1, 2. a) Kaba wariha lidan aturiahani le? b) Ka arufudubalin busén lan Heowá líderaguniwa?

 GAYARAATI líderaguniwa Heowá awandei turobuli luma lun weseriwidun lun lau ugundani. Lidan aturiahani le, warihiba ida liña lan ladügüni luma ka lan lunbei wadügüni lúntima meferidirun wamani ídemuei le líchugubei woun. Lubaragiñe lira, óunaba waméi álügüdahani le: “Inarüni san busén lan Heowá líderaguniwa?”.

² Lun wadariruni óunabagülei, teni wamá lun dimurei le layusurubei apostolu Pábulu tidan gárada to labürüdüboun houn ebüréuna. Ariñagati: “Nabureme Bungiu íderagubalina, manufudebadina. Kábati gayara hamá gürigia adüga nau?” (Ebü. 13:6). Afuranguagüda tumuti fiu dimurei-agei to tani Bíbülia, dimurei lan le ásügürawagüdübei kei “ídehati”, lidan bérusu le layanuhaña luagu aban gürigia le éibaagubei íderagua aban gürigia le amuriahabei ídemuei. Samina wamá luagu léibaagun Heowá esefura aban gürigia le ásügürübei lídangiñe aban sügǘ hénrenguti. Chóuruti, arufuda lan hénpulu le mámarügü aranseñu liña Heowá lun líderaguniwa, busenti giñe ladügüni tídangiñe sun lanigi. Lau Heowá luéigiñe wóubadina, gayaraabei wawanduni óuchawaguni sin weferidiruni wagundan.

3. Ida liña layusurun Heowá ǘrüwa igaburi lun líderaguniwa awanda lau ugundani?

³ Ida liña líderaguniwa Heowá awanda lau ugundani? Darí wamuti óunabagülei tidan liliburun Isaíasi. Saragu lídangiñe profesía le labürühabei Isaíasi lábugiñe lubafu Bungiu, espechaliti le mini houn lubúeingu Heowá ha awinwandubaña uguñe weyu. Lanwoun lira, yúsuti Isaíasi saragu wéiyaasu dimurei le ménrenguti lun gunfurandawa lan luagu Heowá. Kei hénpulu, lidan kapítulu 30 yúsuti hénpulu buíduburiti lun lafuranguagüdüni ida liña lan líderaguniña Heowá lumutuniña. Ariñagati ñein 1) ru lan  Heowá arigei lun wafurieidun ani óunaba lani, 2) adundeha lumutiwa lan ani 3) biní lumutiwa dandu uguñe weyu keime ámuñegü. Wakutihaali ǘrüwa katei le aban aban.

4. a) Ka lariñagubei Heowá hawagu huríu ha lídanbaña lidaani Isaíasi ani ka lígirubei lun lasuseredun houn? b) Ka emenigini líchugubei Heowá houn huríu ha úaraguabaña? (Isaíasi 30:18, 19).

⁴ Lidan lagumeseha kapítulu 30 tidan liliburun Isaíasi, ariñagati Heowá hawagu huríu “isaanigu mabuchahatiña” ani ariñagati giñe rugua hamá “figóu ligibuagu figóu”. Lárigiñe ábaya lariñagun: “Mabuchahatiña gürigia ha, [...] máhatiña haganbuni larufudahan” Heowá (Isa. 30:1, 9). Ladüga maganbadi hamá Ariñagati Isaíasi lígiruba lan Heowá lun liabin burí óunwenbu burí lamiselu hawagu (Isa. 30:5, 17; Her. 25:8-11). Ítara liña lasuseredun, aba hanügüniña Babilóniana huríu adaüra. Gama lumoun añahein meha giñe hádangiñe huríu úaraguatiña lun Bungiu, anihein meha aban uganu le ruti emenigini luma Isaíasi houn: lachülürüba lan aban weyu lagiribudagüdüniña Heowá hageiroun (aliiha huméi Isaíasi 30:18, 19). Gúnfuliti dimurei le. Sagá lumutiña Heowá Babilóniagiñe, gama lumoun mama lau lóufudagun. Dimurei: “Lagurabahañadün Wabureme lau lugudemehabu hun” busenti larufuduni línsiñehabu hun, arufudahati dimurei le mosu lan lásügürün fiu dan lubaragiñe hagiribudun huríu úaraguatiña hageiroun. Sügüti 70 irumu lun gayaraabei lan lígirun Heowá lun hagiribudun hádangiñe huríu Herusaléun (Isa. 10:21; Her. 29:10). Dan le hagiribudunbei ísüraelina hageiroun, aba lasansirun ayahuni le meha hayahuahabei lau íruni dan meha le Babilónia habéi, lun ayahuni lánina ugundani.

