HIIBE-AGEI gürigia subudi hamuti afarúa lan Hesusu luagu aban wagabu hamidangua hámagua bián wügüriña wuribatiña (Mat. 27:35-38). Ariñagati abahüdaguni lárigiñe lan lounwe Hesusu, aba lan laranserún lúgubu lun labunún (Mar. 15:42-46). Añahein gürigia sigene hamuti le tariñagubei Bíbülia.

Fiu hádangiñe ha ayanuhabaña wuriba luagu Ewanhéliu mafiñentiña luagu ígira hamá rómana lun habunún gürigia ha áfarawagubaña kei gürigia wuribatiña, kei hénpulu madünatiña lan lun habunún gürigia ha lidan aban umúahaü. Saminatiña adügǘwa lan amu katei lau hágubu gürigia ha. Ariñagati aban íchuguti ñunsu gíriti Ariel Sabar tidan aban garüdia gíritu Smithsonian ka lan uéigiñe hasaminara gürigia ítara. Abürühati: “Hádarawagun gürigia luagu aban gurúa aba meha abeichúni le houn hagübüri gürigia, ani saminatiña meha fiu sásaamu aba lan libidiounigan aau hábununiña rómana gürigia ha”. Busentiña meha rómana lun weiri lan hünabunaguagüdüniña gürigia wuribatiña ha áfarawagubaña. Ligía meha hígirunbalin hágubu gürigia wuribatiña hagía luagu wagabu lun héiginiña animaalugu áraabuna. Másiñati aba lan hachüürüni le ígiragubei luagu lidoun aban huyu.

Gama lumoun, arufudati binadu aturiahani masuseredun lan katei le houn fiu huríu. Lidan irumu 1968, dariwati yarafa lun Herusalén, aban hamúaha huríu, lau lárigirugu lúgubu aban wügüri le áfarubei lidan furumiñeti sígulu. Lídanñein aban huyu, tidan aban lagei abun. Lidan, dariwati labun lihilin lugudi gürigia le ádarawagubei luagu aban durusu lau aban gürabu le 11,5 sentimeturu (4,5 incha) limigifen. Ariñagati Sabar: “Lihilin lan ugudi ligía lani lan aban wügüri gíriti Jehohanán, seriwiti abun le adarirubei lun lagumuchagun sigenei le barühalibei saragu irumu lun lachoururúniwa bunawa lan Hesusu lidan aban umúahaü, kei lariñaguni Ewanhéliu burí”. Súdiniti katei le, ladüga “chóurugüda lumuti lihilin lugudi Jehohanán ígira hamá rómana lun labunún aban wügüri áfaruti luagu wagabu lidan lidaani Hesusu según hechun huríu”.

Adügaali labun lihilin ugudi le adarirubei lun ñein lan ámuñegueinarügü saminaü luagu ida liña lan ládarawagun Hesusu luagu wagabu. Furanguti bunawa hamá ha áfarawagubaña mama chüwarügüti hágubu lidoun aban huyu. Chóuruti, inarüni lan le tariñagubei Bíbülia luagu labunún Hesusu: bunawati lúgubu lidan aban umúahaü. Adügati sügǘ le lun lachoururúniwa ítara liña lan.

Létima súdinibei, ariñaga lumuti lan Heowá lábunuba lan Hesusu lidan aban umúahaü le lani aban wügüri rísiti, ani úati ni aban lun leredehani lagunfulirun le lariñagubei Bungiu (Isa. 53:9; 55:11).