1, 2. a) Kaba íderaguawa lun woudin sagü weyu wabaruaguóun? Afuranguagüda huméi. b) Kaba wariha lidan arütíkulu le?

LÁRIGIÑE wásügürün lídangiñe aban óuchawaguni, saragu wádangiñe saminatiwa siñabei lan hamuga wagagibudagun luma óuchawaguni ligía wábugua. Háfuga ariñaga wamaali lan dimurei burí le lárigiñe wasaminarun ida liña lan wawanduni aban lanarime sandi o lounwen somu waduhe. Sanditiwa gayara lan woudin wabaruaguóun seremei lani Heowá sífiri sandu le íchugubalin “óunwenbu ubafu le wawagubei” woun (2 Ko. 4:7-9).

² Megei wamuti giñe lídehan sífiri sandu lun wagagibudagun luma lubafu libidiegun ubóu le (1 Huan 5:19). Ani mosu giñe wageindagun “hama burí sífirigu gabafutiña ha lánina wuribani” (Efe. 6:12). Lau gabaroun wamani sun turobuli le úmabei wagagibudagua, warihaali ida luba lan líderaguniwa sífiri sandu lidan bián igaburi. Lárigiñe wakutihabei le gayaraabei wadügüni lun wasagarun buiti lídangiñe.

3. Ka igaburi ídanbei lídehan sífiri sandu lun wawanduni turobuli?

³ Íderagua lumutiwa lani Heowá sífiri sandu lau líchugun ubafu woun, o erei lun wagunfulirun lau wadasin íbini gaturobulin wamá. Saminati meha apostolu Pábulu gayara lan lasigirun eseriwida lun Heowá, íbini laganagua lénrengunga seremei ‘lubafu Kristu’ (2 Ko. 12:9). Lidan libiaman luéiyasun Pábulu kei misioneru, mama áfaaguarügüti saragu lidan apurichihani, nadagimeinti giñe lun libihini lemegeirun. Lúbiñe meha Akila tuma Pürisíla leredera uburugu Korintu, adaagua meha kianpu hafisiutebei. Kei le aban lubéi lifisiute hama, nadagimeinti fiu weyu lidan dimaasu (Adü. 18:1-4). Ruti sífiri sandu erei lun lun ladügüni wadagimanu le luma lun lapurichiha.

4. Según 2 Korintuna 12:7b-9, ka meha uma lageindagua Pábulu?

 ⁴ (Aliiha huméi 2 Korintuna 12:7b-9). Ka labuserunbei Pábulu lariñagun dan le lariñagubei nageindaguña luma “aban hiiyu charuñu nuagu”? Ánhawa hamuga límira hiiyu, háfuga gáribei woun saragu. Le labuserunbei meha Pábulu lariñagun lageindaguña lan luma aban óuchawaguni lidan lúgubu. Aba lariñagun luagu óuchawaguni ligía aba lan “lóunagüle Mafia”, le asufuriragüdübalin. Gayaraati mama lan Satanási hama lumafianu ádarubalin hiiyu ligía luagun, mini lan le, mama lan hagía adügübaña lun gaturobulin lan. Gama lumoun, dan le harihini sífirigu salufuritiña ha gaturobulin lan Pábulu le ítarabei lun kei “hiiyu”, másiñati áluga hamá lúntima hádaruni luagun, o lúntima gaturobulin lan. Ka ladügübei apostolu?

5. Ida liña lóunabuni Heowá lafurieidun Pábulu?

⁵ Furumiñe busenti meha Pábulu lesefurun luéi “hiiyu” ligía. Aba lariñagun: “Ǘrüwaali wéiyaasu namuriahan luma Nabureme [Heowá, TNM] lun lagidaruni sandi ligía nuéi”. Íbini furíei lan magidati hiiyu o turobuli ligía luéi. Mini lan san le móunabun lani Heowá lafurieidun? Uá. Óunaba lumuti Heowá lafurieidun. Íbini magida lani turobuli luéi, ruti erei lun lun lawandun. Aba lariñagun lun “buítimati larihín nubafu buagu dan le débili ban” (2 Ko. 12:8, 9). Seremei meha lídehan Bungiu gunda lubéi Pábulu ani darangilu ligía (Fili. 4:4-7).

6. a) Ida luba lóunabuni Heowá wafurieidun? b) Ka füramasei lídanbei bérusu le lídanbei párafu le gayaraabei líchugun derebugu woun?

