Lidan tidaani Bíbülia, le túniri muna ligía arihibei tau muna o lau lumegen aban gürigia.

Dan meha le musu lubéi Hosé Ehiptu, le liráü Hakobu, írida lumuti labureme lun ligía lan ariha tau luban. Ani aba lígirun wügüri le lun “lóunigirunu Hosé luban [...] lau sun lumegen” (Agu. 39:2-6). Dan lárigiñe, dan le ábanhali wügüri gabafuti Ehiptu, anihein meha giñe aban túniri muna luma Hosé, ligía meha arihibei tau luban (Agu. 44:4).

Lidan meha lidaani Hesusu gürigia meha ha gamuanbaña, uburugu meha hawinwanda dise luéi hamegen. Ítara liñati aban híridun gürigia lun ligía lan ariha lau hamegen luma lun ligía lan ariha hau nadagimeintiña.

Ka meha katei mégeiwabei lun ábanbei lan túniri muna aban gürigia? Ariñagati Columela aban wügüri rómana lánina furumiñe sígulu le abürühabei luagu binadu dan, musu o úniri le lunbei liridún lun ligía lan ariha hau nadagimeintiña, mosu aban lan gürigia “le subuditi luáguti wadagimanu lun”. Mosu meha “ábanbei lan gürigia le arufudati aban igaburi le úati débili lan ua ligíame héregu lan”. Ariñagayati Columela: “Le súdinibei lun mafamurun lan túniri muna subudi lan sun katei lun luma lun láfaagun súnwandan lun lafurendeirun luagu katei le ibidiñeti lun”.

Yusu tumuti Lererun Bungiu dimurei túniri muna lun tayanuhan luagu fiu dasi le adügǘbei lidan damuriguaü kristiánu. Kei hénpulu, ínchaha lumutiña apostolu Féduru kristiánugu lun hayusuruni iyarani le líchugubei Bungiu houn lau lariñagun: “Buidulá hóuseruni luwuyerigu idewesei le heresibirubei lúmagiñe Bungiu. Yusuléi kada aban lun leseriwidun houn amu” (1 Fe. 4:10).

Yusu lumuti giñe Hesusu hénpulu luáguti túniri muna dan le lafuranguagüdüni abahüdaguni le adarirúbei lidan Lúkasi 16: 1-8. Ani lidan profesía luáguti liseinin lagumeserun arúeiha, füramaseti houn lani disipulugu luagu líriduba lan aban “musu úaraguati ani gunfuranda ligía” o “óunigiruti gúnfuliti ani gunfuranda ligía”. Wadagimanu súdinitimati le lagunfulirubei óunigiruti o túniri muna, lun líchugun ariñahani lúmagiñeti Bungiu houn sun kristiánugu, le ítarabei kei éigini, le mégeiwabei lidan lagumuhóun dan (Mat. 24:45-47; Luk. 12:42). Seremei wamuti óunigiruti gúnfuliti ani gunfuranda ligía lau laranseha luma lau lafanreinhan ariñahani lidan sun ubóu lun lederebudagüdüni wafiñen.