1, 2. Ida luba wafalaruni adundehani le lídanbei Ariñawagúni 4:25? Ru humá aban hénpulu?

SAMINA wamá luagu ǘrüwa hénpulu burí le, tasaminaruña aban íbiri luagu lubuidun tibagari lidan dan le sügühalibei, íbini hénrengu lan tibagari guentó sigitu etenira lun teseriwidun lun Heowá (1 Ko. 15:58). Sagü weyu tasaminarun tawinwandun úara hama tiduheñu lidan iseri ubóu. Ábanya íbiri taritaguña luagu le tadügübei aban íbiri tun le adügübei lun wuriba lan tasandiragun tungua. Gama lumoun aba tanúadirun lun masigi tan areidaha igarihabu (Kol. 3:13). Aban íbiri lasaminaruña luagu charati le meha ladügübei, gama lumoun ladügüñein sun liyaraati lun lasigirun eseriwida lun Heowá lau úaraguni (Sal. 51:10).

² Ka ida genegegua lan le gádanbaliña íbirigu ha? Súngubei hagía aritagua hamuti le meha asuseredubei houn lidan dan le sügühalibei. Gama lumoun, masaminaruntiña luagu saragu, lubaragiñe lira aba hetenirun lun harihin habaruaguóun (aliiha huméi Ariñawagúni 4:25).

3. Ka uagu súdini lubéi lun warihin wabaruaguóun?

³ Ka uagu súdini lubéi ítarameme wamá ariha wabaruaguóun? Ítara kei aban gürigia le siñati leibugún suruñu luagu aban laini ladüga aniha lan ariha lárigoun ítarameme siñabei wawanserun lidan weseriwidun lun Heowá ánhawa asaminara súnwandan luagu katei le meha asuseredubei woun (Luk. 9:62).

4. Kaba wakutiha lidan arütíkulu le?

⁴ Lidan arütíkulu le wakutihan ǘrüwa katei le adügübei lun wasaminarun saragu luagu le sügühalibei: wálugun luagu binadu wabagari, wareidahan igarihabu luma wasandirun saragu duru luagu le meha wadügübei. Lidan kada kesi wariha ida luba lan líderaguniwa adundehani tídangiñeti Bíbülia lun ‘wabulieiduni sun le erederubei árigi’ luma lun ‘wárügüdüni le wagibugiñebei’ (Fili. 3:13).

5. Ka eweridihani líchugubei Apurichihati 7:10 woun?

⁵ (Aliiha huméi Apurichihati 7:10). Mariñagunti bérusu le wuriba lan wálügüdagun woungua ka lan uagu buidu lubéi dan le sügühalibei, lubaragiñe lira ariñagarügüti: “Málügüdaguaba bungua ka lan uagu buídutima lubéi sun dan le sügühalibei”. Ligíati magoubaguagüda waméi wabagari lidan dan le sügühalibei lumoun wabagari le guentobei ani aba wasaminarun wuribatimati lan wabagari guentó. Sügügüda tumuti amu Bíbülia bérusu le ítara: “Maweiyasun humá álügüdagua hungua ka lan uagu buídutima lubéi meha dan le sügühalibei, mama aban álügüdahani buiti lira”.

6. Ka uagu mama lubéi lichú au wasaminarun sun dan buídutimati lan meha wabagari lidan dan le sügühalibei? Ru humá aban hénpulu.

⁶ Ka uagu mama lubéi lichú au wasaminarun sun dan buídutimati lan meha wabagari lidan dan le sügühalibei? Ladüga gayaraati dan le lan wálugun luagu binadu wabagari saminarügütiwa luagu buiti le wawinwandubei dan meha lügüra. Ani aba wabulieidagun luéi lidere dan le meha úmabei wagagibudagua. Samina wamá hawagu Ísüraelina ha lánina binadu dan. Lárigiñe meha háfuridun ísüraelina Ehiptugiñe fureseti meha habulieiduni lidere dan le meha hawinwandubei ñein. Aba meha hálugun lárigiñe lubuidun éigini le meha héigibei ñein. Ariñagatiña: “Lanarime waritagun hawagun úduraü ha meha wéigibaña Ehiptu mafayeihanga wagía hawagu. Hóutiwa meha giñe melón ñein, pepinu, sebuya luma lai” (1 Lur. 11:5). Inarüni san mafayeihan hamá luagu le meha héigibei ñein? Uá. Wéiriti meha hasufurirun ísüraelina Ehiptu, lidan meha dan ligía hasufuriruña meha kei idamuni (Afu. 1:13, 14; 3:6-9). Íbini ítara, murusun dan lárigiñe háfuridun Ehiptugiñe aba habulieiduni lidere dan le meha hasufurirubei ñein ani aba hálugun luagu le hígirubei. Lubaragiñe hamuga hetenirun lun sun le ladügübei Heowá hawagu, ábarüga hasaminarun luagu dan le sügühalibei. Magundanti meha Heowá lau le (1 Lur. 11:10).

