1, 2. Ka uagu lunti lubéi wasubudirunu wagía kristiánugu haliburun Fádirigu uguñe weyu?

ARITAGUAGÜDA lumuti apostolu Pábulu aban nibureinti ani lumada, le gíribei Timotéu sun lan “le bürüwañubei tidan Lererun Bungiu, Bungiu guánarügü íchugubalin [...], ani huutu” (2 Tim. 3:16). Haliburun Fádirigu tuguya aban tídangiñe líburu to tídanboun “Lererun Bungiu”. Ka hisaminanbei tuagu líburu to. Ariñagatiña fiu gürigia aban tan líburu to buinboun lau lúrudu le mahuudun haali lidan wadaani. Ánheinti wagía kristiánugu inarünitiña ariha wamutu lidan amu igaburi.

² Bürüwatu haliburun Fádirigu kéiburi 3,500 irumu guentó, Ani ígira laaru Heowá darí lumoun wadaani “lun larufudahóun woun” (Rom. 15:4). Íderagua tumutiwa líburu to lun warihini ligaburi lisaminan Bungiu, ligíati lunti lubéi wakutihanu. Ani gayaraabei wafurendeirun saragu katei tídangiñe. Ariha wamá gádürü.

3. Ka uagu ladagarawagüdüwa lidan Luéyuri Ferudun?

³ Furumiñeti leksióun: mégeitiwa lun lagundaarun Heowá wau lun lánharun lun wani sákürifisiu. Lidan fedu le adügǘbei sagü meha irumu le gíribei Luéyuri Ferudun, aba ladagaragüdün fádiri le íñutimabei animaalugu. Haritaguagüda lumutiña katei le ísüraelina luagu mosu lan haruma hamá lídangiñe figóu. Anihein meha katei le lunbei ladügüni fádiri le íñutimabei weyu ligía lubaragiñe lebelurun lidoun fulasu le Sándutimabei lau lita animaalu, aba katei le súdinitimabei lun ferudunawa lan hafigoun ísüraelina.

4. Kei le aubei warihei lidan Fádirigu 16:12, 13, ka ladügübei fádiri le íñutimabei furumiñe dan le lebelurunbei lidoun fulasu le Sándutimabei lidan Luéyuri Ferudun? (Ariha huméi dibuhu le luágubei tidáü).

⁴ (Aliiha huméi Fádirigu 16:12, 13). Samina wamá luagu  sügǘ le. Aba lebelurun fádiri le íñutimabei tidoun Sanduariu. Barüina liña kupali luma aban katei buiti líhemen, lidan aban ágeidinaü lúhaburugu, ani lidan le aban lúhabu aban lagei kupali golu buin lau leñegura watu. Aba lararamu tigibugiñe korutína to adouraguboun lau fulasu le Sándutimabei. Aba lebelurun fádiri le íñutimabei luagu furumiñe wéiyaasu weyu ligía (lebeluruyaba bián wéiyaasu) aba lararamun tigibugiñe Bágüsi lánina Daradu. Le mini lubéi le, anihán lan liñúarü Heowá. Ábati líchuguni kupali lidoun leñegura watu, aba labuinchun rumu lau aban lubuidun íhemeni. * Murusun oura lárigiñe ábaya lebelurun lidoun fulasu le Sándutimabei lau lita animaalu lun ferudunawa lan figóu.

5. Ka wafurendeirubei lídangiñe layusurún kupali lidan Luéyuri Ferudun?

⁵ Ka wafurendeirubei luagu layusurún kupali lidan Luéyuri Ferudun. Góubaguagüda tumuti Bíbülia kupali luma furíei le hadügübei lubúeingu Bungiu ha úaraguabaña (Sal. 141:2; Aruf. 5:8). Aritagua waméi barǘ lani fádiri le íñutimabei kupali liñúarü Heowá lau saragu inebesei. Aba katei ítarati dan le wayarafadun lun Heowá lidan furíei adüga wamuti lau saragu inebesei. Ani gebegiti woun saragu lau lígirun Bungiu le Adügübalin sun le geyegubei wau lun wayarafadun lun, kei layarafadun aban irahü lun lúguchi (Sant. 4:8). Ánhati woun keisi lumadagu (Sal. 25:14). Aban óunwenbu chansi woun wadisedun luéi katei le mínsiñebei lun.