⁶ Ma anihein dan ítara kei meha ladügüni Pábulu aba burí wafurieidun lun Heowá lun lesefuruniwa luéi somu óuchawaguni? Íbini ítara magidati waturobulin, gánwounguarügüti, másiñati wasaminarun féridi wamaali lan lugundan Heowá. Anhein ítara liña lubéi, aritagua waméi le asuseredubei lun Pábulu. Ítara kei óunaba lani Bungiu lafurieidun, lóunabubei giñe wafurieidun. Íbini másiña lan magidarun lubéi lan turobuli, líchuguba erei woun lau lani sífiri lun wawandun (Sal. 61:3, 4). Másiñati háhuchuruniwa, gama lumoun mágurun lubadiwa Bungiu (2 Ko. 4:8, 9; Fili. 4:13).

7, 8. a) Ida liña ítara lan sífiri sandu kei garabali? b) Ida liña lafuranguagüdüni Féduru ligaburi lawadigimaridun sífiri sandu?

⁷ Ka ida amu igaburi líderaguawa sífiri sandu? Ítara kei lanügünün garabali aban waporu to lamidanguaboun lanarime lérouga baranaha lidoun fulasu le ñéinhinba lubéi tidin, íderagua lumutiwa giñe sífiri sandu lun wásügürün labadinaguagiñe liñawan dan le lánina ibagari lun gayara lan wachülürün lidoun iseri ubóu le füramase lubéi Bungiu woun.

⁸ Kei meha le óuchaha lan lifisiutebei apostolu Féduru subuditi meha luáguti áfayahani baranaha lun. Másiñati ligía lan layusurubei dimurei le lánina áfayahani lun lafuranguagüdüni ida liña lan lídehan sífiri sandu. Ariñagati: “Lugundun madimurehantiña meha wügüriña hagía lau hani houngua. [...] Dimurei burí lúmagiñeti Bungiu hadimurehabei lugundun [s]ífiri [s]andu lan adundehabaliña” (2 Fe. 1:21).

9. Ka labuserunbei Féduru lafuranguagüdün lau layusuruni dimurei “ladundehaniña”?

⁹ Ka labuserunbei Féduru larufudun lau layusurun dimurei “adundehabaliña”? Yúsuti Lúkasi le abürühabarun líburu to gíriboun Adügaü, ligiaméme dimurei güriegu lun layanuhan tuagu waporu to lanaahaboun garabali (Adü 27:15). Ligíati dan le lariñagubei Féduru ‘adundehóuarügü’ hamá ha abürühabarun Bíbülia, yúsuti aban lubuidun katei le genegeguati luma katei le luáguti barana. Kei lariñaguni aban sásaamu tuáguti Bíbülia. Le linarün katei, le labuserunbei Féduru lariñagun ítara kei ládahanu garabali aban waporu lun tachülürün  lidoun fulasu le ñéinheinboun lubéi, adundeha lumutiña giñe sífiri sandu profetagu hama abürühatiña Bíbülia lun hagunfulirun lau hadasin. Ariñagati sásaamu tuáguti Bíbülia ligía: “Aba hadügüni profetagu hadasin, ítara liña kamá le hátuleraguni bira”. Ábati ladügüni Heowá lufanran lau líchuguni “garabali”, mini lan le, lani sífiri. Ani ligía giñe hadügübei abürühatiña Bíbülia dan hafalaruni ladundehan sífiri ligía.

10, 11. Ka bián katei lubéi wadügüni lun wachoururuni anihein lan lani Bungiu sífiri sandu wama? Abahüdagua humá aban sügǘ.

¹⁰ Inarüni, uguñe weyu mayusurun haali Heowá sífiri sandu lun tabürühóun líburu to tídanboun Bíbülia. Gama lumoun, yusu meme láagili lun ladundehaniña lubúeingu. Anihagua Heowá adügei le yuubei lun. Ligíati lun wachoururuni wasagaruña lan buiti lídangiñe ladundehaniwa lani sífiri, lunti wachoururuni wadügüñein lan fánreinti le yuubei woun. Ida liña wadügüni?

