Álügüdahani le hadügübei aliihatiña
Ida luba gunfuranda wamani dimurei le lariñagubei Sálumu 12:7?
Lidan Sálumu 12:1-4, ariñagati Dawidi luagu furumiñeti wéiyaasu: “Ladüga úaaña afiñetiña gúnfulitiña le tímatimaati; úaaña gürigia buítiña”. Ani lárigiñe, lidan Sálumu 12:5-7, aba lariñagun:
“‘Násaara guentó ladüga hamudirawaguña gudemetiña,
agúarahatiña débilitiña lau igarigu.
Níchugubei ídemuei le hemegeirubei hounʼ.
Inarüniti füramasei le líchugubei Wabureme woun;
ítara liña kei pülata le fínutimabei, le adarúbei sedü wéiyaasu lidoun régigi!
Wabureme, bóunigirubadiwa;
súnwandan baramudubadiwa lan hawéi hawuyeri gürigia hagía!”
Ariñaga lumuti bérusu 5 le lunbei ladügüni Bungiu hawagu gürigia ha asufurirubaña: lesefurubaña lan.
Ariñagati giñe bérusu 6: “Inarüniti füramasei le líchugubei Wabureme woun; ítara liña kei pülata le fínutimabei”. Ani úarati saminaü le luma le hasaminarubei kristiánugu úaraguatiña (Sal. 18:30; 119:140).
Tidan amu burí Bíbülia, sügügüdawati Sálumu 12:7 kei: “Bóunigiruboun”.
Kei yusua lan dimurei “füramasei” lidan bérusu le lubaragiñebei le lun layanuhóun luagu le füramase lubéi Bungiu, añahein ariñagutiña ‘góunigiʼ lanu Lererun. Ani subudi wamuti góunigi lanu Heowá Bíbülia hawéi áganiñu ha áfaagubaña lun hadügün lun maliihóun tan o hagumuchun tau (Isa. 40:8; 1 Fe. 1:25).
Gama lumoun, góunigi lumutiña giñe Heowá gürigia ha iridúbaña lidan bérusu 5: “gudemetiña” hama “débilitiña”. Íderagua lumutiña ani lasigiruba íderaguaña luma esefuraña (Hob. 36:15; Sal. 6:4; 31:1, 2; 54:7; 145:20).
Ligíati, ka lóunigiruboun Heowá según le bürüwañubei lidan bérusu 7, gürigia odi Lererun?
Kei warihini lidan le lariñagubei bérusu le, furanguti layanuhaña lan hawagu gürigia.
Lidan lagumeseha Sálumu 12:1, ayanuhati Dawidi hawagu lubúeingu Heowá ha úaraguabaña, ha heyeedubaña gürigia salufuritiña. Lárigiñe, lidan bérusu 3, darí wamuti dimurei le lariñagubei Heowá, násaaruba lun náhuluniña ha adimuredügübaña. Chóurugüda lumuti Sálumu le woun gayara lan wafiñerun luagu lageindaguba lan Bungiu luagu hafulesein lubúeingu ladüga inarüni lan le lariñagubei woun.
Ligíati, hawagu gürigia ha lúnbaña lóunigiruniña Heowá hawéi salufuritiña layanuhóua lidan bérusu 7.
Kati uagu anuhein tubéi Bíbülia to ásügüragüdübalin bérusu le kei “bóunigiruboun”? Bíbülia burí tuguya, sigí tumuti le bürüwañubei lidan Abürüdǘni Ebüréu. Ánheinti tidan Septuahínta güriegu, yúsuati dimurei “bóunigirubadiwa” luma baramudubadiwa. Ligíati, layanuhóuña hawagu lubúeingu Bungiu ha úaraguabaña, ha ouserúabaña wuriba, lóunigirubaña ani sefuláñame hawéi “hawuyeri gürigia hagía”, gürigia wuribatiña ha éibugahañadügübaña lidan sun fulasu (Sal. 12:7, 8). Tidan aban Bíbülia to ásügürawagüdüboun lídangiñe abürüdǘni ebüréu lidoun araméu, ariñagati luagu bérusu 7: “WABUREME, bóunigirubei le úaraguabei, baramudubei lun súnwandan hawéi gürigia salufuritiña ha”. Ruti dimurei le ichouruni woun mama lan layanuhóuña luagu lererun Bungiu lidan Sálumu 12:7.
Lagumuhóun, ruti bérusu le emenigini houn ha úaraguabaña luagu lóunigirubaña lan Heowá.
