1, 2. Ítara kei lariñawagún lidan 1 Féduru 4:7, 8, kaba íderaguawa agagibudagua luma lénrengunga?

LAU ayarafadeina wamá lidoun lagumuchagüle “lagumuhóun dan”, másiñati wásügürüba lan burí lídangiñe saragu lénrengunga (2 Tim. 3:1). Kéiburi lárigiñe abuduhani lidan aban ageiraü Áfürika le ñéingiñe lubéi lálüda weyu, aba ñein lan aban anarimeni ani aba labuinchun fulasu lau saragu chagaguaü. Kéiburi lóugiñe sisi hati hau íbirigu lidan denchaü, ha awinwandubaña lidan fulasu ligía. Ka íderagubaliña lidan sügǘ hénrenguti le? Wínwantiña fiu hádangiñe hábiñe amu íbirigu ha awinwandubaña lidan burí fulasu chóuruti. Ariñagati aban íbiri: “Lidan dan ligía, gúndaatina meha lau hama nan numadagu. Rútiwa meha gurasu wámagua”.

² Danme le laduurun “óunwenbu asufuriruni”, wíchuguba eteingiruni lau gamadagua wamá hama gürigia ha únbaña wínsiñeda (Aruf. 7:14). Ligía súdini lubéi lun wabuiduragüdüni wamadagua guentó (aliiha huméi 1 Féduru 4:7, 8). Furendeitiwa saragu lídangiñe le asuseredubei lun Heremíasi lugundun ibihati ídemuei hámagiñe lumadagu lubaragiñe meha lagünrinchawagun Herusalén. * Ida luba wáyeihani?

3. a) Ka meha katei gayaraabei ladügün lun ladisedun Heremíasi? b) Ka labahüdahabei Heremíasi lun lani abürühati, ani ida liña lidin houn?

³ Wínwanti Heremíasi kéiburi 40 irumu haganagua gürigia múarantiña, hadan, añahein meha lubesinanigu ani másiñati  giñe añahein hamá fiu liduheñu ha lídangiñetiña fulasu le ñein lubéi lagüriahóua, le gíribei Anatótu (Her. 11:21; 12:6). Íbini ítara, madisedunti. Darí lun abahüdaha lani le lasandirubei lun Baruku, le lani abürühati le úaraguabei, ani rédeiti le lariñagubei bürüwañu tidan Bíbülia (Her. 8:21; 9:1; 20:14-18; 45:1). Chóuruti adüga lan hásügürüni dan úara lidan abürüheina lani Baruku sun le asuseredubei lun Heremíasi lun hasandirun aban óunwenbu ínsiñehabuni luma inebesei hámagua (Her. 20:1, 2; 26:7-11).

4. Ka lariñagubei Heowá lun Heremíasi lun ladügüni ani ka uagu adüga lubéi wadagimanu le lun lederebugudun lumadagua Heremíasi luma Baruku?

⁴ Rúhali meha Heremíasi eweridihani houn ísüraelina lau ganigi luagu le meha lunbei lasuseredun lun Herusalén (Her. 25:3). Lidan lagumuhóun láfaagun lun línchahaniña gürigia lun hasakürihan, ariñagati Heowá lun Heremíasi lun labürühani eweridihani tidan aban hóuburatu (Her. 36:1-4). Nadagimeinti Heremíasi úara luma Baruku másiñati luagu saragu hati lun hagunfulirun lau dasi le líchugubei Bungiu houn. Chóuruti ayanuha hamá meha hámagua sun dan le haubei nadagimei úara luagu burí katei le íderagubaliña lun derebugu lan hafiñen.

5. Ida liña wasubudiruni aban lan meha umadaü buiti Baruku lun Heremíasi?

⁵ Dan le lachülürünbei dan lun lasubudiragüdüniwa le tariñagubei hóuburatu, ru lumuti Heremíasi dasi le lun Baruku le lumada (Her. 36:5, 6). Lau ganigi, gúnfuli lumuti dasi denchati le. Gayaraati wasaminarun luagu ugundani le funa lasandirubei Heremíasi dan le lídinbei lumada lidan tibürürün ténpulu lun laliihani le tariñagubei hóuburatu hagibugiñe lílana fulasu (Her. 36:8-10). Dan le híchugunbei lábutigu Hudá fe luagu le ladügübei Baruku, aba hariñagun lun lun laliihani le tariñagubei hóuburatu houn (Her. 36:14, 15). Ábati habahüdahani ábutigu lun urúei Hoakimü ka lan lariñagubei Heremíasi. Ábati híchuguni lubuidun  eweridihani le lun Baruku: “Buguya luma Heremíasi, heiba aramudagua, masubudiraléi ni aban haliañadün lan” (Her. 36:16-19).

