1. Ka wasubudirubei wagía kristiánugu ani ka wachoururubei?

 MAWEIRIDUNTU wanigi luagu añahein lan gürigia máhatiña haganbuni uganu le wapurichihabei, chóuruti laganwoundatimaba lan katei le ámuñegü (Dan. 11:44; 2 Tim. 3:12; Aruf. 16:21). Gama lumoun, chouru wamuti líderagubadiwa lan Heowá. Ka uagu wariñagei? Lugundun súnwandan líderaguniña lubúeingu lun hagunfuliruni dasi le líchugubei houn, íbini hénrengu lan. Lun wachoururuni luagu ítara liña lan, ariha wamá fiu sügǘ le asuseredubei lidan libagari profeta Esekiéli, le apurichihabei houn huríu ha adaürǘbaña Babilónia.

2. a) Ka lariñagubei Heowá hawagu huríu ha únbaña lounahóua Esekiéli lapurichiha? (Esekiéli 2:3-6). b) Kaba wariha lidan aturiahani le?

² Ida liña meha hagaburi gürigia ha únbaña lapurichiha Esekiéli? Ariñagati Heowá hawagu huríu hagía “gürigia maganbaditiña, ha agarabaagubaña” luagu Bungiu ani “dereti giñe haganbun”. Hanarimeti meha hariban kamá hiiyu ani dencha hagía kamá águru. Ligía lariñagubei Heowá lun Esekiéli saragu wéiyaasu: “Manufudedabá hawéi” (aliiha huméi Esekiéli 2:3-6). Gúnfuliti Esekiéli lau lidasin ladüga 1) Heowá óunahabalin, 2) ruti sífiri sandu erei lun ani 3) íderagua tumuti Lererun Bungiu. Ida liña líderaguni ǘrüwa katei le Esekiéli, ani ida luba gayara lan líderaguniwa uguñe weyu?

3. Ka dimurei íchugubei gurasu lun Esekiéli ani ida liña lachoururagüdüni Heowá lun líderagubei lan?

³ Aba lariñagun Heowá lun Esekiéli: “Nóunahaadibu” (Ese. 2:3, 4). Chóuruti ru lan dimurei le dǘgüdaguaü lun Esekiéli. Chóuruti aritagua lani yusu lani Heowá dimurei ítarati dan le lanúadirunbalin Moisesi luma Isaíasi lun lánigu hamá profeta (Afu. 3:10; Isa. 6:8). Subudi lumuti meha Esekiéli luagu íderagua lániña Heowá profetagu ha lun hagunfulirun lau dasi hanarimeti lénrengun. Ligía, dan le lariñagubei Bungiu lun bián wéiyaasu: “Nóunahaadibu”, subudi lumuti líderagubei lan Bungiu. Gama lumoun, daritiwa saragu wéiyaasu tidan liliburun Esekiéli dimurei kei burí: “Ábati lariñagun Aburemei nun” (Ese. 14:2). Saragu wéiyaasu fuati dimurei: “Aba ladimurehan Aburemei nun” (Ese. 6:1). Ligíati, chouru lumuti profeta le, Heowá lan óunahabalin. Kei meha fádiri lubéi lúguchi, chóuruti arufudaha lan lúguchi lun súnwandan lan lachoururagüdüni Heowá houn lánigu profetagu líderagubaña lan. Ani ariñagati meha Heowá lun Isaakü, lun Hakobu luma lun Heremíasi: “Anahein buma” (Agu. 26:24; 28:15; Her. 1:8).

