“ADÜGATI lubuidun hagaburi íbirigu lun taweiridun nanigi”. Ligía tariñagubei aban íbiri gíritu Lisa * luagu le achawahabarun lidoun inarüni. Genegeguati kesi le luma le asuseredubei tun Anne. Ariñagatu: “Lubuiduntima hagaburi gefentiña luagu Heowá, achawahabalina sügǘ luéi le harufudahabei”. Lau sun hínsiñela houn íbirigu ha haliihanu Bíbülia ani ráramagua hagía asaminara luagu le haliihabei, lubuiduntima hagaburi íbirigu ánhingichubarun hanigi.

Ida luba warufudun areini le gayaraabei línchahaniña amu? Ariha wamá ida luba lan wadügüni: lau le wariñagubei luma lau le wadügübei. Lárigiñe wakutihaba kaba lan un warufuda areini.

Lidan Ariñawagúni kapítulu 31 ayanuhóuati tuagu aban würi maríeitu to buitu, ariñagati bérusu le: “Lau lichú aau tadimurehan súnwandan” (Ari. 31:26). Ígiraguagüdatu tungua lun adundehani le, dandu lidan le tariñagubei luma ligaburi tariñaguni. Lunti giñe hígiraguagüdün agübürigu houngua lun adundehani le lidan ligaburi hayanuhan. Subudi hamuti hiibe-agei agübürigu ánhaña lan ayanuha houn hasaanigu lau furundei, hadügüba lan dañu houn. Ani hénrengubei lan lun gaganbadi hamá hasaanigu houn. Gama lumoun, ánhaña ayanuha houn hasaanigu lau ínsiñeni luma areini, ménrengubei houn hasaanigu lun gaganbadi hamá houn.

Anhein gasaanigu wabéi o masaanigu wamá, ka gayaraabei wadügüni lun wayanuhan lau areini? Furumiñeti fánreinti lánina Ariñawagúni 31:26 ruti aban puntu súdiniti woun. Ariñagati ñein: “Lau lichú aau tadimureha súnwandan”. Mini lan le mosu lan wanúadiruni buidu dimurei le lunbei wariñaguni luma ligaburi wariñaguni. Dan le gañi wamá, buiti lun wálügüdagun woungua: “Le lunbei nariñaguni, lagalumarubei san igañi o liñuragubei?” (Ari. 15:1). Arufudatiwa lichú aau dan le wasaminarun lubaragiñe wayanuhan.

Ariñagati amu Ariñawagúni: “Añahein gürigia, abuleseihatiña láurügü hererun” (Ari. 12:18). Ánhawa asaminara ida luba lan léiguadun houn amu ligaburi wariñaguni dimurei, másiñati wóunigirubei lan le lunbei wariñaguni. Dan wígiraguagüdün woungua lun “ladundehaniwa areini”, mayusu báadiwa dimurei le abuleseihati mayanuhan baadiwa giñe lau igañi (Efe. 4:31, 32). Lubaragiñe wasaminarun o wariñagun aban katei le mabuidunti sansi wamuti lau lubuidun saminaü luma dimurei buiti. Ruti Heowá aban buiti hénpulu woun. Kei burí dan le lanufudedunbei Elíasi, aba lóunahan Heowá aban ánheli lun líchugun dǘgüdaguaü lun, aba layanuhan ánheli ligía lun lau “aban umalali hámaruti” (1 Uru. 19:12). Lau sun lira, mámarügübei lau dimurei larufudúa areini. Mosu giñe warufuduni lau le wadügübei. Ariha wamá ida luba lan wadügüni.

Áyeiha wamuti lani Heowá hénpulu dan le wayanuhan lau ínsiñeni luma wóuserun lau areini (Efe. 4:32; 5:1, 2). Lisa, to uáguboun layanuhóua lidan furumiñeti párafu, ariha tumuti lubuidun hagaburi gefentiña luagu Heowá. Ariñagatu: “Dan le meha mosu lubéi  náguyugun hama niduheñu sódini, amuriahatiña bián feru maríeitiña Gefentiña üma lidan hawadigimari lun híderaguniwa. Ani magumeserungidina meha aturiahoun Bíbülia lidan dan ligía”. Adügati igaburi le lúntima tabusenrun Lisa tasubudiruni inarüni.

Lidan tikesin Anne, to giñe uáguboun layanuhóua lidan furumiñeti párafu, rutu giñe seremei luagu lubuidun igaburi le harufudubei gefentiña luagu Heowá tun. Ariñagatu: “Kei wuribaali lan katei ubouagu hénrenguti meha nun nafiñerun hawagu gürigia”. Ariñagatu giñe: “Dan le nasubudirubaliña Gefentiña, mafiñentina meha hawagu. Álügüdaguatina meha nungua ka lan uagu berese habéi nau. Aba nafiñerun tuagu íbiri to íchuguboun aturiahani nun ladüga narihini inarüni lan ínsiñeni le tarufudubei”. Ida liña tasagarun buiti lídangiñe katei le? Ariñagatu Anne: “Lau lásügürün dan, aba netenirun lun le nafurendeirubei”.