6. Ka ladügübei Baruku luma Heremíasi dan le héibahounbei?

⁶ Dan le laganbubalin urúei Hoakimü le labürühabei Heremíasi, aba lagañidun saragu darí lun lágudunu hóuburatu, óunaha ligía adaüragüdei profeta Heremíasi lau sun Baruku. Madügünti katei le lun lanufudedun Heremíasi. Ábaya lanügün aban hóuburatu ani aba líchugunu lun Baruku aba lariñaguni uganu le lúmagiñeti Heowá lun Baruku lun labürüdüni. “Aba labürühani [Baruku] sun le lariñagubei Heremíasi lun, le buga bürüwañubei tidan hóuburatu to láguduboun urúei Hoakimü” (Her. 36:26-28, 32).

7. Ka katei másiñati susere lan lun Heremíasi luma lun Baruku dan le hawadigimaridun úara?

⁷ Liibe-agei dan aba héretima lan hamadagua bián gürigia dan le hawandun óuchawaguni úara. Ligíati danya le labürühabarun Heremíasi úara luma Baruku teweñegua hóuburatu to láguduboun urúei Hoakimü, chóuruti adüga lan lun héretima lan hamadagua. Ka wafurendeirubei hámagiñe bián wügüriña úaraguatiña ha?

8. Ka gayaraabei ladügün lun hénrengu lan lun wadügün umadagu buítiña?

⁸ Anhein adügǘwaali lubéi wuribani woun, másiñati hénrengubei lan woun lun wadaarunu wanigi houn amu (Ari. 18:19, 24). Gayaraati giñe lasuseredun genege lan woun madaani wamá ani mere wamá lun wabuiduragüdüni wamadagua. Mábürühan lan warüna. Anhein busén wabéi lun híderaguniwa wábirigu dan le wagagibudagun luma óuchawaguni, lunti wafurendeirun asubudiragüdei le wasaminarubei luma le wasandirubei houn. Ligía láranibei wadügün umadagu ha inarünitiña (1 Fe. 1:22).

9. a) Ida liña larufuduni Hesusu afiñe lan hawagu lumadagu? b) Ida luba líderaguniwa gayanuhadi wamá lun wederebudagüdüni wamadagua hama amu? Abahüdaha humá aban sügǘ.

⁹ Arufuda lumuti meha Hesusu afiñe lan hawagu lumadagu lau gayanuhadi lan hama (Huan 15:15). Gayaraati wáyeihani le ladügübei ánhawa ayanuha hama amu luagu wagundan, wadiheri luma luagu magundani le wásügürübei o luagu somu sügǘ lidan wabagari. Luagu amu oubaü, lunti wíchugun arigei dan le layanuhan somu gürigia wama, lugundun ítara hasubudirubei ligaburi wasaminan, le wasandirubei, wasubudirubei giñe úara lan wasaminan hama lidan saragu katei. Ariha waméi lidan tikesin Cindy, aban íbiri 29 irumu tau. Aba gamadagua tan tuma aban íbiri prekursora to barüharuboun lóugiñe 60 irumu to gíriboun Marie-Louise. Sagü luagu-gádürü binaafin, háfuridun apurichiha úara ani ayanuhatiña  luagu ámuñegueinarügü tema. Ariñagatu Cindy: “Hínsiñeti nun nayanuhan luagu tema huliliti hama numadagu, ladüga íderagua lumutina le lun nasubudiruniña luma lun gunfuranda nániña buidu”. Ánhawa ayanuha súnwandan wámagua, ábatimame labuidurun wamadagua. Ligíati, ítara wamá kei Cindy ani da waméi furumiñeti pasu lun gayanuhadi wamá dimurei le buiti ani lau ínsiñehabuni (Ari. 27:9).

10. Según Ariñawagúni 27:17, ka gayaraabei lasuseredun dan le wapurichiha úara hama wíbirigu?

¹⁰ Ítara kei lasuseredun lidan likesin Heremíasi luma Baruku, dan le wapurichiha úara hama wíbirigu ani teni wagía lun lubuidun hagaburi, furendeitiwa saragu hámagiñe ani ábatima derebugu lan wamadagua (aliiha huméi Ariñawagúni 27:17). Kéiburi ánhawa áfurida apurichiha luma aban íbiri aganba waméi layanuhan luagu lafiñen lau ganigi o layanuhan lau ichouruni luagu Heowá luma luagu le füramase lubéi, másiñati ábatima lanme línsiñedun íbiri le woun.