4. Ka dimurei buíduburiti íchugubei dǘgüdaguaü lun Esekiéli?

⁴ Ida liña hóunabun hiibe-agei ísüraelina lun uganu le? Aba lariñagun Heowá lun Esekiéli: “Ánhañati lumutuniña Ísüraeli, madügünbaña gasu bau, lugundun máhatiña hadügün gasu nau” (Ese. 3:7). Lau meha hamaharun lun profeta le, hamahaduña meha giñe lun Heowá. Chóuruti ru lan dimurei le darangilaü lun Esekiéli lugundun lau hamaharun gürigia lun, úati mini lan aban lan profeta wuribati ligía. Lanwoun lira, ariñagati Heowá lun, danme lan le lagunfulirun asiadirúni le lariñagubei, hasubudirubei lan huríu luagu “ñeinñein lan buga profeta haganagua” (Ese. 2:5; 33:33). Chóuruti ru lan dimurei buíduburiti le dǘgüdaguaü lun  Esekiéli ani ligiaméme lemegeirubei lun lagunfuliruni lani ministeriu.

5. Ka uagu líchiga dimurei le adarirubei lidan Isaíasi 44:8 gurasu woun?

⁵ Ruti giñe gurasu woun wasubudiruni Heowá lan óunahabaliwa apurichiha. Ruti giñe óunwenbu chansi woun lun lánigu wamá Gefentiña (Isa. 43:10). Ítara kei lariñagun Heowá lun Esekiéli, “manufudeda humá”, ariñagati giñe woun: “Gaguraasun humá”. Ka uagu moun lumuti lubéi wanufudedun hawéi wáganiñu? Ítara kei lidan likesin Esekiéli, Heowá óunahabaliwa apurichiha ani líderagubadiwa (aliiha huméi Isaíasi 44:8).

6. a) Ida liña lachoururagüdüni Heowá woun líderagubadiwa lan? b) Ka íchugubei gurasu luma dǘgüdaguaü woun?

⁶ Ariñaga lumuti Heowá woun líderagubadiwa lan. Kei hénpulu, lubaragiñe lariñagun: “Huguya nánibei gefentiña”, ariñagati: “Danme básügürün dúnarugugiñe, búmabadina, danme bánhiñuragun duna éibaaguti, mañaradagunbadibu; danme básügürün lídangiñe watu gemeti; mágudunbadibu megemebei watu buagu” (Isa. 43:2). Anihein dan, dan le wapurichihan, daritiwa lénrengunga le ítarabei kamá duna éibaaguati ani gagibuguatiwa luma óuchawaguni le ítarabei kei watu. Gama lumoun, lau lídehan Heowá, awanhagua apurichiha (Isa. 41:13). Susereti ligiaméme woun kei lasuseredun lun Esekiéli: hiibe-agei gürigia máhatiña lun uganu le wapurichihabei. Subudi wamuti hámaharunba lan woun mama ladüga aban wamá Gefentiña luagu Bungiu wuribatiña wagía. Ruti gurasu luma dǘgüdaguaü woun wasubudiruni gunda lan Heowá wau lau wasigirun apurichihei uganu lau úaraguni. Ariñagati apostolu Pábulu: “Lafayeirubei lan Bungiu kada aban según luwuyeri leseriwidun lun” (1 Ko. 3:8; 4:1, 2). Ariñagatu aban íbiri to barüharuboun saragu irumu eseriwida kei prekursora: “Gúndaatina nasubudiruni luagu gunda lan Heowá lau áfaaguni le wadügübei”.

7. Ida liña lasandiragun Esekiéli lungua sagü lasaminarun luagu arufudúni le larihibei? (Ariha huméi dibuhu le luágubei tidáü garüdia).

⁷ Ariha lumuti Esekiéli hanarime lan lubafu lani Bungiu sífiri sandu. Lidan aban arufudúni ariha lumuti ida liña lan lawadigimaridun lubafu sífiri sandu hawagu ánheligu luma luagu lanarime o lueirin tubalabala likarün Heowá to siéluna (Ese. 1:20, 21). Ligía guánarügü abahüdahabalin ida liña lan lasandiragun lungua dan le larihinbalin: “Dan le narihinbalin, aba nabuluchagun dagá nerebe múarugun”. Aba taweiridun lanigi, darí lun léiguadun múarugun (Ese. 1:28). Chóuruti, sagü lan lasaminarun luagu arufudúni ligía, ábatima lachoururuni luagu gayaraabei lan lagunfuliruni lani ministeriu lau lídehan lani Bungiu sífiri sandu.

