasandiragun woungua, luma halía lan wawinwanda lun ítara lan wagaburi kei lubéi. Lanwoun lira, subudi lumuti giñe Heowá ka lan tídanbei wanigi, ani gunfuranda lumuti ka lan ínchahabaliwa ani ka lan wayumahabei. Subudi lumuti sun katei dayarügubei. Furanguti sun katei ligibugiñe (Ebü. 4:13). Ligíati, dan le feruduna lani Heowá aban gürigia adüga lumuti ladüga subudi lani sun le gádanbalin gürigia ligía.

10. Ka uagu gayara lubéi wariñagun richagualá sun le lanúadirubei Heowá ladügün? (2 Lúrudu 32:4).

¹⁰ Richaguati sun le lanúadirubei Heowá ladügün. Ani úati himei lan aban gürigia luéi aban. Mámarügü ladüga buidu lan laríawagun aban gürigia, ni ladüga risi lan, ni ladüga súdini lan lubara o gibe lan liyaraati lun feruduna lubéi lan Heowá (1 Sam. 16:7; Sant. 2:1-4). Siñati wafosuruni Heowá ni lun wafayeiruni lun ladügüni le wabusenrubei (2 Kro. 19:7). Mama lau igañi lanúadira ladügün somu katei (Afu. 34:7). Heowá ligía aguseragüdüti le buídutimabei, ladüga gunfuranda lani sun le asuseredubei woun luma sun le gádanbaliwa (aliiha huméi 2 Lúrudu 32:4).

11. Ka uagu móubati lubéi ferudun le líchugubei Heowá?

¹¹ Ha abürüdübarun Abürüdǘni Ebüréu subudi hamuti meha móubati lan feruduna lan  Heowá. Según aban ariñahani luáguti dimurei, anihein dan yúsutiña meha aban dimurei ebüréana le “yúsuati lun larufuduni ligaburi feruduna lániña Bungiu ha afigouhabaña”. Ariñagati giñe ariñahani le: “Mama layanuhaña dimurei le luagu ferudun le líchugubei aban gürigia lun amu gürigia” (Sinónimos del Antiguo Testamento, traducción y adaptación de Santiago Escuain). Heowarügüñein gabafu lun feruduna lan sunsuinagubei aban afigouhati le asakürihabei. Ani ida liña wasandiragun woungua dan le feruduna lániwa Heowá?

12, 13. a) Ka buiti lasagarubei aban gürigia dan le feruduna lani Heowá? b) Átiriñein dan lidura feruduna Heowá?

¹² Dan le feruduna lániwa Heowá sanditiwa awalidaguni, darangilaü luma aban lubuidun saminaü ligibugiñe. Dánrügüñein feruduna lániwa Heowá wasandiragua woungua ítara (Adü. 3:19). Dan le feruduna lániwa, ábaya lígirun lun gamadagua wamá luma. Ítara liña katei le kamá hamuga mafigouhagidiwa.

¹³ Lárigiñe feruduna lani Heowá aban gürigia, maweiyasun hali íchiga duru luagu mabeichulei luagu meha le ladügübei (Isa. 43:25; Her. 31:34). “Dísegüda laali wafigoun wawéi, kei ladisedagüdüni labouchagüle weyu luéi lálüdagüle” (Sal. 103:12). * Dan le wasaminarun luagu ferudun le líchugubei Heowá wéirigüda lumutu wanigi ani buíngüda lumutu lau eteingiruni (Sal. 130:4). Kátañati feruduna lubaña Heowá ítara?

14. Según le ariha wamaalibei ka wafurendeirubei luagu líchigadi Heowá ferudun?

¹⁴ Kei le ariha wamaalibei, manúadahanti Heowá lun feruduna lan aban gürigia ladügarügü lueirin o liñüraü figóu le ladügübei. Furendei hádiwa yusu lani Heowá subudi le luágubei, kei le Adügübaliwa, kei Íchuguti lúrudu ani kei Aguseragüdüti dan le lanúadirun anhein feruduna lubadiwa lubéi o úabei lan feruduna lániwa. Ligíati, ka un letenira Heowá lubaragiñe ferudun lan?

15. Según Lúkasi 12:47, 48, ka uagu lasaminara Heowá lubaragiñe lanúadirun anhein feruduna lubadiwa lubéi?

¹⁵ Gabaroun lumuti Heowá anhein subudi lubéi lun afigouhati wuriba lan le ladügübei.  Furanguti lariñaguni Hesusu, kei waliihani lidan Lúkasi 12:47, 48 (aliiha huméi). Dan le subudi lani aban gürigia wuriba lan le ladügübei ani mínsiñe lan lun Bungiu, ladügüña aban figóu wéiriti. Peliguruti katei le ladüga gayara lan lanúadirun Heowá lun ua lan feruduna lani gürigia ligía (Mar. 3:29; Huan 9:41). Le linarün katei, anihein dan rútiwa fe wuriba lan le wadügübei. Lidan kesi le, gayaraati funa san feruduna lániwa Heowá? Anha. Anihein amu katei le úagubei lasaminara Heowá dan le lanúadirun anhein feruduna lubadiwa lubéi.

