1. Kaba íderaguawa lun wasigirun eseriwida lun Heowá íbini laganagua saragu turobuli?

 ARIÑAGATU Bíbülia wawinwanduña lan lidan dan “hénrenguti” (2 Tim. 3:1). Lidan ubóu le, sun gürigia gaturobulintiña, ani keisi lubúeingu Heowá mosu giñe wagagibudagun luma éibaahouni luma lichugún lidere dan woun. Kaba san íderaguawa lun wasigirun eseriwida lun Heowá meberesenga le asusereduti? Líderagubadiwa waritaguni Heowá lan Bungiu le wínwanbei (Her. 10:10; 2 Tim. 1:12).

2. Ida liña larufuduni Heowá aban lan Bungiu le wínwanti?

² Aban Bungiu wínwanti ani inarüniti Heowá, ligía líderagubadiwa lubéi dan le wásügürün lídangiñe lénrengunga ani áluahati chansi lun ladügüni (2 Kro. 16:9; Sal. 23:4). Ligía lubeiti, líchuguba erei woun lun wawandun furumiñeguarügü turobuli lau warihini kei aban Bungiu wínwanti. Ani ítara liña lasuseredun lidan likesin urúei Dawidi.

3. Ka labusenrubei Dawidi lariñagun dan le lariñagunbei winwan lan Heowá?

³ Subudi lumuti meha Dawidi Heowá buidu ani afiñeti meha luagu. Amuriahati ídemuei luma dan meha le léibaahanbalin urúei Saulu hama amu áganiñu (Sal. 18:6). Dan le larihinbalin Dawidi óunaba lani Heowá lafurieidun ani sefuléi, aba lariñagun: Wínwanti Heowá! (Sal. 18:46). Ka labusenrubei Dawidi lariñagun lau dimurei le? Ariñagatu aban líburu luagu lariñaguña lan Dawidi luagu afiñe lan luagu Heowá keisi aban Bungiu wínwanti le íderagubaliña lumutuniña súnwandan. Ariha lumuti Dawidi lúhabu Heowá lidan libagari. Adügati katei le lúntima lachoururuni Dawidi luagu winwan lan Heowá, ani ruti giñe katei le erei lun, lun lasigirun eseriwida lun ani álawahaleime (Sal. 18:​28, 29, 49).

4. Ka buiti wibihibei dan le warihini Heowá kei aban Bungiu wínwanti?

 ⁴ Líderagubadiwa wachoururuni aban lan Bungiu wínwanti Heowá, lun weseriwidun lun lau ubebeni. Líchuguba erei woun lun wawandun furumiñeguarügü turobuli ani línchahabadiwa lun wawadigimaridun lun. Línchahabadiwa giñe lúntima busén wamá werederun yarafa lun.

LÍCHUGUBA BUNGIU LE WÍNWANBEI EREI HUN

5. Ka íderagubaliwa lun wagagibudagun luma lénrengunga lau afiñeni? (Filipuna 4:13).

⁵ Gayaraati wawandun furumiñeguarügü turobuli íbini le wéinamuti dan le waritaguni winwan lan Heowá ani anihein lan ñein lun líderaguniwa. Le linarün katei, úati turobuli wéiriti lun Heowá. Ligía Suntigabafubei ani gayaraati líchuguni erei le wemegeirubei woun lun wawandun furumiñeguarügü katei (aliiha huméi Filipuna 4:13). Ligíati, anihein saragu resun wama lun wagagibudagun luma óuchawaguni lau afiñeni. Dan le warihini líderaguniwa Heowá lidan turobuli le ñǘbüriti, adügati lun wachoururuni líderagubadiwa lan giñe lidan turobuli le wéinamuti.

6. Ka burí sügǘ adügübei lúntima lederebugudun lafiñen nibureinti Dawidi luagu Heowá?

⁶ Ariha wamá bián katei le lásügürübei Dawidi ani le íderagubalin lúntima lafiñerun luagu Heowá. Dan meha óundaharougili ani lóunigiruñanu meha lilügüniña lúguchi mudún, aba liabin aban liñún, aba lanügün aban hádangiñe mudún ha, ani amu dan aba liabin aban osu, aba ladügüni ligiaméme. Lidan biángubei kesi, éibaaha lumutiña Dawidi animaalugu hagía lau ganigi ani sefu lumutiña mudún. Subudi lumuti meha Dawidi Heowá lan íchugubalin erei ligía lun ani ligía mouchun lubéi lanügüni uéiriguni luouguoun (1 Sam. 17:​34-37). Mabulieidun lumuti Dawidi sügǘ burí ligía. Ráramaguati asaminara luagu ani ruti katei le ichouruni lun luagu líchuguba lan Bungiu le wínwanbei erei lun sagü lemegeiruni.