5. Ka lachoururagüdübei Isaíasi 30:19 woun?

⁵ Uguñe weyu, ruti giñe dimurei le saragu dǘgüdaguaü woun: “Gudemehabubei Wabureme hun danme laganbun hagúarahan amuriaha ídemuei (Isa. 30:19). Chóurugüda lumuti Isaíasi woun líchuguba lan Heowá arigei lun furíei le wadügübei lun ani lóunabubei lan lau lóufudagun. Ábaya lariñagun profeta: “ani keime laganbunün, ítara luba lóunabunün”. Haritaguagüda lumutiwa dimurei buíduburiti le mámarügü lan aranseñu liña Wáguchi le siélubei lun líderaguniña ha amuriahabaña ídemuei luma, busenti ladügüni tídangiñe sun lanigi. Ma lau gabaroun wamani dimurei le ma adügati lun gayara lan wawandun lau ugundani?

6. Ida liña larufuduni dimurei le lariñagubei Isaíasi aganba lani Heowá lafurieidun kada aban hádangiñe lubúeingu?

⁶ Chóurugüda lumuti bérusu le woun ru lan Heowá arigei lun furíei le ladügübei kada aban wádangiñe. Ka uagu wariñagei le? Lidan furumiñeti fánreinti le lídanbei kapítulu 30 tidan liliburun Isaíasi, yúsuti Heowá dimurei “hun”, mini lan lira, layanuhaña lan hawagu saragu. Ánheinti lidan bérusu 19 lidan binadu abürüdǘni ebüréu, layanuhaña Heowá ñein lun kada aban hádangiñe lubúeingu. “Mayahuadigiadibu”, “gudemehabubei Wabureme bun”, “laganbubadibu”. Kei le aban lubéi úguchili ínsiñehabuti Heowá, dan le lábürühan larüna aban hádangiñe lisaanigu, mariñagunti lun: “Mosu here ban kei bíbugaña o kei bamulen”. Bereseti Heowá lau kada aban wádangiñe óunaba lumuti wafurieidun (Sal. 116:1; Isa. 57:15).

7. Ida liña larufuduni Isaíasi luma Hesusu súdini lan mararamun lan wafurieidun?

⁷ Dan le wafurieidun lun Wabungiute luagu aban katei le adiheridagüdübaliwa, furumiñe katei le ladügübei, aba líchugun erei woun lun gayaraabei lan wawanduni le gádanbaliwa. Anhein magidarun lágili lubéi óuchawaguni lau lóufudagun kei hamuga aubei wabusenra, másiñati mosu lan wamuriahan saragu wéiyaasu erei luma lun gayaraabei lan wawanduni óuchawaguni. Ligía labusenrubei lun wadügün. Ligía lariñagubei Isaíasi lidan dimurei le lariñagubei: “Mígira  huméi lun lemeraagun”, layanuhaña ya lun mígirun wamani Heowá lun lemeraagun (Isa. 62:7). Ka mini lubéi dimurei le? Mosu lan wafurieidun sun oura, lidan amu dimurei, lun mígirun wamá lun lemeraagun Heowá. Haritaguagüda lumutiwa le luagu dimurei le lariñagubei Hesusu luagu furíei le waliihabei lidan Lúkasi 11:8-10, 13. Lau layusurun saragu hénpulu, ínchaha lumutiwa lun “merede lan wafurieidun” luma lun wasigirun amuriaha luma Bungiu lun líchuguni lani sífiri sandu woun. Gayaraati giñe wamuriaha luma Heowá lun ladundehaniwa lun buidu lan le lunbei wanúadiruni.