7. Ka íderagubarun aban íbiri lun méiguadun tan tidoun sádara lánina lalugún luagu binadu ibagari?

⁷ Kaba íderaguawa lun méiguadun wamá tidoun sádara lánina wálugun luagu binadu ibagari? Ariha waméi tani aban íbiri hénpulu to meha agumeseruboun eseriwida lidan irumu 1945 tidan  Beteli to meha Brooklyboun. Aba meha tamarieidun luma aban íbiri le meha giñe eseriwidubei tidan Beteli ani seriwitiña úara luagu saragu irumu. Lidan irumu 1976 aba lasandirun tani weiriei. Ariñagatu íbiri to dan le lan líchugubei tani weiriei fe málühali lan ounwe aba meha líchugun adundehani tun lun gayaraabei lan tagagibudagun luma igarigu lárigiñeme lounwen. Ariñagati tun: “Gúndaatiwa lidan wabagari keisi maríeitiña, mawinwandun hamuti saragu gürigia ugundani le”. Ariñagati giñe tun: “Masaminarabá luagu dan le sügühalibei, mabulieidunbubei lubuidun dan le wásügürübei úara, íbini ítara metenirabá saragu lun le basaminarubei. Lau lásügürün dan abulubudeina luba bigarigu. Magudemedaguabá bungua masandirun buguyame saragu íruni luagu le asuseredubei bun. Gundaabá luagu dan le wásügürübei úara lidan weseriwidun lun Heowá. [...] Aban idewesei lúmagiñe Bungiu lubuidun aritaguni”. Ma lubuidun adundehani!

8. Ida liña tibihin íbiri to buiti lídangiñe adundehani le líchugubei meha tani weiriei tun?

⁸ Falá tumuti íbiri to adundehani le líchugubei tani weiriei tun. Seriwitu lun Heowá lau úaraguni darí tounwe dan meha le 92 lubéi irumu tau. Ariñagatu fiu irumu lubaragiñe tounwen: “Dan le nasaminarun luagu 63 irumu le naubei eseriwida lun Heowá, gayaraati nariñagun gunda lan nibagari”. Ka uagu? Ariñagayatu: “Gayaraati gunda lan wabagari ladüga hádangiñe wamá íbirigu, ha hemenigibaña lun hawinwandun lun súnwandan lidan paraísu ya ubouagu eseriwida lun Heowá Bungiu ábanrügüti le Adügübalin sun katei.” * Gayaraati wafurendeirun saragu túmagiñe íbiri to, to arihiboun tubaruaguóun!

9. Ítara kei lariñaguni Fádirigu 19:18, ka dan hénrengu lan woun lun mareidahan wamá igarihabu?

⁹ (Aliiha huméi Fádirigu 19:18). Anihein dan hénrengu lan lun feruduna wamani aban íbiri, aban wamada o aban waduhe le adügübei lun wuriba lan wasandiragun woungua. Kei hénpulu, aba tabulieidagun aban íbiri íchiga tidurun  amu íbiri luagu íweruha tan lan tiseinsun. Dan le meha tíchugubei íbiri to fe mítaran lan katei le, aba tamuriahan ferudun tuma íbiri tuguya, gama lumoun, gárigili meha tun íbiri to uáguboun líchugua duru, ani meredeti meha tasaminarun luagu le asuseredubei. Susereñahaali san le woun? Íbini masusereduñahagili lan le woun, hiibe agei wádangiñe másiñati sandihadiwa lan igarihabu ani afiñetiwa siñabei lan wígiruni.

10. Kaba íderaguawa lun mareidahan wamá igarihabu?

¹⁰ Kaba íderaguawa lun mareidahan wamá igarihabu? Haritagua waméi ariha lani Heowá sun katei. Aríagu liña lun sun turobuli luma marichaü le wásügürübei (Ebü. 4:13). Súfuriti lau larihini wasufurirun (Isa. 63:9). Ani füramaseti lagidarubei lan furumiñeguarügü katei le adügübei lun wasufurirun (Aruf. 21:3, 4).