8, 9. a) Ka gumadi líchugubei Heowá lun Esekiéli? b) Ka ámuya katei ladügübei Heowá lun lederebudagüdüni lafiñen Esekiéli?

⁸ Aba lariñagun Heowá lun Esekiéli: “Liráü wügüri, ráramaba, nadimurehan buma”. Ruti dimurei le erei lun Esekiéli, o sífiri sandu, le lemegeirubei lun gayaraabei lan liñuragun. Abürühati Esekiéli: “Aba lebelurun lubafu Aburemei nidoun, aba lararamagüdünina” (Ese. 2:1, 2). Lárigiñeti aba líchuguni “Aburemei lúhabu” luagun —mini lan, aba lan líchuguni Bungiu lani sífiri sandu— lun ladundehani (Ese. 3:22; 8:1; 33:22; 37:1; 40:1). Ru lumuti sífiri sandu le erei le lemegeirubei Esekiéli lun lun lagunfuliruni dasi lani apurichihani houn huríu ha deretiña ani maganbadi hagía ha lídanbaña fulasu le ñein lubéi (Ese. 3:7). Ariñagati Heowá lun: “Gama lumoun nedereragüdaadibu ani maganbadigüda nábume kei hagía. Nedereragüdaadibu kei déimaani, deré sügǘ lau dübü. Manufudedabá hawéi, máhüchürün buguyame luagu ligaburi  harihin buagu” (Ese. 3:8, 9). Ítara liña kamá hamuga lariñaguña Heowá lun: “Madüga lan libidioniga hau lun lábürühan barüna. Nadügüba lun here ban”.

⁹ Lúmagiñe dan ligía, aba lanügüni lani Bungiu sífiri sandu Esekiéli lidoun fulasu le ñeinba lubéi lapurichiha. Abürühati Esekiéli: “Aba nidin [...] sun aningira lan Aburemei nau ragüinalei núhabu here”. Barüti profeta le aban dimaasu afurendeirei luma lun gunfuranda lani sunsuinagubei uganu le lunbei lapurichihani lun gayaraabei lan lapurichihani lau ichouruni (Ese. 3:14, 15). Lárigiñe, aba lariñagun Heowá lun, lun lidin luagu fulasu mawübüriti, le ñeinba lubéi lebelura sífiri sandu luagu (Ese. 3:23, 24). Aranseeli meha Esekiéli lun lagumeserun apurichiha.

10. Ka ídemuei wemegeirubei lun wagunfulirun lau wani ministeriu, ani ka uagu?

¹⁰ Ka ídemuei wemegeirubei lun gayara lan wagunfulirun lau wadasin lánina apurichihani? Lun gayara lan wóunabuni álügüdahani le, samina wamá luagu Esekiéli. Lubaragiñe lagumeserun apurichiha, ruti lani Bungiu sífiri sandu erei le lemegeirubei lun. Ítara kei Esekiéli, siñabei hamuga wapurichiha sin lídehan lani Bungiu sífiri sandu. Ka uagu wariñagei le? Lugundun lageindaguña Mafia wama lun gayaraabei lan lararamuni apurichihani (Aruf. 12:17). Saminatiña saragu gürigia, weiri lan lubafu Satanási, ligía siñabei lubéi hamuga wagañeiruni. Gama lumoun, wagañeiruñein lau wapurichiha (Aruf. 12:9-11). Dan le wapurichihan, arufuda wamuti luagu manufude wamá luéi lasiadihan Satanási. Sagü wapurichiha wagañeiruñein Satanási. Lau wapurichihaña lan laganagua éibaahouni arufudati lira líchuguña lan lani Bungiu sífiri sandu erei woun ani gunda lan Heowá wau (Mat. 5:10-12; 1 Fe. 4:14).