8. Ida liña lagunfulirun dimurei le adarirubei lidan Isaíasi 30:20, 21?

⁸ (Aliiha huméi Isaíasi 30:20, 21). Geyegua hamuti lisudaranigu Babilónia Herusalén luagu aban irumu sisi-hati. Lidan dan ligía, súfuritiña huríu saragu darí lun larihíniwa hasufurirun kei aban katei kamaniti, kamá hamuga fein luma duna. Según bérusu 20 luma 21, füramaseti Heowá houn lesefurubaña lan ánhaña asaküriha ani sansi hameime ligaburi hóuserun. Ariñagati Isaíasi luagu Heowá ligía lan ‘hamaisturunbei’ lumutuniña ani füramaseti Heowá houn larufudahaba lan houn ida luba lan háhuduragun lun kei le aubei labusenra. Gúnfuliti dimurei le dan le hígirawagüdünbei huríu Babilóniagiñe. Aba larufuduni Heowá houn ligía lan hamaisturunbei. Seremei ladundehan Heowá ábaya hiñuraguni huríu áhuduraguni inarüniti. Uguñe weyu, Heowá wamaisturunbei, adügati katei le lun gúndaatima wamá.

9. Ida liña ligaburi ladundehaniwa Heowá uguñe weyu?

⁹ Aban lubuidun chansi larufudahan Heowá woun. Lidan bérusu burí le, agoubaguagüda lumutiwa Isaíasi hama fiu aturiahatiña ha únbaña larufudaha Heowá lidan bián igaburi. Furumiñe, ariñagati Isaíasi: Heowá le “Humaisturun [...] harihubei lau hagu”. Lidan afuranguagüdüni le, ráramañu liña aban máisturu hagibugiñe aturiahatiña. Ida liña larufudahan Heowá woun uguñe weyu? Arufudahati woun lau layusurunu lóundarun. Seremei wamuti saragu, luagu arufudahani furanguti le tíchugubei lóundarun woun, le wafurendeirubei lídangiñe adamuridaguni, adamurini, le wafurendeirubei giñe tídangiñe agumeiraguagüdüni, programa lani JW Broadcasting^® luma burí lídangiñe amu ligaburi larufudahan woun. Sun adundehani le íderagua lumutiwa lun wawandun lau ugundani dan le wásügürün lídangiñe lénrengunga.

10. Ida liña waganbuni lumalali Bungiu wanagangiñe?

¹⁰ Arufuda lumuti Isaíasi ka lan libiaman igaburi le ídanbei larufudahan Heowá woun lau lariñagun: “Haganbuba aban umalali hanagangiñe”. Guentó larufuduñein profeta Heowá kei  aban máisturu le ñǘdünbei hárigi hárigi aturiahatiña lun ladundehaniña lun hasubudiruni haliñounba lan houdin. Ida liña waganbuni lumalali Heowá wanagangiñe uguñe weyu? Lau waliihanu Bíbülia. Bürüwañu liña Lererun tidan lúmagiñe saragu irumu. Ligíati dan le waliihanu, ítara liña kamá hamuga waganbuñein lumalali Heowá ayanuha wanagangiñe (Isa. 51:4).

11. Ka lunbei wadügüni lun gayaraabei lan wawandun lau ugundani, ani ka uagu?

¹¹ Ka lunbei wadügüni lun wasagarun saragu buiti lídangiñe ladundehan Heowá le líchugubei woun tídangiñe lóundarun luma tídangiñe Lererun? Íridati Isaíasi bián katei. Furumiñe ariñagati “anihán ǘmabei”, an le libiaman, “ñéingiñe lan hidin” (Isa. 30:21). Ligíati úati buídurügü lan wasubudiruni “üma”, mosu giñe wéibugun luéigiñe. Seremei tun Lererun Heowá luma afuranguagüdüni le tíchugubei lóundarun, furendeitiwa luagu le lagurabubei Heowá wámagiñe, lúmati ida luba lan wawinwanduni le larufudahabei woun. Lunti wadügüni bián katei le lun gayaraabei lan wawandun lau ugundani lidan weseriwidun lun Heowá. Ítara luba wachoururuni labinirubadiwa lan.