11, 12. Ru humá aban hénpulu luagu ida liña lan ladügün apurichihani lun lidan hamá aban kristiánugu?

¹¹ Ariha wamá bián kesi le arufudubalin woun ida liña lan ladügün háfuridun kristiánugu apurichiha úara lun lidan hamá aban. Amuriahatu Adeline, 23 irumu tau, tuma aban tumada to gíriboun Candice lun háfuridun apurichiha úara lidan aban fulasu le lóuguati lapurichihóun. Ariñagatu Adeline: “Busentiwa meha lun wapurichihan lau ubebeni luma lun wibihin saragu buiti lidan apurichihani. Biángubei wagía mégeitiwa meha wárügüdün erei lunya wasigirun lidan weseriwidun lun Bungiu”. Ka buiti habihibei lau hapurichihan úara? Óunabatu Adeline: “Sagü lárigiñe wapurichihan aban wayanuhan luagu ida liña lan wasandiragun woungua, luagu gurasu le wibihibei lárigiñe wayanuhan hama gürigia lidan apurichihani luma luagu warihini lúhabu Heowá. Hínsiñeti meha woun, wagía biángubei wayanuhan luagu katei huliliti ani aba subudiguatima wamá wámagua”.

¹² Ñǘdüntün Laïla tuma Marianne, bián íbirigu Faransuna ha mamarieidungiña, apurichiha  luagu seingü dimaasu lidan aban lanarime uburugu gíriti Bangui, le lichügüdina Republika Lamidan Áfürika. Ariñagatu Laïla: “Gaturobulinhadina meha murusunraü nuguya tuma Marianne, gama lumoun seremei gayanuhadi wamá luma ínsiñeni le wádanbei, aba lederebugudun wamadagua. Ábati gebegi tan nun dan le narihinbalin ménrengun lan katei tun, hínsiñe hamá gürigia ha lílana ageiraü tun, arufuda tuguya ubebeni lidan apurichihani”. Mama mosu woudin lidoun aban ageiraü lun wibihini buiti le. Sagü wáfuridun luma aban íbiri o tuma aba íbiri, apurichiha lidan fulasu le ñein lubéi lapurichihan damuriguaü le ñein wabéi, gachansintiwa lun wasubudiruniña buidu luma lun wederebudagüdüni wamadagua hama.

13. Ka gayaraabei lasuseredun dan le wapurichiha úara hama wíbirigu?

¹³ Anihein dan, dan le wapurichiha úara hama wíbirigu, mámarügüñein lubuidun hagaburi wariha, ariha wamuti giñe hachara. Ka gayaraabei líderaguniwa lidan kesi le? Giribu wamá lumoun le ladügübei Heremíasi. Ka íderagubalin lun larihini buiti le hadügübei amu luma lun metenirun lan lun hachara?

14. Ka lafurendeirubei Heremíasi lúmagiñe Heowá, ani ida liña líderaguni le lafurendeirubei?

¹⁴ Heremíasi abürüdübarun líburu to anügübalin liri ani másiñati ligía lan giñe abürüdübarun furumiñetu tuma tibiaman haliburun Urúeigu. Chóuruti adüga lan dasi le lun larihini lugudemehabu Heowá houn gürigia gafigountiña. Kéiburi, subudi lumuti dan le lan lasakürihanbei urúei Aabü lárigiñe wuribani le ladügübei, aba lariñagun Heowá marihin lubéi lan Aabü lagumuchún hau sun liduheñu (1 Uru. 21:27-29). Subudi lumuti giñe íbini adüga lan Manasési würibati ligibugiñe lagu Heowá sügǘ luéi le ladügübei Aabü, feruduna lumuti Heowá dan le lasakürihanbei (2 Uru. 21:16, 17; 2 Kro. 33:10-13). Chóuruti íderagua lani abahüdaguni le Heremíasi lun láyeihani luguraasun luma lugudemehabu Bungiu lau lóuserun hama lumadagu (Sal. 103:8, 9).

15. Dan le lararamagunbei leseriwidun Baruku lun Heowá, ida liña larufuduni Heremíasi gaguraasun lan lubá?

¹⁵ Samina wamá luagu le ladügübei Heremíasi dan le ladireirubei Baruku fiu dan luéi lidasin. Lubaragiñe lasaminarun máraninaali lan Baruku, ábarüga líderaguni lau layanuhan luma luagu uganu furanguti le lúmagiñebei Heowá ani lau ínsiñehabuni (Her. 45:1-5). Ka wafurendeirubei?