11. Ida liña líderaguniwa sífiri sandu ani ka lunbei wadügüni lun gayaraabei lan wasigirun eresibirei?

¹¹ Lau sun adüga lan Heowá lun ledererun ligibu Esekiéli chóurugüdati ámuya katei woun, gayara lan líderaguniwa: lani Bungiu sífiri sandu agagibudagua luma furumiñeguarügü lénrengunga le úmabei gayara lan wagagibudagun  lidan wani ministeriu (2 Ko. 4:7-9). Ligíati, ka lunbei wadügüni lun gayara lan wasigirun eresibirei lani Bungiu sífiri sandu? Wamuriahani lidan furíei súnwandan, lau wachoururuni laganbubadiwa lan Heowá. Ariñagati Hesukrístu houn lánigu disipulugu: “hamuriahan”, “háluaha” ani “hadaünha”. Kaba lóunabagüle Heowá? “Líchugubei húguchi Bungiu sífiri sandu houn ha amuriahabalin” (Luk. 11:9, 13; Adü. 1:14; 2:4).

12. Según Esekiéli 2:9–3:3, halíagiñe tiabin hóuburatu ani ka uganu tídanbei?

¹² Amu luéi leresibiruni Esekiéli lani Bungiu sífiri sandu, derebugüda tumuti Lererun Bungiu lafiñen. Lidan aban arufudúni, arihati aban úhabu le anügübarun aban hóuburatu (aliiha huméi Esekiéli 2:9–3:3). Halíagiñe san tiabin hóuburatu tuguya? Ka uganu tídanbei? Ida liña tíderaguni Esekiéli? Lúmagiñe Heowá tiabin hóuburatu tuguya. Chóuruti aban lan hádangiñe gádürü ánheligu ha larihubaña Esekiéli ederegerubarun hóuburatu tuguya lun (Ese. 1:8; 10:7, 20). Lererun Bungiu tídanbei hóuburatu tuguya: lanarime uganu lánina asiadirúni le lunbei líchuguni Esekiéli houn gürigia maganbaditiña ha adaürǘbaña Babilónia (Ese. 2:7). Bürüwañu liña uganu le dandu tigibugiñe kei tanagangiñe hóuburatu tuguya.

13. Ka lariñagubei Heowá lun Esekiéli lun ladügün tau hóuburatu ani ka uagu bime tubéi?

¹³ Aba lariñagun Heowá lun lani profeta: “huluboun líburu to buíngüdabei buragei tau”. Gaganbaditi Esekiéli aba láhuluchunu dayarügubei. Ka mini le lubéi fánreinti le lidan arufudúni le? Mosu meha gunfuranda lani Esekiéli uganu le meha lunbei lapurichihani sunsuinagubei. Mosu meha lafiñerun luagu uganu ligía; lun gayaraabei lan línchahani lun lapurichiha. Ábati lasuseredun aban katei magurabunti. Aba líchugun Esekiéli fe “bímetu lan hóuburatu kamá sírudu” (Ese. 3:3). Ka uagu? Ladüga aban lan lubuidun chansi lun layanuhan luagu Heowá ítara liña katei le lun kamá aban katei le bímeti (Sal. 19:8-11). Wéiriti meha leteingiradi ladüga lanúadiruni Heowá lun aban lan profeta.

14. Ka íderagubalin Esekiéli lun lagunfulirun lau lidasin lánina apurichihani?

¹⁴ Dan lárigiñe, aba lariñagun Heowá lun Esekiéli: “Tenibá lun baganbuni le lunbei nariñaguni bun buidu, dabei bichügüwagu” (Ese. 3:10). Lariñaguña meha Heowá lun, lun láfaagun lun laritaguni dimurei le tídanbei hóuburatu luma lun lasaminarun luagu. Ladügüba meha lira lun derebugu lan lafiñen Esekiéli luma lun furangu lan lubafu uganu le lunbei lanügüni houn gürigia (Ese. 3:11). Dan le gunfuranda lubalin Esekiéli ani afiñen ligía sunsuinagubei luagu luganute Bungiu aranseñu liña meha lun lagunfulirun lau lidasin lánina apurichihani (ariha huméi giñe Sálumu 19:14).