¹¹ Samina wamá luagu sügǘ le. Anhein busén lubéi aban mádulu lun meferidirun lani garabali, lunti ladügün bián katei: Furumiñe, mosu lanügünün waporu darí le ñein lubéi láfuhan garabali lugundun anhoun eredera luagu wafu mídinboun ni halía. Libiaman, mosu lamudeiragüdüni bira ani tulegua leime. Aban katei ítarati asuseredubei woun anhein anihein lubéi lani Heowá sífiri sandu wama, ítararügüba wasigirun eseriwida lun. Lun lira, mosu wadügün bián katei. Furumiñe, werederun le ñein lubéi láfuhan garabali, mini lan le, wadügüni katei le adügübei lun wibihini ladundehan lani Bungiu sífiri sandu. Libiaman, “wamudeiragüdüni bira” darí le ñein lumuti wayara lau wadügüni sun wayaraati lidan burí dasi le (Sal. 119:32). Ánhawa adügei sun le, línchahabadiwa sífiri sandu lun wasigirun eseriwida lun Heowá lau úaraguni íbini laganagua éibaahouni luma óuchawaguni luma lun wachülürün lidoun iseri ubóu.

12. Kaba wakutihan?

¹² Darí guentó, arihaadiwa ida liña lan líderaguniwa sífiri sandu lidan bián igaburi. Ruti erei  woun ani íderagua lumutiwa lun úaragua wamá dan le wagagibudagun luma óuchawaguni. Ani ínchaha lumutiwa giñe lun wasigirun eseriwida lun Heowá ani íderagua lumutiwa giñe lun wasigirun wabaruaguóun lidoun ibagari magumuchaditi. Ani guentó, akutiha waméi gádürü katei le gayaraabei wadügüni lun lahuudun sífiri sandu woun sunsuinagubei.

13. Según 2 Timotéu 3:16, 17, ka gayaraabei tadügün Lererun Bungiu wawagu? b) Ka lunbei wadügüni?

¹³ Furumiñe, aturiaha wamóun Lererun Bungiu (aliiha huméi 2 Timotéu 3:16, 17). Dimurei güriegu le ásügürawagüdübei kei “Bungiu guánarügü íchugubalin haritagunrugun wügüriña”, mini lan Bungiu lan áfurubei ligarabalin hawagun. Yusu lumuti Heowá lani sífiri lun láfuruni ligarabalin hawagun ha abürühabarun Bíbülia lun habürüdüni lisaminan tidan. Danme le waliihanu Lererun Bungiu ani samina wagíame hulili tuagu, ábame lebelurun larufudahan Bungiu lidoun wasaminan luma tidoun wanigi. Íderagua lumutiwa saminaü lúmagiñeti Bungiu le lun wawinwandun úara luma lugundan (Ebü. 4:12). Gama lumoun, lun lahuudun sífiri sandu sunsuinagubei woun, lunti wasagarun dan lun waturiahanu Bíbülia luma lun wararamagun asaminara luagu le waliihabei. Ani ítara, wígiruba lun gabafu tan Lererun Bungiu lidan sun le wariñagun luma le wadügübei.

14. a) Ka uagu wariñaga áfuha lan garabali lidan wadamuridagun? b) Ka lunbei wadügüni lun wachülaagun lidoun wadamuridagun lau “wabira tulugu”?

¹⁴ Libiaman, hudugua wamá lun Bungiu úara hama lubúeingu (Sal. 22:22). Lidan fiu dimurei gayaraati wariñagun “áfuha lan garabali” lidan wadamuridagun, ladüga anihein lan lani Heowá sífiri ñein (Aruf. 2:29). Ka uagu wariñagei le? Ladüga dan le wadamuridagun, amuriahatiwa sífiri sandu lidan furíei, eremuha wagía uremu tídangiñeti Lererun Bungiu ani aganbatiwa adundehani tídangiñeti Bíbülia le líchugun aban íbiri le iridúbei lau lani Bungiu sífiri sandu. Ani ligiaméme sífiri le íderagubaliña íbirigu würiña aransera luma lun híchuguni hani fánreinti lidan damuriguaü. Guentoti, anhein busén wabéi lun lahuudun sífiri sandu woun sunsuinagubei, mosu woudin adamuridagua luma lun waranserun lun gayara lan wíchuguni wóunabagüle lidan. Ani ítara gayaraabei wachülaagun lau “wabira tulugu”.