6. Ka larufudahabei woun luagu Hesusu, lágudahan fádiri le íñutimabei kupali lubaragiñe ladagaragüdün?

⁶ Gabaroun waméi lunti lan meha lágudaha fádiri le íñutimabei kupali lubaragiñe ladagaragüdün. Ligíati adügati lun lachoururuni anhein gúndaabei lubéi Bungiu lau adagaragüdüni le lunbei lederegerún lun. Ka wafurendeirubei? Dan le ya lubéi Hesusu ubouagu mosu meha ladügün aban katei súdiniti lubaragiñe lederegeruni libagari lun lesefuruniña gürigia. Lun meha gayara lan leresibiruni Heowá lani sákürifisiu mosu meha gaganbadi lan lun lidan sun libagari. Ítara liña larufuduni le lan súdinibei lawinwandun gürigia kei labusenruni Bungiu. Ariha lumuti Hesusu le lan súdinibei Liricha lan Bungiu lun larúeihan luma richá lan ligaburi larúeihan.

7. Ka uagu gunda lubéi Heowá lau sun le ladügübei Hesusu dan le ya lubéi ubouagu?

⁷ Gaganbaditi meha Hesusu buidu buidu lun lugumadin Heowá le richabei, lidan sun libagari ya ubouagu. Madügünti ni aban óuchawaguni ni óunweni le nibusigarídünati lun lalouguadun lageindagun Hesusu luagu ligaburi larúeiha Lúguchi (Fili. 2:8). Ayumuraguati meha Hesusu “lau umalali héreti” dan le lagagibudagunbei luma óuchawaguni (Ebü. 5:7). Tídangiñe meha sun lanigi lafurieida ani derebugüda lumuti meha katei le lun úaragua lan. Ítara liña meha furíei le lun Heowá kei kupali le buiti líhemen. Sun meha le ladügübei Hesusu dan le ya lubéi ubouagu gúndaagüda lumuti Lúguchi ani arufuda lumuti giñe Lúguchi lan garichabei lun Larúeiha.

8. Ida luba wáyeihani Hesusu?

⁸ Gayaraati wáyeihani Hesusu lau wadügüni sun wayaraati lun gaganbadi wamá lun lilurudun Bungiu luma lun úaragua wamá lun. Dan le wagagibudagun luma óuchawaguni, aba wayumuragun lun Heowá lun líderaguniwa ladüga busén wamá wagundaaragüdüni. Lau wadügüni sun le, arufuda wamuti wídehaña lan lidan ligaburi larúeiha. Subudi wamuti maganbun lubéi lan wafurieidun ánhawa adüga katei le mínsiñeti lun. Ánhawati awinwanda kei le aubei labusenra, gayaraabei wachoururuni laganbubei lan  wafurieidun le wadügübei tídangiñe sun wanigi le ítarabei kei kupali le buiti líhemen. Ani chouru waméi lagundaaruba lan Wáguchi le siélubei lau úaragua wamá ani gaganbadi wagía lun (Ari. 27:11).

9. Ka uagu ladügǘwa adagaragüdüni lánina arandaruni?

⁹ Libiaman leksióun: weseriwidunbei lun Heowá ladüga seremei wamani. Akutiha wamá amu katei súdiniti luáguti lahudurawagún lun Bungiu lidan binadu Ísüraeli: “adagaragüdüni lánina arandaruni”. * Tidan haliburun Fádirigu furendeitiwa gayara lan meha híchugun ísüraelina adagaragüdüni lánina arandaruni lun harufuduni ‘heteingiradi’ (Fad. 7:11-13, 16-18). Mama meha ladüga hafosurúña lan lun híchuguni idewesei hadügünbalin, hadügünbalin ladüga busén hamá hadügüni. Ligíati aban lubéi idewesei le mébunati ladüga luagu lan línsiñe Heowá le Habungiute houn hadügünbalin. Ha adügübalin idewesei le, hou hamuti hau sun haduheñu hama fádirigu lǘgürügü animaalu le hadagaragüdünbei. Gama lumoun, anihein fiu fánreinti luagu animaalu lúnrügüñein Heowá yu lan. Kati fánreinti ligía?

10. Ka larufudahabei adagaragüdüni lánina arandaruni le uágubei layanuhóua tidan haliburun Fádirigu 3:6, 12, 14-16 luagu lébuna ladügüni Hesusu lugundan Lúguchi?