12. Según Isaíasi 30:23-26, ida liña labiniruniña Heowá lumutuniña?

¹² (Aliiha huméi Isaíasi 30:23-26). Ida liña lagunfulirun profesía le lidan dan le sügühalibei? Resibitiña huríu ha agiribudubaña Babilóniagiñe saragu abiniruni, dandu lidan le hemegeirubei kei lidan hamadagua luma Bungiu. Ruti Heowá saragu éigini le habusenrubei houn. Gama lumoun busenti aban katei le súdinitimati. Éibume meha líñuraguña lan áhuduraguni inarüniti, éibutima larufudahan houn. Meresibirungiña lumutuniña Heowá ha awinwandubaña lidan dan ligía saragu abiniruni ítarati. Kei lariñaguni bérusu 26, ábatima laganwoundun gunfuranda hamanu huríu Lererun Bungiu (Isa. 60:2). Seremei abiniruni ligía, gúndaatiña lumutuniña ani here hagía lun hasigirun eseriwida lun. Chóuruti buidu lan hasandiragun houngua (Isa. 65:14).

13. Ida liña lagunfulirun uguñe weyu profesía luáguti lararamunya áhuduraguni inarüniti?

¹³ Gúnfuli hali san profesía luáguti lagiribudunya áhuduraguni inarüniti lidan wadaani? Anha. Lúmagiñe irumu 1919 séfuhaña míñunu gürigia tídangiñe Babilónia to wéiriboun, mini lan le sun relihión mama inarünitu to ubouaguboun. Sun hagía barǘ waña lidoun aban fulasu buítimati sügǘ luéi Fulasu Füramasewati: le ídanbei hadarira lumutuniña Bungiu úarani luma darangilaü (Isa. 51:3; 66:8). Káteiti darangilaü luma úarani le ídanbei hawinwanda lumutuniña Bungiu?

14. Katei san úarani le hádanbei lumutuniña Bungiu ani kátañati ñéinbaña uguñe weyu? (Ariha huméi abürüdǘni).

 ¹⁴ Lúmagiñe irumu 1919, gúndaatiña kristiánugu anuadirúaaña lau lídanhaña lan úarani le hádanbei lumutuniña Bungiu. b Lau lásügürün dan, sun kristiánugu ha agurabubaña lun hawinwandun ya ubouagu, ha hádangiñebaña “amu mudún”, óundaraguaaña giñe hamoun lumutuniña Bungiu ha awinwandubaña lidan darangilaü lidan aban ani resibitiña saragu abinirúni lúmagiñe Heowá (Huan 10:16; Isa. 25:6; 65:13).

15. Halíañein san darangilaü luma úarani le ídanbei hawinwanda lumutuniña Bungiu?

¹⁵ Halíañein san darangilaü luma úarani le ídanbei hawinwanda lumutuniña Bungiu uguñe weyu? Kei anihein lubúeingu Heowá awinwanda lidan sun ubóu, ligía dariwa lubéi darangilaü luma úarani le ídanbei hawinwanda lumutuniña Bungiu lidan sun ubóu. Meberesenga halía lan wawinwanda ubouagu, gayaraati lidan wamá darangilaü luma úarani le ídanbei hawinwanda lumutuniña Bungiu, yusu wamarügaali ligía sun wayaraati súnwandan lun wídehan lidan áhuduraguni inarüniti.

16. Ka lunbei wasigirun adügei lun warihini lubuidunmeraü darangilaü luma úarani le ídanbei hawinwanda lumutuniña Bungiu?