15. Ka lunbei wadügüni lun líderaguniwa sífiri sandu lidan apurichihani?

¹⁵ Lǘrüwan, furí wamá apurichiha. Dan le waliiha tídangiñe Bíbülia lidan wapurichiha luma dan le warufudahan, adügatiwa lun líderaguniwa sífiri sandu lidan wani ministeriu (Rom. 15:18, 19). Mosu wáfuridun apurichiha súnwandan luma lun wayusurunu Bíbülia sagü gayara lan lun buídutima lan lahuudun sífiri le woun. Ábaya katei le gayaraabei líderaguniwa lun wayanuha hama gürigia lau wayusuruni ariñahani le tídanbei Le lunbei ladügǘniwa lidan adamuridaguni Habagari Kristiánugu luma Heseriwidun.

16. Ka igaburi ménrengunbei lun libihín sífiri sandu?

¹⁶ Ligadürün, furíei wamá lun Heowá (Mat. 7:7-11; Luk. 11:13). Aba igaburi le ménrengunti lun wibihin sífiri sandu lau wamuriahani luma Heowá lidan furíeigi. Úati ni aban lun hararamuni lachülürün wafurieidun lumoun Heowá, o lachülürün idewesei le lani sífiri sandu wamoun ni baríeiru le tani furisun, ni Satanási guánarügü siñati lararamuni (Sant. 1:17). Ida luba wafurieidun lun lahuudun sífiri sandu woun sunsuinagubei? Lun gayara lan lounabún álügüdahani le, warihali lanwoun tema luáguti furíei lau wakutiha aban sügǘ le adarirúbei tídanrügü ewanhéliu lani Lúkasi. *

17. Ka larufudahabei abahüdaguni le labahüdagubei Hesusu lidan Lúkasi 11:5-9, 13 woun luagu furíei?

¹⁷ (Aliiha huméi Lúkasi 11:5-9, 13). Arufudahati abahüdaguni le woun ida luba lan wamuriahani sífiri sandu. Lidan abahüdaguni le, resibi lumuti wügüri le amuriahabei le lálugubei, “luéi lasigirun ebereseha”. Manufudeti lamuriahan ídemuei luma lumada íbini amidihali lan áriebu (ariha huméi abürüdǘni lani aturiahani “lasigirun ebereseha lun”, tidan Le lunbei ladügǘniwa lidan adamuridaguni Habagari Kristiánugu luma Heseriwidun to lani sedü-hati, 2018). Ida liña lagoubaguagüdüni Hesusu abahüdaguni le luma furíei? Ariñagati: “Hamuriaha, ábame líchugun Bungiu hun; háluaha, ábame hadarirun; hadaünha luagu bena, ábame ladaarúniwa hun”. Le wafurendeirubei, lun gayara lan weresibiruni lídehan sífiri sandu, mosu wamuriahani lidan furíei gabügürügua.

18. Ka uagu chouru wabalin líchuguba lan Heowá sífiri sandu woun?

¹⁸ Líderagubadiwa hénpulu le lun gunfuranda wamani ka lan uagu líchuguba lubéi Heowá sífiri sandu woun. Wügüri le uágubei labahüdahan Hesusu busenti meha leresibiruni wügüri le abisidahabalin buidu le achülürübei darü. Sandiguati lungua mosu lan líchugun somu katei lun lun leigin, gama lumoun, úati ni kata luma lun líchuguni lun. Aba lariñagun Hesusu aban lan líchugun lubesina wügüri ligía fein lun ladüga lasigirun amuriaha. Ka labuserunbei Hesusu larufudahan woun? Anhein aranseñu liña lubéi aban gürigia gafigounti lun líderaguni lubesinan le merederubalin lamuriaha, gúbudigiame Wáguchi le Siélubei le hínsiñehabubei líchuguba sífiri sandu houn ha amuriahabaña luma súnwandan. Ligíati gayaraati wamuriahan sífiri sandu luma Heowá súnwandan, chouru waméi lóunabubadiwa lan (Sal. 10:17; 66:19).

19. Ka uagu chouru wabalin wagañeiruba lan?

¹⁹ Chouru waméi wagañeiruba lan íbini mararamunbei lan lálugun Satanási lun lagumuchun wau. Kati uagu wagañeiruba lubéi? Ladüga líderaguniwa sífiri sandu lidan bián igaburi. Furumiñe, ru lumuti ubafu woun lun wiñuragun lídangiñe óuchawaguni. Ani le libiaman, ligía garabali le adügübei lun “téibaagun ugunei lau bira” ani ínchaha lumutiwa lun weseriwidun lun Heowá darime lun lidan wamá iseri ubóu. Ligíati, aranse wamá lun lahuudun sífiri sandu woun saragu.