Adügati lun taweiridun hanigi bián íbirigu ha harufudun gefentiña luagu Heowá areini houn. Adügati katei le, lúntima busén hamá hasubudiruni inarüni. Adügati areini luma lubuidun igaburi le harufudubei lílana damuriguaü houn lun hafiñerun luagu Heowá luma hawagu íbirigu.

Añahein fiu gürigia ménrenguti houn lun gamadoun hamá ladüga ligía lan hagaburibei o ítara liña lan hagüriarún. Ani buiti katei le. Gama lumoun, anhein wadügüñein lubéi luágurügü gamadóuni, gayaraati ladügün lira lun marufudun wamani lubuidun lareini Bungiu (ariha huméi giñe Adügaü 28:2).

Aban lídangiñe igaburi le líchugubei sífiri sandu areini luma lubuidun igaburi (Gal. 5:22, 23). Ligíati, lun wáyeihani Heowá luma Hesusu, mégeitiwa lun ladundehani sífiri sandu le wasaminarubei luma le wadügübei. Lanwoun lira, kei kristiánugu, beresetiwa hau amu gürigia ladüga hínsiñe lan Heowá hama gürigia woun. Dan le línchahaniwa ínsiñeni le, gúndaagüda lumuti Heowá areini luma lubuidun igaburi le warufudubei.

Besafu dan, ménrenguntimati woun warufudun areini houn ha arufudubaña areini woun o houn ha wasubudiragun (2 Sam. 2:6). Buiti lun geteingiradi wamá houn (Kol. 3:15). Kábati wadüga ánhawa asaminara madüna lan aban gürigia lun wóuseruni lau areini?

Samina wamá luagu le: arufudati Heowá areini íbini houn ha madünabalin, ani úati ni aban arufuduti areini ítara kei ligía. Ani Arufudahatu Lererun Bungiu aban katei súdiniti woun luáguti larufudún igaburi le. Lidan abürüdǘni güriegu yúsuati dimurei lareini Bungiu saragu wéiyaasu. Ida liña larufuduni Bungiu igaburi le?

Samina wamá hawagu saragu míñunu gürigia ha únbaña larufuda Heowá areini lau líchuguni le hemegeirubei houn lun hawinwandun (Mat. 5:45). Le linarün katei, íbini lubaragiñe wasubudiruni Heowá, arufuda laali lareini woun (Efe. 2:4, 5, 8). Kei hénpulu, ru lumuti létima gebegitimabei lun hawagu gürigia: Liráü le ábanrügüti. Abürühati apostolu Pábulu gayara lan wasagarun buiti lídangiñe lebegi esefuruni ladüga feruduna lani Bungiu “wafigoun según lueirin lareini” (Efe. 1:7). Lau sun lira, sigiti Heowá adundehawa, íbini gafigoun wamá ani adüga wagía lun lasandiragun lungua wuriba. Ítara liña larufudahan luma dimurei le lariñagubei kei “láhibihan huya” (2 Lur. 32:2). Siñabei wafayeiruni luagu sun areini le arufuda laalibei woun. Le linarün katei megei wamuti lareini Heowá lun gayara lan wabagaridun ámuñegü (ariha huméi giñe 1 Féduru 1:13).

Ma inarüni achawaha lániwa lareini Heowá luouguoun ani ínchaha lumutiwa lun wadügüni? Ligíati, mámarügü lan houn fiu warufudei areini le. Lubaragiñe lira, lunti wáfaagun saragu lun buidu lan wóuseruniña gürigia kei lóuseruniña Heowá (1 Tesa. 5:15). Dan le warufudun areini, ítara waña kei lara watu lidan lidaani lidiliga. Ánhawa arufudei lubuidun igaburi le, buídubei hasandiragun waduheñu, wíbirigu, wapanaagu lidan wadagimanu luma leskuelarugu hama wabesinanigu houngua wama.

Anihein funa san aban hiduhe o aban íbiri lidan damuriguaü le buídubei hamuga léiguadun lun louserún lau areini luma lun lariñawagún dimurei buiti lun? Másiñati anihein lan somu íbiri lidan damuriguaü le mégeibei ídemuei lun tounigirún luban, linadürigu, o lun woudin agañeihei le lemegeirubei o lun wíderaguni lidan amu katei. Ani ida luba warufudun areini lidan wani ministeriu? Lau wíderaguniña ha mégeibalin.

Sigí waméi lani Heowá hénpulu lau le wadügübei luma lau le wariñagubei lau wígirun lun ladundehaniwa “lareini Bungiu” súnwandan.