7. Kátima un letenira Dawidi, ani ida liña líderaguni katei le lun lageindagun luma Goliadi?

⁷ Dan lárigiñe, másiñati nibureinmemegili lan Dawidi, aba lidin lidan fulasu le ñein habéi súdaragu ísüraelina. Aba larihin buin haña lan súdaragu lau lanarime anufudei ladüga anihán lan aban hígandei filistéana gíriti Goliadi adüga bula hau lau lariñagun: “Ru humá aban wügüri lun lageindagun numa!” (1 Sam. 17:​10, 11). Hanufudetiña súdara ísüraelina ladüga harihini gágubu lan Goliadi ani weiri ligía luma giñe luagu le lariñagubei houn (1 Sam. 17:​24, 25). Ánheinti Dawidi marihin lumuti katei kei harihini súdaragu. Aba lanügüni Dawidi le lariñagubei Goliadi keisi aban anabawaguni houn lisudaranigu Bungiu le wínwanbei, mámarügü hawagu lisudaranigu Ísüraeli (1 Sam. 17:26). Luágutima Heowá lasaminara Dawidi. Afiñeti meha luagu kei lan líderaguni Bungiu lun lesefuruniña mudún, líderagubei lan giñe lidan sügǘ le. Lau lídehan Heowá, aba lagagibudagun luma Goliadi, ani kei wasubudiruni, gañei lumuti Dawidi filistéana ligía (1 Sam. 17:​45-51).

8. Kaba íderaguawa lúntima wéredagüdüni wafiñen luagu Heowá lidan dan hénrenguti? (Ariha huméi giñe dibuhu).

⁸ Ítara kei Dawidi, gayaraati wagagibudagun luma furumiñeguarügü óuchawaguni anhein waritagua aranseñu liña lan Bungiu le wínwanbei lun líderaguniwa (Sal. 118:6). Gayaraati wéredagüdüni wafiñen lau wararamagun asaminara luagu le adüga láalibei Heowá wawagu lidan dan le sügühalibei. Kei hénpulu, aliiha humá abahüdaguni tídangiñeti Bíbülia le gayaraati laritaguagüdünün luagun ida liña lan lesefuruniña Heowá lumutuniña (Isa. 37:​17, 33-37). Lanwoun lira, akutiha humá ariñahani le áfuachubei lidan jw.org le arufudubalin ida liña lan líderaguniña Heowá íbirigu lidan  wadaani. Haritagua huméi giñe ida liña lan líderagunün Heowá lidan hibagari. Madiherida humá ánhaadün maritagun aban sügǘ le hanarimeti kei le asuseredubei lun Dawidi. Le súdinibei, adügaali lan Heowá saragu katei huagu. Kéiburi lagunbirahanün lun gamadagua humá luma (Huan 6:44). Ani seremei lídehan Heowá ligía áünhagua lubéi lidan inarüni. Ka uagu mamuriahan hubéi luma lun líderagunün aritaguei lóunabuni hafurieidun, ídemuei le líchugubei hun dántima le hemegeirunbalin o dan le líderagubadün lidan dan hénrenguti? Hararamagun asaminara luagu le adüga láalibei Heowá huagu, líderagubadün lúntima hachoururuni luagu lasigiramémeba lan íderaguaün.

9. Ida liña lunti lan warihini turobuli? (Ariñawagúni 27:11).

⁹ Líderagubadiwa wasubudiruni aban lan Bungiu wínwanti Heowá lun warihini turobuli lau lubudubu. Ida? Ariha wamuti kei aban turobuli wéiritimati, gáganiguaü le lánibei Heowá luma Satanási. Ariñagati Mafia danme lan le gaturobulin wamá aba lanme meseriwidunhadiwa lanme lun Heowá (Hob. 1:​10, 11; aliiha huméi Ariñawagúni 27:11). Ligíati, dan le úaragua wamá warufuduñein hínsiñe lan Heowá woun ani ye lan Satanási. Hasufuriruña san éibaahouni hámagiñe gumadimatiña lidan fulasu le ñein lubéi hawinwanda, maseinsuni, hamahan gürigia haganbun lidan apurichihani o amu luwuyeri turobuli? Anhein ítara liña lubéi, haritagua huméi ru lan le hasufurirubei chansi hun lun hagundaaragüdüni Heowá. Mabulieida huméi mígirunbei lan Heowá lun hásügürün óuchawaguni le hásiñarun awanda (1 Ko. 10:13). Líchugubei erei le hemegeirubei hun lun hawandun.