¹⁰ Lǘrüwan leksióun: ru wamuti le buídutimabei lun Heowá ladüga línsiñe woun. Létima lagüle animaalu ligíatima buídutimabei lun Heowá. Súdiniti giñe fiu lumegegun animaalu lun kei burí riñón (kidüní) (aliiha huméi Fádirigu 3:6, 12, 14-16). Gúndagüda hamuti ísüraelina Heowá dántima le hedewehani lau sun hagundan  lumegegun animaalu luma sun lagüle lun. Ísüraelina ha adügübalin idewesei le arufuda hamuti meha busén hamá híchuguni sun hayaraati lun Heowá. Ítarameme ru lumuti Hesusu le buídutimabei lun Lúguchi lau leseriwidun lun tídangiñe sun lanigi ladüga ínsiñeni le lasandirubei luagu (Huan 14:31). Aba meha ugundani lun Hesusu ladügüni lugundan Bungiu, ani hínsiñeti meha lilurudun Bungiu lun (Sal. 40:8). Ma funa lugundan Heowá larihini leseriwidun Lisaani lun lau sun lugundan!

11. a) Ida liña genegegua lan weseriwidun lun Bungiu lumoun adagaragüdüni lánina arandaruni? b) Ida liña líchugun katei le dǘgüdaguaü woun?

¹¹ Aban meha idewesei le ladügübei gürigia lau lugundan adagaragüdüni lánina arandaruni ani larufuduñein meha gürigia lun Bungiu hínsiñe lan lun. Ítara liña weseriwidun lun Heowá kei adagaragüdüni burí le, lugundun arufuda wamuti lau sun wagundan le wasandirubei luagu. Ru wamuti le buídutimabei lun, ani adüga wamuti ladüga línsiñe woun tídangiñe sun wanigi. Chóuruti gunda lan lau larihin saragu míñunu gürigia eseriwida lun ladüga sandí hamá aban lanarime ínsiñeni luagu luma luagu lugumadin. Ruti gurasu woun waritaguni ariha lani ani gebegi ligía lun le wadügübei, mámarügü ladüga le wadügübei, ladüga giñe ka lan lébunabei wadügüni. Kéiburi, anhein adüga aweiyaduni lun lásiñarun wadügüni sun le wabusenrubei wadügün lidan weseriwidun, gayaraati wachoururuni meteni lan Heowá lun le wásiñarun adüga. Másiñati wasaminarun murusunrügüñein lan wayaraati íchiga lun, gama lumoun, ariha lumuti lanarime ínsiñeni le ínchahabadiwa lun wadügüni sun wayaraati. Gúndaati lau lánharun lun lubuidun-agei katei le gayaraabei wíchugun lun.

12. Ida liña lasandiragun Heowá lungua dan le ladügǘn adagaragüdüni lánina arandaruni, ani ka gayaraabei wachoururuni?

¹² Ka larufudahabei “adagaragüdüni lánina arandaruni” woun? Gúndaati meha Heowá dan le lamudeirun lugumulali watu le águdubalin lubuidun agei fánreinti luagu animaalu. Ligíati gayaraati wachoururuni gunda lan Heowá lau eseriwiduni le wadügübei lun lau sun wagundan ani tídangiñe sun wanigi (Kol. 3:23). Samina wamá luagu lanarime ugundani le lasandirubei. Gebegiti sun ínsiñeni le ínchahabadiwa lidan weseriwidun lun, lougua lan yebe o gibe lan; ligía aba katei gebegiti le lunbei laritaguni súnwandan (Mat. 6:20; Ebü. 6:10).

13. Según Fádirigu 9:23, 24, ida liña larufuduni Heowá gunda lan hau fádirigu?

¹³ Ligadürün leksióun: biní lumuti Heowá fánreinti tánina lóundarun le yaabei ubouagu. Akutiha waméi le asuseredubei lidan irumu 1512 lubaragiñe lidaani Kristu, dan meha le tadügǘnbei kianpu lánina óundaruni luagu lugudina wübü Sinaí (Afu. 40:17). Moisesi alidihabalin fedu ligía ñein lubéi liridúa Aarón hama lisaanigu keisi fádirigu. Aba hóundarun sun ísüraelina ñein lun harihiniña fádirigu adagaragüda animaalugu luagu furumiñe wéiyaasu (Fad. 9:1-5). Ida liña larufuduni Heowá gunda lan hau fádirigu ha iridúbaña? Dan le labinirunbaliña Aarón luma Moisesi ísüraelina, aba lóunahan Heowá watu siélugiñe lun láguduni adagaragüdüni sunsuinagubei (aliiha huméi Fádirigu 9:23, 24).