15. Lun gayara lan wawandun ka wemegeirubei?

¹⁵ Lun gayara lan mígirun wamani wani ministeriu, lunti giñe wasigirun aliihoun luma aturiahoun Lererun Bungiu. Lunti wánharun tídangiñe sun wanigi lun sun le lariñagubei Heowá woun. Uguñe weyu ayanuhati Heowá wama tídangiñe Bíbülia, to Lererun. Ka gayaraabei wadügüni lun wachoururuni sigí tan Lererun Bungiu lidan wasaminan, lidan ligaburi wasandiragun woungua luma lidan le wadügübei?

16. Ka lunbei wadügüni tau Lererun Bungiu ani ida luba wibihini?

¹⁶ Ítara kei ladügün éigini lun buidu lan wátuadi, buidu ligía larihin wágubu luma lun here wamá, adügati giñe waturiahanu Lererun Bungiu luma wararamagun asaminara luagu le waliihabei lun derebugu lan wafiñen. Anihán le labusenrubei Heowá larufudahan woun lau arufudúni tánina hóuburatu. Busenti lun “wabuinchagüdüni  waragei” tau Lererun luma lun gunfuranda wamani luganute. Ibiha wamuti sun katei le dan le wafurieidun, dan le waliihan luma dan le wararamagun asaminara luagu le waliihabei. Furumiñe, furíeitiwa lun gayaraabei lan waranserunu wanigi lun weresibiruni lisaminan Bungiu. Lárigiñe aban waliihan murusun fánreinti tídangiñe Bíbülia lárigiñe aba wararamagun asaminara luagu le aliiha wamaalibei. Kaba buiti wibiha? Éibutima wararamagun asaminara luagu le waliihabei, gunfurandatima wabéi uganu le tídanbei Lererun Bungiu.

17. Ka uagu súdini lubéi lun wararamagun asaminara luagu le waliihabei tidan Bíbülia?

¹⁷ Ka uagu súdini lubéi lun waliihanu Bíbülia luma lun wararamagun asaminara luagu le waliihabei tidan? Ladüga dan le wadügüni líchuguba erei woun lun wapurichihani uganu guentó luagu Larúeihan Bungiu ani yarafa madise lun wapurichihani uganu lánina asiadirúni. Lanwoun lira, dan le wañuurun asaminara luagu lubuidun luganute Heowá, ábatima lederebudagüdün wamadagua luma. Lau wadügüni lira, wibihiba aban katei bímeti ani semeeti: darangilaü luma aban saminaü darangilati (Sal. 119:103).

18. Ka lunbei hasubudiruni gürigia ha lídanbaña fulasu le ñein lubéi wapurichiha ani ka uagu?

¹⁸ Íbini mama wamá profeta kei Esekiéli, anihein uganu lúmagiñeti Heowá wama le tídanbei Lererun. Aranseñu waña lun wasigirun apurichihei darí lariñagun Heowá dagá ya lébeda. Danme le lachülürün dan lun ladügüni Heowá le aubei lasiadihan, mariñagunbaña gürigia mawisarun hamá ani masaminarun lan Bungiu hawagu (Ese. 3:19; 18:23). Mósume hasubudiruni uganu lan le buga wapurichihabei lúmagiñe lan Bungiu liabin.

19. Halíagiñe san wasagara erei lun gayara lan wagunfulirun lau wani ministeriu?

¹⁹ Halíagiñeba san wasagara erei lun gayaraabei lan lagunfulirun dasi lánina apurichihani? Anihein ǘrüwa katei le íchugubei erei lun Esekiéli wama: ñǘdüntiwa apurichiha ladüga subudi wamuti Heowá lan óunahabaliwa, ruti giñe sífiri sandu erei woun ani aturiaha wamutu Lererun Bungiu. Lau lídehan Heowá aranseñu waña wagunfulirun lau wadasin lánina apurichihani luma lun wawandun “darí lumoun lagumuhóun” (Mat. 24:13).