LÍCHUGUBEI BUNGIU LE WÍNWANBEI HAFAYEIRUAHA

10. Kaba ladüga Bungiu le wínwanbei luagu hafulesein ha áhuduragubaña lun?

¹⁰ Ruti Heowá hafayeiruaha ha áhuduragubaña lun (Ebü. 11:6). Ruti darangilaü luma ugundani woun guentó, ani ámuñegü líchuguba ibagari magumuchaditi woun. Chouru wamuti busén lan líchugun afayeiruahaü woun, ani gabafu  lan lun ladügüni. Ínchaha lumutiwa ichouruni le lun wawadigimaridun luagu lufulesein, ítara kei hadügüni lubúeingu lidan dan le sügühalibei. Ariha waméi likesin Timotéu (Ebü. 6:​10-12).

11. Ka ínchahabalin Timotéu lun lawadigimaridun lidan damuriguaü? (1 Timotéu 4:10).

¹¹ (Aliiha huméi 1 Timotéu 4:10). Ru lumuti Timotéu lemenigin luagu Bungiu le wínwanbei. Ligíati chouru lubalin líchugubei lan Heowá lafayeiruaha. Ligía lawadigimaridunbei luagu lufulesein Heowá luma luagu hafulesein amu. Ka ladügübei? Ínchaha lumuti apostolu Pábulu lun aban lan máisturu le buiti luma lun gíchigadi lan yanu, lúmati lun ábanbei lan buiti hénpulu houn íbirigu nibureintiña luma houn íbirigu ha derebuguhaña. Aba lichugún dasi hénrenguti lun, kéiburi, lererehan lau ínsiñeni houn íbirigu ha mégeibalin (1 Tim. 4:​11-16; 2 Tim. 4:​1-5). Gayaraati meha lachoururuni Timotéu líchuguba lan Heowá afayeiruahaü lun íbini marihín lan le ladügübei o mebegi lan houn amu (Rom. 2:​6, 7).

12. Kaba ínchahaña wéiyaaña lidan afiñeni lun hagunfulirun lau hadasin? (Ariha humóun giñe iyawaü).

¹² Uguñe weyu gayaraati giñe hachoururuni wéiyaaña lidan afiñeni ariha lani Heowá le hadügübei ani gebegi lan lun. Amu luéi harihin hau íbirigu, arufudahatiña, apurichihatiña, ani saragu hádangiñe ídehati lidan bunaguaü, ídehatiña giñe dan le ñein lan chagaguaü lánina liñawan dan kéiburi herigini, hárabaganali o katei líbeina lira. Añahein amu seriwitiña lidan Sétanu le Abisidahabaliña Sánditiña o lílana hama burí Sétanu ha Ídehabaña lun Lagaranihóun houn Íbirigu Háspitalirugu. Subudi hamuti wéiyaaña lidan afiñeni lani lan Heowá damuriguaü, mama lan lani ni aban gürigia. Ligíati, hadügünbalin dasi le ichugúbei houn tídangiñe sun hanigi ani chouru hamuti sunsuinagubei líchuguba lan Bungiu hafayeiruaha (Kol. 3:​23, 24).

13. Ida liña lasandiragun Heowá lungua dan le larihini áfaaguni le wadügübei lun weseriwidun lun?

¹³ Mama sun wagía lun gayara lan weseriwidun kei wéiyaaña lidan afiñeni, lau sun lira sun  wagía gayaraati wíchugun somu katei lun Heowá. Gúndaati dan le wáfaagun lun wíchuguni le buídutimabei wámagiñegua lun. Ligíati, gúndaati giñe dan le wíchugun budagia lun lawanserun dasi lánina apurichihani le adügübei lidan sun ubóu, meberesenga anhein gibe lubéi le wíchugubei o mibe lan. Ariha lumuti lau ugundani dan le háfaagun hiñuruni húhabu lun híchuguni hóunabagüle íbini haburi humá lun hayanuhan hadan saragu gürigia. Gúndaati dan le feruduna wamaniña ha achararubaña woun. Íbini genege lan hun mibe lan le hadügübei luagu lufulesein Heowá kei hamuga habusenrun, haritagua huméi gunda lan lau le hiyaraabei adüga. Hínsiñetün lun ani líchuguba afayeiruahaü hun luagu le hadügübei (Luk. 21:​1-4).

