1, 2. a) Según Éfesuna 6:16, ka uagu megei wabalin idaüdinaü le ítarabei kei afiñeni? b) Kaba álügüdahani wakutiha?

ÍTARA liña wafiñen luagu Bungiu kei aban ‘idaüdinaü’, gama lumoun, halíaba hamuga lébeda lueirin? (Aliiha huméi Éfesuna 6:16). Ítara kei góunigi lani aban idaüdinaü wéiriti aban súdara, góunigi lumutiwa giñe wafiñen luéi katei wuribati le lánina ubóu le, kei burí luéi magíaguni, anarimeni, o furumiñeguarügü amu katei le múaranti luma lilurudun Bungiu.

² Wawinwanduña lidan “lagumuhóun dan”, ani ítarameme luba wafiñen ouchawagúa (2 Tim. 3:1). Ligíati, ida luba wasubudiruni derebugu lan wafiñen le ítarabei kei idaüdinaü? Ani ka lunbei wadügüni lun wárügüdüni lau sun were? Akutiha waméi óunabagülei lun burí álügüdahani le.

3. Ida liña meha hóunigiruni súdaragu hadaüdina, ani ka uagu?

³ Lidan meha tidaani Bíbülia afurarúati meha idaüdinaü lau gueru. Aba háhurudagun súdaragu agülei luagu lun magadeirun lan gueru luma lun magahüdün lan fánreinti le laubei gürabu. Anhein meha íchiga súdara fe luagu gadei haali lan lidaüdina, mosu meha laranseruni, ítara luba laranserun lubaaya lawuribuha. Ka lánibei le luma wafiñen?

4. a) Ka uagu mosu lubéi warihini anhein buídugili lubéi wadaüdina le lánina afiñeni? b) Ida luba wadügüni?

⁴ Ítara kei meha hadüga súdaragu ha lánina binadu dan, mosu  giñe waríaahani súnwandan anhein ua lubéi mégeiti luagu wadaüdina, lidan amu dimurei anhein wasigiruña lubéi afiñera luagu Heowá. Úati ni aban gayarati ladügüni wawagu. Ítararügüba aranseñu wamá lun wawuribuhan, lugundun wageindaguña hama burí sífirigu wuribatiña (Efe. 6:10-12). Ida liña wachoururuni luagu aranseñu waña lan lubá wagagibudagun luma óuchawaguni? Furumiñe, lau wamuriaha ídemuei luma Heowá? Lárigiñe, mosu woudin tidoun Lererun lun waríagun woungua kei larihiniwa (Ebü. 4:12). Ariñagatu Bíbülia: “Afiñebá luagu Bungiu tau sun banigi, mamalá luagu lualin bichügü” (Ari. 3:5, 6). Lau saminaü le, ka uagu makutihan wabéi luagu le wasaminarubei wadügün? Kéiburi, anhein maseinsun wabéi, haritagua wamagili san le lariñagubei Heowá lidan Ebüréu 13:5? Ariñagati ñein: “Nóunigirubadibu; mígirun nubadibu”. Adügati san füramasei le lun wachoururuni líderagubadiwa lan Heowá? Anhein ítara liña lubéi buiti wadaüdina le lánina afiñeni.

5. Ka gayaraabei lasubudiragüdüni woun ida liña lan wafiñen?

⁵ Dan le warihini ida liña lan wafiñen gayaraati taweiridun wanigi. Másiñati, wasubudirun anihein lan somu débili wawagun le ibidiñebei woun anihein lan. Kéiburi háfuga wíchugun fe adügaali lan lanarime idiheri, iyeeni o maguraasuni lun lagadeirun wafiñen. Anhein ligía lubéi asuseredubei hun, ka gayaraabei wadügüni lun maweiridagun lan gádantiwa?

6. Ka katei maribanbei lun wadiheridun luagu?

⁶ Maribanti wadiheridun luagu somu katei, kéiburi lun wagundaaragüdüni Heowá luma Hesusu (1 Ko. 7:32). Anhein adügaadiwa lubéi aban figóu wéiriti, súdiniti woun lunya gamadagua wamá luma Heowá (Sal. 38:18). Maribanti giñe lun hagundaaraguagüdüniña maríeitiña hámarigu, ani sun wagía nidiheritiwa luagu ida luba lan lidin houn waduheñu luma houn íbirigu (1 Ko. 7:33; 2 Ko. 11:28).