¹⁶ Aban katei le lunbei líderaguniwa lun wakipuragun woungua lidan darangilaü luma úarani le ídanbei hawinwanda lumutuniña Bungiu wasigirun lidan damuriguaü kristiánu le lídanbei sun ubóu. Ida luba wadügüni katei le? Lau wetenirun lun katei buiti le hadügübei ha ñéinbaña mama lun wetenirun lun hachara (Huan 17:20, 21). Ka uagu súdini lubéi lun wetenirun lun buiti le hadügübei? Samina wamá luagu hénpulu le. Lidan aban dabíara o fuluri-agei anihein saragu ámuñegueinarügü tídibu wewe. Ítarameme, lidan darangilaü luma úarani le ídanbei hawinwanda lumutuniña Bungiu añahein saragu gürigia lau ámuñegueinarügü igaburi ítara kei tídibu wewe dabíararugu (Isa. 44:4; 61:3). Mígira wamá lun ladügün dáseiti le tuágubei “wewe” to yarafaboun, lun marihin wamani lubuidun “dabíara”.  Mini lan le, mígira wamá lun ladügün hachara wábirigu ha lídanbaña damuriguaü lun marihin wamani lubuidunmeraü úarani le lídanbei damuriguaü kristiánu le lídanbei sun ubóu.

17. Ka gayaraabei ladügüni kada aban wádangiñe lun lederebudagüdüni úarani le lídanbei damuriguaü?

¹⁷ Ka gayaraabei ladügüni kada aban wádangiñe lun lederebudagüdüni úarani le? Láfaagun lun ñein lan darangilaü (Mat. 5:9; Rom. 12:18). Sagü wáfaagun lun wanaagun woungua buidu hama íbirigu ha lídanbaña damuriguaü, wadügüña lun buídumeraü lan laríawagun darangilaü luma úarani le ídanbei hawinwanda lumutuniña Bungiu. Gabaroun waméi Heowá lan achawahabaliña lidoun áhuduraguni inarüniti sun ha lóundaragubaña lun hawinwandun lidan darangilaü (Huan 6:44). Samina wamá luagu ugundani le lasandirubei Bungiu dan le larihini áfaaguni le wadügübei lun wederebudagüdüni darangilaü luma úarani le hádanbei lubúeingu, aban katei le gebegibei lun (Isa. 26:3; Ahe. 2:7).

18. Kaba un wetenira súnwandan dan le wararamagun asaminara ani ka uagu?

¹⁸ Ka gayaraabei wadügüni lun wasagarun saragu buiti lídangiñe abiniruni le líchugubei Heowá houn lubúeingu? Ráramagua wamá asaminara luagu le wafurendeirubei tídangiñe Lererun Bungiu luma tídangiñe wani agumeiraguagüdüni. Ánhawa aturiahoun Lererun Bungiu tuma wani agumeiraguagüdüni, ráramagua wagía asaminara luagu le waliihabei, labuiduruba wagaburi keisi kristiánugu ani línchahabadiwa lun warufudun ínsiñeni wámagua “keisi iduheñu”. Hímeigua wagíame wóuniwagua lidan damuriguaü (Rom. 12:10). Ánhawa araramagua asaminara luagu abiniruni le wámabei guentó, lederebudagüdüba wamadagua luma Heowá. Lau wararamagun asaminara luagu abiniruni le lunbei líchuguni Heowá woun ámuñegü, emenigini lun weseriwidun lun lun súnwandan lerederuba wínwanñu tidan wanigi. Ladügüba sun le lun weseriwidun lun Heowá lau saragu ugundani.

19. a) Según Isaíasi 30:18, ka katei gayaraabei wachoururuni? b) Kaba íderaguawa lun wawandun lau ugundani?

¹⁹ “Liñuraguba” Heowá lun lageindagun waweigiñe danme le lagünrinchaguni lagübüri ubóu le (Isa. 30:18). Kei aban lubéi “Bungiu richati” Heowá, chouru wamuti mígirunbei lan lun lasigirun ubóu le lábugiñe lubafu Mafia wínwanñu nírügü aban weyu luéi weyu le makü laalibei (Isa. 25:9). Dandu Heowá kei wagía wagurabahaña lau gurasu lun lachülürün weyu lun wesefurun. Sunme awanha lan agurabahei weyu ligía, aransetiwa lun gebegi lan furíei woun, waturiahanu Lererun Heowá luma lun wawinwanduni le wafurendeirubei, lúmati lun wararamagun asaminara hulili luagu abiniruni le resibi wamaalibei. Ánhawa asigira adügei sun le, líderagubadiwa Heowá lun weseriwidun lun lau awanduni luma ugundani.