REDEI WAMÁ YARAFA LUN BUNGIU LE WÍNWANBEI

14. Ka uagu wariñaga líderagubadiwa lan werederun yarafa lun Heowá lun úaragua wamá lun? (Ariha huméi giñe dibuhu).

¹⁴ Anhein gamadagua wabéi luma Heowá, ménrenguntimabei woun úaragua wamá lun. Ítara liña ladügüni Hosé, mígiraguagüdünti lungua lun léiguadun lidoun magíaguni, ladüga inarüniti lan Heowá lun ani mabusenrunti ladügün ni kata le mínsiñeti lun Heowá (Agu. 39:9). Lun inarüni lan giñe Heowá woun, mosu wadireirun dan lun wafurieidun lun luma lun waturiahanu Lererun. Ítararügübei aganwoundeina lan wamadagua luma. Anhein buidu lubéi wamadagua luma Heowá kei meha Hosé, mabusenrunbadiwa wadügün ni kata le aubei magundan lan (Sant. 4:8).

15. Ka larufudahabei luriban hénpulu le híchugubei ísüraelina ha meha lídanbaña fulasu mageirawati woun? (Ebüréu 3:12).

¹⁵ Ha abulieidagubaña luagu aban lan Bungiu wínwanti Heowá, gayaraati hadisedun luéi lau lumenrengun. Samina wamá luagu le meha asuseredubei houn ísüraelina lidan fulasu mageirawati. Subudi hamuti meha aban lan Bungiu wínwanti Heowá, íbini ítara, aba hagumeserun asandira machouruni luagu líchugubei lan Heowá le hemegeirubei houn. Darí lun hálügüdagun houngua: “Anihein san Bungiu wama odi úati?” (Afu. 17:​2, 7). Lagumuhóun, aba hebedaagun lun Bungiu. Chóuruti mabusenrun  wamá wafalaruni luriban hénpulu le (aliiha huméi Ebüréu 3:12).

16. Ka katei gayaraabei lóuchaguni wafiñen?

¹⁶ Adügati ubóu le lun hénrengu lan woun werederun yarafa lun Heowá. Gíbetiña gürigia ariñagutiña ua lan Bungiu, ani genegeti buidu lan lidin houn ha madügünbalin lugundan Heowá. Sun katei le, gayaraati lóuchaguni wafiñen. Furanguti maweiyasunbadiwa lan asaminara ua lan Bungiu, le denchabei gayara lan wasaminarun míderagun lubadiwa lan. Aban katei líbeina le asuseredubei lun abürühati Sálumu 73. Arihati meha buidu lan lidin houn ha adüraagubalin lilurudun Heowá. Ábati lálügüdagun lungua anhein buidu lubéi lasigirun eseriwida lun Heowá (Sal. 73:​11-13).

17. Kaba íderaguawa lun werederun yarafa lun Heowá?

¹⁷ Ka íderagubalin abürühati Sálumu lun lasansiruni ligaburi lisaminan? Íderagua lumuti lararamun asaminara luagun le lunbei lasuseredun houn ha meseriwidunbaña lun Heowá (Sal. 73:​18, 19, 27). Lanwoun lira, saminati luagun buiti le wibihibei dan le weseriwidun lun Heowá (Sal. 73:24). Wagía giñe sun gayaraati giñe wararamagun asaminara luagun sun abinirúni le ru láalibei Heowá woun luma lun wasaminarun luagun ida liña lan hamuga wabagari lun hamuga meseriwidun wamá lun. Líderagubadiwa wadügüni katei le lun busén wamá úaragua wamá lun Heowá ani lun wariñaguni dimurei le lariñagubei abürühati Sálumu: “Ánheinti au, nayarafahóuba lun Bungiu, ladüga anihán lubuidun-ágeibei katei nun” (Sal. 73:28).

18. Ka uagu gayara lubéi wagurabuni le lunbei liabin ámuñegü lau afiñeni?

¹⁸ Gayaraati wararamun lun furumiñeguarügü turobuli le ñǘbuinti woun lidan lagumuhóun dan le, lugundun weseriwiduña lun aban “Bungiu wínwanti ani inarüniti” (1 Tesa. 1:9). Aban Bungiu wínwanti Heowá, nidiheriti wawagu ani ñeinbei súnwandan lun líderaguniwa. Íderagua lumutiña lubúeingu lidan dan le sügühalibei ani líderagubadiwa giñe uguñe weyu. Yarafa madise laduuruba aban óunwenbu asufuriruni le hanarimeti, lau sun lira, mámabadiwa wábugua (Isa. 41:10). “Gayaraati lubeiti wariñagun lau afiñeni: ‘Nabureme Bungiu íderagubalina; manufudebadina’” (Ebü. 13:​5, 6).