7. a) Ida liña gayara lan lagadeiruni lanarime idiheri wafiñen? b) Lau gabaroun wamani le lariñagubei Ariñawagúni 29:25, ka uagu moun lumuti lubéi wanufudedun hawéi gürigia?

⁷ Luagu le aban oubaü, gayaraati lagadeiruni lanarime idiheri wafiñen. Aban lídangiñe lasaminarun gürigia libihin saragu daüguaü luma éigini (Mat. 6:31, 32). Gayaraati ladügün idiheri le lun wetenirun lun wibihin umegeguni darí lun línsiñedun seinsu woun. Ábameti ledebilidun wafiñen luagu Heowá ani ábame lagadeirun wamadagua luma (Mar. 4:19; 1 Tim. 6:10). Gayaraati giñe wadiheridun saragu luagu wabusenrun lun wínsiñedun houn amu. Gayaraati ladügün katei le lun wanufudedun luéi ladügǘn bula wau o luéi wéibaahoun, lubaragiñe wagundaaragüdüni Bungiu. Ida luba wóunigiragun woungua luéi turobuli le? Lau wayumuragun lun Heowá lun líchugun lanwoun wafiñen luma lun líchugun ganigi woun (aliiha huméi Ariñawagúni 29:25; Luk. 17:5).

8. Ka lunbei wadügüni anhein aburuchaguagüda somu gürigia iyeeni luagu Heowá luma hawagu wíbirigu?

⁸ Yúsuti Satanási le “lúguchibei iyeeni” gürigia ha lábugiñebaña lubafu lun haburuchaguagüdün iyeeni luagu Heowá luma hawagun wíbirigu (Huan 8:44). Kéiburi, ésegeha hamuti ha agarabaagubaña luagu Bungiu inarüni tuagu lóundarun Heowá tidan Internet, tidan bigibigitu o lidan amu burí katei líbeina le. Iyeeni le, ligía aban tídangiñe “gimara durunguatu to lachüühaboun” Satanási wawagun (Efe. 6:16). Ka lunbei wadügüni anhein ayanuha somu gürigia woun luagu iyeeni le? Lunti wamaharun lun. Ka uagu? Ladüga ru wamuti wafiñen luagu Heowá ani afiñetiwa giñe hawagu wíbirigu. Ligíati, adüga wamuti sun wayaraati lun móundarun wamá hamoun gürigia ha agarabagunbaña  luagu Bungiu. Adüga waméi sun wayaraati lun méiguadun wamá asigeneha hama, nírügü lun waríaaha lidoun le hadaagubei o le hariñagubei.

9. Ka gayaraabei ladügüni maguraasuni woun?

⁹ Gayaraati ladügün maguraasuni lun ledebilidun wafiñen. Anihein dan aban ladügün turobuli lun maguraasun wamá. Inarüni siñá lan waramudagun luéi. Ánhawa hamuga aramudagua luéi meberesen habunihali lira. Ani le lunbei madügün wamani wasaminarun sun oura luagu, lugundun gayaraabei wabulieidagun luéi lubuidun emenigini le líchugubei Heowá woun (Aruf. 21:3, 4). Gayaraati ladügün maguraasuni lun labuchadun wawagu lun meseriwidun wamá lun Heowá (Ari. 24:10). Mama mosu lasuseredun le woun.