14. Ka uagu súdini lubéi woun uguñe weyu wasubudiruni gunda lan Heowá lau lafadirihan Aarón?

¹⁴ Lidan igaburi le, larufudei Heowá sunsuinagubei gunda lan lau fádiri lan Aarón. Dan le harihini ísüraelina furangu anihein lan Heowá hama fádirigu aba giñe gunfuranda hamani mosu lan giñe híchuguni hídehan houn. Súdiniti katei le woun lugundun aban meha iyawadinaü katei le, lánina afadirihani le súdinitimabei. Hesusu ligíatima Fádiri le Íñutimabei, ani úara luma heseriwiduba 144,000 kei  fádirigu ani urúeigu luma sielun (Ebü. 4:14; 8:3-5; 10:1).

15, 16. Ka achoururagüdübalin woun labiniruñoun lan Heowá lóundarun?

¹⁵ Lidan irumu 1919, aba líridun Hesusu fiu kristiánugu anuadirúaaña lun hagía lan “musu úaraguati ani gunfuranda ligía”. Ani musu le ligía adundehabalin apurichihani ani ruti giñe ariñahani houn lani Kristu disipulugu ani ítara liña ariñahani le kei “éigini houn lidan dan” (Mat. 24:45). Ariha wamuti san furangu gunda lan Bungiu lau musu úaraguati ani gunfuranda ligía?

¹⁶ Álugati Satanási hama ha lábugiñebaña lubafu heberesehani lawadigimaridun musu úaraguati ani gunfuranda ligía. Ani lun hamuga ua lan lídehan Heowá siñá lubéi yebe musu wadagimanu le adüga. Anihein haali bián wuribu wéiriti, gudemei lidan sun ubóu, ani éibaahouaña lumutuniña Heowá lau furundei ani óuseruaaña giñe lau marichaü. Íbini lasuseredun sun le houn anihamémegua musu úaraguati ani gunfuranda ligía íchiga ariñahani houn ha afalarubalin Kristu ya ubouagu, le ítarabei kei éigini. Samina wamá tuagu saragu agumeiraguagüdüni to wámaboun to wafanreinhaboun lidan lóugiñe 900 iñeñein maguburahanga. Ligía aba katei le achoururagüdübalin woun líderaguñadiwa lan Heowá. Aban giñe katei le arufudubalin labiniruñein lan Heowá dasi le, lau lapurichihóuniwa. Lapurichihóuña uganu buiti le “lidan sun ubóu” (Mat. 24:14). Chóuruti ladundehañoun lan Heowá lóundarun ani labiniruñoun lan giñe lau areini.

17. Ida liña warufuduni luagu wídehaña lan tuma óundaruni to layusuruboun Heowá?

¹⁷ Álügüdagua wamá woungua: “Gúndaati san nasandiragun nungua lau lídangiñetina lan fánreinti le tani lóundarun Heowá to yaaboun ubouagu?” Furanguti larihín ichouruni le líchugubei  Heowá luagu líderaguñoun lan lóundarun kei larihín lararirun watu siélugiñe lidan lidaani Moisesi luma Aarón. Ligíati furanguti larihín gibe lan lébuna lun weteingiruni (1 Tesa. 5:18, 19). Ida liña warufuduni luagu wídehaña lan tuma óundaruni to layusuruboun Heowá? Lau wafalaruni lidan sun wabagari adundehani le tídanbei Bíbülia le áfuridubei tidan wani agumeiraguagüdüni, lidan adamuridaguni, lidan adamurini, luma giñe lau wadügüni sun wayaraati lidan dasi lánina apurichihani luma hadügǘn disipulugu (1 Ko. 15:58).

18. Ka katei aransetiwa lun wadügüni?

¹⁸ Lunti aranseñu wamá lun wafalaruni le wafurendeirubei tídangiñe haliburun Fádirigu. Áfaagua wamá lun lagundaarun Heowá wau lun lánharun lun adagaragüdüni le wadügübei lun. Seriwi wamá lun Bungiu ladüga lunti weteingiruni. Ítarameme wamá íchigei sun wayaraati lun, ladüga hínsiñeti woun tídangiñe sun wanigi. Ani ídeha wamá tuma óundaruni to layusuruboun uguñe weyu. Lau wadügüni sun le, warufuduñein lun Heowá gebegi lan chansi le woun lau weseriwidun lun luma lau lani wamá Gefentiña.