11. Ida liña lahuudun woun wagidaruni igarihabu?

¹¹ Lunti giñe waritaguni barüti lan buiti woun dan le wagidaruni igarihabu. Ligía meha asuseredubei tun íbiri to iridahouboun luagu leferidirun seinsu. Lau lásügürün dan aba tígiruni igarihabu. Aba gunfuranda tani dan le lan feruduna wamaniña amu, feruduna lubadiwa giñe Heowá (Mat. 6:14). Subudi tumuti wuriba lan le meha tadügübei íbiri lau tíridahanu madurunga, gama lumoun, aba tanúadirun tígiruni igarihabu. Seremei tadügüni ítara aba gunda tan ani aba tetenirun lun teseriwidun lun Heowá.

12. Ka larufudahabei 1 Huan 3:19, 20 woun?

¹² (Aliiha huméi 1 Huan 3: 19, 20). Anihein dan sun wagía sandiguatiwa woungua lau duru. Másiñati ladüga lan katei le wadügübei lubaragiñe wafurendeiruni inarüni o ladüga charati le wadügübei lárigiñe wabadiseirun. Meberesenga ka lan uagu, kamaniti lasandiragun gürigia lungua ítara (Rom. 3:23). Inarüni, ka lan yebe wáfaagunbei lun wadügüni le buídubei, “sun wagía charatiwa” (Sant. 3:2; Rom. 7:21-23). Mama aban katei buiti lasandiragun gürigia lungua ítara, gama lumoun gayaraati mariban lan. Ka uagu? Ladüga gayaraati líderaguniwa lun wasansiruni wémeri, wanúadirun buidu luma lun mábürühanya wamá lidoun wachara (Ebü. 12:12, 13).

13. Ka uagu moun lumuti lubéi wíchugun duru wawougua saragu?

¹³ Guentoti, gayaraati awanhagua lan asandiragua woungua lau duru íbini lárigiñe asakürihaadiwa lan ani arufuda laali Heowá woun feruduna laadiwa lan. Wíchugun duru wawouguoun saragu gayaraati ladügün wuribani woun (Sal. 31:10; 38:3, 4). Ka uagu wariñagei le? Ariha waméi tikesin aban íbiri to meredeboun tíchaagun duru tuouguoun luagu katei le meha tadügübei lidan dan le sügühalibei. Abahüdahatu: “Saminatina yebe le lan lunbei nadügüni lun máfaagun nan saragu lidan neseriwidun lun Heowá ladüga memenigin nan ni murusun”. Saragu wádangiñe sandiguañahaadiwa woungua ítara. Gama lumoun, súdiniti lun míchaagun wamá duru wawouguoun saragu. Lugundun hínsiñeti hamuga lun Mafia lun wasaminarun máranihadiwa lan, íbini marihin lániwa Heowá ítara (ariha huméi giñe 2 Korintuna 2:5-7, 11).

14. Ida liña wasubudiruni marihin lumutiwa lan Heowá kei máraninaaña?

¹⁴ Íbini ítara, másiñati álügüdagua wamá woungua: “Ida luba nachoururuni marihin lumutina lan Heowá kei máraninaaña?”. Le linarün katei, dan le wadügüni álügüdahani le wóunabuñein giñe. Saragu irumu guentó ariñagatu garüdia La Atalaya: “Másiñati adüga wamuti lan ligiaméme charati saragu wéiyaasu. Háfuga ladüga mígirun wamagili lan sunsuinagubei wuribani le meha wadügübei lubaragiñe weseriwidun lun Heowá. Mábürühan lan warüna. Masaminara wamá adügaadiwa lan figóu, ani siñabei lan feruduna lániwa Heowá. Ligía labusenrunbei Satanási lun wasaminarun. Arufudati íruni le wasandirubei luma igañi le wasandirubei wóuniwagua luagu wuribani le wadügübei, mama lan  aban gürigia wuribati wagía ani gayara lan feruduna lániwa Heowá. Ǘnabugumeme wamá ani sigí wamá afurieida lun Heowá lun feruduna lániwa, lun buidu lan wasandiragun woungua luma lun méiguadunya wamá lidoun charati ligía. Meberesenga átiri lan wéiyaasu ládaragun aban irahü lungua lidoun ligiaméme turobuli súnwandan lidin lumoun lúguchi lun líderaguni aranserei turobuli ligía. Ligíati sigí wamá amuriaha ídemuei luma Heowá ani lóunabubadiwa ladüga lareini”. *

15, 16. Ida liña hasandiragun fiu íbirigu houngua dan le hasubudiruni marihin lumutiña lan Heowá kei máraninaaña?