10. Ka wafurendeirubei luagu le tabürühabei aban íbiri?

¹⁰ Ariha waméi le tadügübei aban íbiri Meriga lun takipuruni tafiñen derebuguñu lidan tóunigiruñei lan tani weiriei dan le sandi lubéi. Aba tabürühan aban gárada tidoun Beteli to arihiboun lau hawadigimari Gefentiña lidan sun ubóu, ariñagatu tidan gárada tuguya: “Anihein dan adügati le gádanbaliwa lun wadiheridun ani aba maguraasun wamá, íbini ítara, derebuguti wafiñen. Wéirigüda lumutu nanigi ariñahani le weresibirubei lun wederebudagüdüni wafiñen luma lun gaguraasun wamá. Megei wamuti adundehani le. Íderagua lumutiwa lun wasigirun wabaruaguóun luma lun wawanduni lóuchaguniwa Satanási”. Arufudahati dimurei le tariñagubei íbiri to luagu gayara lan wagañeiruni maguraasuni. Ida? Lau warihini le asuseredubei woun kei aban óuchawaguni lúmagiñeti Satanási luma lau wafiñerun líchuguba lan Heowá gurasu woun luma lun gebegi lan ariñahani le ñǘbuinbei lúmagiñe, le ítarabei kei aban éigini.

11. Ka álügüdahani lunbei wadügüni wóuniwagua lun warihini anhein buídugili lubéi wafiñen?

¹¹ Mégeiti san wadaüdina le lánina afiñeni lun laransehóuniwa. Samina wamá luagu le wadügübei lidan burí hati le sügühalibei: “Áfaaguadina san lun madiheridun nan saragu?, máhatina san lun naganbuniña ha agarabagunbaña luagu Bungiu ni lun nasigeneha hama? Mígiraguagüdün háadina san nungua lun maguraasuni?”. Anhein anha lubéi wariñagubei lidan álügüdahani le, mini lan, buidu lan wafiñen. Guentoti, lunti wóunigiragun woungua ladüga yúsuti Satanási amu burí áruma lun labürühan wawagun. Ariha wamá aban tídangiñe.

12. Ka gayaraabei lasuseredun anhein hínsiñe lubéi umegeguni lun aban gürigia?

¹² Gayaraati ladügün ínsiñeni luagu umegeguni lun wadireiruni warihin luéi idaüdinaü le lánina afiñeni. Ariñagati apostolu Pábulu: “Úati súdara le eseriwiduti ádaraguti lungua lidoun amu katei luéi le lánina asudarahani, lugundun gasu lerederun sunsuinagubei lábugiñe lererehan lábuti” (2 Tim. 2:4). Migirúntiña meha súdaragu rómana lun hadügün bísini. Ka gayaraabei lasuseredun anhein ladüraagua aban súdara gumadi le?

13. Ka uagu man habéi súdaragu bísinisi?

¹³ Samina wamá luagu sügǘ le. Sun binaafin hau súdaragu asayaha tau eféin, anihein aban hádangiñe madügün lumuti, ladüga aningira lan uburugu adarara aban bísinisi lau éigini. Ani rábounweyu, aba harihinu súdaragu ida tiña lan hárumate ani aban hayarahanu hefeinte. Ánheinti, le gánibei bísinisi aba letenirun tun lani bísini aransehei éigini le lunbei laluguarahani larugan weyu. Sódini, larugan binaafin aba hábürühan súdaragu áganiñu hawagun. Ka súdara aransebei lun lawuribuhan ani gúndaabei lábuti lau? Ani ka hamuga wabusenrubei wóubagiñe? Aban san hádangiñe ha aransebaña luba wuribu o le etenirubei tun lani bísinisi?

14. Kátima gebegibei woun wagía le lisudaranigu Kristu?

¹⁴ Ítara kei aban súdara le buiti, mígiruntiwa lun wadireiruni wasaminan luéi le súdinibei: wagundaaragüdüni wábuti, Heowá luma Kristu. Gebegitiña woun sügǘ luéi furumiñeguarügü katei le líchugubei ubóu le lábugiñebei lubafu Satanási. Áfaaguatiwa wachoururuni anihein lan dan luma erei le wemegeirubei wama lun weseriwidun lun Heowá. Lugundun ítara liña wafiñen luagu Bungiu kei aban idaüdinaü, ligíati áfaagua wabéi lun wóunigiruni wadaüdina luma lun ua lan mégeiti luagu.