16. Ka mini lubéi asakürihani, ani ka uagu súdini lubéi lun wadügüni?

¹⁶ Ámuya katei le labusenrubei Heowá larihin anhein asakürihaali lubéi afigouhati tídangiñe sun lanigi. Ka mini lubéi asakürihani? Mini lan wasansiruni ligaburi wasaminarun, wóuserun luma le lunbei wadügüni. Lanwoun lira, gürigia le asakürihaalibei tídangiñe sun lanigi wuribati lasandiragun lungua, sanditi aban óunwenbu íruni luagu katei wuribati le ladügübei o ladüga madügün lani katei buiti le yebe lunbei ladügüni. Híruti gürigia le ladüga lígirun lun ledebilidun lumadagua luma Heowá, ani barǘ lumuti katei le lun ladügün katei wuribati. Haritagua wamá luagu urúei Manasési luma luagu urúei Dawidi. Íbini wéinamu lan figóu le hadügübei, feruduna lumutiña Heowá ladüga hasakürihan tídangiñe sun hanigi (1 Uru. 14:8). Ligíati, feruduna lumutiña Heowá gürigia hárügü arufudubaña asakürihaaña lan. Úati buídurügü lan lun wírudun ladüga afigouhaadiwa lan. Mosu wánhingichun lau le lunbei wadügüni. * Anihein ámuya katei le unbei letenira Heowá.

17. Ka mini lubéi wasansiruni wagaburi, ani ida liña líderaguniwa lun méiguadun wamá lidoun ligiaméme figóu? (Isaíasi 55:7).

¹⁷ Ka amu katei súdiniti unbei letenira Heowá? Lun sánsiguaü le wadügübei lidan wagaburi. Mini lan wasansiruni wagaburi, wígiruni wuribani le meha wadügübei, ábati wagumeserun awinwanda kei labusenruni Heowá (aliiha huméi Isaíasi 55:7). Gürigia le asansirubalin ligaburi mosu lasansiruni ligaburi lisaminan ígiraguagüda ligíame lungua lun ladundehani Heowá ligaburi lisaminan (Rom.  12:2; Efe. 4:23). Lunti aranseñu lan lun lígiruni luriban saminaü luma katei wuribati le meha ladügübei (Kol. 3:7-10). Mabulieida waméi le lan adügübei lun feruduna lani Heowá wafigoun ani chibalei, warufudun afiñeni luagu lani Hesusu sákürifisiu. Dan le larihin Heowá wáfaaguña lan tídangiñe sun wanigi lun wasansiruni wagaburi, feruduna lumutiwa ladüga lani lisaani sákürifisiu (1 Huan 1:7).

18. Ka wafurendeirubei luagu ferudun le líchugubei Heowá?

¹⁸ Águyuguagüda wamá fiu lídangiñe ariñahani súdiniti le ariha wamaalibei lídangiñe aturiahani le. Chóuruti, ua lan ni aban gíchigaditi ferudun lidan sun ubóu luéidügü Heowá. Ka uagu wariñagei le? Furumiñe, ladüga súnwandan aranseñu liña lan lun feruduna lániwa. Libiaman, ladüga subudi lumutiwa buidu buidu; subudi lumuti sun wawaguti ani gayaraati larihini anhein asakürihaadiwa lubéi tídangiñe sun wanigi. Ani lǘrüwan, dan le feruduna lániwa Heowá bulíei lumuti wachara ani ítara liña kamá hamuga madügün wamuti. Adügati le lun haruma lan wasaminan luma lun lagundaarun Heowá wau.

19. Ka uagu gayara lubéi gunda wamá lau sun wachararuba lan ladüga gafigoun wamá?

¹⁹ Inarüni, wasigiruba lan afigouha ladüga gafigoun wamá. Ruti dǘgüdaguaü woun le tariñagubei líburu Perspicacia para comprender las Escrituras, bolumen 1, páhina 209: “Kei gudemehabu lubéi Heowá lun hadebilin lubúeingu, mama mosu hasandiragun houngua wuriba súnwandan luagu charati le hadügübei ladüga gafigoun hamá (Sal. 103:8-14; 130:3). Gúndaabaña ánhaña adügei sun hayaraati lun hawinwandun kei labusenruni Heowá. (Fili. 4:4-6; 1 Huan 3:19-22.)”. Ma ruti dimurei le darangilaü woun!

20. Kaba wariha lidan leweñegua aturiahani?

²⁰ Rútiwa seremei lun Heowá ladüga aranseñu liña lan lun feruduna lániwa ánhawa asaküriha tídangiñe sun wanigi luagu wafigoun. Lau sun lira, ida luba wáyeihani lani hénpulu? Ida liña genegegua lan ferudun le líchugubei Heowá luma le wíchugubei? Ani ka uagu súdini lubéi lun gunfuranda wamani le? Wadarirubei óunabagülei lídanme leweñegua aturiahani.