¹⁵ Sanditiña saragu lubúeingu Heowá awalidaguni dan le hasubudiruni marihin lumutiña lan Heowá kei máraninaaña. Kei hénpulu, saragu irumu guentó íderagua lumuti aban íbiri, aban sügǘ le laliihabei lidan aban arütíkulu gáfuridaditi tidan garüdia La Atalaya le gíribei “La Biblia les cambió la vida”. Lidan arütíkulu ligía, ariñagatu aban íbiri hénrenguti lan meha tun tafiñerun hínsiñe tan lun Heowá ladüga sun wuribani le meha adüga táalibei lidan tibagari. Ani sandiguatu meha tungua ítara luagu saragu irumu íbini lárigiñe tabadiseirun. Gama lumoun, dan le tasaminarun hulili luagu lebegi asalbaruni íderagua lumutu lira lun tafiñerun hínsiñe tan lun Heowá. *

¹⁶ Ida liña líderaguni tani íbiri to hénpulu íbiri le? Ariñagati: “Dan le meha nibureingidina aríaguatina meha iyawaü lánina agamariduni ani hénrenguti meha nun nígiruni luriban igaburi le. Málügili lúmagiñeya néiguadun lidoun tariawagún iyawaü lánina agamariduni. Amuriahatina ídemuei hama wéiyaaña lidan afiñeni ani íderagua hamutina lun nagagibudagun luma turobuli le. Íderagua hamutina giñe lun nafiñerun hínsiñetina lan lun Heowá ani busenti lan lun feruduna lánina. Íbini ítara, anihein dan sandiguatina nungua mebegi nan ni kata ani siñá lan nínsiñedun lun Heowá. Íderagua lumutina tani íbiri to hénpulu saragu. Guentó gunfuranda naali dan le lan nasaminarun úabei lan feruduna lánina Heowá, mini lan lira nasaminaruña lan lóuguati lan lani Liráü sákürifisiu lun ladouragun lau sun nifigoun. Aba níbuguni arütíkulu ligía tídangiñe garüdia lun naliihani ani ráramagua nuguyame  asaminara luagu sagü nasandiragun nungua mebegi nan ni kata ani mínsiñe nan lun Heowá”.

17. Ida liña míchaagun lan apostolu Pábulu saragu duru luougua?

¹⁷ Adügati sügǘ libe burí le lun wasaminarun luagu apostolu Pábulu. Adügati meha figóu wéiriti lubaragiñe ladügagun lungua kristiánume. Aritagua lumuti meha le ladügübei, gama lumoun masaminarunti meha luagu súnwandan (1 Tim. 1:12-15). Ariha lumuti meha lebegi asalbaruni kei aban idewesei le líchugubei Heowá lun (Gal. 2:20). Ítara liña meha míchaagun lan saragu duru luougua ani aba letenirun lun ladügüni sun liyaraati lidan leseriwidun lun Heowá.

18. Ka wafurendeirubei lídangiñe arütíkulu le?

¹⁸ Ka wafurendeirubei lídangiñe arütíkulu le? Furumiñe, aba idewesei lúmagiñeti Heowá lubuidun aritaguni, gama lumoun meberesenga anhein buidu lubéi meha wabagari lidan dan le sügühalibei buídutimabei wabagari lidan iseri ubóu. Libiaman, másiñati adüga hamá amu lun wasandiragun woungua wuriba, gama lumoun dan le wanúadirun lun feruduna wamaniña gayaraabei wetenirun lun weseriwidun lun Heowá guentó. Lǘrüwan, gayaraati ladügün wíchaagun duru wawouguoun saragu lun meseriwidun wamá lun Heowá lau ugundani. Ligíati, ítara kei Pábulu lunti wafiñerun feruduna laadiwa lan Heowá.

19. Ida luba wasubudiruni lidan lanme iseri ubóu masaminarunbadiwa lan luagu dan le sügühalibei?

¹⁹ Lidan iseri ubóu le wagurabubei le ñeinba lubéi wawinwanda lun sun dan maritagun wabéi le meha adügübei lun wasandiragun woungua wuriba. Ariñagatu Bíbülia libügürü katei le: “Labulieidúaba sun le sügühalibei” (Isa. 65:17). Fiu wádangiñe barühadiwa saragu irumu eseriwida lun Heowá ani wéinamugaadiwa saragu, lau sun lira lidan iseri ubóu nibureinguayabadiwa (Hobu 33:25). Ligíati, aranse wamá lun masaminarun wamá saragu luagu dan le sügühalibei, lubaragiñe lira samina wamá luagu iseri ubóu ani adüga waméi sun wayaraati guentó lun ñein wamá.