15. Ka eweridihani líchugubei Pábulu woun, ani ka uagu?

¹⁵ Mígira wamá lun lábürühan warüna. Ka uagu? Eweridihati apostolu Pábulu “Ánhaña ha busenbaña harisidun [...] aba hígiruni hafiñen” (1 Tim. 6:9, 10). Dimurei “hígiruni” mini lan gayara lan wadireirun ánhawa áfaagua lun wibihin umegeguni le memegeirun wamuti. Gayaraati wagagibudagun luma saragu “lagübüri aritaguni”. Ligíati mígira wamá lun lebelurun luriban  ayumahani le tidoun wanigi. Ariha waméi kei áruma to gayaraaboun tagadeiruni wafiñen.

16. Lárigiñe laliihóun abahüdaguni le lídanbei ewanhéliu lani Márükosu 10:17-22, ka álügüdahani lunbei wasaminarun luagu?

¹⁶ Samina wamá anihein lan seinsu wama lun wagañeihan saragu umegeguni. Wadügüña funa san somu katei wuribati lau wibihini katei le genegebei woun megei wamani ani memegeirun wamuti? Mámadigiñe. Gama lumoun samina wamá luagu álügüdahani le: Anhein gayara lubéi wagañeihan somu katei, gadanitiwa san? Anihein san dan luma erei wama lun wayusuruni luma lun wóunigiruni? Ábaya katei, gayarati san ladügün umegeguni lun wagumeserun árügüda ínsiñeni luagu? Gayaraabei san ladügün saminaü le lun wáyeihani nibureinti le amaharunbei lun agunbirahani le ladügübei Hesusu lun lun ladügün saragu lidan leseriwidun lun Bungiu? (Aliiha huméi Márükosu 10:17-22). Buídutimati lun ménrengun lan lun wanügüni wabagari luma lun wíchuguni lubuidun agei wadaani luma lun wadügüni lugundan Heowá.

17. Ka katei maweiyasuntiwa lun wabulieiduni?

¹⁷ Maweiyasun wamá abulieidei lídanñadiwa lan wuribu ani mosu lan aranseñu wamá lubá wageindagun sagü weyu hama sífirigu (Aruf. 12:17). Kei ítara liña lubéi wafiñen luagu Bungiu kei aban idaüdinaü, wagía guánarügü lunbei wáfaagun  lun wárügüdüni wadaüdina buidu, lidan amu dimurei wagía lunbei wáfaagun lun wafiñerun luagu Bungiu.

18. Ka uagu hárügüdei binadu súdaragu hadaüdina lau erei?

¹⁸ Lidan binadu dan, rúwati uéiriguni lun súdara le arufudubei ganigi lidan wuribu. Ani aban busiganu dan le lagiribudun sin lidaüdina. Abürühati aban wügüri Rómana le abürühabei luagu binadu dan, ariñagati: “Aba lanarime busiganu lígiruni lidaüdina fuíwañu”. Ligía lébunabei láfaagun súdara lun lanügüni lidaüdina ragüñu lau erei.

19. Ka gayaraabei wadügüni lun wárügüdüni wadaüdina le lánina wafiñen lau sun were?

¹⁹ Kei ítara liña lubéi wafiñen luagu Bungiu kei aban idaüdinaü, lunti wárügüdüni buidu lau burí wabasihan súnwandan lidoun adamuridaguni, lau wayanuhan luagu liri Heowá luma luagu Larúeihan houn amu gürigia (Ebü. 10:23-25). Ámuya katei, mosu giñe waliihanu Bíbülia sagü weyu luma lun wamuriahan luma Heowá lun líderaguniwa adügei le lariñagubei woun (2 Tim. 3:16, 17). Ligíati úaboun ni aban áruma lani Satanási lun tadügün dañu woun lun sun dan (Isa. 54:17). Lóunigirubadiwa wafiñerun tídangiñe sun wanigi luagu Bungiu. Úaraguabadiwa lidan weseriwidun lun Heowá úara hama wíbirigu. Mama gáñeinrügün wabéi wuribu lánina sagü weyu, gachansibadiwa giñe lun werederun luéigiñe lóubadina Hesusu, danme le lagañeiruni Hesusu Satanási hau sun máfianu (Aruf. 17:14; 20:10).