16. Kei larufuduni Ariñawagúni 17:9, ka lunbei wadügüni lun wederebudagüdüni wamadagua?

¹⁶ Le linarün katei, siñati wagurabun macharabaña lan wábirigu. Ligíati áfaagua wamá lun wederebudagüdüni umadaguaü le wadügübei. Anhein acharara aban umadaü woun, másiñati mosu lanme wayanuhan luma furangu, gama lumoun, lau ínsiñehabuni luma lun weweridiruni lau wayusuruni adundehani le tídanbei Bíbülia (Sal. 141:5). Ánheinti adüga lubéi wuribani woun, lunti feruduna wamani. Danme le feruduna wamaali, áfaagua wamá lun masagahan wamani le ladügübei (aliiha huméi Ariñawagúni 17:9). Lidan dan hénrenguti le, súdiniti lun wetenirun lun lubuidun hagaburi wíbirigu mama lun hachara. Ani ítara, wederebudagüdübei wamadagua. Súdiniti lun wadügübei lan ladüga mégeibadiwa umadagu buítiña lídanme óunwenbu asufuriruni.

17. Ka uagu subudi wabalin aba lan umadaü Heremíasi le inarüniti lidan lidaani idiheri?

¹⁷ Aban meha umadaü profeta Heremíasi lidan lidaani idiheri. Ariha waméi ida liña lan líderaguni Éwedi-mélekü. Aban meha úfisi tídangiñeti lani urúei palasiu le esefurubalin lídangiñe fusu lun mounwen lan. Lárigiñe lesefuruni  libagari aba lasandirun Éwedi-mélekü anufudei luéi hadügün ábutigu wuribani lun. Dan le líchugubei Heremíasi fe, merederunti maniñu agurabaha lun laranseruni Éwedi-mélekü lituróbulin. Íbini ladaürǘña lan Heremíasi, adüga lumuti sun liyaraati lun líchugun darangilaü lun lau layanuhan lun luagu füramasei le lúmagiñeti Heowá (Her. 38:7-13; 39:15-18).

18. Según le lariñagubei Ariñawagúni 17:17, ka gayaraabei wadügüni dan le lasufuriruña lan aban íbiri?

¹⁸ Uguñe weyu hagagibudaguña wábirigu luma saragu turobuli. Kéiburi, saragu hádangiñe hagagibudaguña luma turobuli le lanügübei liñawan dan o turobuli le lagubuhabei wügüri. Lidan burí kesi le másiñati gayaraabei lan weresibiruniña íbirigu ha wábiñe. Ha híbiri íbirigu háfuga gayara lan hídehan lau seinsu. Le gayaraabei wadügüni súngubei wagía lun wamuriahan luma Heowá lun líderaguniña. Ánhawa íchiga fe anihein lan aban íbiri féridi laali lan luguraasun, másiñati ibidiñebei lan woun kaba lan wariñaga lun o kaba lan wadüga lun. Gama lumoun, sun wagía gayaraati wadügün saragu. Kei hénpulu gayaraati wásügürün dan luma, waganbuni le lariñagubei dan le layanuhan wama luma wíridun aban bérusu tídangiñeti Bíbülia le meha íchugubei gurasu woun (Isa. 50:4). Le súdinibei lun werederun houba houba wábirigu danme le hemegeiruniwa (aliiha huméi Ariñawagúni 17:17).

19. Ida luba líderaguniwa umadaguaü le wadügübei guentó lubá ámuñegü?

¹⁹ Mosu aranseñu wamá lun wadügün luma lun wederebudagüdüni wamadagua hama wíbirigu guentó. Ka uagu? Ladüga álugatiña wáganiñu lun wafanreinragun lau haburuchaguagüdün iyeeni luma ñunsu le mabuidunti. Áfaaguatiña lun hadügün lun mídehan wamá wámagua ni lun wafiñerun wawougua. Gama lumoun, wuribabei lidin houn wáganiñu. Siñabei hagadeiruni ínsiñeni le adügübei lun lidan wamá aban. Úati ni kata le lunbei hadügüni lun lagumuchun lau umadaguaü le adüga wamaalibei. Ligíati, laduraruba umadaguaü le, mama darí liabin lagumuchagüle ubóu, laduraruba lun sun dan.